Iin ñu̱ú ta̱ rey Nabucodonosor ni̱xa̱níra ta kǒo níkunda̱a̱-inira xíʼinña. Ndíʼi̱ní-inira ta va̱ása kívi ku̱su̱nra. Ka̱nara na̱ kéʼé magia ta ni̱ka̱ʼa̱nra xíʼina: “Ka̱ʼa̱nndó xíʼi̱n ndáaña kúni̱ kachi ña̱ ni̱xa̱níi̱”. Soo nda̱kuiinna: “Ka̱ʼa̱n xíʼinndi̱ ndáaña ni̱xa̱níún”. Ta̱ nda̱kuiinra: “Va̱ása ka̱ʼi̱n xíʼinndó, miíndó ka̱ʼa̱n xíʼi̱n ndáaña ni̱xa̱níi̱ tá va̱ása ná ka̱ʼa̱nndó kaʼníi̱ ndóʼó”. Soo ni̱ka̱ʼa̱nna: “Ka̱ʼa̱n xíʼinndi̱ ndáaña ni̱xa̱níún, tasaá ka̱ʼa̱nndi̱ xíʼún ndáaña kúni̱ kachiña”. Ta nda̱kuiinra: “Na̱ kúni̱ sandáʼvi yi̱ʼi̱ kúúndó. Kama koondó ka̱ʼa̱nndó xíʼi̱n”. Tasaá nda̱kuiinna: “Ni iin na̱ yiví kǒo kuchiñu keʼé ña̱ ndúkún yo̱ʼvi̱níña”.

Ta̱ Nabucodonosor ni̱sa̱a̱níra ta ni̱ka̱ʼa̱nra xíʼin na̱ káchíñu nu̱úra ña̱ kaʼnína na̱ ndíchi ñuu kán. Nda̱a̱ ta̱ Daniel, ta̱ Sadrac, ta̱ Mesac xíʼin ta̱ Abednego. Ta̱ Daniel ni̱ka̱ʼa̱nra xíʼin ta̱ rey ña̱ kundatura, saá ta̱ Daniel xíʼin na̱ migora ni̱ka̱ʼa̱nna xíʼin Jehová ña̱ chindeérana. Ta ¿ndáaña ke̱ʼé Jehová?

Jehová ni̱na̱ʼa̱ra ña̱ ni̱xa̱ní ta̱ rey nu̱ú ta̱ Daniel ta ni̱ka̱ʼa̱nra ndáaña kúni̱ kachiña. Inka ki̱vi̱ ta̱ Daniel ni̱ka̱ʼa̱nra xíʼin ta̱ káchíñu nu̱ú ta̱ rey: “Va̱ása kaʼníndó na̱ ndíchi chi yi̱ʼi̱ kuchiñui̱ ka̱ʼi̱n ndáaña kúni̱ kachi ña̱ ni̱xa̱ní ta̱ rey”. Ta̱ káchíñu nu̱ú ta̱ rey nda̱kiʼinra ta̱ Daniel ku̱a̱ʼa̱n xíʼinra. Ta̱ Daniel ni̱ka̱ʼa̱nra xíʼin ta̱ rey: “Ndióxi̱ káʼa̱nra xíʼún ndáaña kuu chí nu̱únínu. Ña̱yóʼo ni̱xa̱níún: xi̱niún iin estatua káʼnuní xi̱níña kúú oro, kandíkaña xíʼin so̱ko̱ña kúú plata, ti̱xinña xíʼin xa̱ʼa si̱ʼinña kúú cobre, sa̱ʼndaña kúú hierro ta xa̱ʼaña kúú hierro ña̱ nda̱saka xíʼin nda̱ʼyi̱. Ta ki̱ta iin yu̱u̱ chí yuku̱ ta ndeéní ka̱niña míí xa̱ʼa ña̱ estatua. Ta ña̱yóʼo cha̱chi ndiʼiña ta ndu̱uña yáká ta nda̱chíña xíʼin ta̱chí. Ta ña̱ yu̱u̱ xa̱ʼnuña ta ndu̱uña iin yuku̱ káʼnuní ta nda̱siña iníísaá nu̱ú ñuʼú”.

 Ta ni̱ka̱ʼa̱n ta̱ Daniel: “Ña̱ ni̱xa̱níún kúni̱ kachiña: gobierno yóʼó kúú ña̱ xi̱ní ña̱ oro. Ta ña̱ plata kúú inka gobierno ña̱ kixi sa̱tá yóʼó. Ta ña̱ cobre inka gobierno kúúña ta kaʼndachíñuña iníísaá nu̱ú ñu̱ʼu. Ta inka ña̱ gobierno koo táki̱ʼva íyo ña̱ hierro. Tándi̱ʼi koo iin gobierno ña̱ ndata̱ʼví, iin táʼviña ndakúní koo táki̱ʼva íyo hierro ta inka táʼviña vitání koo táki̱ʼva íyo nda̱ʼyi̱ . Ña̱ yu̱u̱ ña̱ xa̱ʼnu ta ndu̱uña iin yuku̱ káʼnu kúú Reino Ndióxi̱, ta sandiʼi-xa̱ʼaña ndiʼi na̱ gobierno na̱ íyo nu̱ú ñu̱ʼu yóʼo ta ña̱ Reino yóʼo kooña ndiʼi tiempo”.

Ta̱ Nabucodonosor xi̱kuxítíra nu̱ú ta̱ Daniel ta na̱kundee xi̱níra chí nu̱ú ñuʼú. Ta ni̱ka̱ʼa̱nra: “Ndióxi̱ún kúú ta̱ ni̱ka̱ʼa̱n xíʼún ña̱ kúni̱ kachi ña̱ ni̱xa̱níi̱. Kǒo inka ndióxi̱ íyo táki̱ʼva íyo Ndióxi̱ún”. Ta̱ rey va̱ása níxaʼníra ta̱ Daniel, chiñukava ta̱xira ndaʼa̱ra ña̱ kuniʼira yichi̱ nu̱ú na̱ ndíchi xíʼin ña̱ kaʼndachíñura nu̱ú ña̱ ñuu válí chí Babilonia. ¿Ndáaña ke̱ʼé Jehová ña̱ ni̱na̱ʼa̱ra ña̱ xi̱niso̱ʼora ña̱ ni̱ka̱ʼa̱n ta̱ Daniel?