1. ¿Ndáa míí va̱ʼa kunda̱a̱-iniyó xa̱ʼa ña̱ koo chí nu̱únínu?

TÁ XÍTOÚN noticia nu̱ú tele, ¿á xa̱a̱ ndáka̱tu̱ʼún miíún ama ndiʼi-xa̱ʼa tu̱ndóʼo ñuyǐví yóʼo? Tiempo vitin ku̱a̱ʼání tu̱ndóʼo íyo ni iin na̱ yiví kǒo kúnda̱a̱-ini ndáaña kuu ki̱vi̱ ta̱an (Santiago 4:14). Soo Jehová kúnda̱a̱va-inira (Isaías 46:10). Tiempo xi̱naʼáví ni̱ka̱ʼa̱n tu̱ʼunra ña̱ Biblia xa̱ʼa ndiʼi tu̱ndóʼo ña̱ xítoyó vitin xíʼin xa̱ʼa ña̱ koo chí nu̱únínu.

2, 3. ¿Ndáaña ni̱nda̱ka̱tu̱ʼun na̱ discípulo ta̱ Jesús, ta ndáaña ni̱ka̱ʼa̱nra xíʼinna?

² Ta̱ Jesús ni̱ka̱ʼa̱nra xa̱ʼa ña̱ Reino Ndióxi̱, chi ña̱yóʼo sandiʼi-xa̱ʼa ndiʼi tu̱ndóʼo ta ndasaliviña iníísaá nu̱ú ñuʼú (Lucas 4:43). Na̱ yiví xi̱kuni̱na kunda̱a̱-inina ama kixa̱a̱ Reino Ndióxi̱. Na̱ discípulo ni̱nda̱ka̱tu̱ʼunnara: “¿Ndáa seña kúú ña̱ kunindi̱ ña̱ va̱ʼa kunda̱a̱-inindi̱ ña̱ koún xíʼinndi̱ ta saátu ña̱ va̱ʼa kunda̱a̱-inindi̱ ña̱ ndiʼi-xa̱ʼa ñuyǐví yóʼo?” (Mateo 24:3). Ta̱yóʼo ni̱ka̱ʼa̱nra iinlá ta̱ kúnda̱a̱-ini ama ndiʼi-xa̱ʼa ñuyǐví kúú Jehová (Mateo 24:36). Soo ni̱ka̱ʼa̱nvara xa̱ʼa ña̱ʼa ña̱ kuniyó tá xa̱a̱  ku̱nu̱mí kixaʼára kaʼndachíñura. Ta ña̱ ni̱ka̱ʼa̱nra kuniyó tiempo vitin xa̱a̱ xínu nu̱úña.

³ Siʼnaka ná ka̱ʼa̱nyó xa̱ʼa iin guerra ña̱ kǒo níxini ni iin na̱ yiví, saáví ka̱ʼa̱nyó xa̱ʼa prueba ña̱ náʼa̱ nu̱úyó ña̱ ndixa ndóoyó ki̱vi̱ nu̱ú ndíʼi. Guerra yóʼo ni̱xi̱yoña chí ndiví nu̱ú ndóo na̱ ángel. Ta xa̱ʼa ña̱yóʼo ndiʼiyó íyo tu̱ndóʼo nu̱ú.

4, 5. a) ¿Ndáaña ku̱u chí ndiví tá ki̱xaʼá ta̱ Jesús xáʼndachíñura? b) ¿Ndáaña kuu tá ná koo guerra chí ndiví káchi Revelación 12:12?

⁴ Nu̱ú capítulo ni̱ya̱ʼa sa̱kuaʼayó xa̱ʼa ta̱ Jesús ña̱ ki̱xaʼára xáʼndachíñura ku̱i̱ya̱ 1914 (kaʼvi Daniel 7:13, 14). Tá ki̱xaʼára xáʼndachíñura Biblia káʼa̱nña xa̱ʼa ña̱ ke̱ʼéra: “Ni̱xi̱yo guerra chí ndiví: ta̱ Miguel [inka ki̱vi̱ ta̱ Jesús] xíʼin na̱ ángel ka̱ni táʼanna xíʼin tí ko̱o̱ káʼnu [ta̱ Ndi̱va̱ʼa] xíʼin na̱ ángel tíyóʼo”. * Ta̱ Ndi̱va̱ʼa xíʼin na̱ ítáʼan xíʼinra, kǒo níkuchiñuna ta chi̱ndaʼánana va̱xina nu̱ú ñuʼú yóʼo. Na̱ ángel Jehová ni̱kusi̱íní-inina ña̱ va̱ása kooka ta̱ Ndi̱va̱ʼa xíʼin na̱ ítáʼan xíʼinra chí ndiví. Soo na̱ ndóo nu̱ú ñuʼú yóʼo va̱ása kusi̱í-inina. Biblia káchiña: “Ay ndáʼviní na̱ ndóo nu̱ú ñuʼú, saáchi ta̱ Ndi̱va̱ʼa ku̱a̱ʼa̱nra nu̱ú ñuʼú, ta sáa̱níra, chi kúnda̱a̱-inira loʼo kuití tiempo kíndo̱o nu̱úra” (Revelación 12:7, 9, 12).

