1, 2. a) ¿Ndáa xa̱ʼa kúú ña̱ ndáyáʼvi iin regalo nu̱úyó? b) ¿Nda̱chun va̱ʼaní i̱xaa Jehová ña̱ ta̱xira se̱ʼera ni̱xi̱ʼi̱ xa̱ʼayó?

¿NDÁA regalo kúú iin ña̱ va̱ʼaní ni̱ni̱ʼún? Tá níʼi̱yó iin ña̱ʼa va̱ása xíniñúʼu yaʼviní kooña ña̱ kundayáʼviña nu̱úyó. Su̱ví ya̱ʼviña kúú ña̱ kíʼinyó kuenta xíʼin. Ndáyáʼviña nu̱úyó tá iin ña̱ʼa ña̱ xíniñúʼuníyó kúúña ta kútóoníyóña.

² Ni ku̱a̱ʼání ña̱ʼa táxina ndaʼa̱yó, íyo iin ña̱ káʼnuka nu̱ú ndiʼi ña̱yóʼo. Ña̱ nda̱a̱ kúúña Jehová ku̱a̱ʼání ña̱ʼa táxira ndaʼa̱yó soo íyo iin ña̱ káʼnuka ta̱xira ndaʼa̱yó: ta̱xira se̱ʼera ta̱ Jesús ni̱xi̱ʼi̱ xa̱ʼayó (kaʼvi Mateo 20:28). Táki̱ʼva sakuaʼayó nu̱ú capítulo yóʼo, ña̱ ni̱xi̱ʼi̱ ta̱ Jesús xa̱ʼayó ndáyáʼviníña chi xúnáña yichi̱ nu̱úyó ña̱ kivi xa̱a̱yó si̱í kundooyó ta ni̱ʼíyó ndiʼi ña̱ʼa ña̱ xíniñúʼuyó. Xíʼin ña̱yóʼo náʼa̱ Jehová ña̱ kúʼvi̱ní-inira xínira miíyó.

3. ¿Nda̱chun xíniñúʼu saka̱kuna miíyó, ta ndáaña xíniñúʼu kunda̱a̱-iniyó ña̱ va̱ʼa kundayáʼvi ña̱ i̱xaa ta̱ Jesús xa̱ʼayó?

³ Jehová chi̱ndaʼára se̱ʼera nu̱ú ñuʼú yóʼo, ña̱ va̱ʼa nda̱tavára miíyó ti̱xin ku̱a̱chi tasaá va̱ása kuvikayó (Efesios 1:7). Ña̱ va̱ʼa kunda̱a̱-iniyó xíʼin ña̱yóʼo siʼna ná kunda̱a̱-iniyó xa̱ʼa ña̱ ku̱u nu̱ú ñuʼú livi Edén. Tá ná kunda̱a̱-iniyó  xa̱ʼa ña̱ xi̱kuumií ta̱ Adán ta ndi̱ʼi-xa̱ʼa ña̱yóʼo tá va̱ása níxiniso̱ʼora ña̱ ni̱ka̱ʼa̱n Ndióxi̱. Saá kúú ña̱ kunda̱a̱-iniyó ña̱ ndáyáʼviní ña̱ ni̱xi̱ʼi̱ ta̱ Jesús xa̱ʼayó.

4. ¿Ndáa ki̱ʼva ni̱xi̱yo ta̱ Adán?

⁴ Tá i̱xava̱ʼa Jehová ta̱ Adán, va̱ʼaní i̱xava̱ʼarara kǒo ku̱a̱chi níxikuumiíra. Koto ndáa ki̱ʼva ni̱xi̱yora. Xa̱ʼa ña̱ kǒo ku̱a̱chi níxikuumiíra va̱ása kiʼin kue̱ʼe̱ miíra ni kǒo kuchéera ni kǒo kuvira. Ta va̱ʼaní xi̱táʼanra xíʼin Jehová. Biblia káʼa̱nña ña̱ xi̱kuura “se̱ʼe Ndióxi̱” (Lucas 3:38). Jehová xi̱ndatúʼun yuʼúra xíʼin ta̱ Adán nda̱a̱ táki̱ʼva íxaa iin táta xíʼin se̱ʼera. Jehová xi̱taxira chiñu ndaʼa̱ ta̱ Adán chiñu ña̱ xi̱kutóora xi̱kuuña, ta xi̱ka̱ʼa̱nra xíʼinra ndáaña va̱ʼa keʼéra ta ndáaña va̱ása va̱ʼa keʼéra (Génesis 1:28-30; 2:16, 17).

