LECCIÓN 2
¿Yukú kúú Ndióxi̱?
1. ¿Ndachun xíniñúʼu ndasakáʼnuyó Ndióxi̱?
Ndióxi̱ kúú ta̱ i̱xava̱ʼa ndiʼi ña̱ʼa. Tíempo xi̱naʼáví xa̱íyora ta ni iin ki̱vi̱ va̱ása kuvira (Salmo 90:2). Tu̱ʼun ta̱kán kúú ndiʼi ña̱ va̱ʼa ña̱ va̱xi nu̱ú Biblia (1 Timoteo 1:11). Ta̱kán kúú ta̱ ta̱xi ña̱ tákuyó, ta xíniñúʼu kachíñuyó nu̱úra ta ndasakáʼnuyóra. Kaʼvi Revelación (Apocalipsis) 4:11.
2. ¿Nda̱saa káa Ndióxi̱?
Ni iin na̱ yiví kǒo kívi kuni Ndióxi̱ chi táki̱ʼva kǒo kivi kuniyó ta̱chí saá kǒo kivi kuniyóra, ta káʼnuka ta̱yóʼo nu̱ú ndiʼiyó (Juan 1:18; 4:24). Soo va̱ʼava kunda̱a̱-iniyó ndáa Ndióxi̱ kúúra, tá ná kotoyó ña̱ʼa ña̱ i̱xava̱ʼara. Tá kúú ku̱i̱ʼi á ña̱ʼa ña̱ xáxiyó, tá kúú yita ta ndiʼi ña̱yóʼo náʼa̱ña nu̱úyó ña̱ kúʼvi̱ní-inira xínira miíyó ta ndíchiníra. Inkaña káʼa̱n xa̱ʼara ña̱ íyoní ndéera kúú ña̱ i̱xava̱ʼara ndiví xíʼin Ñuʼú. Kaʼvi Romanos 1:20.
Inka ña̱ chindeé táʼan xíʼinyó ña̱ va̱ʼa kunda̱a̱-iniyó xa̱ʼa Ndióxi̱ kúú ña̱ ná kaʼviyó Tu̱ʼunra. Chi ña̱yóʼo káʼa̱nña xíʼinyó ña̱ va̱ʼaní-inira xíʼinyó, ta káʼa̱nña xíʼinyó ndáa ña̱ʼa kúú ña̱ kútóora ta ndáa ña̱ va̱ása kútóora, ta ndáaña ndóʼora tá kéʼé iin na̱ yiví ña̱ va̱ʼa á tá kéʼéna ña̱ kini nu̱úra. Kaʼvi Salmo 103:7-10.
3. Nda̱saa naní Ndióxi̱?
Jesús ni̱ka̱ʼa̱nra: “Yivándi̱ ta̱ íyo nu̱ú ndiví, ndasayi̱i̱ ki̱vi̱ún” (Mateo 6:9). Ku̱a̱ʼání na̱ yiví káʼa̱nna ña̱ naníra Ndióxi̱, Yiváyó á Tátayó, soo iinlaava kúú ki̱vi̱ra. Ta ki̱vi̱ Ndióxi̱ su̱ví inkáchi káʼa̱n ndiʼiyóña chi xa̱síín tu̱ʼun káʼa̱n iin iinyó. Miíyó na̱ káʼa̱n tu̱ʼun sâví Jehová káʼa̱nyó xíʼinra, savana káʼa̱nna Yavé xíʼinra. Kaʼvi Salmo 83:18.
Nu̱ú sava Biblia kǒo ki̱vi̱ Ndióxi̱ va̱xi nu̱úña chi na̱samanaña, va̱xi kuití Ndióxi̱ á Tátava nu̱úña. Soo tá ki̱vi̱ ta̱ana ña̱ Biblia xi̱naʼá, ki̱ʼva u̱xa̱ mil yichi̱ ta̱ana ki̱vi̱ Ndióxi̱ nu̱úña. Soo Jesús tá xi̱sanáʼa̱ra na̱ yiví xa̱ʼa Ndióxi̱ ku̱a̱ʼání yichi̱ xi̱niñúʼura ki̱vi̱ Ndióxi̱. Kaʼvi Juan 17:26.
