1. ¿Nda̱chun ni̱ka̱ʼa̱n ta̱ kúúmií chiñu ñuu Etiopía ña̱ kúni̱ra ndakuchira?

“KOTO, yóʼo ndíka̱a̱ ti̱kui̱í; ¿nda̱chun kǒo kívi ndakuchii̱ yóʼo?”, káchi iin ta̱ kúúmií chiñu ñuu Etiopía. Iin discípulo ta̱ naní Felipe ni̱na̱ʼa̱ra nu̱úra nu̱ú káʼa̱n tu̱ʼun Ndióxi̱ xa̱ʼa ta̱ Jesús ña̱ kúúra ta̱ Mesías. Ta̱ kúúmií chiñu yóʼo ndeéní ni̱kusi̱í-inira xa̱ʼa ña̱ na̱kunda̱a̱-inira ta ni̱ka̱ʼa̱nra ña̱ kúni̱ra ndakuchira (Hechos 8:26-36).

2. ¿Nda̱chun xíniñúʼu ndakanixi̱níún ña̱ ndakuchiún?

 ² Tá xa̱a̱ ka̱ʼviún ndiʼi capítulo nu̱ú libro yóʼo xíʼin na̱ testigo Jehová, sana ndákanixi̱níún ña̱ ndakuchiún. Xa̱a̱ sa̱kuaʼún ña̱ káʼa̱n Biblia ndiʼi na̱ yiví koona ndiʼi tiempo nu̱ú ñuʼú livi (Lucas 23:43; Revelación 21:3, 4). Xíni̱tún ña̱ káʼa̱nña xa̱ʼa na̱ ni̱xi̱ʼi̱ xíʼin xa̱ʼa ña̱ ndatakuna (Eclesiastés 9:5; Juan 5:28, 29). Sana xáʼún reunión xíʼin na̱ testigo Jehová ta xíniún kéʼéna ña̱ sákuaʼana nu̱ú Biblia (Juan 13:35). Soo ña̱ ndáyáʼvi va̱ʼaka kúú ña̱ xa̱ún kutáʼan va̱ʼún xíʼin Jehová.

3. a) ¿Ndáa chiñu xa̱ʼnda ta̱ Jesús nu̱ú na̱ xi̱ndiku̱nñaʼá? b) ¿Ndáa ki̱ʼva ndákuchi na̱ ndíku̱n ta̱ Jesús?

³ ¿Ndáaña keʼún ña̱ va̱ʼa na̱ʼún ña̱ kúni̱ún kachíñún nu̱ú Ndióxi̱? Ta̱ Jesús ni̱ka̱ʼa̱nra xíʼin na̱ xi̱ndiku̱nñaʼá: “Kúaʼanndó, [...] ta sanáʼa̱ndó na̱ yiví ña̱ iníísaá ñuyǐví, ná kundiku̱nna yi̱ʼi̱, ta ná ndakuchina” (Mateo 28:19). Mií ta̱ Jesús sa̱ndákoo yichi̱ nu̱úyó tá nda̱kuchira. Soo su̱ví xi̱ní kuitíra nísakaana ti̱kui̱í (Mateo 3:16). Tu̱ʼun ndakuchi ka̱naña ti̱xin tu̱ʼun griego ta kúni̱ kachiña “sa̱ʼvi níína ti̱kui̱í”. Xa̱ʼa ña̱yóʼo, na̱ ndákuchi xíniñúʼu sa̱ʼvi níína.

4. ¿Ndáaña náʼa̱na tá ndákuchina?

⁴ Ndiʼi na̱ kúni̱ kutáʼan va̱ʼa xíʼin Jehová xíniñúʼu ndakuchina. Tá ndákuchina náʼa̱na ña̱ kúni̱na kachíñuna nu̱úra ta kúsi̱í-inina kéʼéna ña̱ kúni̱ra (Salmo 40:7, 8). Soo ña̱ va̱ʼa xa̱a̱na ndakuchina xíniñúʼu keʼéna sava ña̱ʼa.

5. a) ¿Ndáaña xíniñúʼu keʼún ña̱ va̱ʼa ndakuchiún? b) ¿Nda̱chun ndáyáʼvi ña̱ ku̱ʼu̱n ni̱ʼún reunión?