5. ¿Ndáaña kúni̱ kachi Biblia tá káʼa̱nña Ndióxi̱ i̱xava̱ʼara ta̱ Adán táki̱ʼva káa miíra?

⁵ Ndióxi̱ i̱xava̱ʼara ta̱ Adán táki̱ʼva káa miíra (Génesis 1:27). Su̱ví ña̱yóʼo kúni̱ kachiña tá xíto mií Ndióxi̱ saá níxi̱yo ta̱ Adán. Táki̱ʼva sa̱kuaʼayó nu̱ú capítulo iin, Jehová iin espíritu kúúra (Juan 4:24). Va̱ása íyora táki̱ʼva íyo miíyó na̱ yiví. Ña̱ na̱kuva̱ʼara táki̱ʼva káa mií Ndióxi̱ kúni̱ kachiña ña̱ xi̱kuumiíra ña̱ va̱ʼa ña̱ kúúmií Ndióxi̱: xi̱kuʼvi̱-inira, xi̱kuumiíra ña̱ ndíchi, xi̱kuumiíra ña̱ nda̱kú-ini, ta ni̱xi̱yotu ndéera ña̱ keʼéra ña̱ʼa. Na̱kuva̱ʼatura tá káa Jehová saáchi va̱ʼa xi̱ndaka̱xin miíra ña̱ xi̱kuni̱ra keʼéra. Va̱ása níkuva̱ʼara tá íyo kití, chi ta̱yóʼo va̱ʼa ndaka̱xinra ndáaña kúni̱ra keʼéra á ña̱ va̱ʼa á ña̱ va̱ása va̱ʼa.

6. ¿Ndáaña ndo̱ʼo ta̱ Adán xa̱ʼa ña̱ kǒo níkandíxakara Ndióxi̱, ta ndáaña ndo̱ʼotu na̱ se̱ʼera?

⁶ Ta̱ Adán yaʼviní cha̱ʼvira xa̱ʼa ña̱ kǒo níxiniso̱ʼora ña̱ ni̱ka̱ʼa̱n Ndióxi̱. Saáchi ni̱ka̱ʼa̱n Ndióxi̱ xíʼinra ña̱ kuvira ta ndi̱ʼi-xa̱ʼa ndiʼi ña̱ va̱ʼa xi̱kuumiíra (Génesis 3:17-19). Ta su̱ví iinlá ta̱ Adán níndoʼo saá, chi nda̱a̱ na̱ se̱ʼera sa̱ndákooraña ndaʼa̱. Tu̱ʼun Ndióxi̱ káchiña: “Ña̱kán  ku̱a̱chi iin ta̱a ni̱ki̱ʼvi ku̱a̱chi iníísaá ñuyǐví, ta xa̱ʼa ku̱a̱chi yóʼo ndiʼiyó xíʼi̱ chi ndiʼiyó kúúmií ku̱a̱chi” (Romanos 5:12). Ndiʼiyó ni̱ndo̱o ku̱a̱chi ta̱ Adán ndaʼa̱. Xa̱ʼa ña̱yóʼo káʼa̱n Biblia nda̱a̱ táki̱ʼva íyo na̱ ni̱xi̱kó ta̱ Adán ndaʼa̱ ku̱a̱chi saá íyoyó (Romanos 7:14). Ta̱ Adán xíʼin ñá Eva ña̱ kúni̱ miína kúú ña̱ kǒo níkandíxakana Ndióxi̱ ña̱kán ni̱xi̱ʼi̱na. Soo ¿ndáaña ndoʼo se̱ʼena, tá kúú miíyó?

7, 8. Tá íxakuíʼnana iin na̱ yiví, ¿ndáaña xíniñúʼuna ña̱ va̱ʼa sa̱ñána? Ta saátu miíyó, ¿ndáaña xíniñúʼuyó ña̱ va̱ʼa sa̱ñáyó ndaʼa̱ ku̱a̱chi?

