1, 2. ¿Ndáana va̱ʼa chindeé miíyó?

NDAKANIXI̱NÍ ña̱ ku̱a̱ʼún iin ñuu, ta ki̱xaʼá ndátaka vi̱kó ña̱ ndeéní koon sa̱vi̱. Iin ki̱xaʼá káni taxa chí ndiví, ta ndeéní ndáʼyi̱ sa̱vi̱. Saá xínún ku̱a̱ʼún nandukún nu̱ú kusáviún, tá nda̱ni̱ʼún nu̱ú kusáviún ni̱kusi̱íkaví-iniún.

² Ña̱ tiempo ndóoyó vitin ku̱a̱ʼání tu̱ndóʼo íyo, chi ñuyǐví yóʼo ku̱a̱ʼání ña̱ xíniyó. Soo íyo iin ña̱ va̱ʼa sakáku miíyó, ña̱yóʼo va̱ʼaní chindeéña miíyó. ¿Ndáaña kúúña? Ná kotoyó ña̱ káʼa̱n Biblia: “Ka̱ʼi̱n xíʼin Jehová: ‘Yóʼó kúú Ndióxi̱ ta chíndeún yi̱ʼi̱, ta yi̱ʼi̱ kándíxai̱ yóʼó’” (Salmo 91:2).

3. ¿Ndáaña xíniñúʼu keʼéyó ña̱ va̱ʼa chindeé Jehová miíyó?

³ Jehová, ta̱ i̱xava̱ʼa ndiʼi ña̱ʼa, ta̱yóʼo kúú ta̱ káʼnu nu̱ú ndiʼina. Ta kivi chindeéra  miíyó nda̱a̱ ndáaka tu̱ndóʼo ndóʼoyó chi kúúmiíra ndée. Ni kúndi̱va̱ʼana xíʼinyó á nda̱a̱ ndáaka ña̱ ndóʼoyó, Jehová chindeéra miíyó. ¿Ndáaña keʼéyó ña̱ va̱ʼa chindeéra miíyó? Ná kandíxayóra xíʼin ndinuʼu-iniyó. Chi Biblia káʼa̱nña xíʼinyó: “Kuʼvi̱-inindó kunindó Ndióxi̱” (Judas 21). Xa̱ʼa ña̱yóʼo ná kuʼvi̱-iniyó kuniyóra ta va̱ʼaní kutáʼanyó xíʼinra. Tá ná keʼéyó ndiʼi ña̱yóʼo, Ndióxi̱ chindeéra miíyó nu̱ú tu̱ndóʼo. Soo, ¿ndáaña xíniñúʼu keʼéyó ña̱ va̱ʼa kutáʼanyó xíʼinra?

4, 5. ¿Ndáaña kúú sava ña̱ náʼa̱ Ndióxi̱ nu̱úyó ña̱ kúʼvi̱-inira xínira miíyó?

⁴ Xa̱ʼa ña̱ kúʼvi̱-ini Jehová xínira miíyó ku̱a̱ʼání ña̱ʼa kéʼéra xa̱ʼayó. Yóʼo sakuaʼayó xa̱ʼa savaña chi ña̱yóʼo chindeé miíyó ña̱ kuʼvi̱ka-iniyó kuniyóra. Ndakanixi̱ní xa̱ʼa sava ña̱ sákuaʼún nu̱ú libro yóʼo. Jehová kúni̱ra va̱ʼa kooyó, xa̱ʼa ña̱yóʼo táxira ti̱kui̱í ndaʼa̱yó, táxira ña̱ xíxiyó, i̱xava̱ʼara ñuʼú nu̱ú kooyó, táxira kití ta ku̱a̱ʼáka ña̱ʼa táxira. Ta̱xitura Biblia ña̱ va̱ʼa kunda̱a̱-iniyó xa̱ʼara, nda̱saa naníra ta saátu sakuaʼayó xa̱ʼa ndiʼi ña̱ va̱ʼa kúúmiíra. Ta káʼa̱nña ña̱ chi̱ndaʼára se̱ʼera ki̱xira nu̱ú ñuʼú ta ni̱xi̱ʼi̱ra xa̱ʼa ku̱a̱chiyó (Juan 3:16). Xíʼin ña̱yóʼo ni̱na̱ʼa̱ra ña̱ kúʼvi̱ní-inira xínira miíyó, tá kándíxayó se̱ʼera va̱ʼa xa̱a̱yó kutakuyó ndiʼi tiempo.

