LECCIÓN 8
¿Ndachun táxi Ndióxi̱ ña̱ íyoní tu̱ndóʼo ñuyǐví yóʼo?
1. ¿Ndáa míí ki̱xaʼá xa̱ʼa ku̱a̱chi xíʼin tu̱ndóʼo?
Ndiʼi tíempo ña̱ táxi Ndióxi̱ ndaʼa̱ na̱ yiví ña̱ kaʼndachíñuna nu̱ú Ñuʼú yóʼo, ni loʼo kǒo kúchiñuna sandiʼi-xa̱ʼana ndiʼi tu̱ndóʼo ña̱ íyo nu̱úña
Tá ki̱vi̱ nu̱ú ta̱ Ndiva̱ʼa ni̱ka̱ʼa̱nra tu̱ʼun vatá ta xa̱ʼa ña̱yóʼo ki̱xaʼá tu̱ndóʼo. Tá xa̱ʼa xi̱kuura iin ángel va̱ʼa, soo kǒo níxi̱yo nda̱kú-inira xíʼin ña̱ nda̱a̱ (Juan 8:44). Ki̱xaʼára nda̱kanixi̱níra ña̱ ndasakáʼnu na̱ yiví miíra, soo iinlaa Ndióxi̱ íyo yichi̱ ña̱ ndasakáʼnuna. Ta̱ Ndiva̱ʼa sa̱ndáʼvira ñá Eva, ña̱kán ka̱ndíxañá ña̱ ni̱ka̱ʼa̱nra ta̱ va̱ása níkandíxañá ña̱ ni̱ka̱ʼa̱n Ndióxi̱. Saátu ta̱ Adán nda̱kutáʼanra xíʼin ñá síʼíra ta u̱vi̱ saána kǒo níkandíxana ña̱ ni̱ka̱ʼa̱n Ndióxi̱. Xa̱ʼa ña̱yóʼo kúú ña̱ ka̱ku ku̱a̱chi ta̱ vitin xíʼi̱ ndiʼi na̱ yiví. Kaʼvi Génesis 3:1-6, 19.
Ki̱vi̱ sa̱ndáʼvi ta̱ Ndiva̱ʼa ñá Eva va̱ása níkuni̱kara kachíñura nu̱ú Ndióxi̱. Kǒo níxiinkara ndakunira ña̱ iinlaa Jehová íyo yichi̱ kaʼndachíñu. Ku̱a̱ʼáníka na̱ yiví kándíxa ña̱ káʼa̱n ta̱ Ndiva̱ʼa ta va̱ása kándíxana Ndióxi̱, tasaá ta̱ Ndiva̱ʼa ndu̱ura “ta̱ xáʼndachíñu nu̱ú ñuyǐví yóʼo”. Kaʼvi Juan 14:30 xíʼin 1 Juan 5:19.
2. ¿Á vií i̱xava̱ʼa Ndióxi̱ ndiʼi ña̱ʼa?
Ndiʼi ña̱ʼa ña̱ i̱xava̱ʼa Jehová viíní ke̱ʼéraña. Viíní i̱xava̱ʼara na̱ ángel xíʼin na̱ yiví ña̱ va̱ʼa kandíxana ña̱ káʼa̱nra (Deuteronomio 32:4, 5). Ndióxi̱ táxira ndaka̱xinyó ndáaña kúni̱yó keʼéyó ña̱ va̱ʼa á ña̱ va̱ása va̱ʼa. Tá ná keʼéyó ña̱ va̱ʼa xíʼin ña̱yóʼo náʼa̱yó nu̱ú Ndióxi̱ ña̱ kúni̱yóra. Kaʼvi Santiago 1:13-15 xíʼin 1 Juan 5:3.
3. ¿Ndachun táxika Ndióxi̱ ña̱ íyo tu̱ndóʼo tíempo vitin?
Jehová táxivara loʼo tíempo ndaʼa̱ na̱ yiví ná keʼéna ña̱ kúni̱ miína, ¿ndachun táxira loʼo tíempo yóʼo ndaʼa̱na? Ña̱ va̱ʼa ná kunda̱a̱-iniyó chi ndiʼi na̱ xáʼndachíñu na̱ kǒo xíniso̱ʼo ña̱ káʼa̱nra, kǒo kivi chindeéna na̱ yiví ña̱ kundoo va̱ʼana (Eclesiastés 7:29; 8:9). Xa̱ni̱ya̱ʼa i̱ñu̱ mil ku̱i̱ya̱ ña̱ xáʼndachíñu na̱ yiví nu̱ú miína, ta kǒo kúchiñuna sandiʼi-xa̱ʼana tu̱ndóʼo, ña̱ kini, ku̱a̱chi ni kue̱ʼe̱. Kaʼvi Jeremías 10:23 xíʼin Romanos 9:17.