⁷ Ña̱ xi̱kuni̱ Jehová kúúña na̱ yiví kutakuna ndiʼi tiempo. Ña̱ va̱ʼa xi̱nu ña̱ xi̱kuni̱ra xíniñúʼu chindaʼára ta̱ Jesús kixi kuvi xa̱ʼayó. ¿Nda̱chun xíniñúʼu kuvira xa̱ʼayó? Ná kachiyó iinna i̱xakuíʼnana iin na̱ yiví, ta na̱yóʼo kúni̱na sa̱ñána ta va̱ása kívi. Ña̱ va̱ʼa sa̱ñána xíniñúʼu chaʼvi na̱ veʼena xa̱ʼana.

⁸ Ta saátu miíyó kúni̱yó sa̱ñáyó ndaʼa̱ ku̱a̱chi ña̱ sa̱ndákoo ta̱ Adán ndaʼa̱yó tasaá va̱ʼa kutakuyó ndiʼi tiempo. Jehová ta̱xira se̱ʼera xa̱ʼayó ña̱ va̱ʼa kutakuyó ndiʼi tiempo. ¿Ndáaña ke̱ʼéra ña̱ va̱ʼa ta̱xira se̱ʼera xa̱ʼayó? Ná kotoyó.

9. ¿Nda̱chun káʼa̱nyó inkáchi ni̱xi̱yo ta̱ Adán xíʼin ta̱ Jesús? ¿Nda̱chun xi̱niñúʼu kuvira xa̱ʼayó?

⁹ Nda̱a̱ tá xa̱ʼa tá ni̱ki̱ʼvi ta̱ Adán ku̱a̱chi iin saá nda̱a̱ vitin ni iin na̱ yiví ku̱a̱chi kǒo kívi ndakiʼinna ña̱ sa̱ndíʼi-xa̱ʼara (Salmo 49:7, 8). ¿Ndáaña ke̱ʼé Jehová ña̱ va̱ʼa ndakiʼin na̱ yiví ña̱ sa̱ndáñúʼu ta̱ Adán? Ta̱xira se̱ʼera ta̱ Jesús ni̱xi̱ʼi̱ xa̱ʼayó, nda̱a̱ táki̱ʼva ni̱xi̱yo ta̱ Adán saá ni̱xi̱yotu ta̱yóʼo kǒo ku̱a̱chira níxi̱yo (1 Timoteo 2:6). ¿Nda̱chun xi̱niñúʼu kuvira xa̱ʼayó? Saáchi saá káchi tu̱ʼun Ndióxi̱: tá íyo míí ña̱ ndi̱ʼi-xa̱ʼa saá koo ña̱ chaʼvina (Deuteronomio 19:21). Ña̱ va̱ʼa kunda̱a̱-iniyó xíʼinña: ¿ndáaña kuu tá  iinna ná sandiʼi-xa̱ʼana iin ña̱ʼa? Xíniñúʼu chaʼvina nda̱a̱ táki̱ʼva íyo mií ya̱ʼviña. Saátu íyo ña̱yóʼo, xíniñúʼu chaʼvi iin na̱ yiví na̱ kǒo ku̱a̱chi xa̱ʼa ña̱ ke̱ʼé ta̱ Adán.

10. ¿Ndáaña ke̱ʼé Jehová ña̱ saka̱kura miíyó?

¹⁰ ¿Ndáaña ke̱ʼé Jehová ña̱ saka̱kura miíyó? Chi̱ndaʼára nu̱ú ñuʼú yóʼo iin se̱ʼera ta̱ kǒo ku̱a̱chi. Soo su̱ví nda̱a̱ ndáaka na̱ ángel níchindaʼára chi mií ta̱ kúni̱ va̱ʼara kúú ta̱ chi̱ndaʼára (kaʼvi 1 Juan 4:9, 10). Ta̱yóʼo kǒo na̱ ní ixandúxa xíʼinra kixira (Filipenses 2:7). Táki̱ʼva sa̱kuaʼayó nu̱ú capítulo ña̱ ni̱ya̱ʼa, Jehová ke̱ʼéra iin milagro ña̱ chi̱ka̱a̱ra ta̱ Jesús ti̱xin ñá María. Ta xíʼin espíritu santo xi̱ndaarara ña̱kán va̱ʼa kǒo ku̱a̱chi níxikuumiíra tá ka̱kura (Lucas 1:35).

