1, 2. a) ¿Ndáaña xíniñúʼu nda̱ka̱tu̱ʼunyó miíyó tá xa̱a̱ ke̱eyó ti̱xin veʼe-ñu̱ʼu vatá? b) ¿Nda̱chun xíniñúʼu nda̱ka̱tu̱ʼunyó ña̱yóʼo miíyó?

NDAKANIXI̱NÍ xa̱ʼa iinna ña̱ chi̱ka̱a̱na veneno nu̱ú kána ti̱kui̱í xíʼindó ta xa̱ʼa ña̱yóʼo kivi kuvi ndiʼindó. ¿Ndáaña keʼún vitin? Sana ña̱ keʼún kúú ña̱ ndukún inka nu̱ú koʼún ti̱kui̱í. Soo sana ndakanixi̱níún, ¿á ki̱ʼin veneno yi̱ʼi̱?

² Táki̱ʼva íyo ti̱kui̱í tá kúúmií veneno yóʼo ki̱ʼva saá íyo veʼe-ñu̱ʼu vatá. Ña̱ Biblia káʼa̱nña xa̱ʼa ndiʼi veʼe-ñu̱ʼu vatá ña̱ kǒo ña̱ va̱ʼa sánáʼa̱ña (2 Corintios 6:17). Xa̱ʼa ña̱yóʼo xíniñúʼu keeyó ti̱xin veʼe-ñu̱ʼu vatá ña̱ naní “Babilonia ña̱ káʼnu” (Revelación 18:2, 4). ¿Á xa̱a̱ sa̱ndákoúnña? Tá xa̱a̱ sa̱ndákoúnña va̱ʼaní i̱xaún. Soo su̱ví ña̱ sandákoo kuitíúnña ta xa̱a̱ va̱ʼaví. Xíniñúʼu nda̱ka̱tu̱ʼún miíún: “¿Á kéʼékai̱ sava ña̱ sánáʼa̱ na̱ veʼe-ñu̱ʼu vatá?”. Ná ka̱ʼa̱nyó xa̱ʼa savaña.

3. a) ¿Ndáaña káʼa̱n Biblia xa̱ʼa santo ta nda̱chun íxayo̱ʼvi̱ña xíʼin savana ña̱ sandákoonaña? b) ¿Ndáaña xíniñúʼu keʼún tá kúúmiíún santo?

³ Sava na̱ yiví xa̱a̱ ku̱a̱ʼání ku̱i̱ya̱ íyo santo veʼena. ¿Á íyoña veʼún? Tá íyoña veʼún sana ña̱yóʼo xíniñúʼún  tá káʼún xíʼin Ndióxi̱. Sana nda̱a̱ kúʼvi̱-iniún xíniúnña. Soo Ndióxi̱ káʼa̱nvara xíʼinyó ndáa ki̱ʼva kúni̱ra ndasakáʼnuyóra, Biblia káʼa̱n ña̱ va̱ása va̱ʼa kuniñúʼuyó santo ña̱ ndasakáʼnuyóra (kaʼvi Éxodo 20:4, 5; Salmo 115:4-8; Isaías 42:8; 1 Juan 5:21). Ta vitin ña̱ va̱ʼa ndasakáʼnuyó Ndióxi̱ míí ta̱ nda̱a̱, xíniñúʼu sandákooyó ndiʼi ña̱ kéʼé na̱ veʼe-ñu̱ʼu vatá. Xíniñúʼu kundasíyó kuniyó ña̱yóʼo nda̱a̱ táki̱ʼva kúndasí Jehová xíniraña (Deuteronomio 27:15).

4. a) ¿Nda̱chun va̱ása va̱ʼa ndasakáʼnuyó na̱ ni̱xi̱ʼi̱? b) ¿Nda̱chun kǒo níxikuni̱ Jehová ña̱ keʼé na̱ ñuu Israel ña̱ tási?

