1, 2. ¿Nda̱chun ndáka̱tu̱ʼunyó sava yichi̱?

¿Á XA̱A̱ xíniún ku̱a̱ʼání ña̱ʼa ndáka̱tu̱ʼun na̱ va̱lí? Tá xa̱a̱ sákuaʼana káʼa̱nna kíxaʼána ndáka̱tu̱ʼunna. Iin ndákunana nduchúnu̱úna ta xíto va̱ʼana nu̱úyó, ta káchina: “¿Nda̱chun va̱ása kívi ka̱ʼa̱n kití?”, “¿Yukú na̱ íyo chí ndiví?” á “¿Nda̱chun ndáchí tí saa?”. Ni va̱ʼaní ndákuiinyó yuʼúna ni saáví kíxaʼá tukuna ndáka̱tu̱ʼunna xa̱ʼa inka ña̱ʼa.

² Ta su̱ví na̱ va̱lí kuití kúú na̱ ndáka̱tu̱ʼun. Ndiʼiyó tá xáʼnuyó ku̱a̱ʼa̱nyó kǒo sándákoovíyó ña̱ ndáka̱tu̱ʼunyó, sava ndáka̱tu̱ʼunyó ña̱ va̱ʼa xa̱a̱yó nu̱ú kúni̱yó ku̱ʼu̱nyó, ndáka̱tu̱ʼunyó ña̱ ná kǒo ndoʼoyó iin tu̱ndóʼo, savatu kúni̱ kuitíyó kunda̱a̱-inivayó. Soo íyo ku̱a̱ʼáka ña̱ʼa ña̱ ndáyáʼvi kunda̱a̱-iniyó xa̱ʼa, ta ku̱a̱ʼání na̱ yiví va̱ása ndáka̱tu̱ʼunna xa̱ʼaña. Ni ndáka̱tu̱ʼunvana miína soo kǒo nándukúkana xa̱ʼaña ña̱ va̱ʼa kunda̱a̱-inina xíʼinña.

3. ¿Nda̱chun kǒo xíín savana nda̱ka̱tu̱ʼunna ña̱ va̱ʼa kunda̱a̱-inina xa̱ʼa ña̱ʼa ña̱ ndáyáʼvika?

 ³ Ndakanixi̱ní xa̱ʼa ña̱ va̱xi sa̱tá libro yóʼo, ña̱ va̱xi nu̱ú página 3 xíʼin 6 ta xíʼin ña̱ va̱xi nu̱ú kíxaʼá capítulo yóʼo. Ña̱yóʼo kúú sava ña̱ ndáyáʼviní kunda̱a̱-iniyó xa̱ʼa. Soo ku̱a̱ʼání na̱ yiví va̱ása nándukúkana xa̱ʼa ña̱ kúni̱na kunda̱a̱-inina. ¿Nda̱chun va̱ása nándukúkana xa̱ʼaña? ¿Á kivi ndani̱ʼíyóña nu̱ú Biblia? Sava na̱ yiví káchina yo̱ʼvi̱ní ña̱ va̱xi nu̱ú Biblia. Savatuna kúkaʼan nu̱úna nda̱ka̱tu̱ʼunna. Ta íyotu na̱ káʼa̱n va̱ʼaka ná sándákooyóña ndaʼa̱ na̱ sánáʼa̱ xa̱ʼa Ndióxi̱ á ndaʼa̱ na̱ su̱tu̱, na̱yóʼo ná nandukú xa̱ʼaña. Ta yóʼó, ¿ndáaña ndákanixi̱níún?

4, 5. a) ¿Ndáa sava ña̱ʼa kúú ña̱ ndáyáʼviní nda̱ka̱tu̱ʼunyó xa̱ʼa? b) ¿Nda̱chun xíniñúʼu nandukúyó xa̱ʼaña?