⁵ Koto ña̱ kuu tá ná koo guerra chí ndiví: ta̱ Ndi̱va̱ʼa sa̱a̱níra ta sakakuníra tu̱ndóʼo nu̱ú ñuʼú yóʼo. Yóʼo sakuaʼayó, vitin kúú ña̱ ndóoyó tiempo yo̱ʼvi̱ní. Soo loʼova tiempo koo tu̱ndóʼo nu̱úyó, ta nda̱a̱ ta̱ Ndi̱va̱ʼa xíni̱ ña̱yóʼo, ña̱ Biblia káʼa̱nña ndóoyó ki̱vi̱ nu̱ú ndíʼi  (2 Timoteo 3:1). Kúsi̱íní-iniyó ña̱ xa̱a̱ ku̱nu̱mí sandiʼi-xa̱ʼa Ndióxi̱ ndiʼi ña̱ ndi̱va̱ʼa ña̱ íyo nu̱ú ñuʼú yóʼo. Ná kotoyó ña̱ ni̱ka̱ʼa̱n Biblia koo, ta xa̱a̱ kúuña tiempo vitin. Ña̱yóʼo náʼa̱ña nu̱úyó ña̱ ndixa kúú ña̱ ndóoyó ki̱vi̱ nu̱ú ndíʼi, ta xa̱a̱ ku̱nu̱mí kaʼndachíñu Reino Ndióxi̱ ta ndiʼi na̱ kéʼé ña̱ kúni̱ Jehová ku̱a̱ʼání bendición ndakiʼinna. Soo yóʼo sakuaʼayó xa̱ʼa ku̱mí ña̱ʼa ña̱ ni̱ka̱ʼa̱n ta̱ Jesús koo.

6, 7. ¿Nda̱saa ku̱a̱ʼa̱n xínu nu̱ú ña̱ ni̱ka̱ʼa̱n ta̱ Jesús xa̱ʼa guerra xíʼin so̱ko?

⁶ “Ndakuita iin ñuu kaʼní táʼanña xíʼin inka ñuu, ta na̱ chíñu kani táʼanna xíʼin inka na̱ chíñu.” (Mateo 24:7.) Ti̱xin ña̱ iin ciento ku̱i̱ya̱ ndóoyó tiempo vitin millón na̱ yiví ni̱xi̱ʼi̱ xíʼin guerra. Iin ta̱ nándukú xa̱ʼa historia ni̱ka̱ʼa̱n: “Ña̱ ku̱i̱ya̱ 1901 nda̱a̱ 2000 ku̱a̱ʼání na̱ yiví ni̱xi̱ʼi̱, chi ku̱a̱ʼání guerra ni̱xi̱yo, loʼova tiempo táxin loʼo ni̱xi̱yo”. Na̱ nándukú xa̱ʼa ña̱ kúu iníísaá ñuyǐví ni̱ka̱ʼa̱n: “Ndiʼi guerra ña̱ ni̱xi̱yo tá tiempo ña̱ ki̱xi ta̱ Jesús nda̱a̱ 1899 kǒo kítáʼan na̱ yiví na̱ ni̱xi̱ʼi̱ saá xíʼin na̱  ni̱xi̱ʼi̱ guerra ña̱ ni̱xi̱yo ku̱i̱ya̱ 1901 nda̱a̱ ku̱i̱ya̱ 2000 chi u̱ni̱ka yichi̱ ndu̱ku̱a̱ʼá na̱ ni̱xi̱ʼi̱ ti̱xin ña̱ tiempo yóʼo”. Yáʼa cien millón na̱ yiví ni̱xi̱ʼi̱ xíʼin guerra nani tá ki̱xaʼá ku̱i̱ya̱ 1914. Xa̱ʼa guerra yóʼo ku̱a̱ʼání na̱ yiví ni̱xi̱ʼi̱ táʼan. Á sana nda̱a̱ miívaún ni̱xi̱ʼi̱ táʼan.

