Tá íyoka ta̱ Jesús xíʼin na̱ apóstolra ini cuarto nu̱ú xi̱xina, ni̱ka̱ʼa̱nra xíʼinna: “Ndiʼi ndóʼó sandákoondó yi̱ʼi̱”. Ta̱ Pedro ni̱ka̱ʼa̱nra: “Va̱ása sandákoi̱ yóʼó, ni inkana ná sandákoo yóʼo”. Soo ta̱ Jesús ni̱ka̱ʼa̱nra xíʼin ta̱ Pedro: “Tá kúma̱níka kana tí chele, u̱ni̱ yichi̱ ka̱ʼún ña̱ kǒo xíni̱ún yi̱ʼi̱”.

Tá ku̱a̱ʼa̱n na̱ soldado xíʼin ta̱ Jesús veʼe ta̱ Caifás, xa̱a̱ xi̱nu ndiʼiva na̱ apóstolra. Soo u̱vi̱ na̱ apóstol ndíku̱n ku̱a̱ʼa̱n sa̱tá na̱ yiví. Iinra kúú ta̱ Pedro. Ni̱ki̱ʼvira yéʼé ta̱ Caifás ta ku̱yatinra nu̱ú xíxi ñuʼu̱ ña̱ ndása̱ára. Xíʼin ñuʼu̱ kán nda̱tuvi nu̱úra, ta iin ñá káchíñu kán xi̱niñá nu̱ú ta̱ Pedro ta ni̱ka̱ʼa̱nñá xíʼinra: “Xíni̱vai̱ yóʼó, xíʼin ta̱ Jesús xi̱xikaún”.

Ta̱ Pedro ni̱ka̱ʼa̱nra: “Va̱ása. Kǒo xíni̱i̱ ña káʼún xa̱ʼa”, ta ki̱tara ku̱a̱ʼa̱nra. Tasaá inka ñá káchíñu kán xi̱niñára ta ni̱ka̱ʼa̱nñá: “Ta̱yóʼo xíʼin ta̱ Jesús xi̱táʼanra”. Ta̱ Pedro ni̱ka̱ʼa̱nra: “Kǒo xíni̱ ta̱ Jesús”. Saátu inka ta̱ ta̱a ni̱ka̱ʼa̱nra: “Ta̱ kítáʼan xíʼin ta̱ Jesús kúún. Táki̱ʼva káʼa̱n na̱ ñuu Galilea saá káʼún, chi saá káʼa̱n ta̱ Jesús”. Soo ta̱ Pedro ni̱ka̱ʼa̱nra: “Kǒo xíni̱i̱ra”.

Ndi̱ku̱n saá, ka̱na iin tí chele. Ta̱ Pedro xi̱nira xíto ta̱ Jesús nu̱úra ta nda̱kaʼánra ña̱ ni̱ka̱ʼa̱n ta̱ Jesús xíʼinra. Tasaá ki̱tara ku̱a̱ʼa̱nra ta xa̱kuníra.

Ta na̱ Sanedrín ñúʼuna ini veʼe ta̱ Caifás ña̱ tiinna ku̱a̱chi xíʼin ta̱ Jesús. Na̱ su̱tu̱ na̱ tíin ku̱a̱chi xíʼin na̱ yiví Sanedrín nanína. Xa̱a̱ ki̱ndoona ña̱ kaʼnívanara ta vitin ndúkúna ndáaña keʼéna ña̱ va̱ʼa kaʼnínara. Soo kǒo ku̱a̱chira ndáni̱ʼína ña̱ va̱ʼa kaʼnínara. Ta̱ Caifás ni̱nda̱ka̱tu̱ʼunra ta̱ Jesús: “¿Á se̱ʼe Ndióxi̱ kúú yóʼó?”. Ta̱ Jesús ni̱ka̱ʼa̱nra: “Se̱ʼe Ndióxi̱ kúvai̱”. Tasaá ta̱ Caifás ni̱ka̱ʼa̱nra: “Kǒoka inka prueba xíniñúʼuyó. Ña̱ vatá kúú ña̱ ni̱ka̱ʼa̱nra”. Na̱ inka su̱tu̱ ni̱ka̱ʼa̱nna: “Xíniñúʼu kuviva ta̱ ta̱a yóʼo”. Ka̱nina xa̱ʼnda̱  nu̱úra, ku̱ndaana ta̱sií nu̱úra, nda̱sina nu̱úra, ka̱ninara ta ni̱ka̱ʼa̱nna: “Tá iin profeta kúún, ka̱ʼa̱n xíʼinndi̱ ndáana ka̱ni yóʼó”.

Tá ni̱tu̱vi, ku̱a̱ʼa̱nna xíʼin ta̱ Jesús nu̱ú ndákutáʼan na̱ Sanedrín ta tuku ni̱nda̱ka̱tu̱ʼunnara: “¿Á se̱ʼe Ndióxi̱ kúú yóʼó?”. Ta̱ Jesús ni̱ka̱ʼa̱nra: “Suvivai̱, nda̱a̱ miívandó káʼa̱n ña̱ kúi̱ se̱ʼe Ndióxi̱”. Tasaá ni̱ka̱ʼa̱nna ta̱ vatá kúúra, ta ku̱a̱ʼa̱nna xíʼinra nu̱ú íyo ta̱ Poncio Pilato ta̱ xáʼndachíñu ñuu Roma. ¿Ndáaña ku̱u tándi̱ʼi? Ná kotoyó.