⁴ Inka ña̱ kéʼé na̱ veʼe-ñu̱ʼu vatá kúú ña̱ ndásakáʼnuna na̱ ni̱xi̱ʼi̱. Tá kúma̱níka sakuaʼayó ña̱ káʼa̱n Biblia, savayó xi̱kandíxayó ña̱ tákuna ta va̱ʼa chindeéna miíyó á kundi̱va̱ʼana xíʼinyó. Xa̱ʼa ña̱yóʼo xi̱taváyó vikóna. Soo táki̱ʼva sa̱kuaʼayó nu̱ú ña̱ capítulo 6 na̱ ni̱xi̱ʼi̱ va̱ása tákukana. Xa̱ʼa ña̱yóʼo kǒo xíniñúʼu ka̱ʼa̱nyó xíʼinna. Tá káʼa̱nna xíʼinyó túviyó, su̱ví miína kúú na̱ káʼa̱n, na̱  ta̱chí ndi̱va̱ʼava kúú na̱ káʼa̱n xíʼinyó. Xa̱ʼa ña̱yóʼo Jehová ni̱ka̱ʼa̱nra xíʼin na̱ ñuu Israel ña̱ va̱ása va̱ʼa ka̱ʼa̱nna xíʼin na̱ ni̱xi̱ʼi̱ ni ña̱ keʼéna ña̱ tási (kaʼvi Deuteronomio 18:10-12).

5. ¿Ndáaña keʼún vitin tá ndásakáʼnukaún santo ta saátu kéʼún vikó ndi̱i?

⁵ ¿Ndáaña keʼún vitin tá veʼe-ñu̱ʼu nu̱ú xáʼún ndásakáʼnuna santo ta saátu kéʼéna vikó ndi̱i? Kaʼvi texto ña̱ va̱xi nu̱ú Biblia ndáaña káʼa̱n Ndióxi̱ xa̱ʼa ña̱yóʼo. Ka̱ʼa̱n xíʼin Jehová ndiʼi ki̱vi̱ ña̱ kúni̱ún ndasakáʼnúnra ta kivitu ka̱ʼún xíʼinra ña̱ ná chindeéra yóʼó ña̱ kundasíún kuniúnña táki̱ʼva kúndasí miíraña (Isaías 55:9).

6, 7. a) ¿Nda̱chun ndákaʼán na̱ yiví xa̱ʼa vikó Navidad ta á xi̱keʼé na̱ discípulo vikó yóʼo? b) ¿Ndáa veʼe-ñu̱ʼu xi̱ndiku̱n na̱ xi̱keʼé vikó ña̱ cumpleaño?

⁶ Miíyó na̱ ndásakáʼnu Jehová va̱ása va̱ʼa keʼéyó vikó ña̱ kéʼé na̱ inka veʼe-ñu̱ʼu, chi su̱ví ña̱ va̱ʼa kúúña nu̱ú Jehová. Ná ka̱ʼa̱nyó xa̱ʼa vikó Navidad chi ku̱a̱ʼání na̱ yiví káchina saá ka̱ku ta̱ Jesús ta ku̱a̱ʼání na̱ veʼe-ñu̱ʼu na̱ káʼa̱n ndíku̱n ta̱ Jesús kéʼé vikó yóʼo. Soo kǒo prueba nu̱úyó ña̱ xi̱keʼé na̱ discípulo ta̱ Jesús vikó yóʼo. Táki̱ʼva káchi libro Los orígenes sagrados de las cosas profundas: “Tá ka̱ku ta̱ Jesús ta ni̱ya̱ʼa u̱vi̱ ciento ku̱i̱ya̱ ni iinna va̱ása níxixini̱ ama ka̱kura, ta loʼova kúú na̱ xi̱kuni̱ kunda̱a̱-ini xa̱ʼaña”.