⁵ Ña̱ va̱ʼa kooyó ndiʼi tiempo nu̱ú ñuʼú, Jehová chi̱ndúʼúra iin Reino chí ndiví. Ta Reino yóʼo sandiʼi-xa̱ʼaña ndiʼi tu̱ndóʼo nu̱ú ñuʼú yóʼo ta nduuña iin ñuʼú livi nu̱ú kooyó. Tasaá si̱íkaví kundooyó chi kǒoka ku̱a̱chi koo (Salmo 37:29). Nani ndátuyó ña̱ kixa̱a̱ ki̱vi̱ kán, vitinka xa̱a̱ táxi Ndióxi̱ consejo ndaʼa̱yó ña̱ va̱ʼa kundooyó. Jehová ta̱xira inka ña̱ va̱ʼa ndaʼa̱yó, ña̱yóʼo kúú: ña̱  oración, ña̱ va̱ʼa ka̱ʼa̱nyó xíʼinra. Ña̱yóʼo kúú sava ña̱ náʼa̱ra nu̱úyó ña̱ kúʼvi̱-inira xínira miíyó ta saátu ndiʼi na̱ yiví.

6. ¿Ndáaña keʼún ña̱ va̱ʼa na̱ʼún ña̱ kúʼvi̱-iniún xíniún Ndióxi̱ xa̱ʼa ña̱ kúʼvi̱-inira xínira yóʼó?

⁶ Vitin ndakanixi̱ní xa̱ʼa ña̱yóʼo: “¿Ndáaña keʼún xa̱ʼa ña̱ kúʼvi̱-ini Jehová xínira yóʼó?”. Ku̱a̱ʼání na̱ yiví sana kachina saá: “Xíniñúʼu kuʼvi̱-inii̱ kunira”. ¿Á saá ndákanixi̱níún? Ta̱ Jesús ni̱ka̱ʼa̱nra xa̱ʼa iin ley ña̱ káʼnuka: “Xíniñúʼu kuʼvi̱-iniún kuniún Jehová Ndióxi̱ún xíʼin ndiʼi níma̱ún xíʼin ndiʼi ña̱ tákún xíʼin ndiʼi xi̱níún” (Mateo 22:37). Íyo ku̱a̱ʼá ña̱ keʼún xa̱ʼa Jehová xa̱ʼa ña̱ kúʼvi̱-iniún xíniúnra. Ña̱ va̱ʼa kuʼvi̱-iniún kuniúnra xíʼin ndiʼi níma̱ún xíʼin ndiʼi ña̱ tákún ta xíʼin ndiʼi xi̱níún, ¿á va̱ʼa ka̱ʼa̱n kuitíún ña̱ kúʼvi̱-iniún xíniúnra?

7. ¿Á va̱ʼa ka̱ʼa̱n kuitíyó ña̱ kúʼvi̱-iniyó xíniyó Ndióxi̱?

⁷ Ña̱ Biblia káʼa̱nña xíʼinyó xa̱ʼa ña̱ kúʼvi̱-iniyó xíniyó Ndióxi̱, su̱ví ña̱ ka̱ʼa̱n kuitíyó kúúña. Ña̱ ndáyáʼviní kúú ña̱ ná kuniso̱ʼoyó ña̱ káʼa̱nra. Ña̱ va̱ʼa kunda̱a̱-iniyó xa̱ʼa ña̱yóʼo, ná ka̱ʼa̱nyó xa̱ʼa iin manzana: ná kachiyó kúni̱ún kaxíún iin manzana, ¿á kúsi̱í-iniún ná taxina iin si̱ʼva̱ loʼorí ndaʼún? Va̱ása kutóún saá. Chi si̱ʼva̱ loʼo yóʼo su̱ví manzana kúúrí iin si̱ʼva̱ loʼo kuitíva kúúña, soo yóʼó manzanava kúni̱ún. Ki̱ʼva saá kúni̱ Jehová xíʼinyó ná na̱ʼa̱yó ña̱ ndixa kúʼvi̱-iniyó xíniyóra xíʼin ña̱ kéʼéyó. Biblia káʼa̱nña: “Ña̱yóʼo kúni̱ kachiña ña̱ kúʼvi̱-iniyó xíniyó Ndióxi̱: ña̱ ná kandíxayó chiñu xáʼndara ta chiñu xáʼndara su̱ví ña̱ yo̱ʼvi̱ kúúña”, kúni̱ kachiña su̱ví ña̱ ve̱e kúúña (1 Juan 5:3). Tasaá na̱ʼa̱yó xíʼin ña̱ kéʼéyó ña̱ kúʼvi̱-iniyó xíniyóra (kaʼvi Mateo 7:16-20).