Ña̱ va̱ʼa miíyó kúú ña̱ ná taxiyó kaʼndachíñu Ndióxi̱ nu̱úyó (Isaías 48:17, 18). Xa̱kuyatin sandiʼi-xa̱ʼa Jehová na̱ xáʼndachíñu ñuyǐví yóʼo. Ta na̱ xa̱a̱ kundoo nu̱ú Ñuʼú yóʼo kúú na̱ kándíxa ña̱ káʼa̱n Ndióxi̱ (Isaías 11:9). Kaʼvi Daniel 2:44.
4. ¿Ndáaña va̱ʼa keʼéyó ña̱ táxi Ndióxi̱ tíempo ndaʼa̱yó?
Ta̱ Ndiva̱ʼa ni̱ka̱ʼa̱nra: ndiʼi na̱ yiví káchíñuna nu̱ú Ndióxi̱ chi táxira ku̱a̱ʼá ña̱ va̱ʼa ndaʼa̱na. Tixaʼvi Ndióxi̱ chi táxira tíempo ndaʼa̱yó ña̱ va̱ʼa na̱ʼa̱yó xíʼin ña̱ kéʼéyó ña̱ kándíxavayó chiñu xáʼndara. Ta saá náʼa̱yó ña̱ ni̱ka̱ʼa̱n ta̱ Ndiva̱ʼa su̱ví ña̱ nda̱a̱ kúúña. Kaʼvi Job 1:8-12 xíʼin Proverbios 27:11.
5. Tá kuniyó kaʼndachíñu Ndióxi̱ nu̱úyó, ¿ndáaña xíniñúʼu keʼéyó?
Xíʼin chiñu kéʼéyó náʼa̱yó á ndixa kúni̱yó kaʼndachíñu Ndióxi̱ nu̱úyó
Xíniñúʼu kaʼviyó Biblia ña̱ va̱ʼa kunda̱a̱-iniyó nda̱saa kúni̱ra ndasakáʼnuyóra ta kixaʼáyó ndasakáʼnuyóra táki̱ʼva kúni̱ miíra (Juan 4:23). Xíʼin ña̱yóʼo náʼa̱yó ña̱ kǒo xíniso̱ʼoyó ña̱ káʼa̱n ta̱ Ndiva̱ʼa. Ta ná keʼéyó táʼan ña̱ ke̱ʼé ta̱ Jesús chi ta̱yóʼo kǒo níxíndiku̱nra na̱ chíñu ñuyǐví yóʼo ta ni kǒo níxíndiku̱nra ku̱a̱chi nu̱ú xáʼní-táʼanna. Kaʼvi Juan 17:14.
Ta̱ Ndiva̱ʼa ku̱a̱ʼání ña̱ʼa xíniñúʼura ña̱ ná ndakava na̱ yiví keʼéna ña̱ kini. Ta ki̱vi̱ ná ndakooyó keʼéyó ña̱yóʼo, sana na̱ veʼeyó á na̱ mígoyó nda̱a̱ kusikindaana miíyó á nda̱a̱ sáa̱na xíʼinyó xa̱ʼa ña̱ kéʼéyó ña̱ va̱ʼa (1 Pedro 4:3, 4). Tá ki̱vi̱ ná ndoʼoyó ña̱yóʼo, ¿ndáaña keʼéyó? ¿Á ndakutáʼanyó xíʼin na̱ yiví na̱ kéʼé ña̱ kúni̱ Ndióxi̱? ¿Á kuniso̱ʼoyó ndiʼi chiñu ña̱ xáʼnda Ndióxi̱ nu̱úyó? Tá ná keʼéyó ña̱ kúni̱ Ndióxi̱, saá na̱ʼa̱yó chi ta̱ Ndiva̱ʼa nina tu̱ʼun vatá káʼa̱nra chi ni̱ka̱ʼa̱nra ni iin na̱ yiví kǒo kuniso̱ʼo ña̱ káʼa̱n Ndióxi̱ ki̱vi̱ íyo tu̱ndóʼo nu̱úna. Kaʼvi 1 Corintios 6:9, 10 xíʼin 15:33.
Xa̱ʼa ña̱ kúni̱ní Ndióxi̱ miíyó ña̱kán kǒo xíka-iniyó chi kúnda̱a̱ va̱ʼa iniyó ña̱ sandiʼi-xa̱ʼara ndiʼi ña̱ kini xíʼin tu̱ndóʼo ña̱ íyo ñuyǐví yóʼo. Ndiʼi na̱ kéʼé ña̱ kúni̱ Ndióxi̱, na̱yóʼo kúú na̱ koo nu̱ú Ñuʼú yóʼo ndiʼi tíempo. Kaʼvi Juan 3:16.