11. ¿Nda̱chun iinlá kuití ta̱a kuchiñu chaʼvi xa̱ʼa ku̱a̱chi ndiʼi na̱ yiví?

¹¹ ¿Nda̱chun iinlá kuití ta̱a kuchiñu chaʼvi xa̱ʼa ku̱a̱chi ndiʼi na̱ yiví? ¿Nda̱chun ndiʼina ni̱xa̱a̱na ndu̱una na̱ yiví ku̱a̱chi? Ndakaʼún chi ta̱ Adán kúú ta̱ ni̱ki̱ʼvi ku̱a̱chi ta ndiʼi ña̱ va̱ʼa xi̱kuumiíra ndi̱ʼi-xa̱ʼaña va̱ása níkivika ya̱ʼaña ndaʼa̱ na̱ se̱ʼera. Ña̱ sa̱ndákoora ndaʼa̱na kúú ña̱ ndu̱una na̱ yiví ku̱a̱chi ta xíʼi̱na. Ña̱ Biblia káʼa̱nña xa̱ʼa ta̱ Jesús ña̱ ni̱ndi̱ʼvira nu̱ú ta̱ Adán, ta̱yóʼo kǒo ku̱a̱chi níxikuumiíra (1 Corintios 15:45). Ta̱ Jesús ni̱ndi̱ʼvira nu̱ú ta̱ Adán ña̱ va̱ʼa saka̱kura miíyó. Ka̱ndíxaníra ña̱ ni̱ka̱ʼa̱n yivára xíʼinra ta nda̱a̱ ni̱xi̱ʼi̱ra xa̱ʼayó. Saá kúú ña̱ cha̱ʼvira xa̱ʼa ña̱ ke̱ʼé ta̱ Adán ta xu̱nára yichi̱ nu̱ú ndiʼi na̱ se̱ʼe ta̱ Adán ña̱ kutakuna ndiʼi tiempo (Romanos 5:19; 1 Corintios 15:21, 22).

12. ¿Ndáaña ni̱na̱ʼa̱ ta̱ Jesús xa̱ʼa ña̱ ni̱xi̱yo nda̱kú-inira?

¹² Ña̱ Biblia káʼa̱nña xa̱ʼa ndiʼi ña̱ ndo̱ʼo ta̱ Jesús tá xa̱a̱ ku̱nu̱mí kuvira. Ka̱ninara ta ka̱tikaanara ndaʼa̱ yitu̱n ndeéní sa̱ndóʼonara (Juan 19:1, 16-18, 30; koto apéndice “¿Nda̱chun kǒo xíniñúʼuyó cruz?”). ¿Nda̱chun ndo̱ʼoníra? Nu̱ú inka capítulo sakuaʼayó, ta̱ Ndi̱va̱ʼa ni̱ka̱ʼa̱nra nda̱a̱  ni iin na̱ yiví va̱ása kuchiñuna koo nda̱kú-inina xíʼin Jehová tá ná ya̱ʼana nu̱ú tu̱ndóʼo. Ña̱ ni̱xi̱yo nda̱kú-inira ni ku̱a̱ʼání ña̱ ndo̱ʼora saá ni̱na̱ʼa̱ra ta̱ vatá kúú ta̱ Ndi̱va̱ʼa. Ni̱na̱ʼa̱ra iin na̱ kǒo kúúmií ku̱a̱chi ni táxi Ndióxi̱ ña̱ ndaka̱xinna ña̱ kúni̱ miína keʼéna, va̱ʼava koo nda̱kú-inina xíʼin Jehová ni ku̱a̱ʼá tu̱ndóʼo ná taxi ta̱ Ndi̱va̱ʼa ndaʼa̱na. Á loʼoví ni̱kusi̱í-ini Jehová ña̱ xi̱nira ni̱xi̱yo nda̱kú-ini se̱ʼera (Proverbios 27:11).

