1. ¿Ndáaña va̱ʼa ndakiʼinyó tá ná ndasakáʼnuyó Ndióxi̱ táki̱ʼva kúni̱ miíra?

JEHOVÁ kúʼvi̱ní-inira xínira miíyó, ta kúni̱ra ná kundiku̱nyó yichi̱ra chi ña̱ va̱ʼa miíyó kúúña. Tá ná ndasakáʼnuyóra nda̱a̱ táki̱ʼva kúni̱ miíra si̱íní kundooyó ta kǒoní ku̱a̱chi koo nu̱úyó. Chika̱a̱ra bendición miíyó ta chindeé táʼanra xíʼinyó (Isaías 48:17). Soo ku̱a̱ʼá religión íyo. Ni ndiʼina káʼa̱nna ña̱ sánáʼa̱na ña̱ nda̱a̱ xa̱ʼa Ndióxi̱, soo kǒo xíni̱na mií ña̱ nda̱a̱ xa̱ʼara ni ndáaña kúni̱ra keʼéyó.

2. ¿Ndáaña keʼún ña̱ va̱ʼa kunda̱a̱-iniún ndáa ki̱ʼva xíniñúʼu ndasakáʼnuyó Jehová, ta ndáa ejemplo kivi ka̱ʼa̱nyó xa̱ʼa?

² ¿Ndáaña keʼún ña̱ va̱ʼa kunda̱a̱-iniún ndáa ki̱ʼva kúni̱ Ndióxi̱ ndasakáʼnuyóra? Va̱ása xíniñúʼu nandukún xa̱ʼa iin iinví religión. Iin ña̱ va̱ʼa keʼún kúúña sakuaʼa ña̱ káʼa̱n Biblia xa̱ʼa religión ña̱ nda̱a̱. Ná ka̱ʼa̱nyó xa̱ʼa iin ña̱ʼa. Ku̱a̱ʼání país xíniñúʼuna xu̱ʼún ña̱ va̱ása va̱ʼa. Tá ná kachiyó taxina iin chiñu ndaʼún ña̱ ndataʼviún xu̱ʼún ña̱ va̱ása va̱ʼa xíʼin xu̱ʼún va̱ʼa. ¿Ndáaña keʼún ña̱ va̱ʼa ndakuniúnña? ¿Á xíniñúʼu sakuaʼún ndáa ki̱ʼva íyo ndiʼi xu̱ʼún ña̱ va̱ása va̱ʼa? Ña̱ va̱ʼaka keʼún kúú ña̱ xíniñúʼu sakuaʼún ndakuniún ndáa ki̱ʼva káa xu̱ʼún ña̱ va̱ʼa. Tá ná sakuaʼa va̱ʼún  xíʼin ña̱yóʼo va̱ása yo̱ʼvi̱ kooña nu̱ún ña̱ ndakuniún xu̱ʼún ña̱ va̱ása va̱ʼa. Saátu va̱ása yo̱ʼvi̱ ndakuniyó religión ña̱ vatá tá ná sakuaʼa va̱ʼayó ndáa ki̱ʼva xíniñúʼu koo religión ña̱ nda̱a̱.

