Ñá Ester ñá ñuu Judá kúúñá ta íyoñá ñuu Susa ña̱ kíndo̱o chí ñuu Persia. Ku̱a̱ʼá ku̱i̱ya̱ ni̱ya̱ʼa ña̱ ni̱xa̱ʼa̱n ta̱ rey Nabucodonosor nda̱kiʼinra na̱ veʼeñá ku̱a̱ʼa̱n xíʼinra. Soo ta̱ sa̱kuaʼnu ñáyóʼo kúú ku̱ʼva kuáchiñá ta̱ Mardoqueo, ta xi̱kachíñura nu̱ú ta̱ rey Asuero.

Ta̱ rey Asuero xi̱kuni̱ra inka ñá xa̱a̱ koo reina. Xa̱ʼa ña̱yóʼo na̱ káchíñu nu̱úra ni̱xa̱a̱na xíʼin ná ñaʼá ná livika náʼa̱ nu̱úra, nda̱a̱ ñá Ester ni̱xa̱a̱ xíʼinna. Soo ta̱ rey nda̱ka̱xinra ñá Ester. Ta̱ Mardoqueo ni̱ka̱ʼa̱nra ña̱ va̱ása ka̱ʼa̱nñá ña̱ kúúñá táʼan na̱ ñuu judío.

Ta̱ Hamán iin ta̱a ta̱ kúta̱aní-ini kúúra ta̱ xáʼndachíñu nu̱ú na̱ príncipe. Ta̱yóʼo kúni̱ra ña̱ ná kuxítína nu̱úra. Ta̱ Mardoqueo va̱ása kúni̱ra kuxítíra nu̱úra. Ni̱sa̱a̱níra ta kúni̱ra kaʼníra ta̱ Mardoqueo. Tá na̱kunda̱a̱-inira ña̱ táʼan ta̱ Mardoqueo kúú na̱ judío, ta̱ Hamán nda̱kanixi̱níra ndáaña keʼéra ña̱ va̱ʼa kaʼníra ndiʼi na̱ judío. Ni̱ka̱ʼa̱nra xíʼin ta̱ rey: “Na̱ judío su̱ví na̱ va̱ʼa kúúna. Va̱ʼaka ná kaʼníyóna”. Ta̱ Asuero nda̱kuiinra: “Keʼé ña̱ va̱ʼaka túvi miíún”. Ta ta̱xira ña̱ ná keʼé ta̱yóʼo iin ley. Ña̱ ley káʼa̱nña: 13 xíka tí yo̱o̱ adar xíniñúʼu kaʼnína ndiʼi na̱ yiví na̱ kúú judío. Soo Jehová xítovara ndiʼi ña̱ kúu.

Ñá Ester va̱ása xíni̱ñá xa̱ʼa ña̱yóʼo. Ta̱ Mardoqueo chi̱ndaʼára iin copia ña̱ ley ndaʼa̱ñá ta ni̱ka̱ʼa̱nra xíʼinñá: “Xíniñúʼu ka̱ʼún xíʼin ta̱ rey xa̱ʼa ña̱yóʼo”. Ta nda̱kuiinñá: “Nda̱a̱ ndáaka na̱ ná ku̱ʼu̱n nu̱ú ta̱ rey tá va̱ása níkanarana kuvina. Ta xa̱a̱ 30 ki̱vi̱ va̱ása kánara yi̱ʼi̱. Ni saá ku̱ʼu̱nvai̱. Tá ná katanira tú varara nu̱úi̱ kutakuvai̱. Soo tá va̱ása kuvivai̱”.

Ñá Ester ni̱xa̱a̱ñá chí yéʼé veʼe ta̱ rey. Tá xi̱nirañá ka̱tanira varara nu̱úñá. Ku̱yatinñá ta ni̱nda̱ka̱tu̱ʼunrañá:  “¿Ndáaña kúni̱ún?”. Ta nda̱kuiinñá: “Kúni̱i̱ ña̱ kixiún xíʼin ta̱ Hamán chi íyo ña̱ keʼíi̱ kuxundó”. Tá ni̱xa̱a̱na xi̱xina ni̱ka̱ʼa̱nñá ña̱ kixi tukuna kuxuna inka ki̱vi̱. Tá xi̱xina ña̱ inka ki̱vi̱, ta̱ rey ni̱nda̱ka̱tu̱ʼunrañá: “¿Ndáaña kúni̱ún?”. Ñáyóʼo ni̱ka̱ʼa̱nñá: “Íyo iin na̱ kúni̱ kaʼní yi̱ʼi̱ xíʼin na̱ ñui̱. Saka̱ku ndi̱ʼi̱ ndáʼvindi̱”. Ta̱ rey ni̱nda̱ka̱tu̱ʼunra: “¿Yukú na̱ kúni̱ kaʼní yóʼó?”. Ta nda̱kuiinñá: “Ta̱ ndi̱va̱ʼaní-ini yóʼo kúú ta̱ Hamán”. Ta̱ rey ni̱sa̱a̱níra ta ni̱ka̱ʼa̱nra ña̱ ná kaʼnína ta̱ Hamán.

Ni saá kǒo na̱ kuchiñu sandiʼi-xa̱ʼa ña̱ ley ke̱ʼé ta̱ Hamán, ni ta̱ rey va̱ása kuchiñu. Va̱ʼaka ta̱xira ña̱ kaʼndachíñu ta̱ Mardoqueo nu̱ú na̱ príncipe ta keʼéra inka ley. Ña̱ ley yóʼo káʼa̱nña ña̱ va̱ʼa kanitáʼan na̱ ñuu judío xíʼin na̱ va̱xi kaʼní-ñaʼá. Tá 13 xíka tí yo̱o̱ adar, na̱ ñuu judío sa̱ndíʼi-xa̱ʼana na̱ kúni̱ kaʼní-ñaʼá. Tasaá na̱ ñuu Israel ndiʼi ku̱i̱ya̱ kéʼéna vikó ña̱ ndákaʼánna xa̱ʼaña.