TÁ XÍNISO̱ʼÚN káʼa̱nna xa̱ʼa níma̱, ¿ndáaña ndákanixi̱níún? Ku̱a̱ʼání na̱ yiví ndákanixi̱nína xa̱ʼaña ña̱ kúúña iin ña̱ ndíka̱a̱ iniyó, ta kǒo kívi kuniyóña ta ni kǒo kívi kuviña. Ta káchina tá xíʼi̱yó ndóo níma̱yó ta iníí xíkaña. Ku̱a̱ʼání na̱ yiví kándíxa ña̱yóʼo, soo tá sákuaʼana ña̱ káʼa̱n Biblia ndákanda̱a̱-inina chi síínva káʼa̱n ña̱yóʼo. Na̱ káʼa̱n tu̱ʼun  sáʼan savana káʼa̱nna alma á espíritu xíʼin níma̱ yóʼo. Soo ¿ndáaña kúni̱ kachi tu̱ʼun alma xíʼin espíritu káchi Biblia?

Siʼna tu̱ʼun alma ka̱ʼa̱nyó xa̱ʼa. Táki̱ʼva sa̱kuaʼayó, ña̱ Biblia xíʼin tu̱ʼun hebreo xíʼin griego ka̱ʼyínaña. Ña̱ ka̱ʼa̱nna xa̱ʼa tu̱ʼun alma na̱ ka̱ʼyí Biblia original ka̱ʼyína néfesch ña̱ tu̱ʼun hebreo ta tu̱ʼun griego ka̱ʼyína psykjé. Ta u̱vi̱ saá ña̱yóʼo yáʼaka u̱na̱ ciento yichi̱ va̱xiña nu̱ú Biblia original ta nu̱ú Biblia ña̱ Traducción del Nuevo Mundo sa̱yáʼanaña “alma”. ¿Ndáaña kúni̱ kachi tu̱ʼun “alma” ña̱ va̱xi nu̱ú Biblia? Ña̱yóʼo káʼa̱nña xa̱ʼa 1) na̱ yiví, 2) kití 3) ña̱ tákuyó xíʼin ña̱ táku tí kití. Ná kaʼviyó sava texto ña̱ káʼa̱n xa̱ʼa u̱ni̱ saá ña̱yóʼo.

Na̱ yiví. “Tá tiempo ta̱ Noé, [...] loʼova kúú na̱ ni̱ka̱ku, u̱na̱ na̱ yiví [alma] kúúna, na̱yóʼo kúú na̱ ni̱ka̱ku tá ko̱on sa̱vi̱ kini.” (1 Pedro 3:20.) Tu̱ʼun “alma” ña̱ va̱xi yóʼo xa̱ʼa na̱ yiví káʼa̱nña: xa̱ʼa ta̱ Noé, xa̱ʼa ñá síʼíra, xa̱ʼa se̱ʼera xíʼin xa̱ʼa xa̱nura. Nu̱ú Éxodo 16:16 ña̱yóʼo kúú ña̱ ni̱ka̱ʼa̱nna xíʼin na̱ ñuu Israel: “Ndakayandó [maná] [...] nda̱saa na̱ yiví [alma] kúúndó xíʼin na̱ veʼendó, saá koo ña̱ ndakayandó”. Ña̱yóʼo kúni̱ kachiña, tá ku̱a̱ʼá kúúna xíʼin na̱ veʼena, ku̱a̱ʼá ña̱ ndakayavana. Tu̱ʼun “alma” sava yichi̱ xa̱ʼa na̱ yiví káʼa̱nña, tá káchi tutu Génesis 46:18, Josué 11:11, Hechos 27:37 xíʼin Romanos 13:1.

Kití. Nu̱ú Biblia nu̱ú nátúʼunña xa̱ʼa ña̱ʼa ña̱ i̱xava̱ʼa Ndióxi̱ káchiña: “Ndióxi̱ ni̱ka̱ʼa̱nra: ‘Ná ndakutú ini ti̱ku̱i̱í xíʼin ndiʼi nu̱ú kití [alma], ta saátu ná koo kití ndachí nu̱ú ñuʼú’. Ndióxi̱ ni̱ka̱ʼa̱nra: ‘Ná koo ndiʼi nu̱ú kití [alma] nu̱ú ñuʼú yóʼo, kití tí íyo veʼe xíʼin kití tí íyo yukú’. Míí ña̱ ni̱ka̱ʼa̱nra saá ku̱u” (Génesis 1:20, 24). Tí ti̱a̱ká, kití tí íyo veʼe xíʼin tí íyo yukú, ndiʼi tíyóʼo “alma” kúúrí. Ndiʼi kití alma káʼa̱nna xíʼinrí nu̱ú tutu Génesis 9:10, Levítico 11:46 xíʼin Números 31:28.