3. Nda̱a̱ táki̱ʼva ni̱ka̱ʼa̱n ta̱ Jesús, ¿ndáaña xíniñúʼu keʼéyó ña̱ va̱ʼa kusi̱í-ini Jehová xíʼinyó?

³ Xíniñúʼu ndasakáʼnuyó Jehová táki̱ʼva kúni̱ miíra. Ku̱a̱ʼání na̱ yiví ndákanixi̱nína ña̱ va̱ʼa ndiʼiva religión nu̱ú Ndióxi̱, soo su̱ví saá káchi Biblia. Su̱ví kuití ña̱ káʼa̱nyó ña̱ ndásakáʼnuyó Ndióxi̱ ta xa̱a̱ va̱ʼaví. Ta̱ Jesús ni̱ka̱ʼa̱nra: “Su̱ví ndiʼi na̱ káʼa̱n: ‘Táta, táta’ xíʼi̱n, ndi̱ʼvi ti̱xin Reino Ndióxi̱, chi na̱ ndi̱ʼvi kúú na̱ kéʼé ña̱ kúni̱ yivái̱ ta̱ níndúʼú chí ndiví”. Ndióxi̱ kúsi̱í-inira tá sákuaʼayó xa̱ʼara ta kéʼéyó ña̱ káʼa̱nra. Na̱ kǒo kéʼé ña̱ káʼa̱n Ndióxi̱, ta̱ Jesús ni̱ka̱ʼa̱nra xa̱ʼana ña̱ su̱ví ña̱ va̱ʼa kéʼéna, chi ña̱ kiniva kéʼéna (Mateo 7:21-23). Ña̱ religión vatá táki̱ʼva íyo xu̱ʼún ña̱ va̱ása va̱ʼa saá íyoña chí kǒo ndáyáʼviña. Tu̱ndóʼokava táxiña ndaʼa̱yó.

4. ¿Ndáaña kúni̱ kachi u̱vi̱ yichi̱ ña̱ ni̱ka̱ʼa̱n ta̱ Jesús xa̱ʼa, ta ndáaña taxi iin iin ña̱yóʼo ndaʼa̱yó?

⁴ Jehová kúni̱ra ndiʼi na̱ yiví ná xa̱a̱na kutakuna ndiʼi tiempo. Soo ña̱ va̱ʼa kooyó ndiʼi tiempo nu̱ú iin ñuʼú livi xíniñúʼu ndasakáʼnuyóra ta keʼéyó ña̱ kúni̱ miíra. Ku̱a̱ʼánína kǒo xíínna keʼéna ña̱yóʼo, ña̱kán ni̱ka̱ʼa̱n ta̱ Jesús: “Ki̱ʼvindó chí yéʼé táñu; saáchi yéʼé káʼnu xíʼin yichi̱ ña̱ ndíkaa kán kúú nu̱ú ku̱a̱ʼa̱n na̱ ndiʼi-xa̱ʼa, ta ku̱a̱ʼání kúú na̱ ku̱a̱ʼa̱n kán; ta yéʼé táñu xíʼin yichi̱ táñu, kán kúú nu̱ú ku̱a̱ʼa̱n na̱ kutaku, ta loʼova kúú na̱ ku̱a̱ʼa̱n kán” (Mateo 7:13, 14). Táki̱ʼva sákuaʼayó yóʼo, na̱ ndíka̱a̱ religión ña̱ nda̱a̱ na̱ kutaku kúúna ta na̱ ñúʼu religión ña̱ vatá na̱ ndiʼi-xa̱ʼa kúúna. Jehová va̱ása kúni̱ra ni iinyó ndiʼi-xa̱ʼa, kúni̱ra ndiʼi na̱ yiví ná sakuaʼa xa̱ʼara (2 Pedro 3:9). Xa̱ʼa ña̱yóʼo ná kiʼinyó kuenta ndáa ki̱ʼva ndásakáʼnuyóra chi xíʼin ña̱yóʼo kivi kutakuyó á kivi kuvivayó.

5. ¿Ndáa ki̱ʼva ndakuniyó na̱ ndásakáʼnu Ndióxi̱ ta̱ nda̱a̱?

⁵ ¿Ndáaña keʼéyó ña̱ va̱ʼa ndani̱ʼíyó yichi̱ ña̱ taxi kutakuyó? Ta̱ Jesús ni̱ka̱ʼa̱nra ña̱ va̱ása yo̱ʼvi̱ ndakuniyó na̱ ñúʼu religión ña̱ nda̱a̱ chi xíʼin chiñu kéʼéna ndakuniyóna. Káchira: “Xíʼin ña̱ kéʼéna ndakunindóna”, chi “ndiʼi yitu̱n tú va̱ʼa, ku̱i̱ʼi va̱ʼa táxinú” (Mateo 7:16, 17). Na̱ ndixa ndásakáʼnu Ndióxi̱ náʼa̱ miívana xa̱ʼa ña̱ kándíxana xíʼin ña̱ kéʼéna, ni kúúna na̱ yiví ku̱a̱chi, ta sava va̱ása kána va̱ʼa ña̱ kéʼéna. Soo ndiʼina chíka̱a̱na ndée ña̱ kéʼéna ña̱ kúni̱ Ndióxi̱. Ná sakuaʼayó xa̱ʼa i̱ñu̱ ña̱ʼa ña̱ kivi chindeé miíyó ña̱ ndakuniyóna.

