Ni̱ya̱ʼa tiempo ña̱ ni̱xa̱ní ta̱ rey Nabucodonosor xa̱ʼa estatua, ni̱ka̱ʼa̱nra ña̱ keʼéna iin imagen ña̱ oro. Ta ka̱nindichiraña yosó Dura ta nda̱kayara ndiʼi na̱ yiví ña̱ ku̱ʼu̱nna nu̱úña, nda̱a̱ ta̱ Sadrac, ta̱ Mesac xíʼin ta̱ Abednego. Ta̱ rey ni̱ka̱ʼa̱nra: “Tá ná kuniso̱ʼondó tivina ndiki̱, sakáʼana arpa, xíʼin ndiʼika ka̱a nu̱ú távána yaa, kuxítíndó ta ndasakáʼnundó ña̱ i̱xava̱ʼi̱. Tá kǒo xíínndó kuxítíndó, chika̱a̱na ndóʼó ini horno”. ¿Á kuxítí na̱ va̱lí yóʼo? ¿Á iinlá Jehová ndasakáʼnuna?

Ta̱ rey ni̱ka̱ʼa̱nra ña̱ sakáʼana yaa. Ndiʼina xi̱kuxítí ta nda̱sakáʼnunaña. Soo ta̱ Sadrac, ta̱ Mesac xíʼin ta̱ Abednego va̱ása níndasakáʼnunaña. Tá xi̱ni savana ni̱ka̱ʼa̱nna xíʼin ta̱ rey: “U̱ni̱ saá ta̱ káa va̱ása ndásakáʼnura ña̱ i̱xava̱ʼún”. Ta̱ rey ni̱ka̱ʼa̱nra: “Tuku káʼi̱n xíʼinndó ña̱ kuxítíndó nu̱ú ña̱ i̱xava̱ʼi̱. Soo tá va̱ása ná keʼéndóña chika̱i̱ ndóʼó ini horno. Ta ni iin ndióxi̱ kǒo kuchiñu sakáku ndóʼó”. Na̱yóʼo nda̱kuiinna: “Va̱ása xíniñúʼu ka̱ʼa̱n tukuvíún xíʼinndi̱. Ndióxi̱ndi̱ ta̱ ndásakáʼnundi̱ sáka̱kuvara ndi̱ʼi̱. Soo ni ná kǒo sáka̱kura ndi̱ʼi̱ ni saáví kǒo kuxítíndi̱ nu̱ú ña̱ʼa ña̱ i̱xava̱ʼún”.

Ta̱ Nabucodonosor ni̱sa̱a̱níra. Ta ni̱ka̱ʼa̱nra xíʼin na̱ káchíñu nu̱ura: “Sasaá va̱ʼakandó horno u̱xa̱ka yichi̱ sasaándóña”. Tándi̱ʼi ni̱ka̱ʼa̱nra xíʼin na̱ soldadora: “Katúnndó na̱ ta̱a yóʼo ta taánndóna ini horno ná kokona”. Ña̱ horno yóʼo niʼníkavíña ta  nda̱a̱ na̱ soldado xa̱ʼníña tá ta̱ánna u̱ni̱ saá na̱ va̱lí yóʼo ini horno. Soo tá xi̱to ta̱ Nabucodonosor ini horno, xi̱nira ku̱mí na̱ yiví xíka iniña. Ni̱yi̱ʼvíkavíra ta ni̱nda̱ka̱tu̱ʼunra: “¿Á su̱ví u̱ni̱ kúú na̱ ka̱túnyó ta ta̱ányó ini horno yóʼo? Ta yi̱ʼi̱ ku̱mí kúú na̱ xítoi̱ xíka nu̱ú ñuʼu̱, ta iinra tá káa ángel saá káara”.

Ta̱ Nabucodonosor kuyatinra yuʼú horno ta ka̱nara: “Ndóʼó na̱ ndásakáʼnu Ndióxi̱ míí ta̱ káʼnu, keendó”. Tá ke̱ena, ndiʼi na̱ yiví xi̱ni ni loʼo ña̱ʼa kǒo níndoʼona. Ni yixí xi̱nína ni ti̱ko̱to̱na va̱ása níxi̱xi̱.

Ta̱ rey ni̱ka̱ʼa̱nra: “Ndasakáʼnundó Ndióxi̱ ta̱ Sadrac, ta̱ Mesac xíʼin ta̱ Abednego. Saáchi chi̱ndaʼára iin ángel ki̱xi sa̱káku na̱yóʼo. Kǒo inka ndióxi̱ íyo táki̱ʼva íyo Ndióxi̱ na̱yóʼo”.

Na̱ va̱lí yóʼo chi̱ka̱a̱-inina ña̱ nda̱kúní koo inina xíʼin Jehová, nda̱a̱ ndáaka ña̱ ná ndoʼona. ¿Á kúni̱ún keʼún táki̱ʼva ke̱ʼé na̱yóʼo?