⁷ “Koo so̱ko.” (Mateo 24:7.) Na̱ científico káchina xa̱a̱ ku̱a̱ʼa̱n 30 ku̱i̱ya̱ ña̱ íyoní ña̱ xíxiyó. Soo ni saáví íyokava so̱ko, chi ku̱a̱ʼání na̱ yiví kǒo ñuʼúna ña̱ chiʼina ta ni xu̱ʼúnna kǒo ña̱ satána ña̱ʼa kuxuna. Ñuu nu̱ú ndáʼviní ndóʼona, ku̱a̱ʼání na̱ yiví kǒo mií xu̱ʼúnna, savana iin dolar kuití níʼina ña̱ kuniñúʼuna iin ki̱vi̱ á savana nda̱a̱ ni iin dolar kǒo ndaʼa̱na. Ku̱a̱ʼánína kǒo ña̱ kuxuna. Ña̱ Organización Mundial de la Salud káchiña, yáʼa u̱ʼu̱n millón na̱ va̱lí xíʼi̱ nu̱ú ku̱i̱ya̱ xa̱ʼa ña̱ va̱ása xíxi va̱ʼana.

8, 9. ¿Nda̱saa ku̱a̱ʼa̱n xínu nu̱ú ña̱ ni̱ka̱ʼa̱n ta̱ Jesús xa̱ʼa ña̱ ta̱an xíʼin ña̱ koo kue̱ʼe̱?

⁸ “Ndeéní ta̱an.” (Lucas 21:11.) Iin grupo na̱ científico na̱ Estados Unidos káchina, nani tá ki̱xaʼá ku̱i̱ya̱ 1990 ki̱ʼva 19 terremoto xíyo ku̱i̱ya̱ tá ku̱i̱ya̱ ta ndeéva xíyoña chi nda̱a̱ ndátaña ve̱ʼe ta  ndátaña ñuʼú. Ta ndiʼi ku̱i̱ya̱ xíyo terremoto ña̱ sándiʼi-xa̱ʼa veʼe. Na̱ nándukú xa̱ʼa ña̱yóʼo káchina ña̱ terremoto ku̱a̱ʼání na̱ yiví xáʼníña nani tá ki̱xaʼá ku̱i̱ya̱ 1990 xa̱a̱ yáʼa u̱vi̱ millón na̱ yiví ku̱a̱ʼa̱n xíʼi̱ íxaaña. Inkakana káʼa̱n: “Ña̱ ndíchi ña̱ ku̱a̱ʼa̱n ndáko̱o ñuyǐví yóʼo, loʼova chíndeéña”.

⁹ “Koo kue̱ʼe̱.” (Lucas 21:11.) Ni ku̱a̱ʼání ta̱tán íyo, ni saáví kǒo kúchiñuna xíʼin kue̱ʼe̱, chi kánaka kue̱ʼe̱ xa̱á ku̱a̱ʼa̱nña. Na̱ nándukú xa̱ʼa ña̱yóʼo káchina, tiempo ndóoyó vitin 20 kue̱ʼe̱ ña̱ xa̱a̱ íyo tá ya̱chi̱ka nda̱kooña iníí ñuyǐví tá kúú ña̱ tuberculosis, ña̱ paludismo (á malaria) xíʼin ña̱ cólera, ta savakaña ni ta̱tán kǒo kúchiñu xíʼinña. Ta nda̱kookatu inka 30 kue̱ʼe̱ xa̱á. Ta savaña nda̱a̱ xíʼi̱na xíʼinña ta kǒo ta̱tánña.

10. ¿Ndáaña ni̱ka̱ʼa̱n 2 Timoteo 3:1-5 xa̱ʼa na̱ yiví na̱ koo tiempo vitin?