13. ¿Ndáaña ke̱ʼé Jehová ña̱ va̱ʼa cha̱ʼvira xa̱ʼayó?

¹³ ¿Ndáaña ke̱ʼé Jehová ña̱ va̱ʼa cha̱ʼvira xa̱ʼayó? Tá 14 xíka tí yo̱o̱ nisán ña̱ ku̱i̱ya̱ 33 ña̱ tiempo ña̱ ndóoyó vitin, Ndióxi̱ ta̱xira xa̱ʼnína se̱ʼera ta ta̱yóʼo su̱ví iin ta̱a ku̱a̱chi níxikuura. Tá ki̱vi̱ ni̱xi̱ʼi̱ra xa̱ʼayó saá kúúña cha̱ʼvira xa̱ʼa ku̱a̱chiyó (Hebreos 10:10). Tá ni̱ya̱ʼa u̱ni̱ ki̱vi̱ ña̱ ni̱xi̱ʼi̱ra, Jehová sa̱ndátakuñaʼá ta ndu̱ura táki̱ʼva íyo na̱ ángel (Hebreos 9:24). Ña̱yóʼo kúú ndiʼi ña̱ ndu̱kú Jehová nu̱úra. Tá ndi̱kóra chí ndiví, Jehová ni̱kusi̱í-inira xíʼin ña̱ ke̱ʼéra ña̱ ni̱xi̱ʼi̱ra xa̱ʼayó tasaá va̱ʼa ta̱vára miíyó ndaʼa̱ ku̱a̱chi (kaʼvi Romanos 3:23, 24).

14, 15. ¿Ndáaña xíniñúʼu keʼéyó ña̱ va̱ʼa ndoo ku̱a̱chiyó?

¹⁴ Ni kúúyó na̱ yiví ku̱a̱chi xa̱ʼa ña̱ ni̱xi̱ʼi̱ ta̱ Jesús xa̱ʼayó ku̱a̱ʼání ña̱ va̱ʼa ndakiʼinyó. Ná kotoyó ndáaña va̱ʼa ndakiʼinyó tiempo vitin ta saátu chí nu̱únínu.

¹⁵ Ndoo ku̱a̱chiyó. Xa̱ʼa ña̱ kúúyó na̱ yiví ku̱a̱chi íxayo̱ʼvi̱níña xíʼinyó ña̱ keʼéyó ña̱ va̱ʼa. Ndiʼiyó kíʼvi ku̱a̱chi xíʼin tu̱ʼun ña̱ káʼa̱nyó á xíʼin ña̱ kéʼéyó. Ta xa̱ʼa ña̱ ni̱xi̱ʼi̱ ta̱ Jesús xa̱ʼayó kivi ndoo ku̱a̱chiyó (Colosenses 1:13, 14). Soo xíniñúʼu ndikó-iniyó xa̱ʼa ña̱ kéʼéyó xíʼin ndiʼi níma̱yó. Ta xíniñúʼu ka̱ʼa̱nyó xíʼin Jehová ña̱ ná koo káʼnu-inira xa̱ʼa ku̱a̱chiyó chi xa̱a̱ ta̱xira se̱ʼera ni̱xi̱ʼi̱ xa̱ʼayó (kaʼvi 1 Juan 1:8, 9).

16. ¿Nda̱chun kúú ña̱ kǒo yíʼviyó ña̱ ndásakáʼnuyó Ndióxi̱, ta nda̱saa chíndeé ña̱yóʼo miíyó?

 ¹⁶ Kúnda̱a̱-iniyó ña̱ kúni̱ Ndióxi̱ xínira miíyó ta kǒo castigo táxira ndaʼa̱yó. Tá va̱ása xíni̱yó ña̱yóʼo ndákanixi̱níyó ña̱ va̱ása ndáyáʼviyó nu̱ú Ndióxi̱ ta kíxaʼá ndákava-iniyó. Soo xa̱ʼa ña̱ ki̱xi ta̱ Jesús ni̱xi̱ʼi̱ra xa̱ʼayó, Jehová íxakáʼnu-inira xa̱ʼayó ta ni kúúyó na̱ yiví ku̱a̱chi ndákiʼinvara miíyó ña̱ ndasakáʼnuyóra (Hebreos 9:13, 14). Tasaá kúúña va̱ása xíka-iniyó káʼa̱nyó xíʼinra ta va̱ʼa ndásakáʼnuyóra (Hebreos 4:14-16). Ta xa̱ʼa ña̱ kúnda̱a̱-iniyó ña̱ ndákiʼinra miíyó va̱ʼa kúniyó xíʼin miíyó ta si̱íka ndóoyó.

