Na̱ su̱tu̱ ku̱a̱ʼa̱nna xíʼin ta̱ Jesús nu̱ú íyo ta̱ xáʼndachíñu. Ta̱ Pilato ni̱nda̱ka̱tu̱ʼunrana: “¿Ndáaña ke̱ʼé ta̱ ta̱a yóʼo?”. Na̱kán ni̱ka̱ʼa̱nna: “Rey kúúra káchira”. Ta̱ Pilato ni̱nda̱ka̱tu̱ʼunra ta̱ Jesús: “¿Á yóʼó kúú rey na̱ ñuu Judá?”. Ta̱ Jesús ni̱ka̱ʼa̱nra: “Ña̱ Reino yi̱ʼi̱ su̱ví ña̱ ñuyǐví yóʼo kúúña”.

Ta̱ Pilato chi̱ndaʼára ta̱ Jesús ña̱ ku̱ʼu̱nra nu̱ú ta̱ Herodes, ta̱ xáʼndachíñu ñuu Galilea. Ta̱ Herodes xi̱nira ña̱ kǒo ku̱a̱chi kúúmií ta̱ Jesús, ta ni̱ka̱ʼa̱nra ña̱ ná ndikóra nu̱ú ta̱ Pilato. Tasaá ta̱ Pilato ni̱ka̱ʼa̱nra xíʼin na̱ yiví: “Kǒo ku̱a̱chira níndani̱ʼí ta̱ Herodes ni yi̱ʼi̱ kǒoña níndani̱ʼíi̱. Sañávai̱ra”. Soo na̱ yiví ni̱ka̱ʼa̱nna: “Kaʼníra. Kaʼníra”. Na̱ soldado ka̱ninara, ku̱ndaana ta̱sií nu̱úra. Chi̱núuna iin corona ña̱ iñú xi̱níra ta ni̱ka̱ʼa̱nna: “Kúaʼún rey na̱ ñuu Judá”. Ta̱ Pilato tuku ni̱ka̱ʼa̱nra: “Kǒo ku̱a̱chi ta̱ ta̱a yóʼo”. Soo ni̱ka̱ʼa̱nna: “Katikaara ndaʼa̱ yitu̱n”. Tándi̱ʼi, ta̱ Pilato nda̱taxira ta̱ Jesús ndaʼa̱na ña̱ va̱ʼa kaʼnínara.

Ta nda̱kiʼinna ta̱ Jesús ku̱a̱ʼa̱n xíʼinna nu̱ú naní Gólgota. Ka̱tikaanara ndaʼa̱ iin yitu̱n. Ta̱ Jesús ni̱ka̱ʼa̱nra xíʼin Jehová: “Yivá, káʼnu koo iniún xa̱ʼana chi va̱ása xíni̱na ndáaña kéʼéna”. Ku̱si̱kindaana ta̱ Jesús ta ni̱ka̱ʼa̱nna: “Tá se̱ʼe Ndióxi̱ kúún, sánuu miíún ndaʼa̱ yitu̱n ta saka̱ku miíún”.

Iin ta̱ kui̱ʼná ta̱ ka̱tikaana kán ni̱ka̱ʼa̱nra xíʼin ta̱ Jesús: “Ndakaʼún xa̱ʼíi̱ tá ná kixaʼún kaʼndachíñún”. Ta ni̱ka̱ʼa̱nra: “Koún xíʼi̱n nu̱ú ñuʼú livi”. Ta tá xi̱ku̱aá, iin na̱kunaa ki̱ʼva u̱ni̱ hora. Sava na̱ discípulora ndítana yatin nu̱ú tíkaara, nda̱a̱ siʼíra ñá María. Ta̱ Jesús ni̱ka̱ʼa̱nra xíʼin ta̱ Juan ña̱ kundaara ñá María nda̱a̱ táki̱ʼva íyo siʼíra saá kooñá.

Tándi̱ʼi, ta̱ Jesús ni̱ka̱ʼa̱nra xíʼin Ndióxi̱: “Xa̱a̱ ni̱xi̱nuña”. Tasaá ni̱xi̱ʼi̱vara. Tá ni̱xi̱ʼi̱ra, ndeéní ni̱ta̱an. Ti̱ko̱to̱ ña̱ tíkaa ini templo ña̱ ndátaʼví ña̱ santo xíʼin ña̱ santísimo ni̱ndatá  savaña. Tasaá iin ta̱ soldado ni̱ka̱ʼa̱nra: “Míí ña̱ ndixa kúú ta̱yóʼo se̱ʼe Ndióxi̱”.