ÑA̱ Biblia xíʼin tu̱ʼun hebreo xíʼin griego ni̱ka̱ʼyi̱ña ta ki̱ʼva 70 yichi̱ va̱xi tu̱ʼun hebreo scheʼóhl xíʼin tu̱ʼun griego háides nu̱úña ta u̱vi̱ saá tu̱ʼun yóʼo káʼa̱nña xa̱ʼa nu̱ú ñúʼu na̱ ni̱xi̱ʼi̱. Tu̱ʼun scheʼóhl xíʼin háides nu̱ú sava Biblia sa̱yáʼanaña “ya̱vi̱” á “xi̱tu̱n”. Soo ku̱a̱ʼá tu̱ʼun va̱ása níʼina ndáaña kuniñúʼuna ña̱ va̱ʼa ka̱ʼa̱nña nda̱a̱ táki̱ʼva káchi míí tu̱ʼun hebreo á griego. Xa̱ʼa ña̱yóʼo nu̱ú ña̱ Traducción del Nuevo Mundo ña̱ tu̱ʼun sáʼan sa̱yáʼanaña: “Seol” xíʼin “Hades”. Vitin kunda̱a̱-iniyó ndáaña kúni̱ kachi u̱vi̱ saá tu̱ʼun yóʼo. Ná kotoyó ndáa ki̱ʼva va̱xiña nu̱ú sava texto.

Eclesiastés 9:10 káchiña: “Ndiʼi chiñu kúni̱ún keʼún, keʼéña xíʼin ndiʼi níma̱ún, chi ya̱vi̱ [Seol] nu̱ú ku̱ʼún kán, kǒoka chiñu keʼún, kǒoka ña̱ ndakanixi̱níún keʼún, kǒoka ña̱ sákuaʼún ta kǒoka ña̱ kuxini̱ún”. ¿Á káʼa̱n ña̱yóʼo xa̱ʼa iin iin ya̱vi̱ nu̱ú ndúxu̱n na̱ táʼanyó? Su̱ví saá íyoña. Tá káʼa̱n ña̱ Biblia xa̱ʼa iin iin ya̱vi̱ nu̱ú ndúxu̱n na̱ ni̱xi̱ʼi̱ va̱ása xíniñúʼuña scheʼóhl ni háides, inkava tu̱ʼun hebreo xíʼin griego xíniñúʼuña (Génesis 23:7-9; Mateo 28:1). Tu̱ʼun “Seol” va̱ása káʼa̱nña xa̱ʼa ya̱vi̱ nu̱ú ndúxu̱n na̱ yiví ni kǒo káʼa̱nña xa̱ʼa iin panteón (Génesis 49:30, 31).

Tá va̱xi “Seol” xíʼin “Hades” nu̱ú Biblia, ¿ndáaña káʼa̱nña xa̱ʼa? Su̱ví ndixa ya̱vi̱ nu̱ú ndúxu̱n na̱ ni̱xi̱ʼi̱ káʼa̱nña xa̱ʼa, chi iin ña̱ʼa ña̱ káʼnu va̱ʼava káʼa̱nña xa̱ʼa. Isaías 5:14 káʼa̱nña xa̱ʼa Seol ña̱ “ndu̱káʼnu va̱ʼakaña. Iin kóʼo kóʼo xu̱náña yuʼúña”. Ña̱ Seol yóʼo ku̱a̱ʼání na̱ ni̱xi̱ʼi̱ ñúʼu ti̱xinña ta va̱ása ndáʼa iniña chi kúni̱ tá kúni̱kaña na̱ yiví (Proverbios 30:15, 16). Ña̱ panteón á ñáña nu̱ú ndúxu̱n na̱ yiví chútuvaña, soo ña̱ Seol va̱ása chútuña (Proverbios 27:20). Ña̱yóʼo kúni̱ kachiña ña̱ Seol á ña̱ Hades nda̱a̱ ni iin yichi̱ va̱ása xa̱a̱ña kutúña. Chi su̱ví ndixa iin lugar nu̱ú ndúxu̱n na̱ yiví kúúña chi iin ña̱ náʼa̱ kuití nu̱úvayó kúúña ña̱ ná kunda̱a̱-iniyó na̱ ni̱xi̱ʼi̱ yóʼo ñúʼuna.

 Tá sákuaʼayó xa̱ʼa ña̱ káʼa̱n Biblia ña̱ ndataku na̱ ni̱xi̱ʼi̱ kúnda̱a̱ va̱ʼaka iniyó xa̱ʼa “Seol” á “Hades”. Tu̱ʼun Ndióxi̱ káʼa̱nña na̱ ñúʼu yóʼo ndatakuvana (Job 14:13; Hechos 2:31; Revelación 20:13). * Ta saátu káʼa̱nña xíʼinyó ti̱xin ña̱yóʼo ñúʼu na̱ nda̱sakáʼnu Jehová xíʼin na̱ va̱ása níndasakáʼnu-ñaʼá (Génesis 37:35; Salmo 55:15). Ña̱kán káʼa̱n Biblia xíʼinyó “ña̱ ndataku na̱ ke̱ʼé ña̱ va̱ʼa ta saátu na̱ va̱ása níkeʼé ña̱ va̱ʼa” (Hechos 24:15).