8, 9. ¿Ndáaña keʼéyó tá ndixa kúʼvi̱-iniyó xíniyó Ndióxi̱?

 ⁸ Náʼa̱yó ña̱ kúʼvi̱-iniyó xíniyó Ndióxi̱ tá xíniso̱ʼoyó consejo ña̱ káʼa̱nra xíʼinyó ta saátu tá kéʼéyóña. Ña̱yóʼo su̱ví ña̱ yo̱ʼvi̱ kúúña, va̱ʼava kuniso̱ʼoyóña. Chi ña̱yóʼo va̱ʼaní chindeéña miíyó ta si̱íní kooyó (Isaías 48:17, 18). Tá kéʼéyó ña̱ káʼa̱n Jehová xíʼinyó saá náʼa̱yó ña̱ ndixa kúsi̱í-iniyó xíʼin ndiʼi ña̱ táxira ndaʼa̱yó. Soo su̱ví ndiʼi na̱ yiví kéʼé ña̱yóʼo, miíyó kǒo kúni̱yó kooyó táki̱ʼva ni̱xi̱yo na̱ yiví na̱ xi̱ndoo tiempo ta̱ Jesús. Saáchi iin yichi̱ ta̱ Jesús sa̱ndáʼara u̱xu̱ na̱ xi̱kuumií kue̱ʼe̱ lepra, soo iinlá ta̱yóʼo ndi̱kó ta̱xi tixaʼvi ndaʼa̱ra (Lucas 17:12-17). Ta miíyó kúni̱yó keʼéyó táʼan ña̱ ke̱ʼé ta̱yóʼo, kǒo keʼéyó táʼan ña̱ ke̱ʼé sava na̱ kǒo nítaxi tixaʼvi ndaʼa̱ra.

⁹ ¿Ndáa chiñu xáʼnda Jehová nu̱úyó xíniñúʼu kuniso̱ʼoyó? Sava ña̱ xa̱a̱ sa̱kuaʼayó nu̱ú libro yóʼo. Soo ná ka̱ʼa̱n tukuyó xa̱ʼa savaña, chi tá kéʼéyó ña̱ káʼa̱n Ndióxi̱ xíʼinyó, saá va̱ása yo̱ʼvi̱ kooña nu̱úyó ña̱ kuʼvi̱ka-iniyó kuniyóra.

10. ¿Nda̱chun xíniñúʼu sakuaʼakayó xa̱ʼa Jehová?

¹⁰ Ná sakuaʼa va̱ʼayó xa̱ʼa Jehová ña̱ va̱ʼa kuyatinkayó nu̱úra. Kǒo sándákooyó ña̱ sakuaʼayó xa̱ʼara. Ná kachiyó ña̱ ndíka̱a̱yó yuku̱ ta ñu̱ú kúúña ta vi̱xinkaví, tasaá ki̱xaʼáyó ndákaʼmiyó ñuʼu̱ ña̱ ndasaayó. ¿Á taxiyó nda̱ʼva ñuʼu̱ yóʼo? Va̱ása taxiyó nda̱ʼvaña, saáchi ña̱ keʼéyó kúúña taánkayó titu̱n ña̱ va̱ʼa kokonú, tá kǒo chi sana kuviyó xíʼin kaxin. Táki̱ʼva íyo titu̱n yóʼo táxinú ñuʼu̱ ndásaayó ki̱ʼva saá íyo ña̱ sákuaʼayó xa̱ʼa Ndióxi̱ chi ña̱yóʼo chíndeé miíyó ña̱ kuʼvi̱ka-iniyó kuniyóra (Proverbios 2:1-5).

11. ¿Á va̱ʼa na̱kunda̱a̱-ini na̱ discípulo tá ni̱ka̱ʼa̱n ta̱ Jesús xíʼinna?

