Ta̱ Darío kúú inka rey nu̱ú na̱ ñuu Babilonia. Ta na̱kunda̱a̱-inira ña̱ ndíchika ta̱ Daniel nu̱ú inkana, xa̱ʼa ña̱yóʼo ta̱xira ña̱ kaʼndachíñu ta̱ Daniel nu̱ú na̱ ta̱a na̱ kúúmií chiñu ñuu kán. Na̱yóʼo sáa̱ní-inina xíninara ta kúni̱na kaʼnínara. Ta̱ Daniel u̱ni̱ yichi̱ xi̱ka̱ʼa̱nra xíʼin Jehová iin iin ki̱vi̱, na̱yóʼo xíni̱na ña̱ kéʼéra saá, ta ni̱ka̱ʼa̱nna xíʼin ta̱ Darío: “Táta rey, xíniñúʼu koo iin ley ña̱ iinlá yóʼó keʼéna oración nu̱ú. Tá íyo iin na̱ va̱ása kéʼé ña̱ káʼa̱nña xíniñúʼu chika̱únna nu̱ú ñúʼu tí león”. Ku̱tóovara ña̱ ni̱ka̱ʼa̱nna ta ka̱ʼyíra firmara nu̱ú ña̱ ley ke̱ʼé na̱ ta̱a yóʼo.

Tá na̱kunda̱a̱-ini ta̱ Daniel ña̱yóʼo, ku̱a̱ʼa̱nra chí veʼera. Tá ni̱xa̱a̱ra, xi̱kuxítíra chí ventana ta ni̱ka̱ʼa̱nra xíʼin Jehová. Na̱ ta̱a yóʼo ni̱ki̱ʼvina veʼera ta xi̱nina káʼa̱nra xíʼin Ndióxi̱. Tasaá xínuna ku̱a̱ʼa̱nna natúʼunna xíʼin ta̱ Darío ta káchina: “Ta̱ Daniel kǒo níkeʼéra ña̱ ni̱ka̱ʼún. Ta nda̱a̱ u̱ni̱ yichi̱ káʼa̱nra xíʼin Ndióxi̱ ña̱ iin ki̱vi̱”. Ta̱ Darío va̱ása sáa̱-inira xínira ta̱ Daniel ta va̱ása kúni̱ra ña̱ kaʼnínara. Xa̱ʼa ña̱yóʼo iníísaá ki̱vi̱ nda̱kanixi̱níra ndáaña keʼéra ña̱ va̱ʼa chindeéra ta̱ Daniel, soo ni rey kúúra va̱ása kuchiñu nasamara ña̱ ley yóʼo. Xa̱ʼa ña̱yóʼo va̱ʼaka ni̱ka̱ʼa̱nra ña̱ chika̱a̱na ta̱ Daniel nu̱ú ñúʼu tí león.

 Ñu̱ú saá ta̱ Darío ni̱ndi̱ʼi̱kaví-inira xa̱ʼa ta̱ Daniel ta va̱ása níkuchiñu ku̱su̱nra. Tá inka ki̱vi̱ xínura ku̱a̱ʼa̱nra nu̱ú ñúʼu tí león ta ka̱nara: “Daniel, ¿á ni̱kuchiñu Ndióxi̱ ta̱ ndásakáʼnún sa̱kákura yóʼó?”.

Ta̱ Darío xi̱niso̱ʼora káʼa̱n ta̱ Daniel: “Jehová chi̱ndaʼára iin ángel ña̱ nda̱sira yuʼú tí león ta kǒo ña̱ níkeʼérí xíʼi̱n”. Ta̱ Darío ni̱kusi̱íkaví-inira ta xa̱ʼndara chiñu ña̱ tavána ta̱ Daniel ini ya̱vi̱. Ta̱ Daniel ni iin ña̱ʼa kǒo níndoʼora. Tándi̱ʼi ta̱ rey ni̱ka̱ʼa̱nra: “Chika̱a̱ndó na̱ ta̱a na̱ ni̱ka̱ʼa̱n ña̱ vatá xa̱ʼa ta̱ Daniel”. Tá sákiʼvinana nu̱ú ñúʼu tí león iin kama xa̱xírína.

Ta̱ Darío ni̱ka̱ʼa̱nra xíʼin na̱ ñuura: “Ndiʼindó xíniñúʼu to̱ʼó koondó xíʼin Ndióxi̱ ta̱ Daniel. Chi sa̱kákura ta̱ Daniel ña̱ kǒo níxaxí tí león ta̱yóʼo”.

Ta yóʼó ¿á káʼún xíʼin Jehová ndiʼi saá ki̱vi̱ nda̱a̱ tá ke̱ʼé ta̱ Daniel?