Ta̱ ñuu Israel kúú ta̱ Nehemías ta íyora ñuu Susa, ña̱ ndíka̱a̱ chí Persia. Ta̱ xi̱kachíñu nu̱ú ta̱ rey Artajerjes kúúra. Iin ki̱vi̱ ni̱xa̱a̱ ñanira nu̱úra ta na̱túʼunra xíʼinra xa̱ʼa tu̱ndóʼo ña̱ ñúʼu na̱ ñuura: “Kǒoka nama̱ ni yéʼé ña̱ va̱ʼa kasiña sa̱tá ñuu Jerusalén ña̱ kundoo na̱ ñuu Israel na̱ ndikó, chi nama̱ ña̱ sa̱ndíʼi-xa̱ʼa na̱ ñuu Babilonia ta ta̱ʼán ndaʼaña”. Ta̱ Nehemías ni̱kusuchíní-inira. Saáchi xi̱kuni̱ra chindeé táʼanra xíʼinna, xa̱ʼa ña̱yóʼo ni̱ka̱ʼa̱nra xíʼin Ndióxi̱ ña̱ va̱ʼa ná taxi ta̱ rey ku̱ʼu̱nra ñuu Jerusalén.

Tá ni̱ya̱ʼa tiempo, ta̱ rey xi̱nira kúsuchíní-ini ta̱ Nehemías. Ta ni̱ka̱ʼa̱nra xíʼinra: “Nda̱a̱ ni iin ki̱vi̱ ta̱ʼán kunii̱ yóʼó saá. ¿Ndáaña ndóʼún?”. Ta nda̱kuiinra: “Ñui̱ ña̱ Jerusalén, va̱ása va̱ʼa íyoña, ¿nda̱chun kǒo kusuchí-inii̱?”. Ta̱ rey ni̱nda̱ka̱tu̱ʼunrara: “¿Ndáaña va̱ʼa keʼíi̱ ña̱ chindeé táʼi̱n xíʼún?”. Ndi̱ku̱n ni̱ka̱ʼa̱n ta̱ Nehemías xíʼin Jehová. Tándi̱ʼi ni̱ka̱ʼa̱nra xíʼin ta̱ rey: “Káʼa̱n ndáʼvii̱ xíʼún, taxi ná ku̱ʼi̱n chí ñuu Jerusalén ña̱ sandáʼi̱ nama̱ sa̱táña”. Ta̱ rey Artajerjes ta̱xira ku̱ʼu̱nra. Ta ta̱xira na̱ ku̱ʼu̱n xíʼinra ña̱ kǒo ña̱ ndoʼora yichi̱. Ta̱xitura ña̱ kaʼndachíñura nu̱ú na̱ ñuu Judá, ta̱xitura yitu̱n tú keʼé ta̱ Nehemías yéʼé ñuu Jerusalén.

Tá ni̱xa̱a̱ ta̱ Nehemías ñuu Jerusalén, ni̱xa̱ʼa̱nra xi̱tora nama̱ íyo sa̱táña. Tándi̱ʼi nda̱kayara na̱ su̱tu̱ xíʼin na̱ chíñu ñuu yóʼo ta ni̱ka̱ʼa̱nra xíʼinna: “Va̱ása va̱ʼa íyo ña̱yóʼo. Xíniñúʼu sandáʼayóña”. Na̱ ñuu va̱ʼava ña̱ ni̱ka̱ʼa̱nra túvina ta ki̱xaʼána sándáʼana nama̱.

Savana kúsi̱kindaana na̱ ñuu Israel ta káchina: “Nda̱a̱ tí xi̱kuii a kuchiñu sandiʼi-xa̱ʼa ña̱ nama̱ ña̱ íxava̱ʼandó”. Soo na̱ káchíñu yóʼo kǒo níxiniso̱ʼona ña̱ ni̱ka̱ʼa̱nna xíʼinna nda̱kundeéna ka̱chíñuna. Káʼnuka i̱xava̱ʼana nama̱ ta ndakúka i̱xava̱ʼanaña.

Tasaá na̱ sáa̱-ini xíni na̱ ñuu Israel nda̱kanixi̱nína ña̱ kixaʼána kanitáʼanna xíʼin na̱ íyo ñuu Jerusalén. Tá na̱kunda̱a̱-ini na̱yóʼo ni̱yi̱ʼvínína. Soo ta̱ Nehemías ni̱ka̱ʼa̱nra xíʼinna: “Kǒo yi̱ʼvíndó. Chi Jehová íyo xíʼinyó”.  Xa̱ʼa ña̱yóʼo ta̱ Nehemías ni̱ka̱ʼa̱nra xíʼin sava na̱ ta̱a ña̱ ná kundaana na̱ káchíñu. Ta na̱ sáa̱-ini xíniñaʼá kǒo níkuchiñuna kanitáʼanna xíʼinna.

Ña̱ nama̱ xíʼin ña̱ yéʼé ki̱ʼva 52 ki̱vi̱ na̱kuva̱ʼaña. Xa̱ʼa ña̱ kúsi̱íní-inina, ta̱ Nehemías ni̱ka̱ʼa̱nra xíʼin na̱ se̱ʼe ta̱ Leví ña̱ kixina chí ñuu Jerusalén. Ta u̱vi̱ nda̱taʼvírana. Iin táʼvina ku̱a̱ʼa̱n xíʼin ta̱ Esdras, ta inka táʼvina ku̱a̱ʼa̱n xíʼin ta̱ Nehemías. Nda̱ana chí escalera chí yéʼé nu̱ú kána ti̱kui̱í. Ta iin táʼvína ku̱a̱ʼa̱n iin ñáʼñu ta inka táʼvina ku̱a̱ʼa̱n inka xiyo ta ni̱xi̱kana iníísaá sa̱tá ñuu. Tasaá tívina trompeta, ta sákaʼana ña̱ címbalo xíʼin tú arpa, ta xítana nu̱ú Jehová, iin saá nda̱a̱ ni̱xa̱a̱na nu̱ú templo Ndióxi̱. Na̱ ta̱a, ná ñaʼá xíʼin na̱ va̱lí ta̱xina ña̱ʼa ndaʼa̱ Jehová ta ke̱ʼéna iin vikó. Kúsi̱íní-inina ta nda̱a̱ xíká táku tu̱ʼunna.