SAVA na̱ kándíxa ña̱ Trinidad káchina Ndióxi̱ u̱ni̱ na̱ yiví kúúra: yiváyó, se̱ʼera xíʼin espíritu santo. Ta káchina u̱ni̱ saá na̱yóʼo iin kúúna, ta ndiʼi ña̱ʼa va̱ʼa kéʼénaña. Ta kǒo na̱ ní ixava̱ʼa-ñaʼá tá xa̱ʼa. Ta káchi na̱ kandíxa ña̱ Trinidad, yiváyó kúú Ndióxi̱, se̱ʼera kúú Ndióxi̱ ta saátu nda̱a̱ espíritu santo kúú Ndióxi̱, ta káchina u̱ni̱ saá na̱yóʼo iin Ndióxi̱ kúúna.

Ku̱a̱ʼání na̱ kándíxa ña̱yóʼo kǒo kúchiñuna natúʼunna xa̱ʼaña. Ndákanixi̱nína sana va̱xivaña nu̱ú Biblia. Soo xíniñúʼu kunda̱a̱-iniyó chi ni iin yichi̱ kǒo tu̱ʼun Trinidad va̱xi nu̱úña. Soo, ¿á íyo iin versículo nu̱ú Biblia ña̱ káʼa̱n xa̱ʼa tu̱ʼun Trinidad? Ná kotoyó iin texto ña̱ xíniñúʼu na̱ yiví ña̱ káʼa̱nna va̱xi tu̱ʼun Trinidad nu̱ú Biblia.

Juan 1:1 káchiña: “Tá xa̱ʼa ni̱xi̱yo tu̱ʼun, ta tu̱ʼun ni̱xi̱yoña xíʼin Ndióxi̱, ta tu̱ʼun xi̱kuuña ndióxi̱”. Ta savaka versículo ña̱ va̱xi nu̱ú capítulo yóʼo, ta̱ apóstol Juan ni̱ka̱ʼa̱nra “tu̱ʼun” kúú ta̱ Jesús (Juan 1:14). Nu̱ú Biblia yóʼo káʼa̱nña tu̱ʼun xi̱kuu Ndióxi̱, savana xíniñúʼu ña̱yóʼo ña̱ káchina Ndióxi̱ xíʼin se̱ʼera iin kúúvana.

Xíniñúʼu kunda̱a̱-iniyó iin táʼví Biblia xíʼin tu̱ʼun griego ka̱ʼyínaña, tándi̱ʼi sa̱yáʼanaña inka tu̱ʼun. Ku̱a̱ʼá na̱ káʼyí Biblia chi̱núuna “tu̱ʼun xi̱kuuña iin Ndióxi̱”. Soo, sava na̱ káʼyí Biblia síínva ka̱ʼyínaña. ¿Nda̱chun síín ka̱ʼyínaña? Saáchi tá na̱ndukú va̱ʼana xa̱ʼaña ti̱xin tu̱ʼun griego na̱kunda̱a̱-inina ña̱ va̱ʼa inkáchi ná ka̱ʼa̱nña síínva tu̱ʼun xíniñúʼu kuniñúʼuna. Ná kotoyó nda̱saa káchi sava Biblia: “Tu̱ʼun xi̱kuuña iin Ndióxi̱” (A new Translation of the Bible). “Ta iin Ndióxi̱ xi̱kuu  tu̱ʼun” (The empathic Diaglott). “Tu̱ʼun ni̱xi̱yoña xíʼin Ndióxi̱ ta nda̱a̱ tá káa Ndióxi̱ saá ni̱xi̱yoña” (The translator New Testament). Tá chínúuna Ndióxi̱ nu̱ú Biblia yóʼo su̱ví ndixa Ndióxi̱ káʼa̱nna xa̱ʼa, chi xa̱ʼa iin ta̱ kúúmií ndée káʼa̱nna. Sava xíniñúʼuna ndióxi̱ tá káʼa̱nna xa̱ʼa iin ángel á savatu tá káʼa̱nna xa̱ʼa na̱ juez ñuyǐví yóʼo (Salmo 82:1-6; Juan 10:34, 35). Nu̱ú tutu 2 Corintios 4:4 nda̱a̱ ta̱ Ndi̱va̱ʼa káʼa̱nña xa̱ʼa ña̱ kúúra ndióxi̱ ña̱ ñuyǐví yóʼo. Soo ta̱ Jesús káʼnukava ta̱yóʼo nu̱ú ta̱ Ndi̱va̱ʼa xíʼin na̱ juez ñuyǐví yóʼo. Tá nda̱a̱ na̱yóʼo káʼa̱nna ndióxi̱ xíʼin, víʼikaví ta̱ Jesús nda̱a̱ táki̱ʼva káa “ndióxi̱” saá káara. Soo su̱ví ña̱yóʼo kúni̱ kachiña ña̱ kúúra Ndióxi̱ ta̱ kúúmií ndiʼi ndeé. *