¹¹ Ta̱ Jesús xi̱kuni̱ra ná kuʼvi̱ní-ini na̱ xi̱ndiku̱nñaʼá kunina Jehová. Tá nda̱taku ta̱ Jesús ni̱ka̱ʼa̱nra xíʼin u̱vi̱ na̱ discípulo xa̱ʼa profecía ña̱ ni̱xi̱nu xa̱ʼara ña̱ va̱xi nu̱ú Escrituras Hebreas. ¿Á chi̱ndeé ña̱yóʼo na̱ discípulo? Chi̱ndeévañana chi miína ni̱ka̱ʼa̱n: “¿Á su̱ví tá na̱túʼunra xíʼinyó tá va̱xiyó yichi̱, nda̱a̱ níma̱yó ni̱xa̱a̱ña tá nda̱kanira tu̱ʼun Ndióxi̱ nu̱úyó?” (Lucas 24:32).

12, 13. a) ¿Á kúʼvi̱-ini na̱ yiví na̱ ndóo tiempo vitin xínina Ndióxi̱ xíʼin ña̱ sánáʼa̱ Biblia? b) ¿Ndáaña keʼéyó ña̱ va̱ʼa kǒo sándákooyó kuʼvi̱-iniyó kuniyó Ndióxi̱?

¹² Tá ki̱xaʼún sákuaʼún ña̱ sánáʼa̱ Biblia, sana ni̱kusi̱íkaví-iniún ta ki̱xaʼún kéʼún ña̱ kúni̱ Ndióxi̱. Ku̱a̱ʼánína kúsi̱í-inina tá kíxaʼána sákuaʼana xa̱ʼara. Soo tá yáʼa tiempo saá íxayo̱ʼvi̱ña xíʼinyó keʼéyó ña̱ kúni̱ra. Ná kǒo keʼéyó táʼan ña̱ kéʼé na̱ yiví na̱ ndóo tiempo vitin, chi na̱yóʼo kúú na̱ ni̱ka̱ʼa̱n ta̱ Jesús xa̱ʼa: ‘Ku̱a̱ʼání na̱ yiví va̱ása kuʼvi̱ka-inina kunina Ndióxi̱’ (Mateo 24:12). ¿Ndáaña xíniñúʼu keʼéyó ña̱ ná kǒo sándákooyó ña̱ kuʼvi̱-iniyó kuniyó Jehová xíʼin ña̱ sánáʼa̱ Biblia?

¹³ Va̱ása sandákoún ña̱ sakuaʼakaún xa̱ʼa Jehová xíʼin xa̱ʼa ta̱ Jesucristo (Juan 17:3). Ndakanixi̱ní xa̱ʼa ña̱ káʼviún  nu̱ú Biblia ta ndakanixi̱ní xa̱ʼa ña̱yóʼo: “¿Ndáaña sánáʼa̱ ña̱yóʼo yi̱ʼi̱ xa̱ʼa Jehová? ¿Á sánáʼa̱ña yi̱ʼi̱ ña̱ kuʼvi̱ka-inii̱ kunii̱ Jehová xíʼin ndiʼi níma̱i̱, xíʼin ndiʼi xi̱níi̱ xíʼin ndiʼi ña̱ tákui̱?” (kaʼvi 1 Timoteo 4:15). Tá ná ndakanixi̱níún xa̱ʼa ña̱yóʼo ndiʼi tiempo kuʼvi̱ka-iniún kuniún Jehová.

14. ¿Nda̱chun xíniñúʼu ka̱ʼa̱nyó xíʼin Jehová tasaá na̱ʼa̱yó ña̱ kúʼvi̱-iniyó xíniyóra?