6, 7. ¿Ndáaña ndákanixi̱ní na̱ ndásakáʼnu Ndióxi̱ xa̱ʼa Biblia, ta ndáa yichi̱ sa̱ndákoo ta̱ Jesús nu̱úyó?

⁶ Ndiʼi ña̱ sánáʼa̱na nu̱ú Biblia va̱xiña. Ña̱ Biblia káchiña: “Ndiʼi tu̱ʼun ña̱ ni̱ka̱ʼyi̱, xíʼin ta̱chí yi̱i̱ Ndióxi̱ ni̱ka̱ʼyi̱ña, ta va̱ʼaní sánáʼa̱ña, ta chíka̱a̱ña miíyó yichi̱ nda̱kú tasaá násamaña miíyó xíʼin ña̱ kéʼéyó. Ña̱kán ta̱ káchíñu nu̱ú Ndióxi̱ nduura iin ta̱ xíni̱ va̱ʼa ta koo tu̱ʼvara keʼéra ndiʼi ña̱ʼa” (2 Timoteo 3:16, 17). Ta̱ apóstol Pablo ni̱ka̱ʼa̱nra: “Xa̱ʼa ña̱yóʼo táxiníndi̱ tixaʼvi ndaʼa̱ Ndióxi̱, saáchi tá xi̱niso̱ʼondó tu̱ʼun Ndióxi̱ ña̱ ni̱ka̱ʼa̱nndi̱ xíʼinndó, ka̱ndíxandóña, soo kǒo níkandíxandóña ña̱ kúúña tu̱ʼun na̱ yiví, ka̱ndíxandóña ña̱ kúúña tu̱ʼun Ndióxi̱” (1 Tesalonicenses 2:13). Xíʼin ña̱yóʼo kúnda̱a̱-iniyó na̱ ndásakáʼnu Ndióxi̱ míí ta̱ nda̱a̱ kǒo sánáʼa̱na ña̱ kúni̱ miína á ña̱ káʼa̱n na̱ ñuyǐví yóʼo. Ña̱ sánáʼa̱na nu̱ú Biblia va̱xiña.

⁷ Ta̱ Jesús va̱ʼaní yichi̱ sa̱ndákoora nu̱úyó, chi ndiʼi ña̱ sa̱náʼa̱ra nu̱ú tu̱ʼun Ndióxi̱ va̱xiña. Iin yichi̱ ni̱ka̱ʼa̱nra xíʼin yivára: “Tu̱ʼun yóʼó kúú ña̱ nda̱a̱” (Juan 17:17). Ta̱ Jesús xi̱kandíxara tu̱ʼun Ndióxi̱ ta ndiʼi ña̱ sa̱náʼa̱ra nu̱ú tu̱ʼun Ndióxi̱ va̱xiña. Tuku ta tuku xi̱ka̱ʼa̱nra: “Tu̱ʼun Ndióxi̱  káchiña”, tasaá xi̱ka̱ʼa̱nra iin texto ña̱ va̱xi nu̱ú Biblia (Mateo 4:4, 7, 10). Ta saátu íyo na̱ ndásakáʼnu Ndióxi̱ tiempo vitin, va̱ása sánáʼa̱na ña̱ kána xi̱ní miína. Kándíxanína tu̱ʼun Ndióxi̱ ta kéʼéna ña̱ káʼa̱nña.