⁴ Sana kúni̱ún kunda̱a̱-iniún xa̱ʼa ku̱a̱ʼání ña̱ʼa ña̱ ndáka̱tu̱ʼunyó miíyó. Sana ndákanixi̱níún xa̱ʼa ña̱yóʼo: “¿Ndáa xa̱ʼa kúú ña̱ ka̱kuyó ñuyǐví yóʼo? ¿Á ña̱ kakuyó, kuaʼnuyó ta kuviyó á ña̱yóʼo kúú ndiʼiña? ¿Nda̱saa káa Ndióxi̱?”. Va̱ʼava íxaún tá ndákanixi̱níún xa̱ʼa ña̱yóʼo, va̱ása sándákoún ña̱ nandukún xa̱ʼaña, chi va̱ʼava kunda̱a̱-iniún xa̱ʼaña. Ta̱ Jesús ni̱ka̱ʼa̱n ña̱yóʼo: “Ka̱ʼa̱nkandó, ta taxiraña ndaʼa̱ndó; nandukúkandóña, ta ndani̱ʼíndóña; kanindaʼa̱kandó yéʼé, ta kunáraña nu̱úndó” (Mateo 7:7).

⁵ Tá ná nandukúkaún xa̱ʼa ña̱ʼa ña̱ ndáyáʼvika, ku̱a̱ʼání ña̱ʼa xa̱ún kunda̱a̱-iniún xa̱ʼa (Proverbios 2:1-5). Ni ku̱a̱ʼá ña̱ káʼa̱n sava na̱ yiví xíʼún, kiviva kunda̱a̱-iniún xa̱ʼaña chi nu̱ú Biblia va̱xi ndiʼiña ta va̱ása yo̱ʼvi̱ña. Ña̱yóʼo chindeéña yóʼó ña̱ si̱íka koún ki̱vi̱ vitin ta saátu chí nu̱únínu. Vitin ka̱ʼa̱nyó xa̱ʼa iin ña̱ ndáka̱tu̱ʼun ku̱a̱ʼání na̱ yiví miína.

6. ¿Nda̱chun káʼa̱n savana ña̱ kǒo ndíʼi̱-ini Ndióxi̱ xa̱ʼayó?

⁶ Ku̱a̱ʼánína saá káʼa̱nna xa̱ʼara. Tá ndixa ndíʼi̱-ini Ndióxi̱ xa̱ʼayó xa̱a̱ ndáa tiempoví na̱samara ñuyǐví yóʼo,  káchina. Saáchi vitin, íyo na̱ xáʼní táʼan, íyo na̱ sáa̱-ini xíni táʼan, ta íyo ku̱a̱ʼáka tu̱ndóʼo. Ndiʼiyó kíʼin kue̱ʼe̱, íyo tu̱ndóʼo nu̱úyó, xíʼi̱ na̱ táʼanyó. Xa̱ʼa ña̱yóʼo savana káʼa̱nna: “Tá ndixa ndíʼi̱-ini Ndióxi̱ xa̱ʼayó, ¿nda̱chun ndíka̱a̱ní tu̱ndóʼo ñuyǐví yóʼo?”.

7. a) Na̱ níʼi yichi̱ ti̱xin veʼe-ñu̱ʼu, ¿nda̱chun káʼa̱nyó ña̱ chíka̱a̱ ku̱a̱china Ndióxi̱ xíʼin ndiʼi tu̱ndóʼo ña̱ kúu? b) ¿Ndáaña sánáʼa̱ Biblia xa̱ʼa ndiʼi ña̱ kúu vitin?

⁷ Ta nda̱a̱ na̱ níʼi yichi̱ ti̱xin veʼe-ñu̱ʼu káʼa̱nna xíʼin na̱ yiví ña̱ kǒo ndíʼi̱-ini Ndióxi̱ xa̱ʼayó. Tá kúu iin tu̱ndóʼo mií Ndióxi̱ kúú ta̱ ni̱ka̱ʼa̱n saá koo, káchina. Nda̱a̱ tá íyo iin na̱ chíka̱a̱ ku̱a̱chi Ndióxi̱ saá íyona. Soo, ¿á ndixa Ndióxi̱ kúú ta̱ táxi ndiʼi tu̱ndóʼo ndóʼoyó? ¿Ndáaña sánáʼa̱ Biblia? Santiago 1:13 káchiña: “Tá ñúʼundó tu̱ndóʼo va̱ása ka̱ʼa̱nndó: ‘Ndióxi̱ xítondosó yi̱ʼi̱’. Chi Ndióxi̱ ni loʼo kǒo ndákanixi̱níra keʼéra ña̱ va̱ása va̱ʼa ni kǒo xítondosóra ni iin na̱ yiví”. Su̱ví Ndióxi̱ kúú ta̱ chíndaʼá tu̱ndóʼo va̱xi nu̱úyó (kaʼvi Job 34:10-12). Ni táxivara íyoña, soo su̱ví ta̱yóʼo chíndaʼáña nu̱úyó.

