¿NDA̱SAA ndákanixi̱níún ña̱ koo ki̱vi̱ ña̱ tiin Ndióxi̱ ku̱a̱chi xíʼin na̱ yiví? Ku̱a̱ʼánína ndákanixi̱ní iin iinyó xa̱a̱yó nu̱ú Ndióxi̱ ña̱ tiinra ku̱a̱chi xíʼinyó. Ta ta̱yóʼo kúú ta̱ ka̱ʼa̱n á chí ndiví ku̱ʼu̱nna koona á chí ndayá á xi̱tu̱n ku̱ʼu̱nna kokona. Soo ña̱ Biblia síínva káʼa̱nña koo ki̱vi̱ yóʼo. Su̱ví ki̱vi̱ yi̱ʼvíyó kúúña, ki̱vi̱ nu̱náyó ndaʼa̱ tu̱ndóʼo xíʼin ña̱ kundoo viíyó nu̱ú ñuyǐví xa̱á kúúña.

Nu̱ú tutu Revelación 20:11, 12 ta̱ apóstol Juan ni̱ka̱ʼa̱nra xa̱ʼa ki̱vi̱ tiin Ndióxi̱ ku̱a̱chi: “Ta xi̱nii̱ iin trono yaa, ta xi̱nii̱ ta̱ níndúʼú kán. Ta nu̱ú ta̱kán nda̱ñúʼu ñuʼú xíʼin ndiví, ta va̱ása níxinikanaña. Ta xi̱nii̱ na̱ ni̱xi̱ʼi̱, na̱ va̱lí xíʼin na̱ chée, ndítana nu̱ú trono, ta ni̱nuna libro. Ta ni̱nuna inka libro; ña̱yóʼo kúú libro nu̱ú va̱xi ki̱vi̱ na̱ kutaku. Ta na̱ ni̱xi̱ʼi̱ ti̱inna ku̱a̱chi xíʼinna nda̱a̱ táki̱ʼva va̱xiña nu̱ú rollo xa̱ʼa ña̱ ke̱ʼéna”. ¿Ndáa ta̱ kúú ta̱ juez ta̱ níndúʼú nu̱ú ta̱yi̱ yaa yóʼo?

Jehová kúú juez míí ta̱ káʼnu nu̱ú ndiʼi na̱ yiví. Soo ta̱xira chiñu ndaʼa̱ inkana ña̱ tiinna ku̱a̱chi. Tá káchi tutu Hechos 17:31 ta̱ apóstol Pablo ni̱ka̱ʼa̱nra xa̱ʼa Ndióxi̱ ña̱ “nda̱ka̱xinra  iin ki̱vi̱ ña̱ tiinra ku̱a̱chi nda̱kú xíʼin ndiʼi na̱ yiví ta nda̱ka̱xinra iin ta̱ tiinña”. Ta̱ juez yóʼo kúú ta̱ Jesús (Juan 5:22). Soo, ¿ama kixa̱a̱ ki̱vi̱ tiinra ku̱a̱chi ta nda̱saa tiempo kooña?

Tutu Revelación káʼa̱nña siʼna ku̱a̱chi ña̱ naní Armagedón kixi sandiʼi-xa̱ʼa ña̱ kini íyo ñuyǐví yóʼo, saáví kixi ki̱vi̱ tiinra ku̱a̱chi (Revelación 16:14, 16; 19:19–20:3). * Tándi̱ʼi ki̱xi ña̱ Armagedón saá ndasina ta̱ Ndi̱va̱ʼa xíʼin na̱ ta̱chí ndi̱va̱ʼa ini iin ya̱vi̱ naá ta 1,000 ku̱i̱ya̱ kundasina. Ndiʼi tiempo yóʼo na̱ 144,000 na̱ kaʼndachíñu xíʼin ta̱ Jesús chí ndiví tiinna ku̱a̱chi xíʼin na̱ yiví ti̱xin ña̱ 1,000 ku̱i̱ya̱ (Revelación 14:1-3; 20:1-4; Romanos 8:17). Vitin sakuaʼayó ki̱vi̱ ña̱ tiinra ku̱a̱chi su̱ví iin ki̱vi̱ ña̱ 24 hora kúúña. Ña̱yóʼo ti̱xin 1,000 ku̱i̱ya̱ kooña.

Ti̱xin ña̱ 1,000 ku̱i̱ya̱ yóʼo ta̱ Jesús “tiinra ku̱a̱chi xíʼin na̱ táku ta saátu xíʼin na̱ ni̱xi̱ʼi̱” (2 Timoteo 4:1). “Na̱ táku” kúú na̱ yiví na̱ ka̱ku tá ná kixi Armagedón (Revelación 7:9-17). Ta̱ apóstol Juan xi̱nira “na̱ ni̱xi̱ʼi̱ [...] ndítana nu̱ú tíinna ku̱a̱chi”. Táki̱ʼva ni̱ka̱ʼa̱n ta̱ Jesús “na̱ ni̱xi̱ʼi̱ kuniso̱ʼona ta̱chíra ta keena”, ndatakuna (Juan 5:28, 29; Hechos 24:15). Xa̱ʼa ña̱yóʼo, ¿ndáaña kiʼinra kuenta xíʼin tá ki̱vi̱ ná tiinra ku̱a̱chi xíʼinna?