8. ¿Ndáaña kéʼé na̱ ñuu Ndióxi̱ tasaá náʼa̱na ña̱ ndásakáʼnunara táki̱ʼva kúni̱ miíra?

⁸ Na̱ ndixa ndásakáʼnu Ndióxi̱ ta̱ nda̱a̱ iinlá Jehová ndásakáʼnuna ta sanáʼa̱na ki̱vi̱ra nu̱ú inkana. Ta̱ Jesús ni̱ka̱ʼa̱nra: “Jehová kúú ta̱ xíniñúʼu ndasakáʼnún, ta iinlá ta̱kán kúú ta̱ xíniñúʼu keʼún ña̱ kúni̱” (Mateo 4:10). Ña̱kán na̱ ñuu Ndióxi̱ iinlá Jehová ndásakáʼnuna. Sánáʼa̱na inkana xa̱ʼa ki̱vi̱ra xíʼin xa̱ʼa ña̱ va̱ʼa kúúmiíra chi saá náʼa̱na ña̱ ndásakáʼnunara. Salmo 83:18 káchiña: “Ki̱vi̱ yóʼó kúú Jehová, mitúʼun yóʼó kúú ta̱ káʼnu iníísaá nu̱ú ñuʼú”. Ndíku̱nna yichi̱ ta̱ Jesús ña̱ sánáʼa̱na inka na̱ yiví xa̱ʼa Ndióxi̱. Miíra ni̱ka̱ʼa̱nra xíʼin yivára tu̱ʼun yóʼo: “Xa̱a̱ na̱túʼi̱n xa̱ʼa ki̱vi̱ún xíʼinna” (Juan 17:6). Saátu vitin na̱ ñuu Ndióxi̱ sánáʼa̱na inkana xa̱ʼa ki̱vi̱ Ndióxi̱, nátúʼunna xa̱ʼa ña̱ keʼéra chí nu̱únínu xíʼin xa̱ʼa ña̱ va̱ʼa kúúmiíra.

9, 10. Na̱ ñuu Ndióxi̱, ¿ndáaña kéʼéna tasaá náʼa̱na ña̱ kúʼvi̱-inina xíni táʼanna?

⁹ Na̱ ñuu Ndióxi̱ ndixa ma̱ní táʼanna. Ta̱ Jesús ni̱ka̱ʼa̱nra: “Xíʼin ña̱yóʼo ndakunina ndóʼó ña̱ kúúndó discípuloi̱, tá kúʼvi̱-inindó xíni táʼanndó” (Juan 13:35). Na̱ discípulo ta̱ Jesús xi̱kuʼvi̱-inina xi̱ni táʼanna. Na̱ ñuu Ndióxi̱ na̱ ndóo tiempo vitin ni xa̱a̱ síín color iin iinna, ni xa̱a̱ síín tu̱ʼun káʼa̱nna á ñuuna xa̱ʼa ña̱ kúʼvi̱-inina xíni táʼanna va̱ʼaní ítáʼanna iníísaá ñuyǐví (kaʼvi Colosenses 3:14). Na̱ religión vatá kǒo kúʼvi̱-inina xíni táʼanna. Tá na̱ ndixa kúʼvi̱-ini xíni táʼan kúúna, kǒo kaʼní táʼanna xa̱ʼa ña̱ kúúna na̱ inka ñuu á inka raza. Na̱ ndixa ndásakáʼnu Ndióxi̱ kǒo kíʼinna tu̱xi̱í ña̱ xáʼnína ñanina á inkaka na̱ yiví. Ña̱ Biblia káchiña: “Na̱ se̱ʼe Ndióxi̱ xíʼin na̱ se̱ʼe ta̱ Ndi̱va̱ʼa náʼa̱ miívana xíʼin ña̱yóʼo: Na̱ kǒo kéʼé ña̱ va̱ʼa su̱ví se̱ʼe Ndióxi̱  kúúna saátu na̱ kǒo kúʼvi̱-ini xíni táʼan su̱ví se̱ʼe Ndióxi̱ kúúna [...;] ná kuʼvi̱-iniyó kuni táʼanyó; kǒo keʼéyó táʼan ña̱ ke̱ʼé ta̱ Caín, se̱ʼe ta̱ Ndi̱va̱ʼa xi̱kuu ta̱yóʼo chi xa̱ʼníra ñanira” (1 Juan 3:10-12; 4:20, 21).

