KU̱A̱ʼÁNÍ ña̱ʼa ni̱ka̱ʼa̱n Jehová xíʼin na̱ profeta xa̱ʼa ta̱ Mesías. Va̱ʼava kunda̱a̱-iniyó xa̱ʼara, chi ni̱ka̱ʼa̱nna ndáa ñuu kakura, ndáaña keʼéra ta saátu ña̱ kuvira. Ni̱xi̱nu nu̱ú ndiʼi ña̱ ni̱ka̱ʼa̱nna xa̱ʼara. Yóʼo kunda̱a̱-iniyó xa̱ʼa sava ña̱ káʼa̱n xa̱ʼara míí ka̱kura xíʼin ña̱ káʼa̱n xa̱ʼara tá ni̱xi̱yo loʼora.

Ta̱ profeta Isaías ni̱ka̱ʼa̱nra xa̱ʼa ta̱ Jesús ña̱ kakura ti̱xin na̱ veʼe ta̱ David (Isaías 9:7). Ta saá ku̱u: ta̱ Jesús ka̱kura ti̱xin na̱ veʼe ta̱ rey David (Mateo 1:1, 6-17).

Ta̱ Miqueas, ni̱ka̱ʼa̱nra ña̱ kaku ta̱ Jesús ñuu “Belén Efrata” ta xa̱a̱ra kaʼndachíñura (Miqueas 5:2). Tá ki̱xi ta̱ Jesús ñuyǐví yóʼo, ñuu Israel ni̱xi̱yo u̱vi̱ ñuu ña̱ xi̱naní Belén. Iinña xi̱ndika̱a̱ yatin xíʼin ñuu Nazaret, ta inkaña xi̱ndika̱a̱ ñuu Judá ña̱ ndíka̱a̱ yatin xíʼin ñuu Jerusalén. Ña̱ xi̱ndika̱a̱ yatin xíʼin ñuu Jerusalén kúú ña̱ xi̱naní Efrata. Ta ñuu kán kúú nu̱ú ka̱ku ta̱ Jesús, saá ni̱xi̱nu ña̱ ni̱ka̱ʼa̱n Ndióxi̱ (Mateo 2:1).

Inka ña̱ ni̱ka̱ʼa̱n tu̱ʼun Ndióxi̱ kúúña, kana Jehová se̱ʼera ña̱ kitara chí ñuu Egipto. Ta míí saá ku̱u, ta̱ loʼo Jesús ni̱xi̱yora chí ñuu Egipto, ni̱ya̱ʼa tiempo, tá ni̱xi̱ʼi̱ ta̱ rey Herodes, saá ndi̱kóra chí ñuura. Saá ni̱xi̱nu ña̱ ni̱ka̱ʼa̱n Ndióxi̱ (Oseas 11:1; Mateo 2:15).

 Nu̱ú tabla “ Ña̱ ni̱ka̱ʼa̱nna kuu xíʼin ta̱ Mesías” koto columna “Ña̱ ni̱ka̱ʼa̱nna”, yóʼo va̱xi texto ña̱ káʼa̱n xa̱ʼa ña̱ keʼé ta̱ Mesías xíʼin ña̱ ndoʼora.” Ta káʼa̱nndi̱ xíʼún ná chitáʼún texto yóʼo xíʼin texto ña̱ va̱xi nu̱ú káchiña “Ni̱xi̱nuña”. Tasaá va̱ʼaka kunda̱a̱-iniún ña̱ káʼa̱n tu̱ʼun Ndióxi̱ kúú ña̱ nda̱a̱.

Tá káʼviún ña̱yóʼo, ndakaʼún chi tá kúma̱níka kaku ta̱ Jesús saáví ka̱ʼyínaña. Ta mií ta̱ Jesús ni̱ka̱ʼa̱n tu̱ʼun yóʼo: “Ndiʼi  ña̱ ni̱ka̱ʼyi̱ nu̱ú ley ta̱ Moisés, xíʼin ña̱ ka̱ʼyí na̱ profeta xíʼin ña̱ ni̱ka̱ʼyi̱ nu̱ú tutu Salmos ña̱ káʼa̱n xa̱ʼíi̱ xíniñúʼu xi̱nuña” (Lucas 24:44). Va̱ʼa kuniún ña̱yóʼo nu̱ú Bibliaún, chi ni̱xi̱nu ndiʼiña.