Tá xa̱a̱ ku̱a̱ʼa̱n iin ku̱i̱ya̱ xíka ta̱ Jesús sánáʼa̱ra na̱ yiví, íyo iin ña̱ ndáyáʼviní ke̱ʼéra. ¿Ndáana ndaka̱xinra ña̱ kachíñuna xíʼinra ta kuniʼina yichi̱ nu̱ú na̱ congregación? Tá kúma̱níka ndaka̱xinra na̱yóʼo ni̱ka̱ʼa̱nra xíʼin Jehová ña̱ ná chindeérara. Xa̱ʼa ña̱yóʼo ku̱a̱ʼa̱n iinlá miíra nu̱ú yuku̱ ta iníísaá ñu̱ú ni̱ka̱ʼa̱nra xíʼin Ndióxi̱. Inka ki̱vi̱, ta̱ Jesús sa̱ndátakara sava na̱ discípulo ta nda̱ka̱xinra 12 na̱ koo apóstolra. ¿Á xíni̱ún nda̱saa naní sava na̱yóʼo? Iinra xi̱naní Pedro, Andrés, Santiago, Juan, Felipe, Bartolomé, Tomás, Mateo, Santiago se̱ʼe ta̱ Alfeo, Tadeo, Simón xíʼin ta̱ Judas Iscariote.

Na̱ 12 yóʼo ni̱xi̱kana xíʼin ta̱ Jesús. Ta sa̱náʼa̱rana ña̱ va̱ʼa sanáʼa̱na na̱ yiví, tándi̱ʼi chi̱ndaʼárana ña̱ ku̱ʼu̱n miína sanáʼa̱na na̱ yiví. Saátu ta̱xi Jehová ndée ndaʼa̱na ña̱ tavána ta̱chí ndi̱va̱ʼa ta sandáʼana na̱ kúúmií kue̱ʼe̱.

Nu̱ú ta̱ Jesús na̱ 12 apóstol yóʼo migora xi̱kuuna ta xi̱kandíxara ña̱ va̱ʼa keʼéna ña̱ káʼa̱nra xíʼinna. Na̱ fariseo xi̱ndakanixi̱nína ña̱ ni iin ña̱ʼa va̱ása xíni̱ na̱ apóstol ta̱ Jesús. Soo ta̱ Jesús va̱ása  níndakanixi̱níra saá xa̱ʼana. Va̱ʼaní sa̱náʼa̱rana ña̱ va̱ʼa keʼéna chiñu ta̱xira ndaʼa̱na. Na̱yóʼo koona xíʼin ta̱ Jesús ndiʼi tiempo ña̱ koora nu̱ú ñuʼú. Koona xíʼinra tá kúma̱níka kuvira ta saátu ta ná ndatakura. Ku̱a̱ʼání na̱yóʼo na̱ ñuu Galilea xi̱kuuna, saátu ta̱ Jesús. Savatuna xa̱a̱ íyo ñá síʼína.

Na̱ apóstol na̱ ku̱a̱chi xi̱kuutu na̱yóʼova. Sava va̱ása va̱ʼa ña̱ xi̱ka̱ʼa̱nna ta savatu va̱ása va̱ʼa ña̱ xi̱keʼéna. Su̱ví ndiʼi tiempo va̱ʼa ni̱xi̱yo inina. Nda̱a̱ xi̱kanitáʼanna ta xi̱ka̱ʼa̱nna yukú na̱ ndáyáʼvika. Soo ni saá va̱ʼava ta̱a xi̱kuuna chi xi̱kuʼvi̱-inina xi̱xinina Jehová. Na̱yóʼo kúú na̱ kuniʼi yichi̱ nu̱ú na̱ congregación ta ná kuvi ta̱ Jesús.