¹⁰ Ña̱ ndixa na̱ʼa̱yó ña̱ kúʼvi̱-iniyó xíniyó inkana su̱ví kuití ña̱ kǒo xáʼníyóna ta xa̱a̱ va̱ʼaví chi íyoka inka ña̱ kéʼéyó. Xíniñúʼuyó tiempoyó, ndéeyó á xu̱ʼúnyó ña̱ chindeé táʼanyó xíʼinna (Hebreos 10:24, 25). Chíndeé táʼanyó xíʼin na̱ ñaniyó tá yáʼana nu̱ú tu̱ndóʼo ndeé, ta viítu íyo iniyó xíʼin inkavana. Tasaá ndíku̱nyó ña̱ káʼa̱n Biblia ña̱ ‘keʼéyó ña̱ va̱ʼa xíʼin ndiʼina’ (Gálatas 6:10).

11. ¿Nda̱chun xíniñúʼu kandíxayó ta̱ Jesús ña̱ va̱ʼa ka̱kuyó?

¹¹ Kándíxana iinlá ta̱ Jesús kúú ta̱ xíniñúʼu Ndióxi̱ ña̱ va̱ʼa saka̱kura miíyó. Ña̱ Biblia káchiña “kǒoka inka ña̱ kivi saka̱ku miíyó, chi kǒo inka ki̱vi̱na ña̱ káʼnu táki̱ʼva káʼnu ña̱yóʼo nu̱ú ñuʼú yóʼo ña̱ kivi saka̱ku miíyó” (Hechos 4:12). Táki̱ʼva sa̱kuaʼayó nu̱ú capítulo 5, ta̱ Jesús ki̱xira ni̱xi̱ʼi̱ra xa̱ʼa ndiʼi na̱ kándíxa ña̱ káʼa̱n Ndióxi̱ (Mateo 20:28). Jehová nda̱ka̱xinrara ña̱ kuura rey ta kaʼndachíñura iníísaá ñuyǐví. Ndióxi̱ kúni̱ra ña̱ ná kandíxayó ta̱ Jesús ta kundiku̱nyó ña̱ sa̱náʼa̱ra. Tá saá ná keʼéyó va̱ʼa kutakuyó ndiʼi tiempo. Ña̱kán kúú ña̱ káʼa̱n Biblia: “Na̱ kándíxa se̱ʼe Ndióxi̱ kutakuna ndiʼi tiempo, na̱ kǒo kándíxañaʼá va̱ása kutakuna” (Juan 3:36).

12. ¿Ndáaña kǒo kéʼé na̱ ñuu Ndióxi̱ tasaá náʼa̱na ña̱ kǒo kíʼvina xíʼin na̱ ñuyǐví?

¹² Na̱ ñuu Ndióxi̱ kǒo kéʼéna táʼan ña̱ kéʼé na̱ ñuyǐví yóʼo. Tá ti̱in ta̱ Pilato ku̱a̱chi xíʼin ta̱ Jesús, saá ni̱ka̱ʼa̱n ta̱ Jesús xíʼinra: “Ña̱ Reino yi̱ʼi̱ su̱ví ña̱ ñuyǐví yóʼo kúúña” (Juan 18:36). Nda̱a̱ ndáaka nu̱ú ndóo na̱ ñuu Ndióxi̱ kǒo kíʼvina xíʼin ku̱a̱chi nu̱ú xáʼni táʼanna, ni kǒo kíʼvina xíʼin partido, chi ña̱ káʼa̱n Ndióxi̱va kéʼéna. Tá iin na̱ yiví kúni̱na ki̱ʼvina xíʼin iin partido á chika̱a̱na votona, kǒo  sásina nu̱úna. Ni kǒo kíʼvina xíʼin partido, soo kándíxavana ña̱ káʼa̱n na̱ chíñu. ¿Nda̱chun va̱ʼa kándíxanana? Saáchi tu̱ʼun Ndióxi̱ káʼa̱nña ña̱ ná kandíxana na̱ chíñu (Romanos 13:1). Soo tá káʼa̱n na̱ chíñu xíʼinna ña̱ keʼéna ña̱ kǒo kútóo Ndióxi̱, saá kúú ña̱ kéʼéna táʼan ña̱ ke̱ʼé na̱ apóstol, chi na̱yóʼo ni̱ka̱ʼa̱nna: “Siʼnaka ña̱ káʼa̱n Ndióxi̱ xíniñúʼu kuniso̱ʼondi̱ su̱víka ña̱ káʼa̱n ndóʼó” (Hechos 5:29; Marcos 12:17).