⁵ Ta miíún xa̱a̱ ki̱xaʼún kéʼún iin ña̱ʼa, ¿ndáaña? Xa̱a̱ ki̱xaʼún sákuaʼún ña̱ káʼa̱n Biblia xa̱ʼa Jehová xíʼin xa̱ʼa ta̱  Jesús (kaʼvi Juan 17:3). Soo kivi sakuaʼakaún. Kúni̱ndi̱ ná sakuaʼakaún ndiʼi ña̱ kúni̱ Jehová (Colosenses 1:9). Reunión nu̱ú ndátaka na̱ testigo Jehová kivi chindeé yóʼó ña̱ sakuaʼakaún. Xa̱ʼa ña̱yóʼo va̱ása sandákoún ña̱ ku̱ʼún (Hebreos 10:24, 25). Tá ná ku̱ʼu̱n ni̱ʼún sakuaʼakaún xa̱ʼa Ndióxi̱.

6. ¿Á ndiʼiví ña̱ káʼa̱n Biblia xíniñúʼu sakuaʼún ña̱ va̱ʼa ndakuchiún?

⁶ Xa̱ʼa ña̱ kivi ndakuchiún kǒo xíniñúʼu sakuaʼa ndiʼivíún ña̱ káʼa̱n Biblia. Ndakaʼún xa̱ʼa ta̱ ñuu Etiopía loʼova xi̱xini̱ra, ta̱yóʼo xi̱niñúʼura inkana chi̱ndeéñaʼá xa̱ʼa sava ña̱ káʼa̱n Biblia (Hechos 8:30, 31). Saá miíún íyo ku̱a̱ʼáka ña̱ sakuaʼún, ndiʼi tiempo sakuaʼakaún xa̱ʼa Ndióxi̱ (Eclesiastés 3:11). Ña̱ va̱ʼa ndakuchiún xíniñúʼu sakuaʼún sava ña̱ káʼa̱n Biblia ta keʼún ña̱ káʼa̱nña (Hebreos 5:12). Kivi sakuaʼún, ndáaña ndóʼoyó tá xíʼi̱yó, nda̱chun ndáyáʼvi ki̱vi̱ Ndióxi̱ xíʼin reinora.

7. Tá káʼviún Biblia, ¿ndáaña xíniñúʼu keʼún?

⁷ Soo su̱ví ña̱ sakuaʼa kuitíún káʼa̱nyó xa̱ʼa, chi “tá va̱ása kándíxaún Ndióxi̱ kǒo kívi kuyatiún nu̱úra” (Hebreos 11:6). Biblia káʼa̱nña xa̱ʼa na̱ xi̱ndoo ñuu Corinto: tá xi̱niso̱ʼona xa̱ʼa Ndióxi̱ ña̱ ni̱ka̱ʼa̱n na̱ xi̱ndiku̱n ta̱ Jesús xíʼinna, “ki̱xaʼána kándíxana Ndióxi̱ ta nda̱kuchina” (Hechos 18:8). Táki̱ʼva i̱xaa na̱yóʼo ki̱ʼva saá kandíxaún Ndióxi̱ ta ndakuchiún. Tá káʼviún Biblia, xíniñúʼu kandíxaún ndiʼi ña̱ káʼa̱nña, chi tu̱ʼun Ndióxi̱ kúúña. Ta saátu xíniñúʼu kandíxaún Ndióxi̱ ña̱ saxínura ña̱ káʼa̱nra ta va̱ʼa sakákura miíyó xa̱ʼa ña̱ ni̱xi̱ʼi̱ ta̱ Jesús xa̱ʼayó (Josué 23:14; Hechos 4:12; 2 Timoteo 3:16, 17).

8. ¿Ndáaña chindeé yóʼó ña̱ ka̱ʼún xa̱ʼa ña̱ sákuaʼún?

⁸ Tá ndeéníka kándíxaún Ndióxi̱, ni loʼoví kǒo sandákoún ña̱ ka̱ʼún xa̱ʼara xíʼin na̱ yiví (Jeremías 20:9).  Tasaá kutóokaún ka̱ʼún xa̱ʼara xíʼinna xíʼin xa̱ʼa ña̱ keʼéra (kaʼvi 2 Corintios 4:13).

