Tándi̱ʼi ko̱on sa̱vi̱ kini na̱ se̱ʼe ta̱ Noé ki̱xaʼá ka̱ku ku̱a̱ʼání se̱ʼena. Xa̱ʼa ña̱ ku̱a̱ʼání ndu̱una nda̱taʼvína ku̱a̱ʼa̱nna iníísaá nu̱ú ñuʼú nda̱a̱ táki̱ʼva ni̱ka̱ʼa̱n Jehová xíʼinna.

Soo savana kǒo níkandíxakana Jehová. Ta ndáa ni̱ka̱ʼa̱nna: “Ná keʼéyó iin ñuu ta keʼéyó iin veʼe káʼnu nu̱úña, ta ná xa̱a̱ xi̱níña nda̱a̱ chí ndiví, tasaá kunúu va̱ʼa tu̱ʼunyó”.

 Soo Jehová kǒo níkutóora ña̱ ke̱ʼéna saá ta xa̱ʼa ña̱yóʼo va̱ása nítaxira keʼénaña. ¿Á xíni̱ún ndáaña ke̱ʼéra xíʼinna? Ki̱xaʼára na̱samara tu̱ʼunna. Ta kǒo níkuchiñu keʼékana ña̱yóʼo chi va̱ása níkunda̱a̱-inina xíʼin tu̱ʼun táʼanna. Ña̱kán ñuu yóʼo xi̱naníña Babel, ña̱ kúni̱ kachi “nu̱ú kǒo níkunda̱a̱-inina xíʼin tu̱ʼun táʼanna”. Tasaá ki̱xaʼá nda̱taʼvína ku̱a̱ʼa̱nna ndukúna inka nu̱ú koona. Soo kǒo nísandákoona keʼéna ña̱ va̱ása va̱ʼa. ¿Á íyoka na̱ yiví na̱ keʼé ña̱ kúni̱ Jehová vitin túviún? Nu̱ú inka capítulo sakuaʼayó xa̱ʼa ña̱yóʼo.