LECCIÓN 6
¿Á kivi ndataku na̱ ni̱xi̱ʼi̱?
1. ¿Á kivi ndataku na̱ ni̱xi̱ʼi̱?
Tá ni̱xi̱yo Jesús nu̱ú Ñuʼú yóʼo ni̱xi̱yo iin mígora ta̱ xi̱naní Lázaro, soo iin ki̱vi̱ ni̱xi̱ʼi̱ ta̱yóʼo. Ñuu Betania ni̱xi̱yo ta̱yóʼo, iin ñuu ña̱ ndíka̱a̱ yatin xíʼin Jerusalén. Tá ni̱xa̱a̱ ta̱ Jesús ñuu kán, xa̱ku̱a̱ʼa̱n ku̱mí ki̱vi̱ ña̱ ni̱xi̱ʼi̱ ta̱ Lázaro. Ñá Marta xíʼin ñá María ku̱a̱ʼa̱nná xíʼin ta̱ Jesús nu̱ú sa̱ndúxunna ta̱ Lázaro, tá ni̱xa̱a̱na kán ku̱a̱ʼáka na̱ yiví ni̱xa̱a̱ sa̱tána. ¿Á ni̱kusi̱íní-ini ñá Marta xíʼin ñá María tá xi̱niná ña̱ sa̱ndátaku Jesús ta̱ ku̱ʼvaná ta̱ Lázaro? Kaʼvi Juan 11:21-24, 38-44.
Iin tu̱ʼun va̱ʼa ña̱ káʼa̱n Ndióxi̱ kúú ña̱ ndataku na̱ ni̱xi̱ʼi̱. Ñá Marta xa̱ku̱nda̱a̱-iniñá chi Jehová sandátakura na̱ ni̱xi̱ʼi̱ ña̱ va̱ʼa koo tukuna nu̱ú Ñuʼú yóʼo. Kaʼvi Job 14:14, 15.
2. ¿Á kúnda̱a̱ka-ini na̱ ni̱xi̱ʼi̱?
Ndióxi̱ ni̱ka̱ʼa̱nra xíʼin ta̱ Adán: “Xíʼin ñuʼú ni̱kuva̱ʼún, ta ñuʼú ndikóko̱ún nduún” (GÉNESIS 3:19)
Xíʼin ñuʼú i̱xava̱ʼa Ndióxi̱ miíyó (Génesis 2:7; 3:19). Ku̱a̱ʼání na̱ yiví káʼa̱nna tá ki̱vi̱ xíʼi̱yó ndóo níma̱yó. Soo Biblia káʼa̱nña tá ni̱xi̱ʼi̱yó kǒo ndóo níma̱yó ta ni va̱ása tákukayó ta ndíʼi-xa̱ʼa ndiʼi ña̱ xínituniyó. Xa̱ʼa ña̱yóʼo na̱ ni̱xi̱ʼi̱ kǒoka ña̱ kúnda̱a̱-inina ni va̱ása ndóʼokana. Ña̱kán tá nda̱taku ta̱ Lázaro, nda̱a̱ ni iin ña̱ va̱ása níkáʼa̱nra xa̱ʼa ña̱ ndo̱ʼora tá ni̱xi̱ʼira. Kaʼvi Eclesiastés 9:5, 6, 10.
Sava na̱ yiví káʼa̱nna chi Ndióxi̱ sándoʼora-ini na̱ ni̱xi̱ʼi̱ chi ku̱a̱ʼa̱nna nu̱ú ndaayá, ta ña̱yóʼo su̱ví ña̱ nda̱a̱ kúúña. Na̱ ni̱xi̱ʼi̱ kǒoka ña̱ xínitunina. Ta ña̱ vatá kúú ña̱ káʼa̱n na̱ yiví ña̱ íyo iin ndaayá chi Jehová ni loʼoví kǒo ndákanixiníra ña̱ kaʼmira na̱ yiví. Kaʼvi Jeremías 7:31.
3. ¿Á kivi ka̱ʼa̱nyó xíʼin na̱ ni̱xi̱ʼi̱?
Na̱ ni̱xi̱ʼi̱ kǒo kivi ka̱ʼa̱nna ni kǒo xíniso̱ʼokana (Salmo 115:17). Soo íyo na̱ ángel na̱ kéʼé ña̱ va̱ása va̱ʼa, na̱yóʼo kúú na̱ káʼa̱n xíʼin na̱ yiví, ta saá sándáʼvina na̱ yiví (2 Pedro 2:4). Xa̱ʼa ña̱yóʼo, Jehová va̱ása kútóora ña̱ ka̱ʼa̱nyó xíʼin na̱ ni̱xi̱ʼi̱. Kaʼvi Deuteronomio 18:10, 11.
4. ¿Ndáana kúú na̱ ndataku?
Millón na̱ yiví na̱ ni̱xi̱ʼi̱ ndatakuna ña̱ koo tukuna nu̱ú Ñuʼú yóʼo. Nda̱a̱ na̱ va̱ása níkunda̱a̱-ini xa̱ʼa Jehová ta xi̱keʼéna ña̱ kini ndatakuna. Kaʼvi Lucas 23:43 xíʼin Hechos 24:15.
Na̱ ndataku kán, kivi sakuaʼana ña̱ nda̱a̱ xa̱ʼa Ndióxi̱. Ta xíʼin ña̱yóʼo na̱ʼa̱na ña̱ kándixana Jesús (Revelación [Apocalipsis] 20:11-13). Tá ná keʼéna ña̱ kúni̱ Ndióxi̱, saá kúú ña̱ kutakuna ndiʼi tíempo. Kaʼvi Juan 5:28, 29.
5. ¿Ndachun sandataku Jehová na̱ ni̱xi̱ʼi̱?
Saáchi va̱ʼaní-ini Jehová, ta kúʼvi̱ní-inira xínira na̱ yiví ni kúúna na̱ yiví ku̱a̱chi. Xa̱ʼa ña̱yóʼo chi̱ndaʼára Se̱ʼera ña̱ kuvira xa̱ʼayó, ña̱kán kivi ndataku na̱ ni̱xi̱ʼi̱. Ta miíún, ¿yukú na̱ kúsi̱í-iniún kuniún tá ná ndataku na̱ ni̱xi̱ʼi̱? Kaʼvi Juan 3:16 xíʼin Romanos 6:23.