9, 10. a) ¿Ndáana kivi kixaʼún natúʼún xíʼin xa̱ʼa Ndióxi̱? b) ¿Ndáaña xíniñúʼu keʼún tá kúni̱ún keún xíʼin na̱ testigo Jehová ña̱ natúʼún xa̱ʼa Ndióxi̱?

⁹ Va̱ʼa kixaʼún natúʼún xíʼin na̱ veʼún, xíʼin na̱ migoún, xíʼin na̱ ndóo yatin xíʼún, xíʼin na̱ káchíñún xíʼin xa̱ʼa ña̱ sákuaʼún nu̱ú Biblia. Sana kixa̱a̱ iin ki̱vi̱ ña̱ kutóún kitaún xíʼin na̱ testigo Jehová ña̱ natúʼunndó xa̱ʼa Ndióxi̱. Tá ná kixa̱a̱ ki̱vi̱ kán, ka̱ʼa̱n xíʼin na̱ sánáʼa̱ yóʼó ña̱ kúni̱ún keún servicio. Tá xa̱a̱ va̱ʼa keún túvina, saá ka̱ʼa̱nna xíʼún ama natúʼunndó xíʼin u̱vi̱ na̱ anciano na̱ congregación.

¹⁰ Tasaá xa̱ún kuni va̱ʼakaún na̱ anciano, chi na̱yóʼo kúú na̱ kíʼin kuenta xíʼin congregación (Hechos 20:28; 1 Pedro 5:2, 3). Na̱yóʼo xíniñúʼu xa̱a̱na kunda̱a̱-inina á ndixa kándíxaún ña̱ sánáʼa̱ Biblia. Tá kéʼún ña̱ káʼa̱nña saá na̱ʼún ña̱ ndixa kúni̱ún koún testigo Jehová. Tá kéʼún ndiʼi ña̱yóʼo saá ka̱ʼa̱nna xíʼún ña̱ va̱ʼa koún publicador, ta kivi keún sanáʼún na̱ yiví xa̱ʼa Ndióxi̱.

11. ¿Ndáaña xíniñúʼu keʼé savana ña̱ va̱ʼa xa̱a̱na koona publicador?

¹¹ Soo sava yichi̱ na̱ anciano xítona na̱ kúni̱ koo publicador á xa̱a̱ sa̱ndákoona ña̱ va̱ása va̱ʼa xi̱keʼéna. Savana xi̱keʼé se̱ʼéna ña̱ kini á xa̱a̱ sa̱ndákoonaña. Xa̱ʼa ña̱yóʼo tá kúma̱níka ka̱ʼa̱nna xíʼún ña̱ koún publicador, ndiʼi ña̱ kini kǒokaña keʼún, tá kúú ña̱ kéʼé na̱ kísi̱ xíʼin táʼan, na̱ xíʼi ndixi á na̱ xíniñúʼu droga (kaʼvi 1 Corintios 6:9, 10; Gálatas 5:19-21).

12. ¿Nda̱chun xíniñúʼu ndikó-iniyó xa̱ʼa ku̱a̱chiyó?

¹² Ña̱ va̱ʼa ndakuchiún xíniñúʼu keʼékaún sava ña̱ʼa. Ta̱ apóstol Pedro káchira: “Ndikó-inindó [...] ta ndikóndó  nu̱ú Ndióxi̱ ña̱ va̱ʼa ná ndoo ku̱a̱chindó” (Hechos 3:19). Tá iinna ndi̱kó-inina xa̱ʼa ku̱a̱china kǒo keʼékanaña. Soo su̱ví na̱ ke̱ʼé ku̱a̱chi kuití xíniñúʼu ndikó-ini xa̱ʼaña, nda̱a̱ na̱ kéʼé ña̱ va̱ʼa ná chika̱a̱kana ndée keʼékana ña̱ va̱ʼa. Saáchi ndiʼiyó kúúyó na̱ yiví ku̱a̱chi ta xíniñúʼuyó ña̱ koo káʼnu-ini Ndióxi̱ xa̱ʼayó (Romanos 3:23; 5:12). Saáchi tá kúma̱ní kaʼviún Biblia va̱ása níxixini̱ún ndáaña kúú ña̱ kúni̱ Ndióxi̱. Ña̱kán va̱ása níkeʼún ña̱ káʼa̱nra. Xa̱ʼa ña̱yóʼo, xíniñúʼu ndikó-iniún xa̱ʼa ku̱a̱chiún.

