Tá kúma̱níka koo Pascua tá ku̱i̱ya̱ 32, na̱ apóstol ndi̱kóna ña̱ ni̱xa̱ʼa̱nna sa̱náʼa̱na na̱ yiví. Ku̱naánína, ta nda̱ana ini barco ta ku̱a̱ʼa̱nna chí ñuu Betsaida ña̱ ndakiʼinndéena. Soo tá ni̱xa̱a̱na chí yuʼú mar, ta̱ Jesús xi̱nira ku̱a̱ʼání na̱ yiví ni̱xa̱a̱na ndátunara. Ta̱yóʼo kúni̱ra koo iinlá miíra xíʼin na̱ apóstolra, soo ni saá ku̱ndáʼvi-inira xi̱nirana ta sa̱ndáʼara na̱ kúúmií kue̱ʼe̱ ta nátúʼunra xíʼinna ku̱a̱ʼání ña̱ʼa. Ni̱ka̱ʼa̱nra xíʼinna xa̱ʼa Reino Ndióxi̱. Tá xa̱a̱ ku̱a̱ʼa̱n kúú xi̱ku̱aá na̱ apóstolra ni̱ka̱ʼa̱nna xíʼinra: “Sana xa̱a̱ kúni̱ kuxuva na̱ yiví yóʼo. Ka̱ʼa̱n xíʼinna ná ku̱ʼu̱nna ña̱ va̱ʼa satána ña̱ʼa kuxuna”.

Soo ta̱ Jesús ni̱ka̱ʼa̱nra: “Kǒo xíniñúʼu ku̱ʼu̱nna. Taxindó ña̱ kuxuna”. Na̱ apóstol ni̱ka̱ʼa̱nna: “¿Á kúni̱ún ku̱ʼu̱nndi̱ satándi̱ ña̱ʼa kuxuna?”. Ta̱ Felipe, ni̱ka̱ʼa̱nra: “Ni ku̱a̱ʼání ná koo xu̱ʼúnyó va̱ása kivi satáyó ña̱ kuxu ndiʼi na̱ yiví yóʼo chi ku̱a̱ʼání kúúna”.

Ta̱ Jesús ni̱ka̱ʼa̱nra xíʼinna: “¿Á ku̱a̱ʼá kúú ña̱ʼa kuxuyó níʼindó?” Ta̱ Andrés nda̱kuiinra: “U̱ʼu̱n si̱táva̱ʼa xíʼin u̱vi̱ ti̱a̱ká va̱lí níʼindi̱. Loʼova kúúña va̱ása naniña chi ku̱a̱ʼání kúúna”. Ta̱ Jesús ni̱ka̱ʼa̱nra: “Taxindó si̱táva̱ʼa xíʼin ti̱a̱ká ndaʼíi̱”. Ta ni̱ka̱ʼa̱nra xíʼin na̱ yiví ná kundoona nu̱ú ñuʼú, xa̱a̱ 50 xíʼin 100 nda̱taʼvírana. Tasaá ki̱ʼinra si̱táva̱ʼa xíʼin ti̱a̱ká, ta nda̱niʼira nu̱úra chí ndiví ta ni̱ka̱ʼa̱nra xíʼin Ndióxi̱. Tándi̱ʼi ta̱xira ña̱yóʼo ndaʼa̱ na̱ apóstolra ña̱ ndataʼvínaña xíʼin na̱ yiví. Ta 5,000 ta̱a xi̱kuu na̱ ni̱xi̱yo kán, xíʼin ná ñaʼá  xíʼin na̱ va̱lí, xi̱xina nda̱a̱ chu̱tú inina. Tándi̱ʼi, na̱ apóstolra nda̱kaya̱na ña̱ ki̱ndoo ña̱ ná kǒo ndiʼi-xa̱ʼaña. Ta 12 canasta chu̱tú. ¿Á su̱ví iin ña̱ ndakanda̱-iniyó kúú ña̱yóʼo?

Na̱ yiví nda̱kanda̱ní-inina ta nda̱a̱ xi̱kuni̱na ña̱ koo ta̱ Jesús rey. Soo Jehová va̱ása kúni̱ra ña̱yóʼo, chi kúma̱ní ki̱xa̱a̱ tiempo ña̱ ndasara ta̱ Jesús rey, xa̱a̱ kúnda̱a̱va ini ta̱ Jesús xa̱ʼa ña̱yóʼo. Ña̱kán ni̱ka̱ʼa̱nra xíʼin na̱ yiví ná ku̱ʼu̱nna ta ni̱ka̱ʼa̱nra xíʼin na̱ apóstolra ná ku̱ʼu̱nna inka xiyo tá mar tá ndíka̱a̱ chí Galilea. Na̱kán nda̱ana ini tú barco, ta iinlá mií ta̱ Jesús ku̱a̱ʼa̱n chí yuku̱. ¿Nda̱chun ku̱a̱ʼa̱n iinlá miíra? Chi kúni̱ra ku̱a̱ʼáka tiempo ka̱ʼa̱nra xíʼin yivára. Ni ku̱a̱ʼání chiñu ni̱xi̱yo nu̱ú ta̱ Jesús ndiʼi tiempo xi̱ka̱ʼa̱nra xíʼin Jehová.