¹⁴ Inka ña̱ va̱ʼa chindeé miíyó ña̱ kuʼvi̱-iniyó kuniyó Jehová kúúña ná ka̱ʼa̱n ni̱ʼiníyó xíʼinra (1 Tesalonicenses 5:17). Nu̱ú capítulo 17 xa̱a̱ sa̱kuaʼayó ña̱ ndáyáʼviní ka̱ʼa̱nyó xíʼin Ndióxi̱. Ña̱ va̱ʼa kutáʼanyó xíʼin na̱ yiví xíniñúʼu natúʼunyó xíʼinna ndiʼi ki̱vi̱ ta ka̱ʼa̱nyó nina ña̱ nda̱a̱ xíʼinna. Ta saátu ña̱ va̱ʼa kutáʼanyó xíʼin Jehová xíniñúʼu ka̱ʼa̱nyó xíʼinra ndiʼi tiempo. Ná chika̱a̱yó ndée ña̱ viíní ndakanixi̱níyó xa̱ʼa ña̱ ka̱ʼa̱nyó xíʼinra; va̱ása va̱ʼa tuku ta tuku ka̱ʼa̱nyó tu̱ʼun ña̱ xa̱a̱ ni̱ka̱ʼa̱nyó xíʼinra. Ná ka̱ʼa̱nyó xíʼin Jehová táki̱ʼva káʼa̱n iin ta̱ loʼo xíʼin yivára. Tá kéʼéyó oración nu̱úra to̱ʼóní ná ka̱ʼa̱nyó xíʼinra, xíʼin ndinuʼu-iniyó ná ka̱ʼa̱nyó xíʼinra (Salmo 62:8). Xa̱ʼa ña̱ va̱ʼa ndasakáʼnuyóra xíniñúʼu kaʼvi ni̱ʼiyó Biblia ta ka̱ʼa̱nyó xíʼinra. Tá ná keʼéyó ña̱yóʼo saá kuʼvi̱ka-iniyó kuniyóra.

15, 16. ¿Nda̱chun xíniñúʼu kundayáʼviña nu̱úyó ña̱ nátúʼunyó xa̱ʼa Reino Ndióxi̱ xíʼin na̱ yiví?

¹⁵ Ndásakáʼnuyó Jehová tá káʼviyó Biblia ta kéʼéyó oración nu̱úra, ta ña̱yóʼo sava kéʼé mitúʼunvayóña. Vitin ná ka̱ʼa̱nyó xa̱ʼa sava ña̱ kéʼéyó xíʼin na̱ yiví. ¿Á xa̱a̱ nátúʼún xíʼin savana xa̱ʼa ña̱ sákuaʼún nu̱ú Biblia? Tá xa̱a̱ nátúʼún xíʼinna va̱ʼaní ña̱ kéʼún (Lucas 1:74). Tá nátúʼunyó xíʼin inkana xa̱ʼa ña̱ sákuaʼayó xa̱ʼa Jehová, sáxínuyó ña̱ ni̱ka̱ʼa̱n ta̱ Jesús: ña̱ natúʼunyó tu̱ʼun va̱ʼa xa̱ʼa Reino Ndióxi̱ (kaʼvi Mateo 24:14; 28:19, 20).

 ¹⁶ Ta̱ apóstol Pablo ndeéní xi̱ndi̱ʼi̱-inira ña̱ ku̱ʼu̱nra natúʼunra xíʼin na̱ yiví xa̱ʼa Ndióxi̱ (2 Corintios 4:7). Ña̱ natúʼunyó xa̱ʼa Jehová xíʼin xa̱ʼa ndiʼi ña̱ kúni̱ra keʼéra iin ña̱ va̱ʼaní kúú ña̱yóʼo, chi nu̱ú ta̱yóʼo káchíñuyó ta taxira bendición ndaʼa̱yó. Tá nátúʼunyó xíʼin na̱ yiví xa̱ʼa Ndióxi̱  saá chíndeéyóna ña̱ sakuaʼana xa̱ʼara ta va̱ʼa xa̱a̱na kutakuna ndiʼi tiempo. ¿Á íyoka inka chiñu káʼnu keʼéyó nu̱ú ña̱yóʼo? Tá nátúʼunyó xa̱ʼa Jehová saá ndeéka kándíxayóra ta kúʼvi̱ka-iniyó xíniyóra. Ta ndiʼi ña̱ kéʼéyó Jehová kíʼinra kuenta xíʼinña (Hebreos 6:10). Tá kée ni̱ʼiyó nátúʼunyó xa̱ʼara ña̱yóʼo chíndeé miíyó ta kúʼvi̱ka-iniyó xíniyóra (kaʼvi 1 Corintios 15:58).

17. ¿Nda̱chun iin chiñu númi̱ kúú ña̱ ku̱ʼu̱nyó natúʼunyó xíʼin na̱ yiví xa̱ʼa Ndióxi̱?

