Ta̱ Jesús ki̱xira nu̱ú ñuʼú yóʼo ña̱ sanáʼa̱ra xa̱ʼa Reino Ndióxi̱. Jehová ta̱xira espíritu ndaʼa̱ra ña̱ keʼéra milagro tasaá na̱ʼa̱ra ndáaña keʼéra tá ná koora rey. Ta̱ Jesús sa̱ndáʼara na̱ yiví ni nda̱a̱ ndáaka kue̱ʼe̱ kúúmiína. Iníísaá nu̱ú ni̱xi̱kara, na̱ yiví na̱ kúúmií kue̱ʼe̱ xi̱ka̱ʼa̱nna ña̱ chindeérana ta sa̱ndáʼavarana. Na̱ kǒo túvi nu̱ú nda̱tuvi nu̱úna, na̱ kǒo xíniso̱ʼo nda̱kuniso̱ʼona, na̱ kǒo kívi kaka nda̱kakana. Xi̱tiin kuitína ti̱ko̱to̱ra ta xi̱ndaʼavana. Ta̱ Jesús xi̱tavátura ta̱chí ndi̱va̱ʼa. Nda̱a̱ mií nu̱ú ku̱a̱ʼa̱nra xi̱xika na̱ yiví sa̱tára, ndiʼi na̱ yiví chi̱ndeérana, ni sava yi̱chí xi̱kuni̱ra koo iinlá miíra.

Iin yichi̱, níʼina iin ta̱ va̱ása kívi kaka ni̱xa̱a̱na nu̱ú ta̱ Jesús. Soo ku̱a̱ʼání na̱ yiví íyo kán, ta̱ va̱ása níkuchiñu ki̱ʼvina ini veʼe. Ta ke̱ʼéna iin ya̱vi̱ xi̱ní veʼe, ta sa̱nu̱únara nda̱a̱ nu̱ú ndíka̱a̱ ta̱ Jesús. Ta ni̱ka̱ʼa̱n ta̱ Jesús xíʼin ta̱ va̱ása kívi kaka: “Kundichi ta kaka”. Ta ki̱xaʼára xíkara, na̱ yiví iin nda̱kanda̱-inina.

Inka ki̱vi̱, ta̱ Jesús ki̱xa̱a̱ra iin ñuu, ta 10 ta̱a na̱ kúúmií lepra ka̱nara: “Jesús chindeé ndi̱ʼi̱”. Tiempo saá, kǒo kívi koo yatin na̱ kúúmií kue̱ʼe̱ xíʼin na̱ yiví. Saátu ley Jehová xi̱ka̱ʼa̱nña ña̱ xíniñúʼu ku̱ʼu̱nna templo ta taxina tixaʼvi xa̱ʼa ña̱ kǒoka kue̱ʼe̱ kúúmiína. Ña̱kán ni̱ka̱ʼa̱n ta̱ Jesús xíʼinna ná ku̱ʼu̱nna. Tá ku̱a̱ʼa̱nna chí templo, nda̱ʼavana. Tá xi̱ni iin ta̱ ta̱a yóʼo ña̱ nda̱ʼara, ndi̱kóra ta ta̱xira tixaʼvi ndaʼa̱ ta̱  Jesús ta nda̱sakáʼnura Ndióxi̱. Soo 10 kúú ta̱a na̱ nda̱ʼa, soo iin kuitíra ta̱xi tixaʼvi ndaʼa̱ ta̱ Jesús.

Íyo iin ñaʼá ñá xa̱a̱ 12 ku̱i̱ya̱ kúúmií kue̱ʼe̱ ta kúni̱ñá ndaʼañá chi kǒo kúndeéka-iniña. Ni̱xa̱a̱ñá ni̱ki̱ʼviñá ma̱ʼñú na̱ yiví ña̱ kuyatinñá nu̱ú ta̱ Jesús ta ti̱inñá ti̱ko̱to̱ra. Ndi̱ku̱n saá nda̱ʼavañá. Ta ni̱ka̱ʼa̱n ta̱ Jesús: “¿Yukú na̱ ti̱in yi̱ʼi̱?”. Ñá ñaʼá yóʼo ni̱yi̱ʼvíñá, soo ku̱yantinñá nu̱úra ta ni̱ka̱ʼa̱nñá xíʼinra ña̱ ke̱ʼéñá. Ta̱ Jesús ni̱ka̱ʼa̱nra: “Kǒo ku̱a̱chi siʼí, va̱ása kundi̱ʼi̱-iniún”.

Iin ta̱ chíñu naní Jairo ni̱ka̱ʼa̱nra xíʼin ta̱ Jesús: “Ná ku̱ʼu̱nyó veʼi̱. Ndeéní ndóʼo se̱ʼi̱”. Soo tá kúma̱níka xa̱a̱ ta̱ Jesús, ni̱xi̱ʼi̱va ñá loʼo yóʼo. Tá ni̱xa̱a̱na, xi̱ni ta̱ Jesús ku̱a̱ʼání na̱ yiví xáku. Ta̱ Jesús ni̱ka̱ʼa̱nra xíʼinna: “Va̱ása kuakundó, ñá kísi̱nva kúúñá”. Tasaá ti̱inra ndaʼa̱ ñá loʼo yóʼo ta ni̱ka̱ʼa̱nra: “Ndako̱o ñá loʼo”. Ñá loʼo yóʼo nda̱koovañá, ta̱ Jesús ni̱ka̱ʼa̱nra xíʼin na̱ yiváñá ña̱ ná taxina ña̱ kuxuñá. ¿Ndáaña ndo̱ʼo na̱ yiváñá tá xi̱nina ndiʼi ña̱yóʼo?