Ta̱ Abrahán sa̱náʼa̱ra ta̱ Isaac ña̱ kuʼvi̱-inira kunira Jehová ta kandíxara ña̱ káʼa̱n Jehová. Soo tá ndíka̱a̱ ta̱ Isaac 25 ku̱i̱ya̱, Jehová ni̱ka̱ʼa̱nra xíʼin ta̱ Abrahán ná keʼéra iin ña̱ʼa ña̱ yo̱ʼvi̱ní. ¿Á xíni̱ún ndáaña ni̱ka̱ʼa̱n Jehová xíʼinra?

Ndióxi̱ ni̱ka̱ʼa̱nra xíʼin ta̱ Abrahán: “Kúaʼan xíʼin se̱ʼún ta̱ Isaac yuku̱ ñuu Moria ta kán kaʼníúnra”. Va̱ása níkunda̱a̱-ini ta̱ Abrahán nda̱chun ni̱ka̱ʼa̱n Jehová ña̱yóʼo xíʼinra, soo ni saá ka̱ndíxavara.

Tá inka ki̱vi̱ ke̱e ta̱ Abrahán ku̱a̱ʼa̱nra yuku̱ ñuu Moria xíʼin ta̱ Isaac ta saátu xíʼin u̱vi̱ na̱ káchíñu nu̱úra. Ni̱ya̱ʼa u̱ni̱ ki̱vi̱ saáví xi̱nina yuku̱ kán ta xíkaní ndíka̱a̱ña. Ta̱ Abrahán ni̱ka̱ʼa̱nra xíʼin na̱ káchíñu nu̱úra ná kundatunara chi ku̱ʼu̱nra xíʼin se̱ʼera taxina iin ña̱ʼa ndaʼa̱ Ndióxi̱. Ta̱ Abrahán ta̱xira titu̱n ndaʼa̱ se̱ʼera ña̱ koko ñuʼu̱, ta miíra níʼi iin cuchillo. Tasaá ni̱nda̱ka̱tu̱ʼun ta̱ Isaac: “¿Ndáa míí ku̱a̱ʼa̱n kití tí taxiyó ndaʼa̱ Jehová?”. Ta̱ Abrahán nda̱kuiinra: “Se̱ʼe miíi̱, kǒo kundi̱ʼi̱-iniún, Jehová taxirí ndaʼa̱yó”.

Tá ni̱xa̱a̱ ta̱ Abrahán xíʼin se̱ʼera yuku̱ kán, ke̱ʼéna iin altar. Tasaá ta̱ Abrahán ka̱túnra ndaʼa̱ ta̱ Isaac ta chi̱núurara nu̱ú altar.

Ta vitin ta̱ Abrahán tavára iin cuchillo ña̱ kaʼníra se̱ʼera. Soo kama ni̱ka̱ʼa̱n iin ta̱ ángel xíʼinra: “Abrahán, kǒo kaʼníún se̱ʼún. Vitin na̱kunda̱a̱-inii̱ ña̱ ndinuʼuní-iniún kándíxaún Ndióxi̱, chi va̱ása nísasiún se̱ʼún tá  ni̱ka̱ʼi̱n xíʼún kaʼníúnra”. Tasaá xi̱ni ta̱ Abrahán iin ndikachi tañu yitu̱n ta kama sa̱ñára ndaʼa̱ ta̱ Isaac, ndáa ndikachi yóʼo xa̱ʼníra ta̱xira ndaʼa̱ Jehová.

Ta vitin ki̱xaʼá Jehová káʼa̱nra migora kúú ta̱ Abrahán. ¿Á xíni̱ún nda̱chun ni̱ka̱ʼa̱nra ña̱yóʼo? Saáchi ta̱ Abrahán ke̱ʼéra ndiʼi ña̱ ni̱ka̱ʼa̱n Jehová xíʼinra, ni kǒo níkúnda̱a̱-inira nda̱chun ni̱ka̱ʼa̱n Jehová ña̱yóʼo.

Jehová ni̱ka̱ʼa̱n tukura xíʼin ta̱ Abrahán: “Taxii̱ bendición ndaʼún ta ku̱a̱ʼání koo se̱ʼún”. Ña̱yóʼo kúni̱ kachiña xa̱ʼa na̱ veʼe ta̱ Abrahán Jehová taxira ku̱a̱ʼání bendición ndaʼa̱ ndiʼi na̱ yiví na̱ kéʼé ña̱ va̱ʼa.