13. ¿Ndáaña kúni̱ kachiña ña̱ ndikóyó nu̱ú Ndióxi̱?

¹³ Tá ndíkó-iniyó xa̱ʼa ku̱a̱chiyó saá ndíkóyó nu̱ú Ndióxi̱. Tá ndíkóyó nu̱úra saá kúúña ndákooyó ña̱ xi̱keʼéyó tá ya̱chi̱. Ña̱yóʼo kúni̱ kachiña, nda̱a̱ ni iin yichi̱ va̱ása ndikókayó keʼéyóña. Tasaá nina ña̱ va̱ʼa keʼéyó. Ña̱ ndikó-iniyó xa̱ʼa ku̱a̱chiyó xíʼin ña̱ ndikóyó nu̱ú Ndióxi̱, ña̱yóʼo xíniñúʼu keʼéyó saáví ndakuchiyó.

14. ¿Ndáaña xíniñúʼu keʼéyó saáví ndakuchiyó?

¹⁴ Íyo inka ña̱ ndáyáʼvi keʼéyó ña̱ va̱ʼa ndakuchiyó: ná ka̱ʼa̱nyó xíʼin Jehová tá kútóoyó ndakuchiyó.

15, 16. a) ¿Nda̱chun xíniñúʼu ka̱ʼa̱nyó xíʼin Ndióxi̱ ta saáví ndakuchiyó? b) ¿Ndáaña chindeé miíyó keʼéyó ña̱yóʼo?

¹⁵ Tá xa̱a̱ kútóoyó ndakuchiyó xíniñúʼu keʼéyó iin oración, saá ka̱ʼa̱nyó xíʼin Ndióxi̱ ña̱ ndixa kúni̱yó kachíñuyó nu̱úra ta ndasakáʼnuyó iinlá miíra (Deuteronomio 6:15). ¿Nda̱chun káʼa̱nyó xíʼin Jehová ña̱ kúni̱yó kachíñuyó nu̱úra? Ná kachiyó, iin ta̱a kútóora iin ñaʼá, tá nátúʼunra xíʼinñá ta ndeéka kútóorañá chi xíni̱ra va̱ʼaní iniñá ta nda̱a̱ kútóora tindaʼa̱ra xíʼinñá. Soo ná tindaʼa̱ra xíʼinñá xíni̱ra ña̱ xíniñúʼu kundaarañá.  Soo xa̱ʼa ña̱ kútóorañá tindaʼa̱vara xíʼinñá ta kundaarañá.

¹⁶ Tá na̱kunda̱a̱-iniyó xa̱ʼa Jehová ta kúʼvi̱ní-iniyó xíniyóra, ña̱yóʼo chindeé miíyó ña̱ kachíñuyó nu̱úra ta ndasakáʼnuyóra. Ndiʼi na̱ kúni̱ kundiku̱n se̱ʼe Ndióxi̱, ta̱ Jesucristo, xíniñúʼu ‘sandákoona keʼéna ña̱ kúni̱ miína’ (Marcos 8:34). Sándákooyó ña̱ kúni̱ miíyó tá va̱ása ndákanikaxi̱níyó xa̱ʼa ña̱ kútóoyó keʼéyó, chi kíxaʼáyó kéʼéyó ña̱ kúni̱ Ndióxi̱. Xa̱ʼa ña̱yóʼo ña̱ va̱ʼa ndakuchiún, xíniñúʼu ndakani va̱ʼa xi̱níún xa̱ʼa Jehová ta iinlá nu̱ú ta̱yóʼo kachíñún (kaʼvi 1 Pedro 4:2).

17. ¿Nda̱chun va̱ása káʼa̱n savana xíʼin Ndióxi̱ ña̱ kachíñuna nu̱úra?