¹⁷ Ná ndakaʼányó chi ña̱ nátúʼunyó xa̱ʼa Reino Ndióxi̱ iin chiñu númi̱ kúú ña̱yóʼo. Biblia káchiña: “Ka̱ʼa̱n xíʼinna xa̱ʼa tu̱ʼun Ndióxi̱, ña̱yóʼoka kundi̱ʼi̱-iniún xa̱ʼa” (2 Timoteo 4:2). ¿Nda̱chun iin chiñu númi̱ kúú ña̱yóʼo tiempo vitin? Xa̱ʼa ña̱ káʼa̱n Biblia: “Ña̱ ki̱vi̱ káʼnu Jehová xa̱a̱ yatin va̱xiña. Xa̱a̱ yatin va̱xiña, ná kundi̱ʼi̱-iniyó xa̱ʼaña” (Sofonías 1:14). Ña̱ nda̱a̱ kúúña xa̱a̱ kúyatin ki̱vi̱ ña̱ sandiʼi-xa̱ʼa Jehová ña̱ ñuyǐví yóʼo. Na̱ yiví xíniñúʼu kunda̱a̱-inina xa̱ʼaña, chi vitin kúú ña̱ xíniñúʼu kuniso̱ʼona ña̱ káʼa̱n Jehová ña̱ va̱ʼa ka̱kuna (Habacuc 2:3).

18. ¿Nda̱chun xíniñúʼu ndatakayó ña̱ ndasakáʼnuyó Jehová xíʼin na̱ ndásakáʼnu-ñaʼá?

¹⁸ Jehová kúni̱ra ná ndasakáʼnuyóra xíʼin na̱ ndátaka xíʼinyó. Xa̱ʼa ña̱yóʼo káchi Biblia saá: “Ná kundi̱ʼi̱-iniyó xa̱ʼa táʼanyó ta ná kuʼvi̱ka-iniyó kuni táʼanyó ta keʼéyó ña̱ va̱ʼa xíʼin táʼanyó, ta kǒo sándákooyó ña̱ ndatakayó, táki̱ʼva íxaa inkana, ná taxikayó ndée ndaʼa̱ táʼanyó, saáchi vitin xa̱a̱ kúyatin kixa̱a̱ ki̱vi̱” (Hebreos 10:24, 25). Tá ndátakayó reunión xíʼin na̱ ñaniyó á ku̱ʼvayó saá kúú ña̱ ndásakáʼnuyó yiváyó Jehová. Ta saátu chíka̱a̱yó ndée táʼanyó.

19. ¿Ndáaña xíniñúʼu keʼéyó ña̱ va̱ʼa kutáʼankayó xíʼin na̱ ndásakáʼnu Ndióxi̱?

¹⁹ Tá ndátakayó xíʼin na̱ ndásakáʼnu Jehová saá chíka̱a̱yó ndée táʼanyó ti̱xin congregación. Soo ná kiʼinyó  kuenta xíʼin ña̱ va̱ʼa kéʼévana táki̱ʼva íxaa Jehová xíʼinyó. Va̱ása kundatuyó ña̱ ndiʼi ña̱ kéʼéna nina ña̱ va̱ʼa kooña. Saáchi ndiʼiyó kúú na̱ yiví ku̱a̱chi ta kéʼéyó ña̱ va̱ása va̱ʼa sava yichi̱. Savayó kama sákuaʼayó xa̱ʼa Ndióxi̱ ta savayó kúeeva sákuaʼayó (kaʼvi Colosenses 3:13). Ná kutáʼanyó xíʼin na̱ chíka̱a̱ ndée sákuaʼa xa̱ʼa Jehová tasaá nda̱a̱ miíyó kutu̱ʼvaka. Tá ndásakáʼnuyó Jehová xíʼin na̱ ndásakáʼnu-ñaʼá saá kuʼvi̱ka-iniyó kuniyóra. Ná kotoyó ndáa ña̱ va̱ʼa ndakiʼin na̱ ndásakáʼnu Jehová tá kúʼvi̱-inina xíninara.

20, 21. ¿Ndáa ki̱ʼva kooyó chí nu̱únínu?

