Ta̱ Jesús va̱ʼa sándáʼara na̱ kúúmií kue̱ʼe̱ ta sándátakura na̱ ni̱xi̱ʼi̱. Va̱ʼatu xáʼndachíñura nu̱ú ta̱chí xíʼin sa̱vi̱. Tándi̱ʼi ni̱ka̱ʼa̱n ta̱ Jesús xíʼin Jehová chí yuku̱, xi̱nira nu̱ú íyo tá mar Galilea ta xi̱nira ndeéní xíka ta̱chí. Na̱ apóstol ñúʼuna ini tú barco ta kánuunú nu̱ú ti̱kui̱í. Tasaá ni̱xa̱a̱ ta̱ Jesús ta ki̱xaʼára xíkara nu̱ú ti̱kui̱í ta ku̱a̱ʼa̱nra nu̱úna. Tá xi̱ni na̱ apóstol xíka iin na̱ yiví nu̱ú ti̱kui̱í ni̱yi̱ʼvínína. Soo ta̱ Jesús ni̱ka̱ʼa̱nra xíʼinna: “Yi̱ʼi̱va kúúra. Kǒo yi̱ʼvíndó”.

Ta̱ Pedro ni̱ka̱ʼa̱nra: “Táta, tá ndixa yóʼó kúúra, ka̱ʼa̱n xíʼi̱n ña̱ xa̱i̱ kakai̱ nu̱ú ti̱kui̱í xíʼún”. Ta̱ Jesús ni̱ka̱ʼa̱nra: “Naʼa”. Ta̱ Pedro ki̱tara ini tú barco ta ki̱xaʼára xíkara nu̱ú ti̱kui̱í nu̱ú xíka ta̱chí kini. Soo tá si̱lóʼo kúni̱ xa̱a̱ra nu̱ú ta̱ Jesús, ki̱xaʼára xítora nu̱ú xíka ta̱chí kini ta ni̱yi̱ʼvíra. Ki̱xaʼá sáʼvira ini ti̱kui̱í ta ni̱ka̱ʼa̱nra: “Táta, saka̱ku yi̱ʼi̱”. Ta̱ Jesús ti̱inra ndaʼa̱ra ta ni̱ka̱ʼa̱nra xíʼinra: “¿Nda̱chun ki̱xaʼá xíka-iniún? ¿Á kǒo kándíxaún Ndióxi̱?”.

Ta̱ Jesús xíʼin ta̱ Pedro nda̱ana ini tú barco, ta sa̱yáa̱ ta̱chí kini. ¿Ndáaña ndo̱ʼo na̱ apóstol tá xi̱nina ña̱yóʼo? Ni̱ka̱ʼa̱nna: “Mií ña̱ ndixa, yóʼó kúú se̱ʼe Ndióxi̱”.

Soo su̱ví iinlá yichi̱ yóʼo kúú ña̱ nísasi ta̱ Jesús nu̱ú ta̱chí kini. Inka ki̱vi̱, tá ku̱a̱ʼa̱n ta̱ Jesús xíʼin na̱ apóstolra ini tú barco chí inka xiyo tá mar, ta̱ Jesús ni̱ki̱si̱ra ini tú barco. Tá kísi̱ra, ki̱xaʼá ta̱chí ndeé. Iin ki̱xaʼá káni ña̱ ola tú barco, ta ki̱xaʼá kíʼvi ti̱kui̱í ininú. Na̱ apóstol sa̱ndúkaxina-ini ta̱ Jesús xa̱ʼa ña̱ ka̱na kóʼónara: “Táta, kuvivayó. Chindeé ndi̱ʼi̱”. Ta̱ Jesús nda̱koora ta ni̱ka̱ʼa̱nra xíʼin tá mar: “Táxin koún”. Míí tá ni̱ka̱ʼa̱nra saá sa̱yáa̱ ta̱chí xíʼin mar. Tasaá ni̱ka̱ʼa̱nra xíʼin na̱ apóstol: “¿Á va̱ása kándíxavandó Ndióxi̱?”. Ta na̱yóʼo ni̱ka̱ʼa̱n xíʼin táʼanna: “Nda̱a̱ ta̱chí xíʼin mar xíniso̱ʼo ña̱ káʼa̱nra”. Na̱ apóstol na̱kunda̱a̱-inina tá kándíxana ta̱ Jesús va̱ása xíniñúʼu yi̱ʼvína.