LECCIÓN 7
¿Ndáa ki̱ʼva kaʼndachíñu Ndióxi̱?
1. ¿Ndáa ki̱ʼva kaʼndachíñu Ndióxi̱?
¿Ndachun kúú Jesús iin rey va̱ʼa? (MARCOS 1:40-42)
Jehová Ndióxi̱ ta̱xira chiñu ndaʼa̱ Se̱ʼera ta̱ Jesucristo ña̱ kúúra Rey chí ndiví. Kaʼvi Revelación (Apocalipsis) 11:15.
Ndióxi̱ sakutaʼara ndiʼi na̱ chíñu ñuyǐví yóʼo ta iinlaa Se̱ʼera Jesucristo kaʼndachíñu nu̱úña, tá ná kaʼndachíñu Jesús nu̱ú Ñuʼú yóʼo saá kúú ña̱ sandiʼi-xa̱ʼara ndiʼi na̱ xáʼndachíñu tíempo vitin. Tasaá koo ña̱ kúni̱ Ndióxi̱ chí ndiví ta saátu nu̱ú Ñuʼú yóʼo. Ta̱ Rey nda̱kaxin Ndióxi̱ yóʼo kúú ta̱ xíniñúʼuyó tíempo vitin, chi ta̱yóʼo kúú ta̱ kuchiñu sandákutáʼan ndiʼi na̱ yiví. ¿Á su̱ví tu̱ʼun va̱ʼa kúú ña̱yóʼo? Kaʼvi Daniel 2:44; Mateo 6:9, 10 xíʼin 24:14.
2. ¿Ndachun kúú Jesús iin Rey va̱ʼa?
Saáchi Jesús va̱ʼaní-inira, ta kéʼéra nina chiñu nda̱kú (Juan 1:14). Xa̱ʼa ña̱ kúúmiíra ndée tá ná kaʼndachíñura chí ndiví va̱ʼa chindeéra ndiʼi na̱ yiví. Tá nda̱takura ndi̱kóora chí ndiví, ta xi̱ndatunra nda̱a̱ ki̱vi̱ ta̱xi Ndióxi̱ chiñu ndaʼa̱ra ña̱ va̱ʼa kaʼndachíñura (Hebreos 10:12, 13). Jehová xa̱ta̱xira chiñu ndaʼa̱ Jesús ña̱ va̱ʼa kaʼndachíñura. Kaʼvi Daniel 7:13, 14.
3. ¿Á kaʼndachíñu inkana xíʼin Jesús?
Ña̱ Biblia káʼa̱nña íyo inkana ku̱ʼu̱n kaʼndachíñu xíʼin Jesús. Nu̱ú libro Daniel 7:27 káʼa̱n xa̱ʼana chi na̱yóʼo kúú na̱ yi̱i̱ á santo. Na̱ apóstol ta̱ Jesús kúú na̱ siʼnaka nda̱kaxin Ndióxi̱. Ta nda̱a̱ tíempo vitin Jehová ndáka̱xinkara savana ña̱ va̱ʼa ku̱ʼu̱nna chí ndiví. Ta na̱yóʼo siʼnaka xíʼi̱na saáví ku̱a̱ʼa̱nna chi ndiví. Kaʼvi Juan 14:1-3 xíʼin 1 Corintios 15:42-44.
¿Nda̱saa na̱ yiví ku̱ʼu̱n chí ndiví? Loʼova kúú na̱ ku̱ʼu̱n kaʼndachíñuna xíʼin Jesús káchi Biblia (Lucas 12:32). Ndiʼi na̱ kaʼndachíñu xíʼin Jesús kúúna 144.000. Kaʼvi Revelación 14:1.
4. ¿Ndáaña ku̱u tá ki̱xaʼá Jesús xáʼndachíñura?
Jesús ki̱xaʼára xáʼndachíñura chí ndiví ña̱ ku̱i̱ya̱ 1914. * Saá chi̱ndaʼára ta̱ Ndiva̱ʼa xíʼin na̱ ángel ndiva̱ʼa chí nu̱ú Ñuʼú yóʼo. Ta xa̱ʼa ña̱yóʼo, ni̱sa̱a̱ní ta̱ Ndiva̱ʼa yóʼo ta̱ ki̱xaʼára kéʼékara ku̱a̱ʼáka ña̱ kini nu̱ú ñuyǐví yóʼo (Revelación 12:7-10, 12). Ta tíempo saá ki̱xaʼá ku̱a̱ʼáka ku̱a̱chi nu̱ú Ñuʼú yóʼo. Íyo ku̱a̱chi nu̱ú xáʼní-táʼanna, íyo kue̱ʼe̱, íyo so̱ko, ta íyo sava ñuu táan, ta ña̱yóʼo náʼa̱ña ña̱ xínu nu̱ú tu̱ʼun ña̱ va̱xi nu̱ú Biblia chi xa̱kuyatin kaʼndachíñu Jesús nu̱ú Ñuʼú yóʼo. Kaʼvi Lucas 21:7, 10, 11, 31.
5. ¿Ndáaña va̱ʼa keʼé ta̱ Jesús tá ná kaʼndachíñura?
Vitin na̱ kándixa Ndióxi̱ ku̱a̱ʼa̱nna nátúʼunna xíʼin na̱ yiví iníísaá ñuyǐví ña̱ ná kandíxana chíñu ña̱ xa̱ʼnda Jesús. Millón na̱ yiví kándixa Jesús xíʼin ndiʼi níma̱na, ta táxina xáʼndara chiñu nu̱úna. Ta na̱yóʼo kúú na̱ ka̱ku tá ná sandiʼi-xa̱ʼa Jesús na̱ yiví kini. Ña̱kán, tá kúni̱yó ndakiʼinyó ña̱ va̱ʼa ña̱ taxi ta̱ Jesús, xíniñúʼu kuniso̱ʼoyó ña̱ káʼa̱nra. Kaʼvi Revelación 7:9, 14, 16, 17.
Ti̱xin iin mil ku̱i̱ya̱ ta̱ Jesús sáxi̱nu ndiʼira ña̱ xi̱kuni Ndióxi̱ ki̱vi̱ nu̱ú. Ki̱vi̱ saá, Ñuʼú yóʼo nduuña iin ñuʼú livi. Tándi̱ʼi ndataxi Jesús ña̱ xáʼndachíñura ndaʼa̱ Yivára (1 Corintios 15:24-26). ¿Á kivi natúʼún xíʼin inkana xa̱ʼa̱ ña̱ xáʼndachíñu Jesús? Kaʼvi Salmo 37:10, 11, 29.
^ párr. 6 Tá kúni̱kaún kunda̱a̱-iniún xa̱ʼa ña̱ ki̱xaʼá Jesús xáʼndachíñura ña̱ ku̱i̱ya̱ 1914, kaʼvi página 215 nda̱a̱ 218 ña̱ libro ña̱ naní ¿Qué enseña realmente la Biblia?