8, 9. a) ¿Ndáaña i̱xaa iin ta̱ loʼo? b) ¿Nda̱chun va̱ása va̱ʼa chika̱a̱yó ku̱a̱chi Ndióxi̱ xa̱ʼa ña̱ ndóʼoyó?

⁸ Ná kachiyó, iin táta íyo iin se̱ʼera ta ma̱níníra ta̱ loʼo yóʼo, ta ta̱yóʼo xa̱a̱ chéevara. Soo va̱ása xíínra kandíxakara ña̱ káʼa̱n yivára xíʼinra tasaá ke̱era ku̱a̱ʼa̱nra, ta yivára kǒo nísasira nu̱úra. Tándi̱ʼi, kǒo níkiʼinra iin yichi̱ va̱ʼa ta ku̱a̱ʼání tu̱ndóʼo ndo̱ʼora. ¿Á ku̱a̱chi yivára kúúña? Su̱ví ku̱a̱chira kúúña (Lucas 15:11-13). Saá íyo Ndióxi̱ táxira ña̱ ndaka̱xinyó ndáa yichi̱ kúni̱yó kiʼinyó, su̱ví ña̱yóʼo kúni̱ kachiña Ndióxi̱ táxi ndiʼi tu̱ndóʼo ndaʼa̱yó, chi sava miívayó ndúkú ña̱ ndóʼoyó. Xa̱ʼa ña̱yóʼo, va̱ása va̱ʼa chika̱a̱ ku̱a̱chiyó Ndióxi̱ ña̱ táxira tu̱ndóʼo ndaʼa̱yó.

⁹ Íyo iin xa̱ʼa kúú ña̱ táxi Ndióxi̱ íyo tu̱ndóʼo. Ta̱yóʼo kúú yiváyó ta̱ káʼnu ta̱ i̱xava̱ʼa miíyó ta kǒo xíniñúʼu ka̱ʼa̱nra  xíʼinyó xa̱ʼa ndiʼi ña̱ kúu. Soo, xa̱ʼa ña̱ kúni̱ra xínira miíyó káʼa̱nra xíʼinyó xa̱ʼaña. Nu̱ú capítulo 11 sakuaʼakayó ndáa xa̱ʼa kúú ña̱ táxira íyo tu̱ndóʼo. Soo, ná kǒo kaka-iniyó xa̱ʼara chi su̱ví ta̱yóʼo chíndaʼáña nu̱úyó. Nda̱a̱ káʼa̱nra taxira ña̱ va̱ʼa ndaʼa̱yó chí nu̱únínu (Isaías 33:2).

10. ¿Nda̱chun va̱ʼa kandíxayó Ndióxi̱ ña̱ sandiʼi-xa̱ʼara ndiʼi tu̱ndóʼo?

¹⁰ Jehová iin Ndióxi̱ yi̱i̱ kúúra (Isaías 6:3). Ña̱yóʼo kúni̱ kachiña ni loʼo kǒo ña̱ ndi̱va̱ʼa ndíka̱a̱-inira. Ña̱kán va̱ʼa kandíxayóra chi kǒo sándáʼvira táki̱ʼva íxaa na̱ xáʼndachíñu ñuyǐví yóʼo. Nda̱a̱ na̱ chíñu na̱ kúni̱ keʼé nina ña̱ va̱ʼa kǒo kúchiñuna sandiʼi-xa̱ʼana ndiʼi tu̱ndóʼo ña̱ íyo nu̱úyó ña̱ va̱ʼa kundoo va̱ʼayó. Soo, Ndióxi̱ íyoní ndéera ta kuchiñura sandiʼi-xa̱ʼara ndiʼi tu̱ndóʼo ta nda̱a̱ ni iin ki̱vi̱ kǒo kookaña (kaʼvi Salmo 37:9-11).

11. a) ¿Nda̱chun ni loʼo kǒo kúni̱ Ndióxi̱ xínira ña̱ kini? b) ¿Nda̱saa ndóʼo Ndióxi̱ tá xítora ndóʼoyó tu̱ndóʼo?

