Ndáa ñuu Jerusalén kúú ñuu nu̱ú sa̱ndíʼi ta̱ Pablo na̱túʼunra. Ta kán chi̱ka̱a̱nara veʼeka̱a. Iin ñu̱ú, tá ndíka̱a̱ra veʼeka̱a, ni̱ka̱ʼa̱n ta̱ Jesús xíʼinra xíʼin iin xa̱ni: “Ku̱ʼu̱n ñuu Roma ta natúʼun xíʼin na̱ yiví xa̱ʼa Ndióxi̱”. Jerusalén íyora ta ku̱a̱ʼa̱nra ñuu Cesarea. Kán xi̱ndika̱a̱ra u̱vi̱ ku̱i̱ya̱ veʼeka̱a. Iin ki̱vi̱ tá íyora nu̱ú ta̱ chíñu Festo, ni̱ka̱ʼa̱nra: “Kúni̱i̱ ku̱ʼi̱n nu̱ú ta̱ Cesar ñuu Roma”. Ta̱ Festo ni̱ka̱ʼa̱nra: “Tá kúni̱ún tiin ta̱ Cesar ku̱a̱chi xíʼún, chindaʼíi̱ yóʼó ku̱ʼún nu̱úra”. Tasaá chi̱ka̱a̱na ta̱ Pablo ini barco tú ku̱a̱ʼa̱n ñuu Roma. U̱vi̱ na̱ ku̱a̱ʼa̱n xíʼinra: Ta̱ Lucas xíʼin ta̱ Aristarco.

Tá ndíka̱a̱na ku̱a̱ʼa̱nna ini mar, ku̱a̱ʼání ki̱vi̱ ko̱on sa̱vi̱ kini ta xa̱ʼa ña̱yóʼo va̱ása níxa̱a̱ kamana. Ndiʼina nda̱kanixi̱nína ña̱ kuvina. Soo ta̱ Pablo ni̱ka̱ʼa̱nra xíʼinna: “Iin ángel ni̱ka̱ʼa̱n xíʼi̱n: ‘Kǒo yi̱ʼvíún. Xa̱a̱vaún ñuu Roma, ta ndiʼi na̱ ku̱a̱ʼa̱n xíʼún ini tú barco ka̱kuvanaʼ. Xa̱ʼa ña̱yóʼo, ndakú koo inindó. Chi va̱ása kuviyó”.

Tá ni̱ya̱ʼa 14 ki̱vi̱ ña̱ ndeéní ko̱on sa̱vi̱, saáví xi̱nina nu̱ú ñuʼú ña̱ Malta. Tú barco kǒo níkuchiñu ku̱ʼu̱nnú ta cha̱chi ndiʼinú, na̱ 276 ku̱a̱ʼa̱n ininú ni̱kakuvana. Savana xi̱niñúʼuna tabla tú barco ña̱ va̱ʼa ni̱xa̱a̱na nda̱a̱ nu̱ú ñuʼú yi̱chí. Na̱ yiví na̱ ñuu Malta chi̱ndeé táʼanna xíʼinna nda̱kaʼmina ñuʼu̱ ña̱ va̱ʼa ndasa̱ána.

Tá ni̱ya̱ʼa u̱ni̱ yo̱o̱, na̱ soldado chi̱ka̱a̱na ta̱ Pablo ini inka tú barco tú ku̱a̱ʼa̱n ñuu Roma. Na̱ hermano ni̱xa̱a̱na nda̱kiʼinnara. Tá xi̱nirana, ta̱xira tixaʼvi ndaʼa̱ Ndióxi̱ ta ni̱kusi̱íní-inira. Ni veʼeka̱a ndíka̱a̱ ta̱ Pablo, ta̱xina koora ini iin veʼe ta iin ta̱ soldado xi̱ndaañaʼá. Kán ni̱xi̱yora u̱vi̱ ku̱i̱ya̱. Na̱ yiví va̱xina xítonara, ta ta̱yóʼo nátúʼunra xíʼinna xa̱ʼa Reino Ndióxi̱ xíʼin xa̱ʼa ta̱ Jesús. Ta̱ Pablo ka̱ʼyítura carta ku̱a̱ʼa̱n ndaʼa̱ na̱ ñuu Asia Menor xíʼin na̱ ñuu Judá. Jehová xi̱niñúʼura ta̱ Pablo ña̱ na̱túʼunra xa̱ʼa Ndióxi̱ nu̱ú ku̱a̱ʼání ñuu.