APÉNDICE
Ku̱i̱ya̱ 1914 ni̱xi̱nu iin profecía ña̱ va̱xi nu̱ú Biblia
TÁ KÚMA̱NÍKA kixaʼá ku̱i̱ya̱ 1914, iin grupo loʼo kúú na̱ káʼvi Biblia ta na̱yóʼo xa̱a̱ ya̱chi̱ka ki̱xaʼána káʼa̱nna ña̱ ku̱i̱ya̱ 1914 ku̱a̱ʼání ña̱ʼa kuu. ¿Ndáaña kuu? ¿Ndáa prueba kúú ña̱ náʼa̱ nu̱úyó ña̱ ku̱i̱ya̱ 1914 ku̱a̱ʼá ña̱ ku̱u?
Nu̱ú Lucas 21:24 va̱xi tu̱ʼun ña̱ ni̱ka̱ʼa̱n ta̱ Jesús: ʻJerusalén ndiʼi-xa̱ʼaña. Ta na̱ xáʼndachíñu ñuyǐví yóʼo kaʼndana chiñu ñuu Jerusalén, nda̱a̱ ná xi̱nu tiempo ña̱ ta̱xi Ndióxi̱ ndaʼa̱naʼ. Ndiʼi na̱ se̱ʼe ta̱ David ñuu Jerusalén xi̱xaʼndachíñuna (Salmo 48:1, 2). Síín ni̱xi̱yo na̱ rey yóʼo nu̱ú na̱ inka rey, saáchi na̱yóʼo ni̱xi̱yona nu̱ú “trono Jehová”, ña̱yóʼo kúni̱ kachiña miíra xi̱taxi kaʼndachíñuna (1 Crónicas 29:23). Ña̱kán, Jerusalén yóʼo xi̱ndakiʼinña nu̱ú gobierno Jehová.
¿Ama kúú ña̱ ki̱xaʼá na̱ ñuyǐví xáʼndachíñuna nu̱ú na̱ ñuu Jerusalén? Ña̱yóʼo ku̱uña tá ku̱i̱ya̱ 607 tiempo xi̱naʼá (t. x.), tá sa̱ndíʼi-xa̱ʼa na̱ ñuu Babilonia ñuu Jerusalén. Ta ñuu Jerusalén kǒo níxi̱yoka rey kaʼndachíñu táki̱ʼva xi̱xaʼndachíñu ta̱ David (2 Reyes 25:1-26). ¿Á ndiʼi tiempo kaʼndachíñu na̱ ñuyǐví nu̱ú na̱ ñuu Jerusalén? Su̱ví ndiʼi tiempoví, saáchi nu̱ú libro ta̱ Ezequiel xa̱ʼndana chiñu yóʼo nu̱ú ta̱ Sedequías ta̱ rey ñuu Jerusalén: “Sakutaʼa ti̱ko̱to̱ ña̱ núʼni xi̱nína ta tavá corona. Ña̱yóʼo [...] ni iinna kǒo ndakiʼinña nda̱a̱ ná kixi ta̱ íyo derecho ndakiʼinña, ta ndaʼa̱ ta̱yóʼo taxii̱ña” (Ezequiel 21:26, 27). Ta̱ íyo derecho ndakiʼin corona ta̱ David, kúú ta̱ Jesucristo (Lucas 1:32, 33). Tá ná kixaʼá ta̱ Jesús kaʼndachíñura va̱ása kaʼndachíñuka na̱ ñuyǐví ñuu Jerusalén.
¿Ama ku̱u ña̱yóʼo? Ta̱ Jesús ni̱ka̱ʼa̱nra na̱ va̱ása kúú judío kaʼndachíñuna loʼo tiempo. Nu̱ú capítulo 4 ña̱ libro ta̱ Daniel káʼa̱nña nda̱saa tiempo koo ña̱yóʼo. Ta káʼa̱nña xa̱ʼa iin xa̱ni ña̱ ni̱xaní ta̱ rey Nabucodonosor ta̱ ñuu Babilonia. Ni̱xaníra xi̱nira xáʼndana iin yitu̱n káʼnu. Va̱ása níxaʼnda níínanú sa̱ndákoona xa̱ʼanú ta katúnnaña xíʼin iin ka̱a ña̱ va̱ʼa ná koo kuaʼnukanú. Tándi̱ʼi iin ta̱ ángel ni̱ka̱ʼa̱nra: ‘ná ya̱ʼa u̱xa̱ tiempo kunuʼninú’ (Daniel 4:10-16).
