BIBLIA va̱ása káʼa̱nña ndáa yo̱o̱ ka̱ku ta̱ Jesús. Soo káʼa̱nvaña xíʼinyó ndáa xa̱ʼa kúú ña̱ va̱ása níkakura yo̱o̱ diciembre.

Ñuu Belén, nu̱ú ka̱ku ta̱ Jesús, ¿nda̱saa ni̱xi̱yo tiempo diciembre? Ña̱ calendario na̱ judío kúúmiíña iin yo̱o̱ naní kislev, ta yo̱o̱ yóʼo ndákavaña ma̱ʼñú yo̱o̱ noviembre xíʼin yo̱o̱ diciembre, ta vi̱xinní saá ta kóon sa̱vi̱. Tándi̱ʼi va̱xi yo̱o̱ tebet, yo̱o̱ yóʼo ndákavaña ma̱ʼñú yo̱o̱ diciembre xíʼin yo̱o̱ enero, ta ndeéka vi̱xin saá, sava nda̱a̱ kóon nieve xi̱ní yuku̱. Ná kotoyó ndáaña káʼa̱n Biblia xa̱ʼa yo̱o̱ yóʼo á vi̱xin ni̱xi̱yo saá.

Ta̱ Esdras, iin ta̱ ka̱ʼyí Biblia, ni̱ka̱ʼa̱nra xa̱ʼa yo̱o̱ kislev ña̱ kóonní sa̱vi̱ ta vi̱xinní yo̱o̱ saá. Káʼa̱nra xa̱ʼa yo̱o̱ tí naní kislev, tá ndíka̱a̱rí 20, saá nda̱taka ku̱a̱ʼání na̱ yiví ñuu Jerusalén veʼe Ndióxi̱, ta vi̱xinní chi tiempo saá kóon sa̱vi̱. Ta káchira ña̱ ni̱ka̱ʼa̱n na̱ yiví na̱ nda̱taka kán: ‘Tiempo kóon sa̱vi̱ kúúña, xíniñúʼu ndi̱ʼviyó chí veʼe chi vi̱xinní’ (Esdras 10:9, 13; Jeremías 36:22). Ña̱yóʼo táxi nu̱úyó tá kúma̱níka kixa̱a̱  yo̱o̱ diciembre, na̱ pastor na̱ xi̱ñuʼu xíʼin kití sa̱na̱na chí yuku̱ xíniñúʼu taánnarí veʼe, chi kǒo kívika kuñuʼuna xíʼinrí yuku̱ saáchi tiempo saá kóon sa̱vi̱ ta vi̱xinní.

Soo Biblia káʼa̱nña, ñu̱ú tá ka̱ku ta̱ Jesús, na̱ pastor ñúʼuna ndáana kití sa̱na̱na yuku̱ ñu̱ú saá. Ta̱ Lucas iin ta̱ ka̱ʼyí libro nu̱ú Biblia, ni̱ka̱ʼa̱nra xa̱ʼa na̱ pastor na̱ xi̱ndoo yatin ñuu Belén, na̱yóʼo kǒo veʼe níxindoona chi yuku̱va xi̱ndoona tá xi̱ndaana kití sa̱na̱na (Lucas 2:8-12). Xi̱niyó vitin, kǒo níxika kuitína xíʼin kití sa̱na̱na yuku̱, chi míí yuku̱ xi̱ndoona xíʼinvarí. Tá yo̱o̱ diciembre xi̱koon sa̱vi̱ ta vi̱xinní ni̱xi̱yo ñuu Belén, ¿á va̱ʼa kuñuʼu na̱ pastor xíʼin kití sa̱na̱na yuku̱ saá? Kǒo kívi kuñuʼuna xíʼinrí. Xa̱ʼa ña̱yóʼo kúnda̱a̱-iniyó, su̱ví yo̱o̱ diciembre níkaku ta̱ Jesús chi kǒoka na̱ pastor níxindoo xíʼin kití sa̱na̱na yuku̱ saá. *

Biblia káxiní káʼa̱nña ama ni̱xi̱ʼi̱ ta̱ Jesús, soo loʼova káʼa̱nña xa̱ʼa ña̱ ka̱kura. Ña̱yóʼo sándakaʼánña miíyó xa̱ʼa ña̱ ni̱ka̱ʼa̱n ta̱ rey Salomón: “Va̱ʼaka ná ka̱ʼa̱n va̱ʼana xa̱ʼayó su̱víka xa̱ʼa perfume tá támi xáʼa̱n, va̱ʼaka ki̱vi̱ xíʼi̱yó su̱víka ki̱vi̱ kákuyó” (Eclesiastés 7:1). Xa̱ʼa ña̱yóʼo, Biblia káʼa̱nkaña xa̱ʼa ndiʼi ña̱ ke̱ʼé ta̱ Jesús xíʼin xa̱ʼa ña̱ ni̱xi̱ʼi̱ra, soo loʼova káʼa̱nña xa̱ʼa ki̱vi̱ ka̱kura.