Tá ni̱xi̱ʼi̱ ta̱ Jesús, iin ta̱ ku̱i̱ká ta̱ naní José ni̱ka̱ʼa̱nra xíʼin ta̱ Pilato ña̱ ná taxira ndakiʼinra ta̱ Jesús. Ta̱ José su̱kúndaara ta̱ Jesús xíʼin tela ña̱ lino, chi̱ka̱a̱ra ña̱ʼa liviní xáʼa̱n ku̱ñu ta̱ Jesús, ta sa̱ndúxu̱nrara. Tándi̱ʼi ni̱ka̱ʼa̱nra ña̱ ndasina yéʼé nu̱ú ndíka̱a̱ ta̱ Jesús xíʼin iin yu̱u̱ káʼnu. Na̱ su̱tu̱ ni̱ka̱ʼa̱nna xíʼin ta̱ Pilato: “Ndíʼi̱ní-inindi̱ ña̱ sana ku̱ʼu̱n na̱ discípulo ta̱ Jesús ndakiʼin se̱ʼénara ta ka̱ʼa̱nna ña̱ ndatakura”. Tasaá ni̱ka̱ʼa̱n ta̱ Pilato: “Ndasindó nu̱ú ndíka̱a̱ra, ná ku̱ʼu̱n na̱ soldado kundaana nu̱ú ndíka̱a̱ra”.

Tá ni̱ya̱ʼa u̱ni̱ ki̱vi̱, sava ná ñaʼá ya̱chi̱ní ni̱xa̱ʼa̱nná nu̱ú ndíka̱a̱ ta̱ Jesús. Ta xi̱niná kǒoka yu̱u̱ ndási nu̱ú sa̱ndúxu̱nna ta̱ Jesús. Ta chí iniña íyo iin ángel ta ni̱ka̱ʼa̱nra xíʼinná: “Va̱ása yi̱ʼvíndó. Xa̱a̱ nda̱taku ta̱ Jesús. Ka̱ʼa̱nndó xíʼin na̱ discípulora ná ku̱ʼu̱nna ñuu Galilea ña̱ ndakutáʼanna xíʼinra”.

Ñá María Magdalena kama ni̱xa̱ʼa̱nñá na̱ndukúñá ta̱ Pedro xíʼin ta̱ Juan. Ni̱ka̱ʼa̱nñá xíʼinna: “Íyo iinna nda̱kiʼin ta̱ Jesús”. Ta̱ Pedro xíʼin ta̱ Juan ni̱xa̱ʼa̱nna nu̱ú sa̱ndúxu̱nnara. Tá xi̱nina ña̱ kǒora, ta ndi̱kóna veʼena.

Ñá María ndi̱kóñá, kán xi̱niñá íyo u̱vi̱ na̱ ángel ta ni̱ka̱ʼa̱nñá xíʼinna: “Kǒo xi̱nii̱ ndáa mií ku̱a̱ʼa̱n ta̱ Jesús”. Tasaá xi̱niñá iin ta̱a ta nda̱kanixi̱níñá ta̱ ndáa kán kúúra. Ta ni̱nda̱ka̱tu̱ʼunñára: “Táta, ka̱ʼa̱n xíʼi̱n míí chi̱ka̱únra”. Ta nda̱kuiin ta̱ ta̱a yóʼo: “María”, saá na̱kunda̱a̱-iniñá ña̱ kúúra ta̱ Jesús. Ta ni̱ka̱ʼa̱nñá xíʼinra: “Maestro, ta ti̱inñára”. Soo ta̱ Jesús ni̱ka̱ʼa̱nra: “Ka̱ʼa̱n xíʼin na̱ discípuloi̱ ña̱ xi̱niún yi̱ʼi̱”. Kama, xínu ñá María ku̱a̱ʼa̱nñá ka̱ʼa̱nñá xíʼin na̱ discípulora ña̱ xi̱niñá ta̱ Jesús.

Míí ki̱vi̱ saá, u̱vi̱ na̱ discípulora ke̱ena chí Jerusalén ta ku̱a̱ʼa̱nna nda̱a̱ ñuu Emaús. Iin ta̱a nda̱kutáʼan xíʼinna ku̱a̱ʼa̱nra, ta ni̱ka̱ʼa̱nra xíʼinna ndáaña káʼa̱nna xa̱ʼa. Na̱kán ni̱ka̱ʼa̱nna: “¿Á kǒo níkunda̱a̱-iniún? Xa̱a̱ u̱ni̱ ki̱vi̱ ni̱ya̱ʼa, ña̱ xa̱ʼnda na̱ su̱tu̱ chiñu ña̱ xa̱ʼnína ta̱ Jesús. Ta vitin sava ná ñaʼá káʼa̱nná ña̱ nda̱takuvara”. Ta̱yóʼo ni̱nda̱ka̱tu̱ʼunrana: “¿Á kǒo kándíxandó na̱ profeta? Na̱kán ni̱ka̱ʼa̱nna ña̱ xíniñúʼu kuvi ta̱ Cristo ta saá ndatakura”. Tándi̱ʼi  ni̱ka̱ʼa̱nra xíʼinna xa̱ʼa ña̱ ni̱ka̱ʼyi̱ tá ya̱chi̱. Tá ni̱xa̱a̱na ñuu Emaús, na̱ discípulo ni̱ka̱ʼa̱nna xíʼinra na̱ ndo̱ora xíʼinna. Tá xa̱a̱ kuxuna, ke̱ʼéra iin oración, ta saá na̱ discípulo na̱kunda̱a̱-inina ña̱ kúúra ta̱ Jesús. Tasaá nda̱ñuʼúra nu̱úna.

U̱vi̱ saá na̱ discípulo yóʼo kama ku̱a̱ʼa̱nna chí ñuu Jerusalén. Ta ni̱xa̱a̱na veʼe nu̱ú nda̱kutáʼan na̱ apóstolra ta ni̱ka̱ʼa̱nna ndiʼi ña̱yóʼo xíʼinna. Tá ñúʼukana ini veʼe, ki̱ta ta̱ Jesús nu̱úna. Tá sa̱kán xi̱ninara, ni kǒo níkandíxa-inina ña̱ kúúra ta̱ Jesús. Soo ta̱kán ni̱ka̱ʼa̱nra xíʼinna: “Kotondó ndaʼíi̱, tiinndó yi̱ʼi̱. Xa̱a̱ ni̱ka̱ʼyi̱vaña xa̱ʼa ta̱ Cristo ña̱ ndatakura”.