¹¹ ¿Nda̱saa ndóʼo Ndióxi̱ tá xítora ndóʼoyó tu̱ndóʼo? Ña̱ Biblia káʼa̱nña iin Ndióxi̱ ta̱ kéʼé ña̱ nda̱kú kúúra (Salmo 37:28). Xítora ndiʼi ña̱ kúu, ta ni loʼoví kǒo kúni̱ra koo ña̱ kini. Ña̱ Biblia káchiña tá tiempo xi̱naʼá nda̱kutú ña̱ kini nu̱ú ñuʼú yóʼo, Jehová “ni̱kusuchíkaví níma̱ra” (Génesis 6:5, 6). Jehová kǒo násamara ña̱ ndákanixi̱níra (Malaquías 3:6). Ni loʼoví kǒo kúni̱ra koo ña̱ kini ta kúndáʼvi-inira xínira na̱ ndóʼo tu̱ndóʼo. Ña̱ Biblia káchiña ‘ndíʼi̱-inira xa̱ʼayó’ (kaʼvi 1 Pedro 5:7).

12, 13. a) ¿Nda̱chun kúʼvi̱-iniyó xíni táʼanyó, ta xa̱ʼa ña̱yóʼo ndáaña ndóʼoyó tá xíniyó tu̱ndóʼo ña̱ íyo ñuyǐví yóʼo? b) ¿Nda̱chun kǒo kaka-iniyó ña̱ sandiʼi-xa̱ʼa Ndióxi̱ ndiʼi tu̱ndóʼo iníísaá ñuyǐví?

¹² ¿Nda̱chun kúnda̱a̱ va̱ʼa iniyó ña̱ kúsuchí-ini Ndióxi̱ tá xínira ndóʼoyó tu̱ndóʼo? Ña̱ Biblia káchiña Ndióxi̱ i̱xava̱ʼara miíyó táki̱ʼva káa miíra (Génesis 1:26). Ña̱kán  chi̱ka̱a̱ra ña̱ va̱ʼa níma̱yó ña̱ kooyó táki̱ʼva káa miíra. Ta miíún, ¿á kúsuchí-iniún tá xíniún ndóʼo iinna tu̱ndóʼo? Tá saá ndóʼún, Ndióxi̱ ndeéka kúsuchí-inira.

¹³ Iin ña̱ va̱ʼaní ta̱xi Ndióxi̱ ndaʼa̱yó kúú ña̱ kuʼvi̱-iniyó kuni táʼanyó saáchi saá íyo miíra. Ña̱ Biblia káʼa̱nña xa̱ʼara ña̱ ‘kúʼvi̱-inira xínira miíyó’ (1 Juan 4:8). Kúʼvi̱-iniyó xíni táʼanyó saáchi saá káa Ndióxi̱. Tá ná kachiyó, miíún kúúmiíún ndée ña̱ va̱ʼa sandiʼi-xa̱ʼún ndiʼi tu̱ndóʼo ña̱ íyo ñuyǐví yóʼo, ¿á su̱ví sandiʼi-xa̱ʼúnña xa̱ʼa ña̱ kúʼvi̱-iniún xíniún na̱ yiví? Sandiʼi-xa̱ʼavaúnña. Saátu Ndióxi̱ sandiʼi-xa̱ʼavara ndiʼi tu̱ndóʼo, ndiʼi ña̱ káʼa̱n página 3 xíʼin 6 su̱ví ña̱ vatá kúúña. Mií Ndióxi̱ ni̱ka̱ʼa̱nña ta saxínuraña. Soo ña̱ va̱ʼa kandíxayó ndiʼi ña̱yóʼo xíniñúʼu sakuaʼakayó xa̱ʼara.

14. ¿Nda̱saa naní Ndióxi̱, ta nda̱chun xíniñúʼu kuniñúʼuyó ki̱vi̱ra?