17. ¿Ndáa ña̱ va̱ʼa ndakiʼinyó xa̱ʼa ña̱ ni̱xi̱ʼi̱ ta̱ Jesús xa̱ʼayó?

¹⁷ Kúnda̱a̱-iniyó ña̱ va̱ʼa kooyó ndiʼi tiempo nu̱ú iin ñuʼú livi. “Ña̱ cháʼviyó xa̱ʼa ku̱a̱chiyó kúú ña̱ xíʼi̱yó”, káchi Romanos 6:23, ta káʼa̱nkatu versículo yóʼo, “ta ña̱ va̱ʼa táxi Ndióxi̱ kúú ña̱ kutakuyó ndiʼi tiempo xa̱ʼa ña̱ ki̱xi táta Cristo Jesús” ni̱xi̱ʼi̱ra xa̱ʼayó. Nu̱ú capítulo u̱ni̱ ña̱ libro yóʼo sa̱kuaʼayó xa̱ʼa ña̱ bendición ña̱ xa̱a̱ ku̱nu̱mí koo nu̱ú ñuyǐví xa̱á (Revelación 21:3, 4). Ndiʼi bendición yóʼo, xíʼin ña̱ xa̱a̱yó kooyó ndiʼi tiempo kivi ni̱ʼíyóña xa̱ʼa ña̱ ni̱xi̱ʼi̱ ta̱ Jesús xa̱ʼayó. Soo ña̱ va̱ʼa ndakiʼinyóña xíniñúʼu na̱ʼa̱yó ña̱ táxiyó tixaʼvi ndaʼa̱ Jehová.

18. ¿Nda̱chun xíniñúʼu taxiyó tixaʼvi ndaʼa̱ Jehová xa̱ʼa ña̱ ta̱xira se̱ʼera ni̱xi̱ʼi̱ xa̱ʼayó?

¹⁸ ¿Nda̱chun xíniñúʼu taxiyó tixaʼvi ndaʼa̱ Jehová xa̱ʼa ña̱ ta̱xira se̱ʼera ni̱xi̱ʼi̱ xa̱ʼayó? Iin regalo ndáyáʼviña nu̱úyó tá na̱ ta̱xiña ndaʼa̱yó xi̱niñúʼuna tiempona, ndéena á xu̱ʼúnna ña̱ ki̱ʼinnaña. Ta xíʼin ña̱yóʼo ni̱na̱ʼa̱na ña̱ ndixa kúni̱na xínina miíyó. Soo mií ña̱ káʼnuka nu̱ú ndiʼiña kúú ña̱ i̱xaa Ndióxi̱, Juan 3:16 káchiña: “Saáchi kúʼvi̱ní-ini Ndióxi̱ xínira ndiʼi na̱ yiví ña̱kán ta̱xira se̱ʼera ta̱  mitúʼun” xa̱ʼana. Xíʼin ña̱yóʼo ni̱na̱ʼa̱ra ña̱ ndixa kúʼvi̱-inira xínira miíyó. Saátu ta̱ Jesús kúʼvi̱-inira xínira miíyó chi ki̱xira ni̱xi̱ʼi̱ra xa̱ʼayó (kaʼvi Juan 15:13). Ná kǒo kaka-iniyó chi Jehová xíʼin ta̱ Jesús ndixa kúʼvi̱-inina xínina miíyó (Gálatas 2:20).

19, 20. ¿Nda̱saa na̱ʼún ña̱ ndixa táxiún tixaʼvi ndaʼa̱ Jehová xa̱ʼa ña̱ ta̱xira se̱ʼera ni̱xi̱ʼi̱ xa̱ʼayó?