⁷ Ni xi̱xini̱ na̱ discípulo ndáa ki̱vi̱ ka̱ku ta̱ Jesús, ni saáví kǒo níndasakáʼnuna ki̱vi̱ ka̱kura. ¿Nda̱chun kǒo níndasakáʼnunaña? Saáchi xíni̱vana “na̱ xi̱ndasakáʼnu vikó yóʼo na̱ veʼe-ñu̱ʼu vatá kúú na̱ xi̱keʼéña”, saá káchi libro (Las cosas nuestras de cada día). U̱vi̱ kuití na̱ rey  na̱ ke̱ʼé cumpleaño káʼa̱n Biblia xa̱ʼa, soo su̱ví Jehová níndasakáʼnuna (Génesis 40:20; Marcos 6:21). Saátu xi̱keʼéna xíʼin na̱ ndióxi̱ vatá, xi̱keʼéna cumpleaño na̱yóʼo. Ná ka̱ʼa̱nyó xa̱ʼa na̱ ñuu Roma, na̱yóʼo xi̱ndasakáʼnuna vikó ñá ndióxi̱ Diana 24 tí yo̱o̱ mayo, tá ni̱tu̱vi inka ki̱vi̱ xi̱ndasakáʼnuna ndióxi̱ ñu̱ʼu ña̱ xi̱naní Apolo, ndiʼi na̱ xi̱tavá vikó ndióxi̱ yóʼo su̱ví na̱ ndásakáʼnu Jehová níxikuuna, na̱ veʼe-ñu̱ʼu vatáva xi̱kuuna.

8. ¿Á kútóo Jehová ña̱ ndasakáʼnuyó vikó ña̱ cumpleaño?

⁸ Íyo inka xa̱ʼa ña̱ kǒo níndasakáʼnu na̱ discípulo ta̱ Jesús ki̱vi̱ ka̱kura. Na̱yóʼo xi̱xini̱vana xa̱ʼa ña̱ cumpleaño ña̱ va̱ása va̱ʼa keʼénaña. Ku̱a̱ʼání na̱ ñuu Grecia xíʼin na̱ ñuu Roma na̱ xi̱ndoo xi̱naʼá káchina tá kákuyó kúúmiíyó iin espíritu ña̱ kundaa miíyó ña̱ kooyó ñuyǐví yóʼo. Íyotu inka libro ña̱ káʼa̱n: “Ña̱ espíritu yóʼo va̱ʼa ítáʼanña xíʼin ndióxi̱ na̱ xínu ku̱i̱ya̱ tá ki̱vi̱ káku iin na̱ yiví.” (The Lore of Birthdays [La tradición de los cumpleaños].) Yiváyó Jehová va̱ása kútóora keʼéyó vikó ña̱ káʼa̱n xa̱ʼa ña̱ ka̱ku ta̱ Jesús, chi su̱ví ña̱ nda̱a̱ kúúña (Isaías 65:11, 12). Tá su̱ví ña̱ nda̱a̱ kúúña, ¿nda̱chun ku̱a̱ʼání na̱ yiví ndásakáʼnu vikó yóʼo?

9. ¿Nda̱chun kíxaʼána ndásakáʼnuna ki̱vi̱ ka̱ku ta̱ Jesús 25 tí yo̱o̱ diciembre?