¹⁴ Tá va̱ása xíni̱ iin na̱ yiví yóʼó, ¿á su̱ví siʼna ki̱vi̱ún káʼún xíʼinna? ¿Á íyo ki̱vi̱ Ndióxi̱? Ku̱a̱ʼání na̱ inka veʼe-ñu̱ʼu káʼa̱n ña̱ naníra “Ndióxi̱” á “táta”, soo su̱ví ki̱vi̱ra kúú ña̱yóʼo. Táki̱ʼva káʼa̱nyó xíʼin iin “rey” á “presidente” su̱ví ki̱vi̱na kúúña. Nu̱ú Biblia va̱xi ki̱vi̱ chiñu kéʼéra, soo ña̱yóʼo su̱ví ki̱vi̱ra kúúña. Chi íyova ki̱vi̱ra: Jehová naníra. Salmo 83:18 káchi: “Ki̱vi̱ yóʼó kúú Jehová, mitúʼun yóʼó kúú ta̱ Káʼnu iníísaá  nu̱ú ñuʼú”. Tá kǒo ki̱vi̱ Ndióxi̱ va̱xi nu̱ú Bibliaún káʼa̱nndi̱ xíʼún ná nandukúnña nu̱ú apéndice “Ki̱vi̱ Ndióxi̱: ¿ndáaña kúni̱ kachiña ta nda̱saa va̱ʼa kuniñúʼuyóña?”. Ki̱vi̱ Ndióxi̱ ku̱a̱ʼání yichi̱ ka̱ʼyínaña nu̱ú Biblia tá xi̱naʼá. Jehová kúni̱ra ná sakuaʼún xa̱ʼa ki̱vi̱ra ta kuniñúʼúnña. Ta xíniñúʼura Biblia ña̱ va̱ʼa ná sakuaʼún xa̱ʼara.

15. ¿Ndáaña kúni̱ kachi ki̱vi̱ Jehová?

¹⁵ Mií Ndióxi̱ chi̱núura ki̱vi̱ra ña̱ kunaníra Jehová ta ku̱a̱ʼání ña̱ʼa kúni̱ kachiña. Kúni̱ kachiña miíra kivi  saxínu ndiʼira ña̱ kúni̱ra keʼéra xíʼin ña̱ káʼa̱nra. * Kǒo iinna kivi kunaní táki̱ʼva naní Ndióxi̱ chi iinlá ki̱vi̱ miívara kúúña. Ta síín íyora nu̱ú ndiʼina. Yóʼo sakuaʼayó xa̱ʼa ña̱yóʼo.

16, 17. ¿Ndáaña sákuaʼayó xa̱ʼa Jehová xíʼin tu̱ʼun: a) “ta̱ kúúmií ndiʼi ndée” b) “ta̱ kúú rey ndiʼi tiempo” c) “ta̱ i̱xava̱ʼa ndiʼi ña̱ʼa”?

¹⁶ Nu̱ú Salmo 83:18 sa̱kuaʼayó xa̱ʼa Jehová ña̱ kúúra ta̱  “káʼnu iníísaá nu̱ú ñuʼú”. Ta iinlá ta̱yóʼo kúú “ta̱ kúúmií ndiʼi ndée”. Revelación 15:3 káchiña: “Náʼnuní ña̱ʼa i̱xava̱ʼún ta liviníña, Jehová, ta̱ kúúmií ndiʼi ndée. Ta ndiʼi ña̱ ke̱ʼún ña̱ va̱ʼaní kúúña, ta kúún rey ndiʼi tiempo”. Tá káʼa̱n Biblia xa̱ʼara ña̱ kúúra “ta̱ kúúmií ndiʼi ndée” kúni̱ kachiña nda̱a̱ ni iinna kǒo kúúmií ndée táki̱ʼva íyo ndée ta̱yóʼo. Ta saátu tá káʼa̱nña xa̱ʼara ña̱ kúúra “rey ndiʼi tiempo” kúni̱ kachiña síínní íyora nu̱ú ndiʼina chi kǒo ni iinna ní ixava̱ʼa-ñaʼá, chi xi̱naʼáví íyora ta koora ndiʼi tiempo. Nu̱ú Salmo 90:2 káchiña: “Miíún kúú Ndióxi̱ ndiʼi tiempo”. ¿Ndáaña túviún tá ndákanixi̱níún xa̱ʼa ña̱yóʼo?

¹⁷ Íyo inka ña̱ káʼa̱n xa̱ʼa Jehová ña̱ síín íyora: chi iinlá ta̱yóʼo i̱xava̱ʼa ndiʼi ña̱ʼa. Revelación 4:11 káchiña: “Jehová, Ndióxi̱ miíndi̱, iinlá yóʼó kúú ta̱ íyo yichi̱ ña̱ ndasakáʼnu ndiʼina yóʼó, yóʼó kúú ta̱ taxindi̱ ña̱ to̱ʼó ndaʼa̱, yóʼó kúú ta̱ ndakiʼin ndiʼi ndéendi̱, saáchi yóʼó kúú ta̱ i̱xava̱ʼa ndiʼi ña̱ʼa, ta xa̱ʼa ña̱ kúni̱ miíún na̱kuva̱ʼa ndiʼi ña̱yóʼo”. Jehová kúú ta̱ i̱xava̱ʼa ndiʼi ña̱ʼa: i̱xava̱ʼara ndiʼi ña̱ íyo chí ndiví, i̱xava̱ʼara ki̱mi, i̱xava̱ʼara yitu̱n tú kána fruta ndaʼa̱, i̱xava̱ʼara ti̱a̱ká tí ñúʼu ini yu̱ta xíʼin mar, ta íyo ku̱a̱ʼáka ña̱ʼa i̱xava̱ʼara.