13. ¿Nda̱chun xíkaní na̱ ñuu Ndióxi̱ nátúʼunna xíʼin na̱ yiví xa̱ʼa Reinora?

 ¹³ Na̱ ndixa kúú discípulo ta̱ Jesús nátúʼunna xíʼin na̱ yiví xa̱ʼa Reino Ndióxi̱ chi iinlá ña̱yóʼo kuchiñu chindeé ndiʼi na̱ yiví. Ta̱ Jesús ni̱ka̱ʼa̱nra: “Tu̱ʼun va̱ʼa ña̱ káʼa̱n xa̱ʼa ta̱ kaʼndachíñu, ku̱ʼu̱nña nu̱ú ndiʼi na̱ ñuu ña̱ va̱ʼa kunda̱a̱-ini ndiʼi na̱ yiví; ta saá kixa̱a̱ ña̱ ndiʼi-xa̱ʼa na̱ ñuyǐví” (Mateo 24:14). Na̱ ndixa kúú discípulo ta̱ Jesús va̱ása káʼa̱nna xíʼin na̱ yiví ña̱ ná kandíxana na̱ gobierno ñuyǐví yóʼo ña̱ va̱ʼa sandiʼi-xa̱ʼana tu̱ndóʼo. Ña̱ xíka na̱yóʼo káʼa̱nna kúú ña̱ iinlá Reino Ndióxi̱ kúú ña̱ kuchiñu kindaa ndiʼi tu̱ndóʼo (Salmo 146:3). Ta̱ Jesús sa̱ndákoora yichi̱ nu̱úyó ndáa ki̱ʼva ka̱ʼa̱nyó xíʼin Ndióxi̱ xa̱ʼa gobiernora, káchira: “Ná kixa̱a̱ ña̱ kaʼndachíñún. Saá koo ña̱ kúni̱ miíún, táki̱ʼva íyo chí ndiví, saá ná koo nu̱ú ñuʼú yóʼo” (Mateo 6:10). Tu̱ʼun Ndióxi̱ káchiña ta̱ rey ta̱ nda̱ka̱xinra kúú ta̱ sandiʼi-xa̱ʼa “ndiʼi na̱ chíñu ñuyǐví yóʼo, ta mitúʼunra koo ndiʼi tiempo” (Daniel 2:44; Revelación 16:14; 19:19-21).