¹⁹ Ta, ¿nda̱saa na̱ʼún ña̱ ndixa táxiún tixaʼvi ndaʼa̱ Jehová xa̱ʼa ña̱ ta̱xira se̱ʼera ni̱xi̱ʼi̱ xa̱ʼayó? Xíniñúʼu sakuaʼakaún ña̱ kunda̱a̱ka-iniún xa̱ʼara (Juan 17:3). Ta ña̱ va̱ʼa kunda̱a̱ka-iniún xíniñúʼu kaʼviún Biblia xíʼin libro yóʼo. Tá ná kunda̱a̱ka-iniún xa̱ʼara xa̱ún kuʼvi̱ka-iniún kuniúnra. Tá ná kuʼvi̱ka-iniún kuniúnra kuni̱kaún keʼún ña̱ kúni̱ra (1 Juan 5:3).

²⁰ Kandíxaníún ta̱ Jesús. Ña̱ Biblia káchiña: “Na̱ kándíxa ndinuʼu-ini se̱ʼe Ndióxi̱ kutaku ndiʼi tiempo” (Juan 3:36). ¿Ndáaña keʼéyó ña̱ va̱ʼa kandíxayó ta̱ Jesús? Su̱ví tu̱ʼun kuití ka̱ʼa̱nyó, tá káchi Santiago 2:26, ni ná ka̱ʼa̱nvayó ña̱ kándíxayó Ndióxi̱ tá va̱ása kéʼéyó ña̱ kúni̱ra su̱ví ña̱ ndixa kúúña. Ña̱ va̱ʼa na̱ʼa̱yó ña̱ ndixa kándíxayó ta̱ Jesús kúúña ná keʼéyó ña̱ ke̱ʼéra (Juan 13:15).

21, 22. a) ¿Nda̱chun xíniñúʼu ku̱ʼu̱nyó ndakaʼányó xa̱ʼa ña̱ ni̱xi̱ʼi̱ ta̱ Jesús? b) ¿Ndáaña sakuaʼayó nu̱ú capítulo 6 xíʼin 7?

 ²¹ Xíniñúʼu ku̱ʼún ndakaʼún xa̱ʼa ña̱ ni̱xi̱ʼi̱ ta̱ Jesús. Tá ñu̱ú 14 xíka tí yo̱o̱ nisán ña̱ ku̱i̱ya̱ 33, ta̱ Jesús ke̱ʼéra iin ña̱ káʼa̱n Biblia xa̱ʼa ña̱ naní cena ta̱ Jesús (1 Corintios 11:20; Mateo 26:26-28). Savatuna káʼa̱nna Conmemoración xíʼinña chi saá kúú ña̱ ndákaʼánna xa̱ʼa ña̱ ni̱xi̱ʼi̱ ta̱ Jesús. Ke̱ʼé ta̱ Jesús ña̱yóʼo ña̱ va̱ʼa ná ndakaʼán na̱ apóstol xíʼin ndiʼika na̱ cristiano xa̱ʼa ña̱yóʼo: ña̱ ni̱xi̱ʼi̱ra cha̱ʼvira xa̱ʼa ku̱a̱chiyó. Miíra ni̱ka̱ʼa̱n xa̱ʼa ña̱yóʼo ta káchira: “Kǒo sándákoondó keʼéndó ña̱yóʼo ña̱ va̱ʼa ndakaʼánndó xa̱ʼíi̱” (Lucas 22:19). Ña̱ Conmemoración sándakaʼánña miíyó ña̱ kúʼvi̱ní-ini Jehová xíʼin ta̱ Jesús xínina miíyó. Tá xáʼa̱nyó yóʼo náʼa̱yó ña̱ táxiyó tixaʼvi ndaʼa̱ra xa̱ʼa ña̱yóʼo. *

²² Káʼnuní ña̱ ke̱ʼé Jehová ña̱ ta̱xira se̱ʼera ni̱xi̱ʼi̱ xa̱ʼayó (2 Corintios 9:14, 15). Ta nda̱a̱ na̱ ni̱xi̱ʼi̱ kivi chindeéña táki̱ʼva sakuaʼayó nu̱ú capítulo 6 xíʼin 7.