Ta̱ Nabucodonosor nda̱kiʼinra na̱ príncipe ñuu Judá ku̱a̱ʼa̱n xíʼinra chí ñuu Babilonia tasaá ta̱xira ta̱ Aspenaz ña̱ kundaarana. Ni̱ka̱ʼa̱ntura xíʼin ta̱yóʼo ña̱ ná ndaka̱xinra míí na̱ xíni̱ va̱ʼa xíʼin na̱ kǒo kue̱ʼe̱ kúúmií. Ta na̱ va̱lí yóʼo kaʼvi va̱ʼana ki̱ʼva u̱ni̱ ku̱i̱ya̱ ña̱ va̱ʼa xa̱a̱na kachíñuna veʼe nu̱ú xáʼndachíñu ta̱ rey ñuu Babilonia. Xíniñúʼu sakuaʼana kaʼvina, taana letra ta ka̱ʼa̱nna tu̱ʼun naní acadio ña̱ xi̱ka̱ʼa̱n na̱ ñuu Babilonia. Saátu xíniñúʼu kuxina ña̱ xíxi ta̱ rey. Ta ña̱yóʼo xi̱kuu ki̱vi̱na, Daniel, Hananías, Misael xíʼin Azarías. Soo ta̱ Aspenaz na̱samara ki̱vi̱na ta nda̱kunanína táki̱ʼva naní na̱ ñuu Babilonia: Beltsasar, Sadrac, Mesac xíʼin Abednego. ¿Ndáaña ndákanixi̱níún á kuxíkana nu̱ú Jehová xa̱ʼa ña̱ kaʼvi va̱ʼana?

 Ku̱mí saá na̱ va̱lí yóʼo kúni̱na kandíxana Jehová. Xi̱xini̱na ña̱ va̱ása xíniñúʼu kuxuna ña̱ xíxi ta̱ rey, chi ley ta̱xi Jehová káʼa̱nña ña̱ va̱ása va̱ʼa kuxuna sava ña̱yóʼo. Xa̱ʼa ña̱yóʼo ni̱ka̱ʼa̱nna xíʼin ta̱ Aspenaz: “Káʼa̱nndi̱ xíʼún, va̱ása taxiún ña̱ xíxi ta̱ rey kuxundi̱”. Soo ta̱ Aspenaz nda̱kuiinra: “Tá va̱ása ná kuxundó ña̱yóʼo, ta̱ rey kunira ña̱ va̱ása va̱ʼa náʼa̱ndó ta kaʼníra yi̱ʼi̱”.

Ta̱ Daniel nda̱kanixi̱níra, ta ni̱ka̱ʼa̱nra ña̱yóʼo: “Káʼa̱nndi̱ xíʼún u̱xu̱ ki̱vi̱ taxi kuitíún yiva kuxundi̱ xíʼin ti̱kui̱í koʼondi̱. Ta ná ya̱ʼa u̱xu̱ ki̱vi̱ saá kotoún, ndáakandi̱ va̱ʼa náʼa̱ á na̱ xi̱xi ña̱ xíxi ta̱ rey á ndi̱ʼi̱”. Va̱ʼa káchi ta̱yóʼo.

Tá ni̱ya̱ʼa 10 ki̱vi̱, ta̱ Daniel xíʼin u̱ni̱ na̱ kítáʼan xíʼinra va̱ʼaka náʼa̱ na̱yóʼo nu̱ú na̱ xi̱xi ña̱ xíxi ta̱ rey. Jehová ni̱kusi̱íní-inira xa̱ʼa ña̱ ka̱ndíxanara. Ta̱xitura ña̱ ndíchi ndaʼa̱ ta̱ Daniel ña̱ va̱ʼa kunda̱a̱-inira xíʼin xa̱ni.

Tá ni̱ya̱ʼa u̱ni̱ ku̱i̱ya̱ ña̱ ka̱ʼvi na̱ va̱lí yóʼo, ta̱ Aspenaz ni̱xa̱ʼa̱nra xíʼinna nu̱ú ta̱ Nabucodonosor. Tá ni̱ka̱ʼa̱n ta̱ rey xíʼinna na̱kunda̱a̱-inira ña̱ xíni va̱ʼaka ta̱ Daniel, ta̱ Hananías, ta̱ Misael xíʼin ta̱ Azarías nu̱ú inka na̱ va̱lí. Xa̱ʼa ña̱yóʼo nda̱ka̱xinrana ña̱ kachíñuna xíʼinra. Ta ku̱a̱ʼání yichi̱ xi̱ndukúra consejo nu̱úna xa̱ʼa sava ña̱ʼa. Jehová ta̱xira ña̱ ndíchika koona nu̱ú na̱ ta̱a ndíchi na̱ káchíñu nu̱ú ta̱ rey xíʼin na̱ kéʼé magia.

Ta̱ Daniel, ta̱ Hananías, ta̱ Misael xíʼin ta̱ Azarías su̱ví ñuuna kúú nu̱ú ndóona, soo ni saá kǒo nínandósóna xa̱ʼa Jehová. ¿Ta yóʼó ndáaña keʼún? Tá kǒo na̱ veʼún íyo xíʼún, ¿á ndakaʼún ña̱ ndásakáʼnún Jehová?