Ñuu Filipos ni̱xi̱yo iin ñaʼá ñá xi̱kachíñu veʼe inkana, ta xi̱kuumiíñá ta̱chí ndi̱va̱ʼa. Ku̱a̱ʼání xu̱ʼún xi̱kiʼin na̱ xi̱kachíñuñá nu̱ú xa̱ʼa ña̱ xi̱keʼéñá. Tá ki̱xa̱a̱ ta̱ Pablo xíʼin ta̱ Silas ñuu Filipos, ñáyóʼo ndiʼi ki̱vi̱ xi̱ndiku̱nñá sa̱tána. Ta̱chí ndi̱va̱ʼa yóʼo chíka̱a̱ña iniñá ta kánañá: “Na̱ ta̱a yóʼo kúú na̱ káchíñu nu̱ú Ndióxi̱ ta̱ káʼnu”. Tándi̱ʼi ta̱ Pablo ni̱ka̱ʼa̱nra xíʼin ta̱chí ndi̱va̱ʼa: “Káʼi̱n xíʼún xíʼin ki̱vi̱ ta̱ Jesús kita iniñá”. Ta ki̱ta ta̱chí ndi̱va̱ʼa ini ñá loʼo yóʼo.

Tá na̱kunda̱a̱-ini na̱ káchíñuñá nu̱ú ña̱ va̱ása tavákana xu̱ʼún xíʼinñá, ni̱sa̱a̱nína. Ti̱inna ta̱ Pablo xíʼin ta̱ Silas ta ku̱a̱ʼa̱nna nu̱ú na̱ chíñu ta ni̱ka̱ʼa̱nna xíʼinna: “Na̱ ta̱a yóʼo kǒo íxato̱ʼóna ley, ta ndátaʼví ndiʼina na̱ ñuu”. Na̱ chiñu ni̱ka̱ʼa̱nna ña̱ ná kanina ta̱ Pablo xíʼin ta̱ Silas ta ná chika̱a̱nana veʼeka̱a. Ta̱ ndáa veʼeka̱a chi̱ka̱a̱rara nu̱ú naá. Saátu, ka̱túnra xa̱ʼana xíʼin yitu̱n.

Tasaá ta̱ Pablo xíʼin ta̱ Silas ki̱xaʼána xítana yaa ña̱ ndásakáʼnuna Jehová ta inka na̱ ñúʼu veʼeka̱a xi̱niso̱ʼona yaa yóʼo. Iin kama, mií sava ñu̱ú, ndeéní ni̱ta̱an. Ni̱nuná ndiʼi yéʼé ta ni̱ndaxín ndiʼi na̱ ñúʼu veʼeka̱a. Ta̱ ndáa veʼeka̱a ni̱ki̱ʼvira ta xi̱nira núná yéʼé. Nda̱kanixi̱níra ña̱ ku̱a̱ʼa̱n ndiʼi na̱ ñúʼu veʼeka̱a, tasaá ki̱ʼinra iin yuchu̱ ta kúni̱ra kaʼníra miíra.

Mií saá, ni̱ka̱ʼa̱n ta̱ Pablo xíʼinra: “Va̱ása kaʼníún miíún. Yóʼo ñúʼu ndiʼindi̱”. Ta̱yóʼo xínura ni̱xa̱a̱ra nda̱a̱ nu̱ú ndíka̱a̱ ta̱ Pablo xíʼin ta̱ Silas ta xi̱kuxítíra nu̱úna. Ta ni̱ka̱ʼa̱nra xíʼinna: “¿Ndáaña xíniñúʼu keʼíi̱ ta ka̱kui̱?”. Ta ni̱ka̱ʼa̱nna xíʼinra: “Yóʼó xíʼin ndiʼi na̱ íyo xíʼún veʼún xíniñúʼu kandíxandó ta̱ Jesús”. Tasaá ta̱ Pablo xíʼin ta̱ Silas ki̱xaʼána sánáʼa̱nara xíʼin na̱ veʼera xa̱ʼa Jehová, ta̱yóʼo xíʼin ndiʼi na̱ veʼera nda̱kuchina.