Ña̱ xi̱ni ta̱ apóstol Juan kúúña “ni̱nuna iin libro” ta “na̱ ni̱xi̱ʼi̱ tiinna ku̱a̱chi xíʼinna nda̱a̱ táki̱ʼva va̱xiña nu̱ú rollo xa̱ʼa ña̱ ke̱ʼéna” (Revelación 20:12). Nu̱ú libro yóʼo, ¿á va̱xi ña̱ʼa ke̱ʼéna tá kúma̱níka kuvina? Kǒoña va̱xi. Su̱ví ña̱ ke̱ʼéna tá kúma̱ní kuvina kúú ña̱ koo ku̱a̱chi xa̱ʼa. ¿Nda̱chun va̱ʼa kúnda̱a̱-iniyó su̱ví ña̱yóʼo kúúña? Saáchi Biblia káchiña “na̱ ni̱xi̱ʼi̱ xa̱a̱ cha̱ʼvivana xa̱ʼa ku̱a̱china” (Romanos 6:7). Ta na̱ ndataku kǒoka ku̱a̱china koo xa̱a̱ ndo̱ovaña. Tutu ña̱ nu̱ná ña̱ káʼa̱n tutu Revelación xa̱ʼa nu̱ú ña̱yóʼo kixi ña̱  ka̱ʼa̱n Ndióxi̱ xíʼinyó keʼéyó chí nu̱únínu. Ña̱ va̱ʼa kooyó ndiʼi tiempo, ni na̱ ndataku ni na̱ ka̱ku tá ná kixi Armagedón xíniñúʼu kandíxana ley Ndióxi̱. Nu̱ú tutu ña̱ nu̱ná kixi ña̱ kúni̱ Jehová koo ti̱xin 1,000 ku̱i̱ya̱, ta ley kixi nu̱ú tutu kán kuniñúʼu Ndióxi̱ ña̱ tiinra ku̱a̱chi xíʼin na̱ kundoo ti̱xin ña̱ 1,000 ku̱i̱ya̱.

Ti̱xin ña̱ 1,000 ku̱i̱ya̱ ku̱a̱ʼání na̱ yiví taxi Ndióxi̱ tiempo ndaʼa̱na ña̱ sakuaʼana xa̱ʼa ña̱ kúni̱ra keʼéna. Xa̱ʼa ña̱yóʼo xíniñúʼu koo escuela ña̱ sakuaʼana xa̱ʼa Ndióxi̱ iníísaá ñuyǐví. “Ña̱ nda̱kú sakuaʼa ndiʼi na̱ yiví keʼéna” (Isaías 26:9). Soo su̱ví ndiʼina kutóo keʼé ña̱ kúni̱ Ndióxi̱. Isaías 26:10 káchiña: “Ni ná keʼéna ña̱ va̱ʼa xíʼin na̱ yiví na̱ ndi̱va̱ʼa, ni loʼo kǒo sakuaʼana ña̱ nda̱kú. Ni ná koo ña̱ nda̱kú nu̱ú ñuʼú, ni saáví keʼé tá keʼévana ña̱ ndi̱va̱ʼa, xa̱ʼa ña̱yóʼo va̱ása kunina ña̱ va̱ʼa ña̱ kúúmií Jehová”. Na̱ yiví na̱ ndi̱va̱ʼa-ini ndiʼi-xa̱ʼana tá ki̱vi̱ ná tiin Ndióxi̱ ku̱a̱chi xíʼinna (Isaías 65:20).

Ná ndiʼi 1,000 ku̱i̱ya̱ na̱ yiví na̱ va̱ása níndiʼi-xa̱ʼa “xa̱a̱na nduuna” na̱ kǒoka ku̱a̱chi kúúmií (Revelación 20:5). Ti̱xin 1,000 ku̱i̱ya̱ yóʼo na̱ yiví xa̱a̱na nduuna nda̱a̱ tá ni̱xi̱yo tá xa̱ʼa (1 Corintios 15:24-28). Ta saáví kixi inka prueba ña̱ nu̱ú ndíʼi. Xa̱ʼa ña̱yóʼo nu̱ná ta̱ Ndi̱va̱ʼa ta taxi Ndióxi̱ sándáʼvira na̱ yiví (Revelación 20:3, 7-10). Na̱ yiví na̱ va̱ása níxiin keʼé ña̱ kúni̱ ta̱ Ndi̱va̱ʼa kunina xi̱nu tu̱ʼun ña̱ káʼa̱n Biblia: “Na̱ yiví va̱ʼa kúú na̱ koo nu̱ú ñuʼú, ta ndiʼi tiempo kundoona nu̱úña” (Salmo 37:29). Yóʼo sa̱kuaʼayó ki̱vi̱ tiin Ndióxi̱ ku̱a̱chi xíʼin na̱ yiví iin ki̱vi̱ ña̱ taxira bendición ndaʼa̱ na̱ yiví na̱ ndinuʼu-ini kándíxañaʼá kúúña.