⁹ Tá ki̱xi ta̱ Jesús nu̱ú ñuʼú yóʼo, ku̱a̱ʼání ku̱i̱ya̱ ni̱ya̱ʼa, saáví ki̱xaʼána ndásakáʼnuna 25 tí yo̱o̱ diciembre ña̱ ka̱kura káchina. Soo ta̱ Jesús su̱ví yo̱o̱ yóʼo níkakura, * sana yo̱o̱ octubre ka̱kura. Ta, ¿nda̱chun ndásakáʼnuna 25 tí yo̱o̱ diciembre? Saáchi na̱ cristiano na̱ vatá na̱ xi̱ka̱ʼa̱n xi̱ndiku̱nñaʼá “na̱samana vikó nu̱ú inkaña. Na̱  ñuu Roma xi̱ndasakáʼnuna 25 tí yo̱o̱ diciembre ña̱ xi̱kaku ‘ñu̱ʼu ta ndu̱uña vikó ña̱ ka̱ku ta̱ Jesús’” (Enciclopedia de la Religión Católica). Tá yo̱o̱ diciembre vitákaví túun ñu̱ʼu, xa̱ʼa ña̱yóʼo na̱ veʼe-ñu̱ʼu vatá xi̱ndatakana ña̱ xi̱ndasakáʼnuna ña̱yóʼo ña̱ va̱ʼa ndeéka tu̱unña ta niʼní koo. Chi ña̱ túvi miína 25 tí yo̱o̱ diciembre xíniñúʼu ndikóña nduuña táki̱ʼva ni̱xi̱yoña. Ña̱ va̱ʼa xa̱a̱ ku̱a̱ʼá na̱ yiví kundiku̱nna ta̱ Jesús, ña̱kán na̱sama na̱ su̱tu̱ vikó yóʼo xíʼin ki̱vi̱ ka̱kura. *

10. ¿Nda̱chun kǒo níndasakáʼnu sava na̱ yiví Navidad tiempo xi̱naʼá?

¹⁰ Xi̱naʼáví xíni̱na ña̱ Navidad ti̱xin veʼe-ñu̱ʼu vatá ki̱xaʼá xa̱ʼaña. Xa̱ʼa ña̱ kǒo káʼa̱n Biblia xa̱ʼa ña̱yóʼo, tá ku̱i̱ya̱ 1650 na̱ ñuu Inglaterra xíʼin sava na̱ ñuu Estados Unidos kǒo níxiinna ndasakáʼnuna vikó yóʼo. Ndiʼi na̱ kǒo níxixa̱ʼa̱n kachíñu míí ki̱vi̱ xi̱ndakava ña̱ Navidad xi̱kiʼinna multa nu̱úna. Soo ni̱ya̱ʼa loʼo tiempo saá ki̱xaʼá tukuna kéʼéna costumbre ña̱ xi̱keʼéna xi̱naʼá ta ki̱xaʼána kéʼékana sava vikó. Tasaá ña̱ Navidad ndu̱uña iin vikó káʼnu ta ku̱a̱ʼání ñuu kéʼéna ña̱yóʼo, nda̱a̱ tiempo vitin kéʼénaña. Soo na̱ yiví na̱ kúni̱ ndasakáʼnu Ndióxi̱ míí ta̱ nda̱a̱ xíni̱na ña̱ kúúña vikó ña̱ kéʼé na̱ veʼe-ñu̱ʼu  vatá ta va̱ása ndásakáʼnuna ña̱yóʼo ni kǒo kéʼéna inkaka vikó. *

11. ¿Nda̱chun ndásakáʼnu savana vikó ta ndáaña xíniñúʼu keʼé miíyó?

¹¹ Sava na̱ yiví xíni̱na xa̱ʼa sava vikó tá kúú ña̱ Navidad ka̱naña ti̱xin veʼe-ñu̱ʼu vatá, soo va̱ʼava keʼénaña káchina chi kǒo ku̱a̱chi xa̱ʼaña. Ta savatuna ni loʼo kǒo ndúkúna míí ka̱na xa̱ʼaña, ña̱ ndíʼi̱ka-inina xa̱ʼa kúú ña̱ koo si̱ína xíʼin na̱ veʼena ki̱vi̱ saá. ¿Á saá ndákanixi̱níún? Sana xa̱ʼa ña̱ kúni̱ún na̱ veʼún kúúña, su̱ví xa̱ʼa ña̱ kúni̱ún keʼún ña̱ kéʼé na̱ veʼe-ñu̱ʼu vatá kúúña ta xa̱ʼa ña̱yóʼo íxayo̱ʼvi̱ña xíʼún keʼún ña̱ kúni̱ Ndióxi̱. Kǒo kundi̱ʼi̱-iniún chi Jehová míí ta̱ i̱xava̱ʼa na̱ yiví kúni̱ra si̱í koún xíʼin na̱ veʼún (Efesios 3:14, 15). Soo íyo inka ña̱ va̱ʼa keʼéyó tasaá ndasasi̱íyó ini Ndióxi̱ ta va̱ʼatu koo si̱íyó xíʼin na̱ veʼeyó. Ta̱ apóstol Pablo ni̱ka̱ʼa̱nra ndáaña kúú ña̱ kundayáʼvika nu̱úyó: “Kǒo sandákoondó keʼéndó míí ña̱ kúni̱ tátayó” (Efesios 5:10).