Ku̱a̱ʼá na̱ yiví kǒo xíni̱na tu̱ʼun griego ña̱ ni̱ka̱ʼyi̱ Biblia xi̱naʼá. Tá saá, ¿nda̱saa va̱ʼa kúnda̱a̱-iniyó ndáaña kúni̱ kachi ña̱ ka̱ʼyí ta̱ apóstol Juan? Ña̱ va̱ʼa kunda̱a̱-iniyó xa̱ʼa ña̱yóʼo, ná ka̱ʼa̱nyó xa̱ʼa iin ta̱ maestro, ta̱yóʼo sánáʼa̱ra na̱ va̱lí xa̱ʼa iin ña̱ʼa ña̱ xíniñúʼu kunda̱a̱-inina. Tándi̱ʼi, kǒo inkáchi níkunda̱a̱-inina xíʼinña. ¿Ndáaña keʼéna vitin? Xíniñúʼu nda̱ka̱tu̱ʼunkana ta̱ maestro yóʼo, saá kúúña xa̱a̱na kunda̱a̱ka-inina xa̱ʼaña. Saá xíniñúʼu keʼéyó xíʼin texto ña̱ Juan 1:1, xíniñúʼu kaʼvi nííyóña ña̱ va̱ʼa kunda̱a̱-iniyó ndáa chiñu kúúmií ta̱ Jesús. Tá ná kunda̱a̱-iniyó xíʼin ndiʼi ña̱yóʼo va̱ása kakaka-iniyó xa̱ʼaña.

Ná kotoyó ña̱ ka̱ʼyí ta̱ apóstol Juan nu̱ú capítulo 1 versículo 18: “Nda̱a̱ ni iin na̱ yiví kǒo xínina Ndióxi̱”. Soo sava na̱ yiví xi̱nivana se̱ʼe Ndióxi̱, ta̱ Jesús, saá ka̱chi ta̱ apóstol Juan: “Tasaá tu̱ʼun [ta̱ Jesús] ndu̱uña ku̱ñu, ta ni̱xi̱yoña xíʼinyó” (Juan 1:14). Tá saá, ¿nda̱chun káʼa̱nna ta̱ Jesús, se̱ʼe Ndióxi̱, iin kúúra xíʼin Ndióxi̱? Ta̱ apóstol Juan ni̱ka̱ʼa̱nra xa̱ʼa “tu̱ʼun ña̱ ni̱xi̱yoña xíʼin Ndióxi̱”. Tá inkáchi ndóo u̱vi̱ na̱ yiví ¿á kivi ka̱ʼa̱nyó ña̱ iinlá na̱ yiví kúúna? Nu̱ú Juan 17:3 ni̱ka̱ʼa̱n káxi ta̱ Jesús xa̱ʼa miíra xíʼin xa̱ʼa yivára chi yivára kúú  “mitúʼun Ndióxi̱ ta̱ nda̱a̱”. Nu̱ú ndíʼi tutu Juan, ta̱ apóstol Juan ni̱ka̱ʼa̱nra ña̱yóʼo: “Soo ña̱yóʼo ka̱ʼyínaña ña̱ va̱ʼa kandíxandó ña̱ kúú ta̱ Jesús ta̱ Cristo ta kúúra se̱ʼe Ndióxi̱” (Juan 20:31). Nu̱ú versículo yóʼo xi̱niyó va̱ása káʼa̱nña xa̱ʼa ta̱ Jesús ña̱ kúúra Ndióxi̱ chi se̱ʼe Ndióxi̱va kúúra káchiña. Ndiʼi ña̱ ni̱ka̱ʼa̱n ta̱ apóstol Juan nu̱ú tutu yóʼo chíndeéña miíyó ña̱ va̱ʼa kunda̱a̱-iniyó ña̱ káʼa̱n Juan 1: 1. Tu̱ʼun kúúña iin “ndióxi̱”, kúni̱ kachiña ña̱ kúúmií ta̱ Jesús iin chiñu káʼnu, soo su̱ví inkáchi káara xíʼin Ndióxi̱ ta̱ kúúmií ndiʼi ndée.

