Iin ñu̱ú, ta̱ Nabucodonosor ni̱xa̱níra ta ni̱yi̱ʼvíníra. Ka̱nara na̱ yiví ndíchi ña̱ ka̱ʼa̱nna xíʼinra ndáaña kúni̱ kachi ña̱ ni̱xa̱níra, soo va̱ása níkuchiñuna ka̱ʼa̱nna xíʼinra. Tasaá ni̱ka̱ʼa̱nra xíʼin ta̱ Daniel.

Ta̱ rey ni̱ka̱ʼa̱nra xíʼin ta̱ Daniel: “Tá ni̱xa̱níi̱ xi̱nii̱ iin yitu̱n tú xa̱ʼnuní ta ni̱xa̱a̱nú nda̱a̱ chí ndiví. Ta iníísaá nu̱ú ñuʼú túvi níndichinú. Liviní yu̱ku̱ íyo ndaʼa̱nú ta íyoní ku̱i̱ʼi ndaʼa̱nú. Tí kití ndákiʼindéerí xa̱ʼanú, ta tí saa íxava̱ʼarí chiʼyo̱rí ndaʼa̱nú. Tándi̱ʼi iin ángel nu̱ura chí ndiví ta ni̱ka̱ʼa̱nra: ‘Kaʼndandó tú yitu̱n ta kaʼndandó ndaʼa̱nú soo ndáa tikundunú ná kindo̱o xíʼin ti̱oʼonú. Ta katúnndó u̱vi̱ ña̱ʼa tokonú iin ña̱ koo ña̱ hierro ta inkaña koo ña̱ cobre. Ta níma̱nú nasa̱maña. Va̱ása kookaña níma̱ na̱ yiví chi níma̱ kití nduuña. Saá kooña nda̱a̱ ná ya̱ʼa u̱xa̱ tiempo. Ta ndiʼina kunda̱a̱-ini ña̱ mií ta̱ chíñu káʼnu kúú Ndióxi̱, ta miíra kúú ta̱ ndáka̱xin yukú na̱ taxira kaʼndachíñuʼ”.

Jehová ni̱ka̱ʼa̱nra xíʼi ta̱ Daniel ña̱ kúni̱ kachi xa̱ní ta̱ rey. Tá na̱kunda̱a̱-ini ta̱ Daniel ña̱ kúni̱ kachi xa̱ní ta̱ rey ni̱yi̱ʼvíníra ta ni̱ka̱ʼa̱nra: “Táta rey, á va̱ʼaví na̱ sáa̱-iniún xíniún ná ndoʼo ña̱ ni̱xa̱níún, soo vitin yóʼóva ndoʼoña. Miíún kúú tú yitu̱n xi̱níún xa̱ʼndana. Va̱ása kookaún rey, yu̱ku̱ kaxíún nda̱a̱ táki̱ʼva íyo iin kití. Soo ta̱ ángel ni̱ka̱ʼa̱nra ña̱ ndo̱o tikundu xíʼin ti̱oʼonú. Ña̱yóʼo kúni̱ kachiña ña̱ ndikóún koún rey”.

Tá xa̱a̱ ni̱ya̱ʼa iin ku̱i̱ya̱, ta̱ Nabucodonosor nda̱ara chí xi̱ní veʼera ta ki̱xaʼára xítora ña̱ ñuu Babilonia. Ta ni̱ka̱ʼa̱nra: “Nda̱chunkaví liviní ñuu ña̱ i̱xava̱ʼi̱. Mií ta̱ kúchiñu va̱ʼa kúi̱”. Tá ni̱ka̱ʼa̱nra saá iin na̱ ni̱ka̱ʼa̱n chí ndiví xi̱niso̱ʼora: “Nabucodonosor vitin va̱ása kookaún rey”.

Ta ndi̱ku̱n saá, ki̱xaʼá sa̱nara táki̱ʼva kéʼé iin kití saá ki̱xaʼá kéʼéra. Ta xa̱ʼa ña̱yóʼo ta̱vánara ta ku̱a̱ʼa̱nra koora xíʼin kití chí yuku̱. Xa̱ʼnu yixí xi̱níra táki̱ʼva íyo tu̱mi tí águila, ta chíi̱nra xa̱ʼnuña táki̱ʼva íyo chíi̱n tí saa.

 Tá xa̱a̱ ni̱ya̱ʼa u̱xa̱ ku̱i̱ya̱, ta̱ Nabucodonosor ndu̱va̱ʼara, ta ta̱xi Jehová ña̱ koo tukura rey nu̱ú na̱ ñuu Babilonia. Tasaá ni̱ka̱ʼa̱nra: “Ndásakáʼnui̱ Jehová, ta̱ kúú rey chí ndiví. Chi sákukaʼanra nu̱ú na̱ yiví na̱ kúta̱a-ini. Vitin kúnda̱a̱-inii̱ Jehová kúú ta̱ chíñu káʼnu ta nda̱a̱ ndáaka na̱ kúni̱ra ndaka̱xinra kaʼndachíñu”.