14. Nu̱ú miíún, ¿ndáana kúú na̱ kéʼé ndiʼi ña̱ káʼa̱n Biblia?

¹⁴ Xa̱ʼa ndiʼi ña̱ sa̱kuaʼayó yóʼo, ndakanixi̱ní: “¿Ndáa religión kúú ña̱ ndíku̱n ndiʼi ña̱ va̱xi nu̱ú Biblia? ¿Ndáana kúú na̱ nátúʼun xa̱ʼa ki̱vi̱ Ndióxi̱ ña̱ naníra Jehová? ¿Ndáa religión kúú na̱ kúʼvi̱-ini xíni táʼan, kándíxana ta̱ Jesús, va̱ása kíʼvina xíʼin na̱ ñuyǐví yóʼo, ta nátúʼunna xa̱ʼa Reino Ndióxi̱ ña̱ iinlá ña̱yóʼo kuchiñu sandiʼi-xa̱ʼa tu̱ndóʼo? Ndiʼi religión ña̱ íyo ñuyǐví yóʼo, ¿ndáana kúú ña̱ kéʼé ndiʼi ña̱ ni̱ka̱ʼa̱nyó xa̱ʼa yóʼo?”. Á su̱ví ña̱ nda̱a̱ kúúña iinlá na̱ testigo Jehová kéʼé ndiʼi ña̱yóʼo (kaʼvi Isaías 43:10-12).

15. ¿Ndáaña xíniñúʼu keʼékayó ña̱ va̱ʼa na̱ʼa̱yó ña̱ kándíxayó Ndióxi̱?

¹⁵ Su̱ví ña̱ kandíxa kuitíyó Ndióxi̱ ta xa̱a̱ va̱ʼaví, ña̱ Biblia káchiña nda̱a̱ na̱ ta̱chí ndi̱va̱ʼa kándíxavana ña̱ íyo Ndióxi̱ (Santiago 2:19). Soo kǒo kéʼéna ña̱ kúni̱ra, ta  va̱ása kúsi̱í-inira xíʼinna. Ña̱ va̱ʼa sákusi̱íyó-ini Ndióxi̱ su̱ví kuití kandíxayó ña̱ íyora ta xa̱a̱ va̱ʼaví, xíñiñúʼu keʼéyó ña̱ kúni̱ra. Ta xíniñúʼu keeyó ti̱xin veʼe-ñu̱ʼu vatá ta ndasakáʼnuyó Ndióxi̱ míí ta̱ nda̱a̱.

16. ¿Ndáaña xíniñúʼu keʼéyó ña̱ va̱ʼa ná kǒo kutáʼanyó xíʼin na̱ veʼe-ñu̱ʼu vatá?

¹⁶ Ta̱ apóstol Pablo ni̱ka̱ʼa̱nra ña̱ va̱ása keʼéyó ña̱ kéʼé na̱ veʼe-ñu̱ʼu vatá. Saá káchi ña̱ ka̱ʼyíra: “‘Keendó ta kǒo kuñuʼukandó xíʼinna, káchi Jehová, ta kǒo keʼéndó ña̱ kiniʼ; ‘ta yi̱ʼi̱ ndakiʼi̱n ndóʼó’” (2 Corintios 6:17; Isaías 52:11). Ña̱kán na̱ ndixa ndásakáʼnu Ndióxi̱ kǒo kéʼékana ni iin ña̱ʼa ña̱ kéʼé na̱ veʼe-ñu̱ʼu vatá.

17, 18. ¿Ndáaña kúú “Babilonia ña̱ káʼnu”, ta nda̱chun xíniñúʼu keeyó ti̱xinña?

¹⁷ Na̱ Biblia káʼa̱nña ndiʼi religión vatá ndíka̱a̱ña ti̱xin “Babilonia ña̱ káʼnu” (Revelación 17:5). * Saá xi̱naní ñuu ña̱ ni̱xi̱yo xi̱naʼá nu̱ú ki̱xaʼá xa̱ʼa ndiʼi religión vatá, tándi̱ʼi ko̱on sa̱vi̱ kini tá tiempo ta̱ Noé. Ku̱a̱ʼání ña̱ kéʼé na̱ veʼe-ñu̱ʼu vatá xíʼin ña̱ sánáʼa̱na vitin ki̱xaʼá xa̱ʼaña tiempo xi̱naʼá ti̱xin ñuu Babilonia. Tá kúú na̱ xi̱ndoo tiempo saá xi̱ndasakáʼnuna u̱ni̱ ndióxi̱, ta tiempo vitin ku̱a̱ʼání religión kándíxa ña̱ íyo Trinidad. Soo ña̱ Biblia, káxiníva káʼa̱nña iinláva Ndióxi̱ íyo, Jehová naníra, ta̱ Jesús kúú se̱ʼera (Juan 17:3). Na̱ ñuu Babilonia xi̱kandíxatuna ña̱ kíta níma̱ na̱ yiví tá xíʼi̱na, á tá xíʼi̱tuna ku̱a̱ʼa̱nna xi̱tun á infierno. Ta tiempo vitin ku̱a̱ʼání na̱ religión vatá sánáʼa̱ ña̱yóʼo.

