LECCIÓN 4
¿Yukú kúú Jesucristo?
1. ¿Yukú i̱xava̱ʼa Jesús?
¿Ndáaña ke̱ʼé Jesús ta ña̱yóʼo káʼa̱nña xa̱ʼara ña̱ va̱ʼa xi̱kuyatin ndiʼi na̱ yiví nu̱úra? (MATEO 11:29; MARCOS 10:13-16)
Síínva ni̱xi̱yo Jesús nu̱ú ndiʼi na̱ yiví, chi tá kúma̱níka kixira nu̱ú Ñuʼú yóʼo iin ángel xi̱kuura chí ndiví (Juan 8:23). Ta siʼnaka ta̱yóʼo i̱xava̱ʼa Ndióxi̱ nu̱ú ndiʼika ña̱ʼa. Tándi̱ʼi chi̱ndeéra Yivára ña̱ i̱xava̱ʼana ndiʼi ña̱ʼa. Ña̱ Biblia káʼa̱nña xíʼinyó ña̱ naníra “Se̱ʼe mitúʼun” Ndióxi̱ chi kǒo ni iinna níchindeé Ndióxi̱ ña̱ i̱xava̱ʼara Jesús (Juan 1:14). Nanítura “Tu̱ʼun”, saáchi na̱túʼunra xíʼin inkana xa̱ʼa Yivára. Kaʼvi Proverbios 8:22, 23, 30 xíʼin Colosenses 1:15, 16.
2. ¿Ndachun ki̱xi Jesús nu̱ú Ñuʼú yóʼo?
Ndióxi̱ chi̱ndaʼára Se̱ʼera ña̱ ki̱xira nu̱ú Ñuʼú yóʼo. Xa̱ʼa ña̱yóʼo ka̱ku Jesús ti̱xin ñá María, iin ñá loʼo kuáa̱n ñá ñuu Judá. Xa̱ʼa ña̱yóʼo kǒo níxi̱yo iin yivá Jesús nu̱ú Ñuʼú yóʼo (Lucas 1:30-35). Ta u̱ni̱ nu̱ú kúúña ki̱xira xa̱ʼa nu̱ú ñuʼú yóʼo: 1) sa̱náʼa̱ra ña̱ nda̱a̱ xa̱ʼa Ndióxi̱, 2) sa̱ndákoora yichi̱ nu̱úyó ña̱ kéʼéyó ña̱ kúni̱ Ndióxi̱ ni tá íyo tu̱ndóʼo nu̱úyó, 3) ki̱xira ni̱xi̱ʼi̱ra xa̱ʼayó. Kaʼvi Mateo 20:28.
3. ¿Ndachun xíniñúʼu chaʼvi iinna xa̱ʼa ku̱a̱chiyó?
Ña̱ va̱ʼa ná kǒo kuvi iin na̱ yiví xíniñúʼu chaʼvi iinna xa̱ʼana (Éxodo 21:29, 30). Jehová va̱ása níxikuni̱ra ña̱ kuchée na̱ yiví ni ña̱ kuvina. Kúnda̱a̱-iniyó ña̱yóʼo, saáchi Jehová ni̱ka̱ʼa̱nra xíʼin ta̱ Adán tá kǒo xíniso̱ʼora ña̱ káʼa̱nra xíʼinra kuvivara káchira xíʼinra. Tá níxiniso̱ʼo ta̱ Adán ña̱ ni̱ka̱ʼa̱n Ndióxi̱ xíʼinra kutakura nda̱a̱ tíempo vitinva (Génesis 2:16, 17; 5:5). Tu̱ʼun Ndióxi̱ káʼa̱nña ndiʼi na̱ yiví xíʼi̱na, saáchi ta̱ Adán va̱ása níkandíxara Ndióxi̱. Ta̱ Adán sa̱yáʼara ku̱a̱chi ndaʼa̱ ndiʼi na̱ yiví, ta ña̱kán ndiʼiyó xíʼi̱yó vitin. Xa̱ʼa ña̱yóʼo xíniñúʼu chaʼvi iinna xa̱ʼa ku̱a̱chiyó. Kaʼvi Romanos 5:12 xíʼin 6:23.
Ta, ¿yukú na̱ kuchiñu chaʼvi xa̱ʼa ku̱a̱chiyó ta saá kǒo kuvikayó? Tá ki̱vi̱ xíʼi̱yó cháʼviyó xa̱ʼa ku̱a̱chiyó. Soo ndiʼiyó kúúyó na̱ yiví ku̱a̱chi, ña̱kán ni iinyó va̱ása kivi chaʼviyó xa̱ʼa ku̱a̱chi inkana. Kaʼvi Salmo 49:7-9.
4.¿Ndachun ni̱xi̱ʼi̱ Jesús?
Jesús síínva ni̱xi̱yora nu̱úyó, chi kǒo ku̱a̱chira níxi̱yo. Ña̱kán va̱ása níxi̱ʼi̱ra xa̱ʼa ku̱a̱chi miíra, chi xa̱ʼa ku̱a̱chi inkavana ni̱xi̱ʼira. Ña̱ chi̱ndaʼá Ndióxi̱ Se̱ʼera ña̱ kuvira xa̱ʼayó, ni̱na̱ʼa̱ra ña̱ kúʼvi̱ní-inira xínira miíyó. Ta saátu Jesús ni̱na̱ʼa̱ra ña̱ kúʼvi̱-inira xínira miíyó chi xi̱niso̱ʼora ña̱ ni̱ka̱ʼa̱n Yivára xíʼinra ta ki̱xira ni̱xi̱ʼi̱ra xa̱ʼa ku̱a̱chiyó ta saá kǒo kuvikayó. Kaʼvi Juan 3:16 xíʼin Romanos 5:18, 19.
5. ¿Ndáaña kéʼé Jesús vitin?
Tá ni̱xi̱yo ta̱ Jesús nu̱ú Ñuʼú yóʼo, si̱ndáʼara na̱ yiví na̱ xi̱kuʼvi̱, sa̱ndátakura na̱ ni̱xi̱ʼi̱ ta chi̱ndeétura na̱ yiví na̱ xi̱kumií tu̱ndóʼo xíʼin ña̱yóʼo sa̱náʼa̱ra ña̱ keʼéra chí nu̱únínu xa̱ʼa na̱ ndinuʼu-ini kándixa Ndióxi̱ (Mateo 15:30, 31; Juan 5:28). Tá ni̱xi̱ʼi̱ Jesús, Ndióxi̱ sa̱ndátakura ta̱yóʼo ta saá ndi̱kóora chí ndiví ta ndu̱ura iin ángel (1 Pedro 3:18). Tasaá, Jesús xi̱ndatunra nda̱a̱ tá ni̱ka̱ʼa̱n Yivára xíʼinra ña̱ koora Rey nu̱ú Ñuʼú yóʼo (Hebreos 10:12, 13). Vitin Jesús xáʼndachíñura chí ndiví, ta na̱ kándixa tu̱ʼunra nu̱ú Ñuʼú yóʼo káʼa̱nna tu̱ʼun va̱ʼa xa̱ʼara iníísaá nu̱ú Ñuʼú yóʼo. Kaʼvi Daniel 7:13, 14 xíʼin Mateo 24:14.
Ta̱ Rey yóʼo, xa̱kunu̱mí sandiʼi-xa̱ʼara ndiʼi na̱ yiví na̱ keʼé ña̱ kini. Ndiʼi na̱ yiví na̱ kándixa Jesús si̱íní koo-inina kundoona nu̱ú Ñuʼú yóʼo chi nduuña iin Ñuʼú livi. Kaʼvi Salmo 37:9-11.