Ná ka̱ʼa̱n tukuyó xa̱ʼa ta̱ maestro ta̱ ni̱ka̱ʼa̱nyó xa̱ʼa. Ná kachiyó íyoka ña̱ kǒo níkunda̱a̱-ini na̱ va̱lí xa̱ʼa tá nda̱kani ta̱ maestro nu̱úna. ¿Ndáaña xíniñúʼu keʼéna? Kivi nda̱ka̱tu̱ʼunna inkaka maestro ña̱ va̱ʼa kunda̱a̱-inina xíʼinña. Tá inkáchi ni̱ka̱ʼa̱n u̱vi̱ saá ta̱ maestro yóʼo, sana ku̱a̱ʼávana kandíxa. Saá íyo ña̱yóʼo tá kǒo kúnda̱a̱ va̱ʼa iniyó xa̱ʼa ña̱ ni̱ka̱ʼa̱n ta̱ apóstol Juan ña̱ su̱ví Ndióxi̱ kúú ta̱ Jesús. Xíniñúʼu kotoyó ña̱ ka̱ʼyí inkana nu̱ú Biblia. Ná kotoyó ña̱ ka̱ʼyí ta̱ Mateo. Ta̱yóʼo ka̱ʼyíra ña̱ ni̱ka̱ʼa̱n ta̱ Jesús: “Ki̱vi̱ saá ni iin na̱ yiví kǒo xíni̱, ni na̱ ángel chí ndiví, ni se̱ʼera, iinlá yiváyó kúú ta̱ xíni̱ ama kuuña” (Mateo 24:36). ¿Nda̱saa náʼa̱ ña̱yóʼo nu̱úyó ña̱ su̱ví ta̱ Jesús kúú Ndióxi̱?

Ta̱ Jesús ni̱ka̱ʼa̱nra yivára kúú ta̱ xíni̱ka nu̱ú miíra. Soo tá ta̱ Jesús kúú Ndióxi̱ xíniñúʼu kunda̱a̱-inira ndiʼi ña̱ʼa ña̱ xíni̱ yivára. Yóʼo kúnda̱a̱-iniyó ña̱ su̱ví inkúú ta̱ Jesús xíʼin Ndióxi̱. Sana ka̱ʼa̱n savana: “Ta̱ Jesús ni̱ka̱ʼa̱nra ña̱yóʼo, ña̱ kǒo xíni̱ra, tá xi̱kuura iin na̱ yiví nu̱ú ñuʼú yóʼova”. Tá ná kachiyó saá ni̱xi̱yoña, ¿ndáaña ka̱ʼa̱nyó xa̱ʼa espíritu santo Ndióxi̱? Tá ña̱ nda̱a̱ iin kúúña xíʼin Ndióxi̱, ¿nda̱chun kǒo níka̱ʼa̱n ta̱ Jesús xa̱ʼa espíritu santo ña̱ xíni̱ña ña̱ʼa ña̱ xíni̱ Ndióxi̱? Ta̱yóʼo ni̱ka̱ʼa̱nra iinlá yiváyó kúú ta̱ xíni̱ xa̱ʼa ña̱ kuu.

Ná sakuaʼakaún xa̱ʼa Biblia saá xa̱ún kunda̱a̱ka-iniún xa̱ʼa ku̱a̱ʼáka texto ña̱ káʼa̱n xa̱ʼa ña̱yóʼo. Káʼa̱nña ña̱ nda̱a̱ xíʼinyó xa̱ʼa yiváyó, xa̱ʼa se̱ʼera xíʼin xa̱ʼa espíritu santo (Salmo 90:2; Hechos 7: 55; Colosenses 1: 15).