4. ¿Á ndíʼi̱-ini Ndióxi̱ xa̱ʼayó?
Nda̱a̱ tá íyo táta yóʼo ma̱ni̱ra se̱ʼera, saá íyo Ndióxi̱ xíʼinyó chi ndíʼi̱-inira xa̱ʼayó tá ki̱vi̱ yâʼayó tu̱ndóʼo
Tá ndixa kúʼvi̱-ini Ndióxi̱ xínira miíyó, ¿ndachun táxira íyoní tu̱ndóʼo nu̱úyó? Savana káʼa̱nna Ndióxi̱ kúú ta̱ táxi tu̱ndóʼo ndaʼa̱yó ña̱ xítondosóra miíyó. Soo su̱ví ña̱ nda̱a̱ kúú ña̱yóʼo. Kaʼvi Santiago 1:13.
Jehová táxira ndaka̱xinyó ndáa yichi̱ kúú ña̱ kúni̱yó kundiku̱nyó. Ta ña̱ va̱ʼaníka kúúña tá ná ndaka̱xinyó kachíñuyó nu̱úra (Josué 24:15). Soo sava na̱ yiví ndáka̱xinna keʼéna ña̱ kiniva ta xa̱ʼa ña̱kán íyo tu̱ndóʼo. Soo Jehová kúsuchí-inira ña̱ xínira tu̱ndóʼo ña̱ kúú vitin. Kaʼvi Génesis 6:5, 6.
Jehová ña̱ kúni̱ra miíyó ta kúni̱ra si̱íní ná kooyó, ña̱kán xa̱kuyatin sandiʼi-xa̱ʼara ndiʼi ña̱ kini ta saátu na̱ yiví na̱ kéʼé ña̱ kini. Jehová kúú ta̱ xíni̱ ndáa xa̱ʼa kúú ña̱ táxira íyo tu̱ndóʼo vitin. Nu̱ú lección 8 sakuaʼayó ndáa xa̱ʼa kúúña. Kaʼvi 2 Pedro 2:9 xíʼin 3:7, 13.
5. ¿Nda̱saa va̱ʼa kuyatinyó nu̱ú Ndióxi̱?
Jehová kúni̱ra ná ka̱ʼa̱nyó xíʼinra ta saá va̱ʼa kuyatinyó nu̱úra. Ta ndíʼi̱ní-inira xa̱ʼa iin iinyó (Salmo 65:2; 145:18). Ta íyo tu̱ʼvara ña̱ koo káʼnu-inira xa̱ʼa ku̱a̱chiyó, ta xíni̱ra ña̱ chíka̱a̱yó ndée ña̱ keʼéyó ña̱ kúni̱ra ni sava ña̱ kéʼéyó kǒo kána va̱ʼaña. Ña̱kán kúúña ni kúúyó na̱ yiví ku̱a̱chi va̱ʼava kooyó mígora. Kaʼvi Salmo 103:12-14 xíʼin Santiago 4:8.
Iinlaa Ndióxi̱ kúú ta̱ xíniñúʼu kuʼvi̱ va̱ʼaka iniyó kuniyó nu̱úka inka na̱ yiví chi ta̱yóʼo kúú ta̱ táxi ña̱ tákuyó (Marcos 12:30). Náʼa̱yó ña̱ kúʼvi̱-iniyó xíniyó Ndióxi̱ tá ki̱vi̱ sákuaʼayó xa̱ʼara tá xíniso̱ʼoyó chiñu ña̱ xáʼndara nu̱úyó. Tá ki̱vi̱ ná kéʼéyó ña̱yóʼo va̱ʼaníka xa̱a̱yó kutáʼanyó xíʼinra. Kaʼvi 1 Timoteo 2:4 xíʼin 1 Juan 5:3.
