Jehová ni̱ka̱ʼa̱nra: “Ya̱kúnra ti̱kui̱í nu̱úna, ta kǒo kuvikana, ni va̱ása kooka ña̱ kusuchí-inina ni va̱ása kuakukana, ni va̱ása kooka ña̱ xóʼvi̱na. Ndiʼi ña̱yóʼo va̱ása ndakaʼánkana xa̱ʼaña”.

Jehová ta̱xira ñuʼú livi ña̱ Edén koo ta̱ Adán xíʼin ñá Eva ta kusi̱íní-inina kundoona. Xi̱niñúʼu ndasakáʼnuna yivána ta̱ íyo chí ndiví ta kaku ku̱a̱ʼá se̱ʼena ta sakutúna iníísaá nu̱ú ñuʼú. Ta̱ Adán xíʼin ñá Eva kǒo níxiniso̱ʼona ña̱ ni̱ka̱ʼa̱n Jehová, soo ña̱ kúni̱ra keʼéra kǒo nísa̱maña. Nu̱ú libro yóʼo xa̱a̱ xi̱niyó ndiʼi ña̱ káʼa̱n Jehová keʼéra. Ku̱a̱ʼání ña̱ va̱ʼa taxi Reinora nu̱ú ñuʼú yóʼo, tasaá saxínura ña̱ ni̱ka̱ʼa̱nra xíʼin ta̱ Abrahán.

Si̱lóʼo kúma̱ní ta ndiʼi-xa̱ʼa ta̱ Ndi̱va̱ʼa xíʼin na̱ ta̱chí ndi̱va̱ʼa xíʼin na̱ yiví na̱ kítáʼan xíʼinra. Ndiʼi na̱ yiví iinlá Jehová ndasakáʼnuna. Va̱ása kooka kue̱ʼe̱ ni va̱ása kuvikayó, ki̱vi̱ tá ki̱vi̱ ndakiʼinyó ndéeyó  ta kusi̱íní-iniyó xa̱ʼa ña̱ tákuyó. Iníísaá nu̱ú ñuʼú nduuña iin ñuʼú livi. Ta ña̱ kuxuyó ya̱sinní kooña ta va̱ʼaní koo veʼeyó. Kǒoka na̱ kéʼé ña̱ va̱ása va̱ʼa koo, va̱ʼaní koo ini ndiʼina. Va̱ása yi̱ʼví tí kití kunirí miíyó, ta ni miíyó kǒo yi̱ʼvíyórí.

Kusi̱íní-iniyó tá ná ki̱xaʼá Jehová sandátakura na̱ ni̱xi̱ʼi̱. Ndakiʼinyó na̱ ni̱xi̱ʼi̱ tá kúú ta̱ Abel, ta̱ Noé, ta̱ Abrahán, ñá Sara, ta̱ Moisés, ñá Rut, ñá Ester xíʼin ta̱ David. Na̱yóʼo chindeéna miíyó ña̱ ndasaliviyó nu̱ú ñuʼú. Ku̱a̱ʼání ña̱ kivi keʼéyó kán.

Jehová kúni̱ra koún nu̱ú ñuʼú livi. Kán sakuaʼayó ku̱a̱ʼání ña̱ kǒo xíni̱yó xa̱ʼa Ndióxi̱. Xa̱ʼa ña̱yóʼo, ki̱vi̱ tá ki̱vi̱ ná kuyatinkayó nu̱úra. Soo su̱ví nda̱saa vitin kuyatinyó nu̱úra ná keʼéyóña ndiʼi tiempo.