¹⁰ Ña̱ Biblia ni̱ka̱ʼa̱nña xa̱ʼa ña̱ʼa ña̱ kuniyó koo iníísaá ñuyǐví ta saátu ka̱ʼa̱nña xa̱ʼa na̱ yiví nda̱a̱ na̱yóʼo nasa̱ma. Ta̱ apóstol Pablo ni̱ka̱ʼa̱nra nda̱saa koo na̱ yiví. Káchira: “Tiempo nu̱ú ndíʼi, koo  ku̱a̱ʼá tu̱ndóʼo” (kaʼvi 2 Timoteo 3:1-5). Ña̱yóʼo kúú sava ña̱ʼa ña̱ keʼé na̱ yiví káchi ta̱ apóstol Pablo:

• kuʼvi̱ka-inina kunina miína

• kutóonína koo xu̱ʼúnna

• kǒo kandíxana ña̱ ka̱ʼa̱n yivána

• va̱ása nda̱kú koo inina

• va̱ása kuʼvi̱-inina kunina na̱ veʼena

• kǒo tavána ki̱ʼva xíʼin miína

• ndi̱va̱ʼaní koo inina

• keʼéna ña̱ kúni̱ miína su̱víka ña̱ kúni̱ Ndióxi̱

• ka̱ʼa̱nna ña̱ ndásakáʼnuna Ndióxi̱, soo su̱ví ña̱ nda̱a̱ kúú ña̱yóʼo

11. ¿Ndáaña ndoʼo na̱ yiví na̱ ndi̱va̱ʼa-ini káchi Salmo 92:7?

¹¹ ¿Á saá íyo na̱ yiví na̱ ndóo ñuún? Sana saá íyovana. Chi iníí ndóo na̱ yiví na̱ íxaa saá. Ña̱yóʼo náʼa̱ña nu̱úyó ña̱ xa̱a̱ ku̱nu̱mí keʼé Ndióxi̱ iin ña̱ʼa, chi Biblia káchiña: ‘Tá ná ndakoo na̱ ndi̱va̱ʼa-ini nda̱a̱ tá kana ku̱ʼu̱ saá koona, ta ndiʼi na̱ kéʼé ña̱ va̱ása va̱ʼa ndakoo, kúni̱ kachiña ña̱ ndiʼi-xa̱ʼa va̱ʼavana’ (Salmo 92:7).

12, 13. ¿Ndáaña náʼa̱ nu̱úyó ña̱ tiempo vitin kúú ña̱ kunda̱a̱ va̱ʼaka iniyó xa̱ʼa Ndióxi̱?

¹² Tiempo ndóoyó vitin ndeéní íyo tu̱ndóʼo, nda̱a̱ táki̱ʼva ni̱ka̱ʼa̱n Biblia. Soo na̱ ndásakáʼnu Jehová íyo ña̱ va̱ʼa xínina.

¹³ “Ta va̱ʼaní xa̱a̱na kunda̱a̱-inina xíʼin ña̱ káʼa̱nña”, káchi libro ta̱ Daniel. ¿Ama kúú ña̱ xi̱nu tu̱ʼun yóʼo? Ki̱vi̱ nu̱ú ndíʼi (Daniel 12:4). Nani tá ku̱i̱ya̱ 1914, Jehová chíndeéra na̱ ndixa kúni̱ ndasakáʼnu-ñaʼá ña̱ va̱ʼaka kunda̱a̱-inina xíʼin tu̱ʼunra. Tá kúú ña̱ kunda̱a̱ va̱ʼaka inina xa̱ʼa ki̱vi̱ra xíʼin ña̱ kúni̱ra keʼéra nu̱ú ñuʼú yóʼo, ña̱ ki̱xi se̱ʼera ni̱xi̱ʼi̱ra xa̱ʼayó, ña̱ kunda̱a̱ka-inina xa̱ʼa na̱ ni̱xi̱ʼi̱ xíʼin xa̱ʼa ña̱ ndatakuna. Sákuaʼatuna ña̱ vií koona tasaá ndasakáʼnuna Jehová. Kúnda̱a̱ va̱ʼakatu inina xa̱ʼa Reino Ndióxi̱, chi ña̱yóʼo kúú ña̱ ndasalivi nu̱ú ñuʼú yóʼo. ¿Ndáaña kéʼéna xíʼin ndiʼi ña̱ xíni̱na? Ña̱yóʼo kúú ña̱ káʼa̱n inka profecía xa̱ʼa ta xa̱a̱ ku̱a̱ʼa̱n xínuña tiempo vitin.

14. ¿Á xa̱a̱ ku̱a̱ʼání ñuu xíkana nátúʼunna xa̱ʼa Ndióxi̱, ta ndáana xíka nátúʼun xa̱ʼara?