¹⁸ Ña̱ xi̱keʼéna ti̱xin religión ña̱ ni̱xi̱yo Babilonia xi̱naʼá iníí ni̱xa̱xaña ku̱a̱ʼa̱nña. Ña̱kán, Babilonia ña̱ káʼnu saá káʼa̱nna xíʼin ndiʼi religión vatá. Ndióxi̱ ni̱ka̱ʼa̱nra ña̱ Babilonia yóʼo iin kama kuití kixa̱a̱ ki̱vi̱ ña̱ ndiʼi-xa̱ʼaña. ¿Á kúnda̱a̱-iniún vitin ndáa xa̱ʼa kúú ña̱ xíniñúʼu kitaún  ti̱xin Babilonia ña̱ káʼnu? Jehová kúni̱ra ña̱ kamaní ná kitaún ti̱xinña chi vitin kúú ña̱ íyo loʼoka tiempo (kaʼvi Revelación 18:4, 8).

19. ¿Ndáa ña̱ va̱ʼa ndakiʼún xa̱ʼa ña̱ ndásakáʼnún Jehová?

¹⁹ Tá xa̱a̱ nda̱kanixi̱níún kitaún ti̱xin veʼe-ñu̱ʼu vatá, savana kǒo kuni̱kana kutáʼanna xíʼún. Soo ña̱ ndasakáʼnún Jehová xíʼin na̱ ñuura ku̱a̱ʼáka ña̱ va̱ʼa ndakiʼún. Nda̱a̱ táki̱ʼva ndo̱ʼo na̱ discípulo na̱ sa̱ndákoo ña̱ʼa ta xi̱kundiku̱nnara saá ndoʼún: xa̱ún koo ku̱a̱ʼání ñaniún, ku̱ʼvaún, ku̱ʼviún na̱ káʼvi tu̱ʼun Ndióxi̱. Xa̱ún nduún táʼan na̱ káʼvi tu̱ʼun Ndióxi̱ na̱ ndóo iníísaá ñuyǐví, ta ndiʼi na̱yóʼo kuʼvi̱ní-inina kunina yóʼó. Ta va̱ʼa xa̱ún koún ndiʼi tiempo nu̱ú ñuyǐví xa̱á (kaʼvi Marcos 10:28-30). Sana na̱ sándákoo yóʼó vitin xa̱ʼa ña̱ kaʼviún tu̱ʼun Ndióxi̱, chí nu̱únínu sana xa̱a̱na sakuaʼana ña̱ káʼa̱n Biblia nda̱a̱ kixaʼána ndasakáʼnuna Jehová.

20. ¿Ndáaña ndakiʼin na̱ ndixa ndásakáʼnu Ndióxi̱ táki̱ʼva kúni̱ miíra?

²⁰ Ña̱ Biblia káchiña xa̱a̱ ku̱nu̱mí sandiʼi-xa̱ʼa Ndióxi̱ ñuyǐví ndi̱va̱ʼa yóʼo ta ndasaxa̱ára ñuʼú yóʼo tá ná kaʼndachíñu ta̱ rey ta̱ nda̱ka̱xinra (2 Pedro 3:9, 13). Livikaví koo ñuyǐví saá. Si̱ín iinlá kuití religión koo nu̱úña, inkáchi ndasakáʼnu ndiʼina Ndióxi̱. ¿Á su̱ví vitin kúú ña̱ xíniñúʼu chika̱ún ndée ña̱ kutáʼún xíʼin na̱ ndixa ndásakáʼnu Ndióxi̱?