Nu̱ú Biblia, sava yichi̱ tá káʼa̱nña xa̱ʼa yitu̱n su̱ví ndixa yitu̱n káʼa̱nña xa̱ʼa chi xa̱ʼa na̱ gobierno káʼa̱nña (Ezequiel 17:22-24; 31:2-5). Ña̱ káʼa̱nña xa̱ʼa ña̱ ni̱taʼnda tú yitu̱n kúni̱ kachiña ña̱ va̱ása kaʼndachíñuka na̱ rey na̱ ñuu Jerusalén, ti̱xin ña̱ “u̱xa̱ tiempo”. ¿Nda̱saa ku̱i̱ya̱ kuu ña̱yóʼo?
Revelación 12:6, 14 káʼa̱nña u̱ni̱ tiempo sava “1,260 ki̱vi̱”, kúúña. Ña̱kán “u̱xa̱ tiempo” 2,520 ki̱vi̱ kúúña. Soo na̱ ñuyǐví su̱ví 2,520 kuití ki̱vi̱ níxaʼndachíñuna ñuu Jerusalén. Ña̱kán ku̱a̱ʼákava tiempo káʼa̱nña xa̱ʼa. Tá ná ndukúyó Números 14:34 xíʼin Ezequiel 4:6 kuniyó u̱vi̱ saá texto káʼa̱nña xíʼinyó ndáa ki̱ʼva kaʼviyóña: “iin ki̱vi̱ koo iin ku̱i̱ya̱”. Tá ná taváyó cuenta xíʼinña “u̱xa̱ tiempo” kúúña 2,520 ku̱i̱ya̱.
Ku̱i̱ya̱ ña̱ káʼa̱nyó xa̱ʼa yóʼo ki̱xaʼáña octubre ña̱ 607 t.x., tá ka̱ni táʼan na̱ ñuu Babilonia xíʼin na̱ ñuu Jerusalén saá kúúña va̱ása níxaʼndachíñuka na̱ se̱ʼe ta̱ rey David, ta ndi̱ʼiña octubre ku̱i̱ya̱ 1914. Tasaá kúú ña̱ ndi̱ʼi tiempo na̱ ñuyǐví yóʼo ta ki̱xaʼá xáʼndachíñu ta̱ Jesús (Salmo 2:1-6; Daniel 7:13, 14). *
Ta̱ Jesús ni̱ka̱ʼa̱nra tá ná kixaʼára kaʼndachíñura ku̱a̱ʼání ña̱ʼa kuniyó, guerra, so̱ko, ta̱an ta koo kue̱ʼe̱ (Mateo 24:3-8; Lucas 21:11). Ndiʼi ña̱yóʼo náʼa̱ nu̱úyó ña̱ 1914 saá ki̱xaʼára xáʼndachíñura ta saá ki̱xaʼá ki̱vi̱ nu̱ú ndíʼi (2 Timoteo 3:1-5).
^ párr. 4 Octubre ña̱ ku̱i̱ya̱ 607 t.x. nda̱a̱ octubre ña̱ ku̱i̱ya̱ 1 t.x. xa̱a̱ ku̱a̱ʼa̱n 606 ku̱i̱ya̱. Octubre ña̱ ku̱i̱ya̱ 1 t.x. xíʼin octubre ña̱ ku̱i̱ya̱ 1 t.v. ni̱ya̱ʼa tuku inka ku̱i̱ya̱, (chi kǒo ku̱i̱ya̱ cero). Ta ku̱i̱ya̱ 1 nda̱a̱ ku̱i̱ya̱ 1914 ni̱ya̱ʼa 1913 ku̱i̱ya̱. Ta ná taváyó cuenta xíʼin ña̱ (606+1+1913) kúúña 2,520 ku̱i̱ya̱. Tá kúni̱kaún kunda̱a̱-iniún ña̱ ndixa ndi̱ʼi-xa̱ʼa ñuu Jerusalén ña̱ ku̱i̱ya̱ 607 t.x., kaʼvi artículo “Cronología” ña̱ va̱xi nu̱ú enciclopedia Perspicacia para comprender las Escrituras, ña̱ ta̱vá na̱ testigo Jehová.