¹⁷ Sava na̱ yiví va̱ása káʼa̱nna xíʼin Jehová ña̱ kachíñuna nu̱úra chi na̱ yíʼvi kúúna, ndákanixi̱nína ña̱ kǒo kúchiñuna saxínuna ña̱ káʼa̱nra. Sava ndákanixi̱nína ña̱ tiinra ku̱a̱chi xíʼinna xa̱ʼa ña̱ kǒo kéʼé viína ña̱ kúni̱ra, xa̱ʼa ña̱ yíʼvina ña̱kán kǒo kúni̱na kachíñuna nu̱úra.

18. ¿Ndáaña kivi chindeé yóʼó keʼún ña̱ kúni̱ Jehová?

¹⁸ Tá sákuaʼakaún xa̱ʼa Jehová ta kúʼvi̱ka-iniún xíniúnra, ña̱yóʼo chindeé yóʼó ña̱ va̱ʼa keʼún ña̱ kúni̱ra (Eclesiastés 5:4). Tá xa̱a̱ nda̱kuchiún saá kutóokaún ‘keʼún ña̱ kúni̱ Jehová ta sakusi̱íún inira’ (Colosenses 1:10). Xa̱ʼa ña̱ kúʼvi̱ní-iniún xíniúnra chindeéña yóʼó keʼún ña̱ va̱ʼa. Sana ndákanixi̱níún táki̱ʼva káchi ña̱ ka̱ʼyí ta̱ apóstol Juan: “Ña̱yóʼo kúni̱ kachiña ña̱ kúʼvi̱-iniyó xíniyó Ndióxi̱: ña̱ ná kandíxayó chiñu xáʼndara ta chiñu xáʼndara su̱ví ña̱ yo̱ʼvi̱ kúúña”, kúni̱ kachiña su̱ví ña̱ ve̱e kúúña (1 Juan 5:3).

19. ¿Nda̱chun va̱ása yi̱ʼvíún kachíñún nu̱ú Jehová?

 ¹⁹ Ndióxi̱ kúni̱ra ná kachíñuyó nu̱úra ni kúúyó na̱ yiví ku̱a̱chi. Jehová xíni̱vara ndáaña va̱ʼa keʼéyó ta ndáaña kǒo kívi keʼéyó (Salmo 103:14). Ta̱yóʼo chindeé táʼan xíʼinyó keʼéyó ña̱ kúni̱ra, tasaá kúni̱tura va̱ʼa kooyó (kaʼvi Isaías 41:10). Tá ndinuʼu-iniyó kándíxayó Jehová, ‘miíra na̱ʼa̱ yichi̱ nu̱úyó’ (Proverbios 3:5, 6).

20. ¿Ndáaña xíniñúʼu keʼún tándi̱ʼi ni̱ka̱ʼún xíʼin Jehová ña̱ kúni̱ún ndakuchiún?

²⁰ Ndakanixi̱ní xa̱ʼa ña̱ ni̱ka̱ʼa̱nyó, sana ka̱ʼún xíʼin Jehová ña̱ kúni̱ún kachíñún nu̱úra. Soo ndiʼi na̱ kúʼvi̱-ini xíni Ndióxi̱ xíniñúʼu keʼékana inka ña̱ʼa: xíniñúʼu na̱ʼa̱na nu̱ú inkana ña̱ xa̱a̱ ni̱ka̱ʼa̱nna xíʼin Ndióxi̱ ña̱ kúni̱na kachíñuna nu̱úra (Romanos 10:10). ¿Ndáa ki̱ʼva keʼéna ña̱yóʼo?

21, 22. ¿Ndáaña xíniñúʼu keʼún ña̱ va̱ʼa na̱ʼún ña̱ ndixa kúni̱ún kachíñún nu̱ú Jehová?