Ña̱ táku na̱ yiví. Sava yichi̱ tu̱ʼun “alma” xa̱ʼa ña̱ táku na̱ yiví káʼa̱nña. Jehová ni̱ka̱ʼa̱nra xíʼin ta̱ Moisés: “Xa̱a̱ ni̱xi̱ʼi̱  ndiʼi na̱ yiví na̱ kúni̱ kaʼní [alma] yóʼó” (Éxodo 4:19). ¿Ndáaña kúni̱ káchi texto yóʼo? Ña̱ kúni̱na kaʼnína ta̱ Moisés. Saátu káchiña xa̱ʼa ñá Raquel tá ka̱ku ta̱ loʼo se̱ʼeñá ta̱ Benjamín ʻki̱ta almañá (saáchi ni̱xi̱ʼi̱vañá)ʼ (Génesis 35:16-19). Ná kotoyó ña̱ ni̱ka̱ʼa̱n ta̱ Jesús: “Yi̱ʼi̱ kúi̱ iin ta̱ pastor ta̱ va̱ʼa, ta̱ pastor ta̱ va̱ʼa táxira miíra [alma] ña̱ kuvira xa̱ʼa tí ndikachi sa̱na̱ra” (Juan 10:11). Ta̱ Jesús sa̱kákura miíyó tá ni̱xi̱ʼi̱ra xa̱ʼayó. Ndiʼi texto ña̱ ka̱ʼviyó yóʼo káʼa̱nña xa̱ʼa ña̱ táku na̱ yiví. Saá káchika sava texto ña̱ va̱xi nu̱ú 1 Reyes 17:17-23, Mateo 10:39, Juan 15:13 xíʼin Hechos 20:10.

Tá ná kaʼvikaún Biblia saá kuniún ni iin táʼví nu̱ú Biblia va̱ása káʼa̱nña tá xíʼi̱yó kíndo̱o níma̱yó. Ña̱ Biblia káxiva káʼa̱nña tá xíʼi̱yó ndíʼi-xa̱ʼayó káchiña (Ezequiel 18:4, 20). Ña̱ Biblia káchiña na̱ ni̱xi̱ʼi̱ kúúna “alma muerta” (Levítico 21:11).

Ná kotoyó vitin ndáaña kúni̱ kachi tu̱ʼun “espíritu” ña̱ va̱xi nu̱ú Biblia. Savana káchina ña̱yóʼo kúú níma̱yó ña̱ kíta tá xíʼi̱yó. Ta su̱ví saá káchi Biblia.

Na̱ ka̱ʼyí Biblia xi̱niñúʼuna tu̱ʼun hebreo rúaj xíʼin tu̱ʼun griego pnéuma ña̱ káʼa̱nna xa̱ʼa “espíritu”. Ña̱ Biblia káʼa̱nña ndáaña kúni̱ kachi tu̱ʼun yóʼo. Ná kotoyó tutu Salmo 104:29 yóʼo káʼa̱nña xa̱ʼa Jehová: “Tá ná ndakiʼún espírituna [rúaj], kuvivana, ta ñuʼúva nduuna”. Tutu Santiago 2:26 káchiña ʻiin na̱ yiví tá kǒo kúúmiína espíritu [pnéuma] na̱ ndi̱i á na̱ xa̱a̱ ni̱xi̱ʼi̱va kúúnaʼ. Nu̱ú versículo yóʼo kúnda̱a̱-iniyó “espíritu” káʼa̱nña xa̱ʼa iin ña̱ʼa ña̱ táxi tákuyó, tá kǒo ña̱yóʼo kúúmiíyó kuvivayó. Tá sa̱yáʼana, tu̱ʼun rúaj á “espíritu” nu̱ú Biblia, kúni̱ kachituña ña̱ táxi ndée ndaʼa̱yó. Ná kotoyó ña̱ ni̱ka̱ʼa̱n Ndióxi̱ tá sa̱ko̱onra sa̱vi̱ kini tá tiempo ta̱ Noé: ʻSákoi̱n sa̱vi̱ kini nu̱ú ñuʼú tasaá ndiʼi-xa̱ʼa ndiʼi ña̱ʼa ña̱ íyo nu̱úña, ndiʼi ña̱ʼa ña̱ ndákiʼin ta̱chí [rúaj] ndiʼi-xa̱ʼañaʼ (Génesis 6:17; 7:15, 22). Kúnda̱a̱-iniyó vitin, ña̱ “espíritu” káʼa̱nña xa̱ʼa iin ña̱ táxi ndée ndaʼa̱yó na̱ yiví xíʼin kití.

