Na̱ fariseo xi̱keʼéna sava ña̱ʼa ña̱ ná ka̱ʼa̱n va̱ʼa na̱ yiví xa̱ʼana. Tá xi̱keʼéna ña̱ va̱ʼa, xi̱kuni̱na ndiʼina ná kuni ña̱yóʼo. Xi̱keʼéna oración nu̱ú íyo ku̱a̱ʼá na̱ yiví. Sa̱kuaʼa xíʼin xi̱nína oración, ta xi̱ka̱ʼa̱nnaña nu̱ú sinagoga xíʼin calle ña̱ kuniso̱ʼo na̱ yiví ña̱ káʼa̱nna. Ña̱kán na̱ yiví nda̱kanda̱-inina tá ni̱ka̱ʼa̱n ta̱ Jesús: “Kǒo keʼéndó oración táki̱ʼva kéʼé na̱ fariseo. Chi ndákanixi̱nína ña̱ xíniso̱ʼo Ndióxi̱ ña̱ káʼa̱nna xa̱ʼa ña̱ ku̱a̱ʼání káʼa̱nna, soo va̱ása. Su̱ví ndiʼina xíniñúʼu kuniso̱ʼo ña̱ ka̱ʼún xíʼin Ndióxi̱. Va̱ása ka̱ʼún tuku ta tuku suvi míí tu̱ʼun ña̱ xa̱a̱ ni̱ka̱ʼún. Jehová kúni̱ra ka̱ʼún xíʼinra xa̱ʼa míí ña̱ ndixa ndóʼún”.

Ta̱ Jesús ni̱ka̱ʼa̱nra nda̱saa xíniñúʼu ka̱ʼa̱nyó xíʼin Ndióxi̱: “Yivándi̱ ta̱ íyo chí ndiví, ndasayi̱i̱ ki̱vi̱ún. Ná kixa̱a̱ ña̱  kaʼndachíñún. Tasaá ná koo ña̱ kúni̱ miíún, táki̱ʼva íyo chí ndiví, saá ná koo nu̱ú ñuʼú yóʼo”. Ta̱ Jesús ni̱ka̱ʼa̱nra ña̱ ndukúna ña̱ kuxuna, ña̱ koo káʼnu-inira xa̱ʼana ta ndukúna inka ña̱ xíniñúʼuna.

Ta̱ Jesús ni̱ka̱ʼa̱nra: “Kǒo sandákoún ña̱ ka̱ʼún xíʼin Ndióxi̱. Ndukú ña̱ va̱ʼa nu̱ú yiváyó, Jehová. Ndiʼi na̱ íyo se̱ʼe kúni̱na taxina ña̱ va̱ʼa ndaʼa̱ se̱ʼena. Tá iin se̱ʼún ndúkúna si̱táva̱ʼa nu̱ún, ¿á taxiún iin yu̱u̱ ndaʼa̱na? Tá ndúkúna iin ti̱a̱ká nu̱ún, ¿á taxiún iin ko̱o̱ ndaʼa̱na?”.

Tasaá ta̱ Jesús ni̱ka̱ʼa̱nra ndáaña sakuaʼayó xíʼin ña̱yóʼo: “Tá miíún táxiún iin ña̱ va̱ʼa ndaʼa̱ se̱ʼún, saátu yiváyó, Jehová, taxira espíritu santo ndaʼún. Iinlá ña̱ xíniñúʼu keʼún kúúña ndukúña nu̱úra”. ¿Á kéʼún nda̱a̱ táki̱ʼva ni̱ka̱ʼa̱n ta̱ Jesús? ¿Ndáaña ndúkún nu̱ú Jehová tá káʼún xíʼinra?