¹⁴ “Tu̱ʼun va̱ʼa ña̱ káʼa̱n xa̱ʼa ta̱ kaʼndachíñu, ku̱ʼu̱nña nu̱ú ndiʼi na̱ ñuu”, ka̱chi ta̱ Jesús tá ni̱ka̱ʼa̱nra xa̱ʼa “ña̱ ndiʼi-xa̱ʼa ñuyǐví yóʼo” (kaʼvi Mateo 24: 3, 14). Iníísaá nu̱ú ñuʼú xíkana nátúʼunna xa̱ʼa Ndióxi̱, ndáaña keʼéra ta ndáaña keʼéyó ña̱ va̱ʼa ndakiʼinyó bendiciónra. Ta ki̱ʼva 239 país xíkana ta xa̱a̱ 600 nu̱ú tu̱ʼun nátúʼunna xa̱ʼara. Ku̱a̱ʼání kúú na̱ testigo Jehová na̱ xíka nátúʼun xa̱ʼa Ndióxi̱ ta xa̱a̱ síín ñuu iin iinna xa̱a̱ síín tu̱ʼun káʼa̱n iin iinna (Revelación 7:9). Ta xáʼa̱nna veʼe na̱ yiví na̱ ndixa kúni̱ sakuaʼa xa̱ʼa Ndióxi̱ ta káʼvina xíʼinna, ni ku̱a̱ʼání na̱ yiví sáa̱-ini xíni̱ñaʼá, táki̱ʼva ka̱chi ta̱ Jesús (Lucas 21:17).

15. a) ¿Nda̱chun ndóoyó ki̱vi̱ nu̱ú ndíʼi túviún? b) Tá ná ndiʼi-xa̱ʼa ñuyǐví yóʼo, ¿ndáaña ndoʼo na̱ kǒo kúni̱ xíni Ndióxi̱ ta ndáaña ndoʼo na̱ kéʼé ña̱ kúni̱ Ndióxi̱?

¹⁵ Xa̱ʼa ña̱ xa̱a̱ xínu ndiʼi ña̱ ni̱ka̱ʼa̱n Biblia tiempo vitin, ¿á va̱ása ndóoyó ki̱vi̱ nu̱ú ndíʼi túviún? Tu̱ʼun Jehová ku̱ʼu̱nña nu̱ú na̱ yiví nda̱a̱ ki̱vi̱ ná ka̱ʼa̱n miíra ña̱ kǒo keʼékayóña, tasaá kúú ña̱ “ndiʼi-xa̱ʼa ñuyǐví yóʼo” (Mateo 24:14). Ña̱ “ndiʼi-xa̱ʼa ñuyǐví” kúni̱ kachiña ña̱ ndiʼi-xa̱ʼa ndiʼi ña̱ʼa ña̱ va̱ása va̱ʼa íyo nu̱ú ñuʼú. Ta̱ Jesús xíʼin na̱ ángel na̱ ítáʼan xíʼinra sandiʼi-xa̱ʼana ndiʼi na̱ yiví na̱ kǒo kúni̱ xíni Ndióxi̱ (2 Tesalonicenses 1:6-9). Ta̱ Ndi̱va̱ʼa xíʼin na̱ ta̱chí ndi̱va̱ʼa va̱ása sandáʼvikana na̱ yiví yóʼo. Tándi̱ʼi ni̱ya̱ʼa ndiʼi ña̱yóʼo, na̱ yiví na̱ kéʼé ña̱ kúni̱ Ndióxi̱ ku̱a̱ʼání ña̱ va̱ʼa ndakiʼinna (Revelación 20:1-3; 21:3-5).

16. ¿Ndáaña kúú ña̱ xíniñúʼu keʼún vitin?

¹⁶ Xa̱ʼa ña̱ xa̱a̱ kúyatin ndiʼi-xa̱ʼa ñuyǐví ta̱ Ndi̱va̱ʼa, iin iin miíyó xíniñúʼu nda̱ka̱tu̱ʼunyó miíyó: “¿Ndáaña xíniñúʼu keʼíi̱?”. Ña̱ xíniñúʼu keʼéyó kúú ña̱ ndakundeékayó sakuaʼayó xa̱ʼa Jehová ta keʼéyó ña̱ kúni̱ra (Juan 17:3). Chika̱a̱níún ndée ña̱ kaʼviún Biblia ta kundi̱ʼi̱ní-iniún xa̱ʼaña. Chika̱a̱ ndée ña̱ ku̱ʼu̱n ni̱ʼún reunión nu̱ú xáʼa̱n na̱ ndásakáʼnu Jehová (kaʼvi Hebreos 10:24, 25). Sakuaʼa va̱ʼaka xa̱ʼara, ta chika̱a̱ ndée ña̱ keʼún ña̱ kúni̱ra (Santiago 4:8).