12. ¿Ndáa ejemplo va̱ʼa kuniñúʼuyó ña̱ va̱ʼa kunda̱a̱-iniyó sava vikó su̱ví ña̱ va̱ʼa kúúña?

¹² Savayó ndákanixi̱níyó su̱ví iin kúú vikó ña̱ kéʼéyó vitin xíʼin ña̱ xi̱keʼéna xi̱naʼá. ¿Á xíniñúʼu kunda̱a̱-iniyó míí ki̱xaʼá xa̱ʼaña? Xíniñúʼuva kunda̱a̱-iniyó xa̱ʼaña. Ná ka̱ʼa̱nyó xa̱ʼa iin dulce ña̱ nda̱kava nu̱ú yaku̱a̱. ¿Á kaxíyóña? Va̱ása kaxíyóña chi xa̱a̱ ku̱yaku̱a̱ña. Táki̱ʼva saá íyo sava vikó kútóokavíyó keʼéyóña, soo su̱ví vikó va̱ʼa kúúña tá íyo ña̱ yaku̱a̱ saá íyoña. Tá kúni̱yó ndasakáʼnuyó Ndióxi̱ míí ta̱ nda̱a̱, ná ndakanixi̱níyó táki̱ʼva xi̱ndakanixi̱ní ta̱ profeta Isaías. Ta̱yóʼo ni̱ka̱ʼa̱nra xíʼin na̱  xi̱ndasakáʼnu Jehová: “Kǒo keʼéndó ña̱ yaku̱a̱” (Isaías 52:11).

13. ¿Ndáaña kivi ndoʼoyó xa̱ʼa ña̱ kǒo xíínyó keʼéyó sava vikó?

¹³ Sana yo̱ʼvi̱ kooña nu̱úyó ña̱ sandákooyó sava vikó ña̱ xi̱keʼéyó. Ná kachiyó, ¿ndáaña ka̱ʼa̱nyó xíʼin na̱ ñúʼu nu̱ú káchíñuyó tá íxayo̱ʼvi̱ña xíʼinna kunda̱a̱-inina nda̱chun kǒo ndásakáʼnuyó sava vikó? ¿Ndáaña ka̱ʼa̱nyó xíʼinna tá táxina ña̱ʼa ndaʼa̱yó vikó Navidad? ¿Á va̱ʼa kiʼinyóña ndaʼa̱na? ¿Ndáaña keʼéyó tá na̱ ti̱ndaʼa̱ xíʼinyó kǒo ndásakáʼnuna Jehová? ¿Ndáaña keʼéyó xíʼin na̱ va̱lí se̱ʼeyó ña̱ va̱ʼa kunda̱a̱-inina sava vikó su̱ví ña̱ va̱ʼa kúúña?

14, 15. ¿Ndáaña ka̱ʼún xíʼinna tá kánana yóʼó ku̱ʼún vikó veʼena á tá kúni̱tuna taxina iin regalo ndaʼún?