 Na̱ yiví xíniñúʼuna ña̱ espíritu ña̱ va̱ʼa kutakuna nda̱a̱ táki̱ʼva íyo iin radio xíniñúʼunú luz. Tú radio tá táanyó pila ininú, ña̱ pila yóʼo kúúmiíña ndée ta va̱ʼa xítanú xíʼinña. Tá kǒo pila ñúʼu ininú va̱ása katanú. Saá íyotu tú radio tú tíin luz tá kǒo luz va̱ása kivi katanú. Saá íyo ña̱ espíritu: ña̱yóʼo táxiña ndée nda̱ʼayó ña̱ va̱ʼa kutakuyó. Ña̱ pila á luz va̱ása kúnda̱a̱-iniña ni va̱ása ndákanixi̱níña, táki̱ʼva saá íyo espíritu su̱ví ña̱ táku kúúña. Tá kǒoka ña̱ espíritu kúúmiíyó á ndée ña̱ táxi tákuyó, ndóʼoyó ña̱ káchi tutu Salmo: “Xíʼi̱vayó, ta ndúuyó ñuʼú”.

Eclesiastés 12:7 káchiña, tá xíʼi̱ na̱ yiví, ʻndíkóna nu̱ú ñuʼú táki̱ʼva ni̱xi̱yona tá ya̱chi̱, ta ña̱ espíritu ndíkóña nu̱ú Ndióxi̱ chi ta̱yóʼo kúú ta̱ ta̱xiñaʼ. Tá xíʼi̱ iinna ndúuna ñuʼúva ta ña̱ espíritu á ña̱ táxi ndée tákuna kítaña ku̱ñuna ta ndíkóña nu̱ú Ndióxi̱ (Job 34:14, 15; Salmo 36:9). Soo ña̱yóʼo va̱ása kúni̱ kachiña ña̱ espíritu á ndée yóʼo ndíkó nda̱kúña chí ndiví. Ña̱ kúni̱ kachiña kúúña tá xíʼi̱yó, Jehová kúú ta̱ xíni̱ á ndatakuyó á va̱ása ndatakuyó chí nu̱únínu. Ndaʼa̱ ta̱yóʼo kíndo̱oyó ta miíkara xíni̱ xíʼinyó. Iinlá ta̱yóʼo kúú ta̱ kivi taxi tuku espíritu ndaʼa̱yó ña̱ kivi ndatakuyó.

Kúsi̱íkaví-iniyó ña̱ kúnda̱a̱-iniyó ña̱ sandátaku Ndióxi̱ na̱ yiví “na̱ ni̱xi̱ʼi̱” (Juan 5:28, 29). Tá ná kixa̱a̱ ki̱vi̱ ndatakuna, Jehová ndasaxa̱ára ku̱ñuna ta taxi tukura espíritu á ndée ña̱ taxi kutaku tukuna.

Tá kúni̱ún kunda̱a̱ka-iniún xa̱ʼa “alma” xíʼin “espíritu”, kivitu ndani̱ʼúnña nu̱ú folleto ¿Qué nos sucede cuando morimos? Va̱xituña nu̱ú libro Razonamiento a partir de las Escrituras, ña̱ página 32 nda̱a̱ página 36 xíʼin página 136 nda̱a̱ página 140 u̱vi̱ saá tutu yóʼo, na̱ testigo Jehová ta̱váña.