 ²¹ Ka̱ʼa̱n xíʼin ta̱ coordinador na̱ anciano ña̱ congregación ña̱ kúni̱ún ndakuchiún. Ta̱yóʼo ka̱ʼa̱n xíʼin savaka na̱ anciano ña̱ keʼéna pregunta xíʼún xa̱ʼa ña̱ xa̱a̱ sa̱kuaʼún nu̱ú Biblia. Saá kunda̱a̱-ini na̱ anciano á xa̱a̱ va̱ʼa ndakuchiún ña̱ inka asamblea va̱xi. * Tá ná ki̱xa̱a̱ ki̱vi̱ ndakuchiún, saá taxina iin discurso ña̱ va̱ʼa kunda̱a̱-iniún xa̱ʼa ña̱yóʼo. Tándi̱ʼi ta̱xina discurso yóʼo, nda̱ka̱tu̱ʼunna u̱vi̱ pregunta na̱ ndakuchi, ta na̱yóʼo saá xíniñúʼu ndeé va̱ʼa ndakuiinna. Saá kúú ña̱ náʼa̱na nu̱ú inkana ña̱ xa̱a̱ ni̱ka̱ʼa̱nna xíʼin Ndióxi̱ ña̱ kúni̱na kachíñuna nu̱úra.

²² Tá ná ndakuchiún na̱ʼún nu̱ú inkana ña̱ táxiún miíún ndaʼa̱ Jehová tasaá nduún Testigora. Ndiʼi na̱ ndákuchi chíka̱a̱ níína na̱yóʼo ti̱kui̱í saá náʼa̱na ña̱ táxina miína ndaʼa̱ra.

23. ¿Ndáaña kúni̱ kachi ña̱ ndakuchina “xíʼin ki̱vi̱ yiváyó xíʼin ki̱vi̱ se̱ʼera tasaá xíʼin ki̱vi̱ espíritu santo”?

²³ Ta̱ Jesús ni̱ka̱ʼa̱nra xíʼin na̱ discípulo ña̱ ndakuchina “xíʼin ki̱vi̱ yiváyó xíʼin ki̱vi̱ se̱ʼera tasaá xíʼin ki̱vi̱ espíritu santo” (Mateo 28:19). Ña̱yóʼo kúni̱ kachiña na̱ ndakuchi xíniñúʼu ndakunina Jehová xíʼin ta̱ Jesucristo ña̱ kúúna na̱ xáʼndachíñu (Salmo 83:18; Mateo 28:18). Ta saátu ndakunina ña̱ espíritu santo ña̱ kúúña ndée Ndióxi̱ (Gálatas 5:22, 23; 2 Pedro 1:21).

24, 25. a) ¿Ndáaña kúni̱ kachi ña̱ ndákuchiyó? b) ¿Ndáa pregunta sakuaʼayó xa̱ʼa?

²⁴ Su̱ví ña̱ ndakuchi kuitíyó ta ña̱yóʼo kúú ndiʼiña, chi íyoka inka ña̱ kúni̱ ka̱ʼa̱nña. Xa̱ʼa ña̱ ndakuchiún á  ña̱ chika̱a̱ níína yóʼó ti̱kui̱í, ña̱yóʼo kúni̱ kachiña sandákoún ndiʼi ña̱ xi̱keʼún. Ta vitin keʼún ndiʼi ña̱ kúni̱ Jehová. Va̱ása nandosóún xa̱ʼa ña̱yóʼo chi su̱ví nu̱ú na̱ yiví kachíñún chi nu̱ú Jehová kachíñún vitin. Ña̱ ni̱ka̱ʼún xíʼin Ndióxi̱ tá nda̱kuchiún ña̱yóʼo chindeé yóʼó ña̱ va̱ʼa kutáʼankaún xíʼinra (Salmo 25:14).

²⁵ Soo ña̱ ndakuchiún kǒo kúni̱ kachiña xa̱a̱ ni̱ka̱kuviún. Ta̱ apóstol Pablo ka̱ʼyí ña̱yóʼo: “Yi̱ʼvíndó kunindó Ndióxi̱ ta kachíñundó nu̱úra ña̱ va̱ʼa ka̱kundó” (Filipenses 2:12). Tá ndákuchiyó saá kíxaʼáyó káchíñukayó nu̱ú Ndióxi̱. Ta vitin va̱ʼa ndakanixi̱níyó xa̱ʼa ña̱yóʼo: ¿nda̱saa va̱ʼa kutáʼan ndiʼiyó ña̱ ndasakáʼnuyó Ndióxi̱ ta kuʼvi̱-iniyó kuniyóra? Nu̱ú inka capítulo ña̱ va̱xi nu̱ú libro yóʼo sakuaʼayó xa̱ʼaña.