SAVA tu̱ʼun ña̱ va̱xi nu̱ú libro ña̱ Revelación, iin ña̱ ndána̱ʼa̱ kuitíva kúúña su̱ví ndixa míí ña̱ʼa kán káʼa̱nña xa̱ʼa (Revelación 1:1). Tá kúú káʼa̱nña xa̱ʼa iin ñaʼá ñá íxikó míí nu̱ú ta̱a ta chí teʼéñá ni̱ka̱ʼyi̱ iin letra ta káchiña “Babilonia ña̱ káʼnu”. Saátu káʼa̱nña xa̱ʼañá xíkundúʼúñá sa̱tá ku̱a̱ʼání na̱ yiví xíʼin ku̱a̱ʼání ñuu (Revelación 17:1, 5, 15). Ni iinlána kǒo  kívi keʼé ña̱yóʼo, ña̱kán su̱ví iin ñaʼá káʼa̱nña xa̱ʼa, chi Babilonia ña̱ káʼnu inka ña̱ʼava kúú ña̱yóʼo. Tá saá, ¿ndáaña kúni̱ káchiña?

Revelación 17:18 káʼa̱n ña̱yóʼo iin ñuu káʼnu kúúña ta xáʼndachíñuña nu̱ú na̱ chíñu ñuyǐví yóʼo. Tá káʼa̱nña xa̱ʼa “ñuu”, xa̱ʼa iin grupo na̱ yiví káʼa̱nña ña̱ ndákutáʼanna ña̱ keʼéna iin chiñu. Ta ñuu káʼnu yóʼo, kúú ña̱ kíʼin kuenta xíʼin na̱ chíñu ñuyǐví yóʼo. Ña̱kán, Babilonia ña̱ káʼnu yóʼo kúú iin grupo káʼnuní na̱ níʼi yichi̱ nu̱ú iníísaá ñuyǐví. ¿Ndáa grupo kúúña? Iin grupo na̱ veʼe-ñu̱ʼu kúúña. Ná kotoyó ndáaña káchi tutu Revelación xa̱ʼa ña̱yóʼo ña̱ va̱ʼa kunda̱a̱ka-iniyó xa̱ʼaña.

Kúnda̱a̱-iniyó Babilonia ña̱ káʼnu su̱ví na̱ político káʼa̱nña xa̱ʼa, saáchi tu̱ʼun Ndióxi̱ káchiña “na̱ chíñu ñuyǐví yóʼo kéʼéna ña̱ kini xíʼinña”. Ña̱ káʼa̱nña kéʼéña ña̱ kini xíʼin na̱ ñuyǐví yóʼo kúni̱ kachiña, va̱ʼaní ítáʼanña xíʼinna. Ña̱kán káʼa̱n tu̱ʼun Ndióxi̱ ña̱ naníña “ñaʼá ñá kísi̱ xíʼin ku̱a̱ʼá ta̱a” (Revelación 17:1, 2; Santiago 4:4).

Ña̱ Biblia káchiña tá ná ndiʼi-xa̱ʼa ñá ñaʼá yóʼo, kusuchíní-ini na̱ “íxikó ña̱ʼa xa̱ʼañá”. Xíʼin ña̱yóʼo kúnda̱a̱-iniyó Babilonia ña̱ káʼnu, su̱ví xa̱ʼa na̱ íxikó káʼa̱nña. Saáchi Biblia káchiña na̱ chíñu xíʼin na̱ íxikó ña̱ʼa “xíká” kunditana ña̱ kotonañá (Revelación 18:3, 9, 10, 15-17). Xíʼin ña̱yóʼo kúnda̱a̱-iniyó Babilonia ña̱ káʼnu iin veʼe-ñu̱ʼu kúúña, su̱ví xa̱ʼa na̱ político á na̱ íxikó káʼa̱nña.

Íyo inka prueba ña̱ náʼa̱ nu̱úyó ña̱ kúúña na̱ veʼe-ñu̱ʼu, saáchi na̱yóʼo kúú na̱ sándáʼvi na̱ yiví xíʼin ña̱ tási ña̱ kéʼéna (Revelación 18:23). Ndiʼi nu̱ú ña̱ tási ti̱xin na̱ demonio va̱xiña. Xa̱ʼa ña̱yóʼo Biblia káʼa̱nña xa̱ʼa Babilonia ña̱ káʼnu ña̱ kúúña nu̱ú ndóo na̱ ta̱chí ndi̱va̱ʼa (Revelación 18:2; Deuteronomio 18:10-12). Ta na̱ veʼe-ñu̱ʼu yóʼo kǒo kúni̱na xínina na̱ religión ña̱ nda̱a̱ chi ndíku̱nna sa̱tá na̱ profeta xíʼin na̱ santo (Revelación 18:24). Xa̱ʼa ña̱ sáa̱ní-inina xínina na̱ religión ña̱ nda̱a̱ íxandiva̱ʼanína xíʼin “na̱ testigo ta̱ Jesús” ta nda̱a̱ xáʼnínana (Revelación 17:6). Ña̱kán ñaʼá ñá naní Babilonia ña̱ káʼnu, kúú ñá ndákiʼin nu̱ú ndiʼi religión na̱ kǒo kúni̱ xíni Jehová.