17. ¿Nda̱chun ku̱a̱ʼání na̱ yiví kǒo kunda̱a̱-ini ña̱ kixa̱a̱ ki̱vi̱ ña̱ ndiʼi-xa̱ʼa ñuyǐví yóʼo?

¹⁷ Ta̱ Jesús ni̱ka̱ʼa̱nra ku̱a̱ʼání na̱ yiví kǒo kandíxana ña̱ ndóoyó ki̱vi̱ nu̱ú ndíʼi. Ta iin kama kuití kixa̱a̱ ki̱vi̱ ña̱ ndiʼi-xa̱ʼana ni iinna kǒo kunda̱a̱-ini, nda̱a̱ táki̱ʼva íxaa iin ta̱ kui̱ʼná saá kixa̱a̱ña (kaʼvi 1 Tesalonicenses 5:2). Ta̱ Jesús ni̱ka̱ʼa̱nra: “Saáchi táki̱ʼva ni̱xi̱yo tiempo  ta̱ Noé saá koo tá ná koo ta̱ nda̱ka̱xin Ndióxi̱. Saáchi nda̱a̱ tá ni̱xi̱yo ki̱vi̱ saá tá kúma̱níka koon sa̱vi̱ kini, ndóona xíxina ta xíʼina, ta̱ ta̱a tíndaʼa̱ra ta ná ñaʼá tíndaʼa̱ná, nda̱a̱ ki̱vi̱ ni̱ki̱ʼvi ta̱ Noé ini tú arca; ta kǒo níkandíxana nda̱a̱ tá ki̱xa̱a̱ sa̱vi̱ kini ta ndi̱ʼi-xa̱ʼa ndiʼina i̱xaará, saá koo tá ná koo ta̱ nda̱ka̱xin Ndióxi̱” (Mateo 24:37-39).

18. ¿Ndáa tu̱ʼun ni̱ka̱ʼa̱n ta̱ Jesús xíniñúʼu kuniso̱ʼoyó?

¹⁸ Ña̱kán ni̱ka̱ʼa̱n ta̱ Jesús: “Kiʼinníndó kuenta xíʼin miíndó ña̱ va̱ása kundi̱ʼi̱ní-inindó xa̱ʼa ña̱ kuxuníndó á ña̱ koʼoníndó, á xa̱ʼa ña̱ʼa ña̱ íyo ñuyǐví yóʼo ta iin kama kixa̱a̱ ki̱vi̱ kán sa̱tándó. Saáchi kixa̱a̱ña sa̱tá ndiʼi na̱ ndóo nu̱ú ñu̱ʼu. Kunditoníndó, ndiʼi tiempo ka̱ʼa̱nndó xíʼin Ndióxi̱ ña̱ va̱ʼa ná ka̱kundó nu̱ú ndiʼi tu̱ndóʼo ña̱ va̱xi, xíʼin ña̱ va̱ʼa kunditandó nu̱ú ta̱ nda̱ka̱xin Ndióxi̱” (Lucas 21:34-36). Ña̱ va̱ʼaní kúúña tá ná kuniso̱ʼoyó tu̱ʼun ña̱ ni̱ka̱ʼa̱n ta̱ Jesús. ¿Nda̱chun xíniñúʼu kuniso̱ʼoyó ña̱ ni̱ka̱ʼa̱nra? Saáchi na̱ xíniso̱ʼo ña̱ káʼa̱n Jehová xíʼin se̱ʼera ta̱ Jesús na̱yóʼo kúú na̱ ka̱ku tá ná ndiʼi-xa̱ʼa ñuyǐví ta̱ Ndi̱va̱ʼa. Ta va̱ʼa xa̱a̱na koona nu̱ú ñuyǐví xa̱á ña̱ xa̱a̱ ku̱nu̱mí kixa̱a̱ (Juan 3:16; 2 Pedro 3:13).