Ni̱xi̱yo iin ñuu ña̱ xi̱ndika̱a̱ chí sa̱tá ñuu Israel nu̱ú xi̱kandíxa na̱ yiví ña̱ va̱ʼa níʼi tí ki̱mi yichi̱ nu̱úna. Iin ñu̱ú, xi̱ni na̱ ta̱a na̱ ñuu Arabia iin ki̱mi chí ndiví, ta kánda̱ tí yóʼo ku̱a̱ʼa̱nrí, ta na̱yóʼo xi̱kundiku̱nna sa̱tárí. Tí ki̱mi yóʼo nda̱a̱ ñuu Jerusalén ni̱xa̱a̱rí. Na̱ yiví yóʼo ndáka̱tu̱ʼunna ku̱a̱ʼa̱nna ta káchina: “¿Ndáa míí íyo ta̱ loʼo ta̱ xa̱a̱ koo rey nu̱ú na̱ Judío? Kúni̱ndi̱ ndasakáʼnundi̱ra”.

Ta̱ Herodes kúú rey ñuu Jerusalén, na̱kunda̱a̱-inira xa̱ʼa ta̱ koo rey na̱ Judío. Ta ni̱ndiʼiní-inira, ta ni̱nda̱ka̱tu̱ʼunra na̱ su̱tu̱: “¿Ndáa míí kaku ta̱ rey yóʼo?”. Na̱yóʼo ni̱ka̱ʼa̱nna: “Na̱ profeta ni̱ka̱ʼa̱nna ña̱ kakura ñuu Belén”. Tasaá ka̱na ta̱ rey Herodes na̱ ñuu Arabia ta ni̱ka̱ʼa̱nra xíʼinna: “Kúaʼanndó chí ñuu Belén ta nandukúndó ta̱ loʼo yóʼo. Tasaá ndikóndó ta ka̱ʼa̱nndó xíʼi̱n ndáa míí íyora, chi kúni̱i̱ ndasakáʼnui̱ra”. Soo su̱ví ña̱ nda̱a̱ kúú ña̱ níka̱ʼa̱n ta̱yóʼo.

Tí ki̱mi ki̱xaʼá kánda̱ tukurí, ta na̱ ta̱a yóʼo xi̱kundiku̱nna sa̱tárí ta ni̱xa̱a̱na ñuu Belén. Tasaá tí ki̱mi yóʼo ni̱xa̱a̱rí xi̱ní iin veʼe, na̱ ta̱a yóʼo ni̱ki̱ʼvina ini ña̱ veʼe ta xi̱nina ta̱ Jesús xíʼin ñá María. Tasaá ku̱xítína nu̱ú ta̱ loʼo yóʼo ta ta̱xina ku̱a̱ʼá ña̱ʼa ndaʼa̱ra: ta̱xina oro, incienso xíʼin mirra. Soo, ¿á ndixa Ndióxi̱ chi̱ndaʼá na̱yóʼo ña̱ ku̱a̱ʼa̱nna kotona ta̱ Jesús? Va̱ása.

Mií ñu̱ú saá, Jehová ni̱ka̱ʼa̱nra xíʼin ta̱ José xíʼin iin xa̱ni: “Ta̱ Herodes kúni̱ra kaʼníra ta̱ Jesús. Ndakiʼin ñá síʼún xíʼin se̱ʼún, ta kúaʼanndó ñuu Egipto. Kán kindo̱ondó ta va̱ása ndikóndó nda̱a̱ ná ka̱ʼa̱n miíi̱ xíʼinndó saá ndikóndó”. Tasaá ta̱ José xíʼin na̱ veʼera ku̱a̱ʼa̱nna ñuu Egipto.

Saátu ni̱ka̱ʼa̱n Jehová xíʼin na̱ ñuu Arabia ña̱ ná kǒo ndikóna nu̱ú ta̱ Herodes. Tá ki̱vi̱ na̱kunda̱a̱-ini ta̱ Herodes ña̱ va̱ása níndikó na̱ ta̱a yóʼo ni̱sa̱a̱níra. Ta xa̱ʼa ña̱ va̱ása níkuchiñura ndani̱ʼíra ta̱ Jesús, ni̱ka̱ʼa̱nra ña̱ ná kaʼnína ndiʼi na̱ va̱lí ñuu Belén na̱ ndíka̱a̱ táʼan ku̱i̱ya̱ ta̱ Jesús. Soo kǒo ña̱ níndoʼo ta̱ Jesús chi xa̱a̱ ñuu Egipto íyora.

 Ni̱ya̱ʼa tiempo, ta̱ Herodes ni̱xi̱ʼi̱ra. Tasaá ni̱ka̱ʼa̱n Jehová xíʼin ta̱ José: “Kǒoka ña̱ keʼéna xíʼinndó, xa̱a̱ va̱ʼa ndikóndó”. Ta̱ José, ñá María xíʼin ta̱ Jesús ndi̱kóna ki̱xa̱a̱na Israel ta ni̱xa̱a̱na xi̱koona ñuu Nazaret.