Xa̱a̱ 70 ku̱i̱ya̱ ni̱ya̱ʼa ña̱ ndi̱kó na̱ ñuu Israel chí ñuu Jerusalén, soo íyokava sava na̱ ñuu Israel chí ñuu Persia. Ta xíʼin na̱yóʼo íyo ta̱ Esdras, iin su̱tu̱ ta sánáʼa̱ ley Jehová kúúra. Ta̱ Esdras na̱kunda̱a̱-inira ña̱ va̱ása kéʼéka ñuu Jerusalén ña̱ káʼa̱n ley Ndióxi̱, ta xa̱ʼa ña̱yóʼo kúni̱ra ku̱ʼu̱nra chí nu̱úna ta chindeé táʼanra xíʼinna. Ta̱ Artajerjes, rey ña̱ ñuu Persia, ni̱ka̱ʼa̱nra xíʼinra: “Ndióxi̱ ta̱xi ña̱ ndíchi koún ña̱ va̱ʼa sanáʼún leyra. Xa̱ʼa ña̱yóʼo kúaʼan ta ná ku̱ʼu̱n na̱ kúni̱ ku̱ʼu̱n xíʼún”. Ta̱ Esdras nda̱kayara ndiʼi na̱ kúni̱ ndikó chí ñuu Jerusalén. Ta ni̱ka̱ʼa̱nna xíʼin Jehová ña̱ chindeérana ta kǒo tu̱ndóʼo ndoʼona yichi̱ nu̱ú ku̱ʼu̱nna.

Tá xa̱a̱ ni̱ya̱ʼa ku̱mí yo̱o̱, saá ni̱xa̱a̱na ñuu Jerusalén. Na̱ príncipe na̱ íyo kán ni̱ka̱ʼa̱nna xíʼin ta̱ Esdras: “Na̱ ñuu Israel va̱ása xíniso̱ʼona ña̱ káʼa̱n Jehová ti̱ndaʼa̱na xíʼin ná ndásakáʼnu ndióxi̱ vatá”. ¿Ndáaña ke̱ʼé ta̱ Esdras? Xi̱kuxítíra nu̱ú na̱ ñuu ta ni̱ka̱ʼa̱nra: “Jehová, yóʼó ku̱a̱ʼání ña̱ va̱ʼa kéʼún xa̱ʼandi̱, soo ndi̱ʼi̱ nina ña̱ va̱ása va̱ʼa kéʼéndi̱”. Ndiʼi na̱ ñuu ndi̱kó-inina, soo kéʼé tá kéʼévana ña̱ va̱ása va̱ʼa. Ta̱ Esdras nda̱ka̱xinra na̱ xi̱ku̱aʼa xíʼin na̱ juez ña̱ ndasaviína ña̱yóʼo. Tá xa̱a̱ ni̱ya̱ʼa u̱ni̱ yo̱o̱, na̱ kǒo níkandíxa ndasakáʼnu Jehová ta̱vánana ña̱ va̱ása kookana ñuu kán.

Ni̱ya̱ʼa 12 ku̱i̱ya̱. Vitin sa̱ndíʼina ke̱ʼéna nama̱ sa̱tá ñuu Jerusalén. Ta̱ Esdras nda̱kayara na̱ ñuu ña̱ kaʼvira ley Ndióxi̱ nu̱úna. Tá xu̱nára ña̱ ley, iin nda̱kuita ndiʼi na̱ ñuu. Ta̱ Esdras nda̱sakáʼnura Jehová, ta na̱ ñuu Israel ka̱ndíxavana ña̱ káʼa̱n Ndióxi̱ ña̱ va̱ʼa na̱ʼa̱na ña̱yóʼo nda̱niʼina ndaʼa̱na. Tándi̱ʼi ta̱ Esdras ka̱ʼvira ley ta ni̱ka̱ʼa̱nra xíʼinna ndáaña káʼa̱nña xa̱ʼa. Na̱ ñuu va̱ʼaní xi̱niso̱ʼona. Ta na̱kunda̱a̱-inina ña̱ va̱ása níkeʼéna ña̱ káʼa̱n Jehová ta xa̱kunína. Inka ki̱vi̱ ta̱ Esdras ka̱ʼvi tukura ley. Na̱ ñuu Israel na̱kunda̱a̱-inina ña̱ xíniñúʼu keʼéna vikó ña̱ Cabaña. Ta ki̱xaʼána ndásaviína ña̱ xíniñúʼu nu̱úna ña̱ va̱ʼa koo vikó.

 Na̱ ñuu Israel ni̱kusi̱íní-inina tá ni̱xi̱yo vikó ña̱ u̱xa̱ saá ki̱vi̱. Ta̱xina tixaʼvi ndaʼa̱ Jehová xa̱ʼa ña̱ va̱ʼaní ka̱na ña̱ʼa chi̱ʼina. Tá tiempo ta̱ Josué saáví ke̱ʼéna vikó yóʼo ta nda̱a̱ vitinví ndikóna keʼénaña. Tándi̱ʼi vikó, ndiʼina ni̱ka̱ʼa̱n xíʼin Ndióxi̱: “Jehová, yóʼó ta̱vá ndi̱ʼi̱ nu̱ú tu̱ndóʼo. Ta̱xiún ña̱ xi̱xindi̱ nu̱ú ñuʼu̱ yi̱chí ta ta̱xiún ñuʼu̱ livi yóʼo ndaʼa̱ndi̱. Soo ndi̱ʼi̱ nina ña̱ va̱ása va̱ʼa kéʼéndi̱. Ni ku̱a̱ʼání na̱ profeta chi̱ndaʼún nu̱úndi̱, va̱ása níxiniso̱ʼondi̱ ña̱ ni̱ka̱ʼa̱nna. Soo va̱ása nísa̱a̱ kamaún xíʼinndi̱. Va̱ása nínandosóún ña̱ ni̱ka̱ʼún xíʼin ta̱ Abrahán. Soo vitin chíka̱a̱ndi̱ iin trato xíʼún ña̱ kuniso̱ʼondi̱ ndiʼi ña̱ káʼún”. Na̱ ñuu yóʼo ka̱ʼyína ña̱ ni̱ka̱ʼa̱nna, ta na̱ príncipe, na̱ se̱ʼe ta̱ Leví xíʼin na̱ su̱tu̱ ka̱ʼyína firmana nu̱ú tutu yóʼo xíʼin iin sello.