APÉNDICE
¿Ndáa ta̱ kúú ta̱ arcángel Miguel?
NU̱Ú Biblia va̱xi sava texto ña̱ káʼa̱n xa̱ʼa ta̱ Miguel. Soo ndiʼi yichi̱ ña̱ káʼa̱nña xa̱ʼara íyo iin ña̱ kéʼéra. Nu̱ú libro ta̱ Daniel káʼa̱nña xa̱ʼara ña̱ káni táʼanra xíʼin na̱ ángel ndi̱va̱ʼa; nu̱ú carta ta̱ Judas, káʼa̱nña xa̱ʼara ña̱ ndáʼyi̱ nu̱ú táʼanna xíʼin ta̱ Ndi̱va̱ʼa, ta nu̱ú libro ña̱ Revelación, káʼa̱nña xa̱ʼara ña̱ káni táʼanra xíʼin ta̱ Ndi̱va̱ʼa xíʼin na̱ ta̱chí ndi̱va̱ʼa. Ndiʼi yichi̱ káʼa̱nra xa̱ʼa Jehová táki̱ʼva íxaa iin rey ta káni táʼan xíʼin na̱ sáa̱-ini xíni Jehová. Tasaá kéʼéra táki̱ʼva íyo ki̱vi̱ra, Miguel, ña̱ kúni̱ kachi, “¿ndáana íyo táki̱ʼva íyo Ndióxi̱?”. Soo, ¿ndáa ta̱ kúú ta̱ arcángel Miguel?
Ná ndakaʼányó chi sava na̱ yiví ku̱a̱ʼá kúú ki̱vi̱na. Tá kúú ta̱ Jacob xi̱nanítura Israel, ta ta̱ apóstol Pedro, xi̱nanítura Simón (Génesis 49:1, 2; Mateo 10:2). Ña̱ Biblia káʼa̱nña inka ki̱vi̱ ta̱ Jesús kúú Miguel, saá xi̱naníra tá kúma̱níka kixira nu̱ú ñuʼú yóʼo ta saátu tá ndi̱kóra chí ndiví. Ná kotoyó nu̱ú Biblia ndáa xa̱ʼa kúú ña̱ káʼa̱nyó ña̱yóʼo.
Ta̱ Arcángel. Ña̱ tu̱ʼun Ndióxi̱ káʼa̱nña xa̱ʼa ta̱ Miguel ña̱ kúúra “ta̱ arcángel” (Judas 9). Arcángel kúni̱ kachiña “ta̱ ángel káʼnu”. Yóʼo xítoyó inka ki̱vi̱ ta̱ Miguel kúú arcángel, ña̱yóʼo kúni̱ kachi iinlá kúú ángel naní saá. Ña̱ Biblia ni iin yichi̱ kǒo xíniñúʼuña tu̱ʼun “arcángel” ña̱ ka̱ʼa̱nña xa̱ʼa ku̱a̱ʼá na̱ ángel, chi iinlávana káʼa̱nña xa̱ʼa. Biblia káʼa̱nña xa̱ʼa ta̱ Jesús ña̱ kéʼéra chiñu táki̱ʼva íxaa iin arcángel. Saá káchi 1 Tesalonicenses 4:16: “Tátayó kixira chí ndiví ta kaʼndara chiñu, nda̱a̱ táki̱ʼva íxaa iin arcángel”. Xíʼin ña̱yóʼo kúnda̱a̱-iniyó ta̱ Jesús kúú ta̱ arcángel Miguel.
Comandante. Ña̱ Biblia káchiña “ta̱ Miguel xíʼin na̱ ángelra ka̱ni táʼanna xíʼin tí ko̱o̱ káʼnu xíʼin na̱ ángel tíyóʼo” (Revelación 12:7). Ta̱ Miguel kúú ta̱ comandante á ta̱ xáʼnda chiñu nu̱ú iin tiʼvi na̱ ángel. Nu̱ú libro Revelación káʼa̱nña xa̱ʼa ta̱ Jesús ña̱ kúúra comandante nu̱ú na̱ ángel (Revelación 19:14-16). Ta̱ apóstol Pablo ni̱ka̱ʼa̱nra xa̱ʼa tátayó Jesús xíʼin na̱ ángelra (2 Tesalonicenses 1:7). Xíʼin ña̱yóʼo xítoyó ña̱ Biblia káʼa̱nña xa̱ʼa ta̱ Miguel xíʼin na̱ ángelra ta saátu káʼa̱nña xa̱ʼa ta̱ Jesús xíʼin na̱ ángelra (Mateo 13:41; 16:27; 24:31; 1 Pedro 3:22). Soo Biblia va̱ása káʼa̱nña xa̱ʼa na̱ ángel ña̱ kúúna u̱vi̱ táʼví, iin na̱ kuenta ta̱ Miguel ta inkana kuenta ta̱ Jesús. Xíʼin ña̱yóʼo kúnda̱a̱-iniyó ta̱ Miguel kúú ta̱ Jesús. *
^ párr. 1 Tá kúni̱kaún kunda̱a̱-iniún xa̱ʼa ta̱ Miguel ña̱ kúúra ta̱ Jesús nandukú nu̱ú libro Perspicacia para comprender las Escrituras, volumen 2, ña̱ página 386, 387, ña̱ ta̱vá na̱ testigo Jehová.
