Ta̱ Moisés ni̱ka̱ʼa̱nra ña̱ va̱ása ndikókara ku̱ʼu̱nra nu̱ú ta̱ faraón. Soo tá níndichikara nu̱úra ni̱ka̱ʼa̱nra: “Sava ñu̱ú, ndiʼi se̱ʼe nu̱ú na̱ ñuu Egipto kuvina, nda̱a̱ se̱ʼe ta̱ faraón kuvi ta kuvitu se̱ʼe na̱ káchíñu nu̱úra”.

Jehová ni̱ka̱ʼa̱nra xíʼin na̱ ñuu Israel: “Keʼéndó ña̱ kuxundó. Kaʼníndó iin ndikachi á iin ti̱xúʼu tí iin ku̱i̱ya̱, ta kaʼyíndó yéʼéndó xíʼin ni̱i̱rí. Tavindó ku̱ñurí ta kuxundóña xíʼin si̱táva̱ʼa ña̱ kǒo yuxa̱n iyá xíʼin. Koo tu̱ʼvandó ña̱ keendó ku̱ʼu̱nndó ñu̱ú vitin chi yi̱ʼi̱ tavá ndóʼó”. ¿Á su̱ví ni̱kusi̱íní-ini na̱ ñuu Israel xa̱ʼa ña̱yóʼo?

Mií maʼñú ñu̱ú saá, ta̱ ángel ta̱ chi̱ndaʼá Jehová ni̱ya̱ʼara ndiʼi veʼe na̱ ñuu Egipto. Na̱ kǒo níka̱ʼyi̱ yéʼé xíʼin ni̱i̱, xa̱ʼníra se̱ʼe nu̱úna. Soo na̱ ni̱ka̱ʼyi̱ yéʼé va̱ása níxaʼníra se̱ʼena. Ni̱xi̱ʼi̱ ndiʼi se̱ʼe nu̱ú na̱ ñuu Egipto ni kúúna na̱ ndáʼvi á na̱ ku̱i̱ká. Soo va̱ása níxi̱ʼi̱ se̱ʼe nu̱ú na̱ ñuu Israel.

Ni̱xi̱ʼi̱tu se̱ʼe nu̱ú ta̱ faraón. Kǒo níkundeéka-ini ta̱ faraón ta ni̱ka̱ʼa̱nra xíʼin ta̱ Moisés xíʼin ta Aarón: “Kúaʼanndó ta ndasakáʼnundó Ndióxi̱ndó. Ná ku̱ʼu̱n kití sa̱na̱ndó xíʼinndó. Kamandó, kúaʼanndó”.

 Va̱ʼaní ki̱ta yo̱o̱ ñu̱ú saá. Ta na̱ ñuu Israel ke̱ena ku̱a̱ʼa̱nna xíʼin na̱ veʼena. Ku̱a̱ʼa̱n ki̱ʼva 600,000 ta̱a, ta saátu ku̱a̱ʼa̱n ná si̱ʼí xíʼin na̱ va̱lí. Ta ku̱a̱ʼa̱n sava na̱ inka ñuu xíʼinna ña̱ ndasakáʼnuna Jehová. Nda̱a̱ vitinví ke̱e na̱ ñuu Israel.

Ña̱ va̱ása nandósóna ña̱ ke̱ʼé Jehová xa̱ʼana, xíniñúʼu kuxuna ña̱ xi̱xina ñu̱ú saá ku̱i̱ya̱ tá ku̱i̱ya. Ña̱yóʼo pascua xi̱naníña.