Na̱ judío xi̱keʼéna vikó ña̱ pascua ndiʼi ku̱i̱ya̱, ki̱vi̱ 14 tí yo̱o̱ nisán. Saá xi̱ndakaʼánna ña̱ ta̱vá Jehová miína ñuu Egipto nu̱ú sa̱ndóʼonínana, tándi̱ʼi ta̱xira iin ñuʼú xa̱á ndaʼa̱na. Tá ku̱i̱ya̱ 33, ta̱ Jesús xíʼin na̱ apóstolra ke̱ʼéna ña̱ pascua ini iin cuarto ña̱ íyo ini iin veʼe chí ñuu Jerusalén. Tándi̱ʼi xi̱xina, ta̱ Jesús ni̱ka̱ʼa̱nra: “Iin ndóʼó xi̱kó yi̱ʼi̱”. Iin nda̱kanda̱-ini na̱ apóstol ta ni̱ka̱ʼa̱nna xíʼinra: “¿Ndáa ta̱ kúú ta̱ xi̱kó yóʼó?”. Ta̱ Jesús ni̱ka̱ʼa̱nra: “Ta taxii̱ iin ñáʼñu si̱táva̱ʼa ndaʼa̱ kúúra”. Tasaá ta̱xira iin ñáʼñu si̱táva̱ʼa ndaʼa̱ ta̱ Judas Iscariote. Tasaá, ta̱ Judas nda̱kundichira ta ku̱a̱ʼa̱nra.

Tándi̱ʼi ta̱ Jesús ke̱ʼéra iin oración, ta̱ʼvíra iin si̱táva̱ʼa ta ta̱xiraña ndaʼa̱ na̱ apóstol na̱ ni̱ndo̱o xíʼinra. Ta ni̱ka̱ʼa̱nra: “Kuxundó si̱táva̱ʼa yóʼo. Chi ña̱yóʼo ndákiʼin nu̱ú ku̱ñui̱ ña̱ chaʼvii̱ xa̱ʼandó”. Tándi̱ʼi ke̱ʼéra inka oración xa̱ʼa tá vino ta ta̱xirará ndaʼa̱na ta ni̱ka̱ʼa̱nra: “Koʼondó vino yóʼo. Táyóʼo ndákiʼin nu̱ú ni̱íi̱ ña̱ chaʼvii̱ xa̱ʼa ku̱a̱chindó. Káʼi̱n xíʼinndó ña̱ xa̱a̱ndó koondó rey xíʼi̱n chí ndiví. Keʼéndó ña̱yóʼo ndiʼi ku̱i̱ya̱ ña̱ va̱ʼa ndakaʼánndó xa̱ʼíi̱”. Na̱ ndíku̱n ta̱ Jesús ndiʼi ku̱i̱ya̱ kéʼéna ña̱yóʼo tá xa̱a̱ ku̱a̱ʼa̱n kúna̱a. Ña̱yóʼo naníña cena ta̱ Jesús.

 Tándi̱ʼi ña̱ cena yóʼo, na̱ apóstol ki̱xaʼána káʼa̱nna xa̱ʼa ndáa ta̱ kúú ta̱ káʼnuka nu̱úna. Soo ta̱ Jesús ni̱ka̱ʼa̱nra: “Ta̱ kúni̱ koo káʼnuka nu̱úndó xíniñúʼu koora nda̱a̱ táki̱ʼva íyo iin ta̱ loʼo ta va̱ása ni̱nuní kunira”.

Ta̱ Jesús ni̱ka̱ʼa̱nra: “Ndóʼó kúú migoi̱. Chi káʼi̱n xíʼinndó ndiʼi ña̱ káʼa̱n yivái̱ ka̱ʼi̱n xíʼinndó. Loʼova kúni̱ ta ndikói̱ chí ndiví, nu̱ú íyo yivái̱. Soo ndóʼó ndo̱ondó, ta na̱ yiví kunda̱a̱-inina ña̱ kúúndó discípuloi̱ tá kúʼvi̱-inindó xíni táʼanndó. Xíniñúʼu kuʼvi̱-inindó kuni táʼanndó táki̱ʼva ni̱kuʼvi̱-inii̱ xi̱nii̱ ndóʼó”.

Ta̱ Jesús ke̱ʼéra iin oración ta ni̱ka̱ʼa̱nra xíʼin Jehová ña̱ ná kundaara na̱ discípulora ta ná chindeérana ña̱ inkáchi kachíñuna ta kǒo kanitáʼanna. Ni̱ka̱ʼa̱ntura xa̱ʼa ki̱vi̱ Ndióxi̱ ña̱ ná ndukáʼnuña. Ta̱ Jesús xíʼin na̱ apóstolra xi̱tana yaa nu̱ú Jehová ta ku̱a̱ʼa̱nna. Ndáa loʼova kúni̱ ña̱ tiinna ta̱ Jesús.