¹⁴ Xíniñúʼu viíní ndakanixi̱níyó ndáaña ka̱ʼa̱nyó xíʼin na̱ yiví na̱ ndáka̱tu̱ʼun miíyó xa̱ʼa sava vikó. Ná kachiyó iinna kánana miíyó ku̱ʼu̱nyó kuxuyó xíʼinna veʼena chi vikó kúúña, kivi taxi kuitíyó tixaʼvi ndaʼa̱na. Soo tá iin na̱ káchíñu xíʼinyó ndeéní káʼa̱nna xíʼinyó ku̱ʼu̱nyó vikó veʼena, kivi natúʼunyó xíʼinna ndáa xa̱ʼa kúú ña̱ kǒo xíínyó ku̱ʼu̱nyó. Viíní ná ka̱ʼa̱nyó xíʼinna xa̱ʼa ña̱yóʼo. Biblia káchiña: “Tá káʼa̱nndó xíʼinna viíní ka̱ʼa̱nndó ña̱ va̱ʼa ná kusi̱í-inina, ta viíní ndakuiinndó yuʼúna ña̱ ndáka̱tu̱ʼunna xa̱ʼa” (Colosenses 4:6). Viíní ná ka̱ʼa̱nyó ta va̱ása ndukue̱ʼe̱yó xíʼinna. Kiviva ndatakayó ta taxiyó regalo ndaʼa̱ táʼanyó, soo kǒo xíniñúʼu nda̱a̱ ki̱vi̱ koo vikóví saáví keʼéyóña.

¹⁵ Tá iinna kúni̱na taxina iin regalo ndaʼa̱yó, xíniñúʼu kunda̱a̱-iniyó ndáa xa̱ʼa kúúña. Sana kachina xíʼinyó: “Xa̱a̱ xíni̱vai̱ ña̱ kǒo ndásakáʼnún vikó yóʼo, soo kúnii̱ taxii̱ iin regalo ndaʼún”. Tá saá ná ka̱ʼa̱nna xíʼún, sana kiʼinvaúnña ndaʼa̱na, soo su̱ví ña̱yóʼo kúni̱ kachiña ña̱  keʼún vikó yóʼo xíʼinna. Tá iinna va̱ása xíni̱na ña̱ káʼviún Biblia, kivi ka̱ʼún xíʼinna ña̱ va̱ása kéʼún vikó ña̱ kéʼéna. Ña̱ ka̱ʼún kǒo kéʼún vikó ña̱ kéʼéna ña̱yóʼo kúni̱ kachiña ña̱ va̱ása kundatuna taxiún iin regalo ndaʼa̱na. Soo inkatu ña̱ kivi keʼéna xíʼún kúúña kotondosóna yóʼó á ndixa ndinuʼu-iniún kándíxaún Ndióxi̱, á xa̱ʼa ña̱ kútóún ña̱ʼa ña̱ táxina ndaʼún kǒo keʼékaún ña̱ káʼa̱n Biblia. Tá yóʼó xítondosóna kǒo kiʼúnña ndaʼa̱na.

16. ¿Nda̱chun xíniñúʼu kundaayó miíyó xíʼin sava ña̱ kéʼéyó?

¹⁶ ¿Ndáaña keʼéyó xíʼin na̱ veʼeyó tá kǒo káʼvina Biblia xíʼinyó? Xíniñúʼu vií ka̱ʼa̱nyó xíʼinna. Va̱ása xíniñúʼu sa̱a̱yó xíʼinna á ndukue̱ʼe̱yó xíʼinna xa̱ʼa costumbre á vikó ña̱ kúni̱na keʼéna. To̱ʼó ná kooyó xíʼinna táki̱ʼva kúni̱yó keʼéna xíʼinyó (kaʼvi Mateo 7:12). Ná kiʼinyó kuenta xíʼin ña̱ kéʼéyó. Ná koto va̱ʼayó ndáaña va̱ʼa keʼéyó ta ndáaña va̱ása va̱ʼa keʼéyó, ña̱kán ná kǒo ndakanixi̱nína ña̱ kéʼéyó vikó xíʼinna. Nina ña̱ va̱ʼa ná ndakanixi̱níyó keʼéyó tasaá kǒo ña̱ʼa sándi̱ʼi̱ miíyó (kaʼvi 1 Timoteo 1:18, 19).

