Tá íyo mií ñá Eva ni̱ka̱ʼa̱n iin ko̱o̱ xíʼinñá. Ta káchirí: “¿Á ña̱ nda̱a̱ kúú ña̱ kǒo xíín Ndióxi̱ taxira kaxíndó ku̱i̱ʼi ña̱ íyo ndaʼa̱ yitu̱n yóʼo?”. Tasaá nda̱kuiinñá: “Va̱ʼava kaxíndi̱ ku̱i̱ʼi ndaʼa̱ yitu̱n tú íyo yóʼo, soo iinva kúútú va̱ása kívi kaxíndi̱ ku̱i̱ʼi ndaʼa̱ chi tá ná kaxíndi̱ña kuvivandi̱”. Tasaá ni̱ka̱ʼa̱nrí: “Va̱ása kuvindó chi tá ná kaxíndó ku̱i̱ʼi ndaʼa̱nú xa̱a̱ndó koondó nda̱a̱ táki̱ʼva íyo Ndióxi̱”. ¿Á ña̱ nda̱a̱ kúú ña̱ ni̱ka̱ʼa̱nrí? Va̱ása. Soo ñá Eva kandíxavañá ña̱ ni̱ka̱ʼa̱nrí. Tá ki̱xaʼá xítoñá ña̱ va̱ʼaní náʼa̱ tí ku̱i̱ʼi yóʼo kutóokañá kaxíñárí, tasaá ki̱ʼinñárí xa̱xíñá ta ta̱xituñárí ndaʼa̱ ta̱ Adán. Ni xíni̱vara ña̱ kuvira tá ná kaxíra ku̱i̱ʼi yóʼo nisaá xa̱xívararí.

Mií ki̱vi̱ saá Jehová ni̱nda̱ka̱tu̱ʼunrana nda̱chun kǒo níkandíxana ña̱ ni̱ka̱ʼa̱nra. Ñá Eva ni̱ka̱ʼa̱nñá tí ko̱o̱ kúúmií ku̱a̱chi, ta̱ Adán ni̱ka̱ʼa̱nra ñá Eva kúúmií ku̱a̱chi. Xa̱ʼa ña̱ va̱ása níkandíxana ña̱ ni̱ka̱ʼa̱n Ndióxi̱, ta̱várana nu̱ú ñuʼú livi. Ta saátu ka̱tara na̱ ángel xíʼin iin espada ña̱ xíxi, ña̱ va̱ása ndikókana nu̱ú ñuʼú livi yóʼo.

Jehová ni̱ka̱ʼa̱nra taxira castigo ndaʼa̱ na̱ sa̱ndáʼvi ñá Eva. Soo su̱ví ko̱o̱ kúú tí ni̱ka̱ʼa̱n xíʼin ñáyóʼo chi Jehová kǒo nítaxira tu̱ʼunrí, iin ángelva kúú ta̱ sa̱káʼa̱nrí. Chi xi̱kuni̱ra sándáʼvira ñá Eva. Ta̱yóʼo kúú ta̱ Ndi̱va̱ʼa. Chí nu̱únínu, Jehová sandiʼi-xa̱ʼara ta̱ Ndi̱va̱ʼa ña̱ va̱ása sándáʼvikara na̱ yiví. ¿Á su̱ví si̱íní kooyó saá?