18. ¿Nda̱chun káʼa̱n sava na̱ yiví ña̱ kǒo kívi kuyatinyó nu̱ú Ndióxi̱, soo ndáaña káchi Biblia?

¹⁸ Sava na̱ yiví yíʼvina xínina Jehová xa̱ʼa ña̱ kúúra iin Ndióxi̱ ta̱ káʼnuní. Ta káʼa̱nna xíkaní íyora nu̱úyó ta nda̱a̱ ni iin yichi̱ va̱ása kivi kuyatinyó nu̱úra ta kǒo ndíʼi̱-inira xa̱ʼayó, káchina. ¿Á ña̱ nda̱a̱ kúú ña̱yóʼo? Su̱ví ña̱ nda̱a̱ kúúña chi Biblia síínva káchiña, Jehová “va̱ása xíká íyora nu̱ú iin iinyó” (Hechos 17:27). Nda̱a̱ káʼa̱nña xíʼinyó: “Kuyatindó nu̱ú Ndióxi̱ tasaá kuyatinra nu̱úndó” (Santiago 4:8).

19. a) ¿Ndáaña xíniñúʼu keʼéyó ña̱ va̱ʼa kuyatinyó nu̱ú Ndióxi̱, ta ndáaña va̱ʼa ndakiʼinyó xa̱ʼa ña̱yóʼo? b) Ndiʼi ña̱ va̱ʼa kúúmií Ndióxi̱, ¿ndáaña kútóokaún?

 ¹⁹ ¿Ndáaña keʼún ña̱ va̱ʼa kuyatiún nu̱ú Ndióxi̱? Kǒo sándákoún keʼún táʼan ña̱ kéʼún vitin ña̱ sákuaʼún xa̱ʼara. Ta̱ Jesús ni̱ka̱ʼa̱nra: “Ña̱ va̱ʼa kutakuna ndiʼi tiempo, xíniñúʼu ndakundeéna sakuaʼana xa̱ʼa yóʼó, mitúʼun Ndióxi̱ ta̱ nda̱a̱, ta saátu xa̱ʼa ta̱ chi̱ndaʼún nu̱ú ñuʼú yóʼo, ta̱ Jesucristo” (Juan 17:3). Ña̱ Biblia káchiña tá ná sakuaʼayó xa̱ʼa Jehová xíʼin xa̱ʼa ta̱ Jesús xa̱a̱yó ‘kutakuyó ndiʼi tiempo’. Xa̱a̱ sa̱kuaʼayó xa̱ʼa Jehová ña̱ ‘kúʼvi̱-inira xínira miíyó’ (1 Juan 4:16). Jehová ku̱a̱ʼání ña̱ va̱ʼa kúúmiíra. Ña̱ Biblia káʼa̱n ña̱ “ndíʼi̱-inira xa̱ʼa na̱ yiví ta kúni̱ra chindeérana, ta kǒo sáa̱ kamara ta va̱ʼaní inira ta ña̱ nda̱a̱ kúú ndiʼi ña̱ káʼa̱nra” (Éxodo 34:6). Iin Ndióxi̱ ‘va̱ʼaní kúúra ta íyo tu̱ʼvara ña̱ koo káʼnu-inira xa̱ʼayó’ (Salmo 86:5). Ndátuníra xíʼinyó (2 Pedro 3:9). Nda̱kúní-inira (Revelación 15:4). Tá loʼo loʼo ku̱a̱ʼún káʼviún Biblia sakuaʼakaún xa̱ʼara chi íyo ku̱a̱ʼáka ña̱ va̱ʼa kúúmiíra.