²⁰ Iin ña̱ va̱ʼa ña̱ táxi Jehová ndaʼa̱ na̱ káchíñu nu̱úra kúú ña̱ va̱ʼa ndóona. Ku̱a̱ʼáníyó káchiyó va̱ʼaní ndóoyó saáchi xíxiyó ta xíʼiyó, tasaá kusi̱í-iniyó ndóoyó. Soo Biblia káchiña va̱ása va̱ʼa ndóoyó tiempo vitin, xa̱ʼa ña̱yóʼo ni iinyó kǒo kívi ka̱ʼa̱n ña̱ va̱ʼaní ndóoyó.

²¹ Biblia káʼa̱nña xíʼin ndiʼiyó ña̱ kivi ‘xa̱a̱yó kutakuyó ndiʼi tiempo’ (1 Timoteo 6:19). Ña̱ káʼa̱nña xa̱ʼa yóʼo kúú ña̱ xa̱a̱yó kooyó chí nu̱únínu ta kǒo kuvikayó. Tasaá va̱ása kookayó na̱ yiví ku̱a̱chi ta va̱ʼa kundooyó, ta kooyó táki̱ʼva xi̱kuni̱ Ndióxi̱ tá xa̱ʼa. Tá ná kixa̱a̱ tiempo ña̱ kooyó nu̱ú ñuʼú livi, kǒo kuumiíkayó kue̱ʼe̱, kǒoka ku̱a̱chi kundoʼoyó, ta si̱íkaví kundooyó, ña̱yóʼo kúni̱ kachiña kooyó ndiʼi tiempo (1 Timoteo 6:12). Livikaví kooyó nu̱ú ñuyǐví xa̱á, ¿á kútóún koún nu̱úña?

22. ¿Ndáaña xíniñúʼu keʼún ña̱ va̱ʼa xa̱ún kutakún ndiʼi tiempo?

²² ¿Ndáaña xíniñúʼu keʼé iinna ña̱ va̱ʼa ‘xa̱a̱na kutakuna ndiʼi tiempo’? Ta̱ Pablo ni̱ka̱ʼa̱nra xíʼin na̱ cristiano ná keʼéna “nina ña̱ va̱ʼa” (1 Timoteo 6:18). Vitin miíyó xíniñúʼu ndakanixi̱níyó xa̱ʼa ña̱ káʼa̱n Biblia á keʼéyóña. Soo,  ¿á ña̱ ni̱ka̱ʼa̱n ta̱ Pablo xa̱ʼa kúni̱ kachiña ná keʼéyó ña̱ va̱ʼa ta xa̱a̱yó kutakuyó ndiʼi tiempo? Su̱ví ña̱yóʼo kúni̱ kachiña, ña̱ va̱ʼa xa̱a̱yó kooyó chí nu̱únínu iinlá Ndióxi̱ xíni̱ xa̱ʼaña (Romanos 5:15). Soo, Jehová kúsi̱í-inira taxira ña̱ va̱ʼa ndaʼa̱ na̱ ndásakáʼnu-ñaʼá. Ta kúni̱ra xa̱ún koún ndiʼi tiempo ta kǒoka tu̱ndóʼo ndoʼún. Ña̱yóʼo kúú ña̱ kúni̱ Ndióxi̱ taxira ndaʼa̱ na̱ kúʼvi̱-ini xíniñaʼá.

23. ¿Ndáa ña̱ va̱ʼa ndakiʼinyó xa̱ʼa ña̱ ndásakáʼnuyó Ndióxi̱?

²³ Iin iinyó xíniñúʼu ndakanixi̱ní ña̱yóʼo: “¿Á ndásakáʼnuyó Jehová táki̱ʼva káʼa̱n Biblia?”. Tá ndiʼi ki̱vi̱ ndásakáʼnuyóra kúni̱ káchiña ña̱ va̱ʼa kúú ña̱ kéʼéyó, chi kándíxayóra ña̱ va̱ʼa ndáara miíyó. Tasaá ndáatura na̱ ñuura nu̱ú ñuyǐví kini yóʼo, ta taxira ñuyǐví xa̱á kundooyó ta kusi̱íní-iniyó kundooyó nu̱úña. Ta kúsi̱íkaví-iniyó ña̱ ndásakáʼnuyóra tiempo vitin. Tá ndásakáʼnún Jehová vitin, kusi̱íka-iniún ndasakáʼnúnra chí nu̱únínu, chi saá taxira koún ndiʼi tiempo táki̱ʼva xi̱kuni̱ra tá xa̱ʼa.