17. ¿Ndáaña keʼéyó xíʼin na̱ va̱lí se̱ʼeyó ña̱ va̱ʼa kunda̱a̱-inina sava vikó su̱ví ña̱ va̱ʼa kúúña tá xítona kéʼé inkanaña?

¹⁷ ¿Ndáaña keʼéyó xíʼin na̱ va̱lí se̱ʼeyó ña̱ va̱ʼa kunda̱a̱-inina sava vikó su̱ví ña̱ va̱ʼa kúúña káchi Biblia? Savana va̱ása ndátuna nda̱a̱ koo vikóví saáví taxina regalo ndaʼa̱ se̱ʼena, chi kivi taxinaña inka ki̱vi̱va. Míí ña̱ ndáyáʼvi va̱ʼaka kúú ña̱ taxina tiempona xíʼin ña̱ kuʼvi̱-inina kunina se̱ʼena.

18. ¿Nda̱saa chindeé reunión miíyó ña̱ va̱ʼa ndasakáʼnuyó Ndióxi̱?

¹⁸ Ña̱ va̱ʼa ndasasi̱íyó ini Ndióxi̱, ná keʼéyó ña̱ kúni̱ra ta kǒo keʼékayó táʼan ña̱ kéʼé na̱ veʼe-ñu̱ʼu vatá. ¿Ndáaña  xíniñúʼu keʼéyó tá saá? Biblia káchiña: “Ná kundi̱ʼi̱-iniyó xa̱ʼa táʼanyó ta ná kuʼvi̱ka-iniyó kuni táʼanyó ta keʼéyó ña̱ va̱ʼa xíʼin táʼanyó, ta kǒo sándákooyó ña̱ ndatakayó, táki̱ʼva íxaa inkana, ná taxikayó ndée ndaʼa̱ táʼanyó, saáchi vitin xa̱a̱ kúyatin kixa̱a̱ ki̱vi̱” (Hebreos 10:24, 25). Nu̱ú ndátakayó reunión kán ndásakáʼnuyó Ndióxi̱ táki̱ʼva kúni̱ miíra (Salmo 22:22; 122:1). Chi yóʼo kúú nu̱ú ‘táxiyó ndée ndaʼa̱ táʼanyó’, miíyó na̱ ndásakáʼnu Ndióxi̱ (Romanos 1:12).

19. ¿Nda̱chun xíniñúʼu natúʼún xíʼin na̱ yiví xa̱ʼa ña̱ sákuaʼún nu̱ú Biblia?

¹⁹ Inka ña̱ va̱ʼa keʼún tasaá na̱ʼún ña̱ ndixa ndásakáʼnún Ndióxi̱ kúú ña̱ natúʼún xíʼin na̱ yiví xa̱ʼa ña̱ sákuaʼún nu̱ú Biblia xíʼin na̱ testigo Jehová. Ku̱a̱ʼání na̱ yiví ñúʼu nu̱ú tu̱ndóʼo ñuyǐví yóʼo (Ezequiel 9:4). Sana xíni̱ún savana. Kivi natúʼún xíʼin na̱yóʼo xa̱ʼa ña̱ va̱ʼa káʼa̱n Biblia koo chí nu̱únínu. Kǒo sandákoún natúʼún xíʼin na̱ yiví xa̱ʼa ña̱ sákuaʼún nu̱ú Biblia ta saátu kǒo sandákoún ña̱ ku̱ʼún reunión. Tá kéʼún ña̱yóʼo, kivi chindeéña yóʼó ña̱ va̱ása ndakanikaxi̱níún xa̱ʼa vikó ña̱ kéʼé na̱ ñuyǐví. Tá kéʼún ña̱ kúni̱ Ndióxi̱, kusi̱íní-iniún ta ku̱a̱ʼáka ña̱ va̱ʼa taxira ndaʼún (Malaquías 3:10).