20-22. a) Xa̱ʼa ña̱ kǒo kívi kuniyó Ndióxi̱, ¿á kúni̱ kachiña va̱ása kívi sakuaʼayó xa̱ʼara? b) ¿Ndáaña kivi ka̱ʼa̱n savana xíʼún xa̱ʼa ña̱ kǒo kúni̱na ña̱ sándákoún veʼe-ñu̱ʼu?

²⁰ Ña̱ nda̱a̱ kúú ña̱ kǒo kívi kuniyó Ndióxi̱ nda̱a̱ tá kǒo kívi kuniyó ta̱chí (Juan 1:18; 4:24; 1 Timoteo 1:17). Soo ña̱ Biblia káʼa̱nvaña xíʼinyó xa̱ʼara. Táki̱ʼva ni̱ka̱ʼa̱n ta̱ ka̱ʼyí tutu Salmo, miíún kivi kuniún ndiʼi ña̱ʼa ña̱ i̱xava̱ʼara (Salmo 27:4; Romanos 1:20). Tá ná sakuaʼakaún xa̱ʼara, ndeéka xa̱ún kunda̱a̱-iniún nda̱saa káara ta va̱ʼaka kuyatiún nu̱úra.

²¹ Kúee kúee xa̱ún kunda̱a̱-iniún nda̱chun káʼa̱n Biblia xa̱ʼa Jehová ña̱ kúúra yiváyó (Mateo 6:9). I̱xava̱ʼara miíyó ña̱ kúni̱ra si̱í kooyó nda̱a̱ táki̱ʼva kúni̱ na̱ yiváyó ña̱ si̱í kooyó, saá kúni̱ Jehová (Salmo 36:9). Ña̱ Biblia káʼa̱nña xíʼinyó ña̱ va̱ʼa xa̱a̱yó kooyó migora (Santiago 2:23). Ndakanixi̱níún  kivi xa̱ún koún migo Ndióxi̱ ta̱ i̱xava̱ʼa ñuyǐví yóʼo.

²² Tá ná sakuaʼakaún xa̱ʼa ña̱ sánáʼa̱ Biblia, sana ka̱ʼa̱n savana xíʼún ña̱ ná sándákoún kaʼviúnña chi ña̱ va̱ʼava kúú ña̱ káʼa̱nna xíʼún túvi miína. Chi kǒo kúni̱na ña̱ sándákoún veʼe-ñu̱ʼún. Soo va̱ása taxiún ña̱ kasina nu̱ún ña̱ xa̱ún koún migo Ndióxi̱. Chi va̱ʼaka Ndióxi̱ ná koo migoún.

23, 24. a) ¿Nda̱chun va̱ása yi̱ʼvíún nda̱ka̱tu̱ʼún ndáaña kǒo kúnda̱a̱-iniún xíʼin? b) ¿Ndáaña sakuaʼayó nu̱ú inka capítulo?

²³ Tá ná kixaʼún kaʼviún Biblia sana kǒo kunda̱a̱-iniún xíʼin sava ña̱ʼa. Soo va̱ása yi̱ʼvíún nda̱ka̱tu̱ʼún ndáaña kǒo kúnda̱a̱-iniún xíʼin. Ta̱ Jesús ni̱ka̱ʼa̱nra va̱ʼaka ná kooyó táki̱ʼva íyo na̱ va̱lí (Mateo 18:2-4). Xíni̱yó chi na̱ va̱lí nina ndáka̱tu̱ʼunna. Ndióxi̱ kúni̱ra ná kunda̱a̱-iniún xa̱ʼa ndiʼi ña̱ ndáka̱tu̱ʼún miíún. Ña̱ Biblia káʼa̱nña xa̱ʼa sava na̱ xi̱ndoo xi̱naʼá ña̱ xi̱kuni̱na kunda̱a̱-inina xa̱ʼa Ndióxi̱. Ña̱kán, viíní ka̱ʼvina Biblia ña̱ va̱ʼa kunda̱a̱-inina á ndixa ña̱ nda̱a̱ kúú ña̱ sákuaʼana xa̱ʼa Ndióxi̱ (kaʼvi Hechos 17:11).

²⁴ Ña̱ va̱ʼa kunda̱a̱-iniyó xa̱ʼa Jehová xíniñúʼu kaʼviyó Biblia, ta ña̱yóʼo síínní íyoña nu̱ú ndiʼi libro. ¿Nda̱chun síínní íyoña? Nu̱ú inka capítulo sakuaʼayó xa̱ʼaña.