APÉNDICE
Ta̱ profeta Daniel ni̱ka̱ʼa̱nra ña̱ kixa̱a̱ ta̱ Mesías
TA̱ PROFETA Daniel yáʼa 500 ku̱i̱ya̱ tá kúma̱ní kaku ta̱ Jesús ni̱xi̱yora. Jehová ni̱ka̱ʼa̱nra xíʼinra ndáaña kivi chindeé táʼan xíʼin na̱ yiví ña̱ va̱ʼa kunda̱a̱-inina ama kúú ña̱ nduu ta̱ Jesús ta̱ Mesías á ta̱ Cristo. Xíʼin ta̱ Daniel ni̱ka̱ʼa̱nna: “Xíniñúʼu kuxini̱ún ta ndíchi koún ña̱ kunda̱a̱ va̱ʼa iniún tá ná kaʼndana chiñu ña̱ sandáʼana ñuu Jerusalén nda̱a̱ ná kixa̱a̱ ta̱ Mesías ta̱ ndaka̱xin Ndióxi̱, koo 7 semana xíʼin 62 semana” (Daniel 9:25).
Ná kotoyó ndáaña keʼéyó ña̱ va̱ʼa kunda̱a̱-iniyó ama kixa̱a̱ ta̱ Mesías. Siʼna ná kotoyó ama kúú ña̱ kixaʼáyó kaʼviyó ku̱i̱ya̱ ta nda̱saa tiempo ya̱ʼa ña̱ kixa̱a̱ra. Tu̱ʼun Ndióxi̱ káʼa̱nña kixaʼáyó kaʼviyóña tá ná “kaʼndana chiñu ña̱ sandáʼana ñuu Jerusalén”. ¿Ama kúú ña̱ xa̱ʼndana chiñu yóʼo? Ta̱ Nehemías ni̱ka̱ʼa̱n, xa̱ʼndana chiñu yóʼo “tá xa̱a̱ ku̱a̱ʼa̱n o̱ko̱ ku̱i̱ya̱ xáʼndachíñu ta̱ rey Artajerjes” (Nehemías 2:1, 5-8). Ku̱a̱ʼá na̱ káʼyí xa̱ʼa historia ña̱ ku̱u xi̱naʼá, káchina ku̱i̱ya̱ 474 tá tiempo xi̱naʼá (t.x.), saá kúúña ni̱xi̱nu níí iin ku̱i̱ya̱ ña̱ xa̱ʼndachíñu ta̱ rey Artajerjes. * Tá ná taváyó cuenta xíʼinña kúnda̱a̱-iniyó ku̱i̱ya̱ 455 t.x. saá kúúña ni̱xi̱nu o̱ko̱ ku̱i̱ya̱ ña̱ xa̱ʼndachíñura. Xa̱ʼa ña̱yóʼo ña̱ ni̱ka̱ʼa̱n ta̱ profeta Daniel xa̱ʼa ta̱ Mesías ki̱xaʼáña ku̱i̱ya̱ 455 t.x.
Ta̱ Daniel ni̱ka̱ʼa̱nra nda̱saa tiempo ya̱ʼa ña̱ kixa̱a̱ ta̱ Mesías. Biblia káchiña “7 semana kuuña xíʼin 62 semana”, tá ná taváyó cuenta xíʼin ndiʼi semana yóʼo ndúuña 69 semana. ¿Nda̱saa ku̱i̱ya̱ kúúña? Ku̱a̱ʼá Biblia káʼa̱n xa̱ʼa ña̱yóʼo su̱ví ndixa semana ña̱ u̱xa̱ ki̱vi̱ kúúña chi semana ña̱ ku̱i̱ya̱ kúúña. Iin semana u̱xa̱ ku̱i̱ya̱ káʼa̱nña. Na̱ ñuu Judá na̱ xi̱ndoo tá ya̱chi̱ xi̱xini̱ va̱ʼana xa̱ʼa semana ña̱ ku̱i̱ya̱ saáchi iin semana u̱xa̱ ku̱i̱ya̱ xi̱kuuña nu̱úna. Xi̱ndasakáʼnuna ña̱ ki̱vi̱ sábado tá xi̱xinu u̱xa̱ tá u̱xa̱ ku̱i̱ya̱ (Éxodo 23:10, 11). Ña̱kán, 69 semana tá ná taváyó cuenta xíʼinña, iin semana 7 ku̱i̱ya̱ káʼa̱nña, ndiʼiña kúúña 483 ku̱i̱ya̱.
Vitin ndáa cuenta kuití taváyó. Tá ná kaʼviyó 483 ku̱i̱ya̱ ta ña̱yóʼo kixaʼáyó kaʼviyóña tá kíxaʼá ku̱i̱ya̱ 455 t.x., saá xáa̱yó ku̱i̱ya̱ 29 ña̱ tiempo vitin (t.v.), ku̱i̱ya̱ yóʼo kúú ña̱ nda̱kuchi ta̱ Jesús ta ndu̱ura ta̱ Mesías (Lucas 3:1, 2, 21, 22). * ¿Á su̱ví ni̱xi̱nu ndiʼi ña̱ ni̱ka̱ʼa̱n Biblia?
^ párr. 1 Nu̱ú página 198 va̱xi iin flecha loʼo ◀ chí ndaʼa̱ yítin ña̱ káʼa̱n xíʼinyó ndáa ki̱ʼva xi̱kaʼvina ku̱i̱ya̱ tiempo xi̱naʼá ta flecha loʼo ▶ chí ndaʼa̱ kúaʼa káʼa̱n xa̱ʼa tiempo vitin.
^ párr. 3 Ku̱i̱ya̱ 455 t.x. nda̱a̱ ku̱i̱ya̱ 1 t.x. xa̱a̱ ku̱a̱ʼa̱n 454 ku̱i̱ya̱. Ku̱i̱ya̱ 1 t.x. nda̱a̱ ku̱i̱ya̱ 1 t. v. ni̱ya̱ʼa tuku inka ku̱i̱ya̱, (chi kǒo ku̱i̱ya̱ cero). Ta ku̱i̱ya̱ 1 t.v. nda̱a̱ ku̱i̱ya̱ 29 t. v. ni̱ya̱ʼa 28 ku̱i̱ya̱ . Tá ná taváyó cuenta xíʼin (454+1+28) kúúña 483 ku̱i̱ya̱. Ta̱ Jesús ni̱xi̱ʼi̱ra ku̱i̱ya̱ 33 ti̱xin ña̱ semana 70 (Daniel 9:24, 26). Tá kúni̱kaún kunda̱a̱-iniún kaʼvi capítulo 11 ña̱ libro Prestemos atención a las profecías de Daniel, xíʼin tutu Perspicacia para comprender las escrituras, volumen 2 página 1014-1017. U̱vi̱ saá libro yóʼo na̱ testigo Jehová ta̱váña.
