Ta̱ Moisés xíʼin ta̱ Aarón ni̱xa̱ʼa̱nna nu̱ú ta̱ faraón ña̱ ka̱ʼa̱nna xíʼinra ña̱ ni̱ka̱ʼa̱n Ndióxi̱: “Tá kǒo táxiún ku̱ʼu̱n na̱ ñui̱, chindaʼíi̱ tí ndikama náʼnu nu̱úndó”. Tí ndikama náʼnu ndeéní xa̱xírína. Ku̱a̱ʼání ndikama yóʼo ni̱ki̱ʼvi veʼe na̱ ñuu Egipto: veʼe na̱ ku̱i̱ká xíʼin veʼe na̱ ndáʼvi. Soo va̱ása níki̱ʼvirí ñuu Gosén nu̱ú xi̱ndoo na̱ ñuu Israel. Tu̱ndóʼo ña̱ ku̱mí xíʼin inkaka tu̱ndóʼo, nda̱saa nu̱ú na̱ ñuu Egipto ki̱xiña. Ta̱ faraón ni̱ka̱ʼa̱n ndáʼvira xíʼin ta̱ Moisés: “Ka̱ʼa̱n xíʼin Jehová ná sakútaʼara ndikama náʼnu yóʼo, tasaá taxii̱ ku̱ʼu̱nndó”. Soo tá ki̱vi̱ sa̱kútaʼa Jehová tíyóʼo ta̱ faraón kǒo nítaxira ku̱ʼu̱nna. ¿Á kixa̱a̱ iin ki̱vi̱ ña̱ nuu ini ta̱ faraón?

Tándi̱ʼi Jehová ni̱ka̱ʼa̱nra: “Tá kǒo táxi ta̱ faraón ku̱ʼu̱n na̱ ñui̱ kiʼin kue̱ʼe̱ kití sa̱na̱na ta kuvirí”. Inka ki̱vi̱ ku̱uva ña̱ ni̱ka̱ʼa̱n Jehová, soo kití sa̱na̱ na̱ ñuu Israel va̱ása níxi̱ʼi̱rí. Ta̱ faraón ndeéní ni̱xi̱yo inira ta kǒo nítaxira ku̱ʼu̱nna.

Tasaá Jehová ni̱ka̱ʼa̱nra xíʼin ta̱ Moisés ná ku̱ʼu̱nra nu̱ú ta̱ faraón ta katara ñuʼú chí ndiví. Ta ña̱yóʼo ni̱koyoña sa̱tá ndiʼi na̱ ñuu Egipto. Ka̱na ndi̱ʼi táʼyi miína xíʼin kití sa̱na̱na i̱xaña. Soo nisaá kǒo nítaxi ta̱ faraón ku̱ʼu̱nna.

Jehová tuku chi̱ndaʼára ta̱ Moisés nu̱ú ta̱ faraón ña̱ ka̱ʼa̱nra xíʼinra: “¿Nda̱chun va̱ása táxiún ku̱ʼu̱n na̱ ñui̱? Xa̱ʼa ña̱yóʼo ta̱an sakui̱n  ñíʼin”. a Inka kivi, Jehová chi̱ndaʼára ñíʼin, taxa xíʼin ñuʼu̱. Ndi̱va̱ʼaní ku̱unña ñuu Egipto. Sa̱ndiʼi-xa̱ʼaña ndiʼi yitu̱n xíʼin nu̱ú chíʼna, ta kǒo ña̱ níndoʼo ñuu Gosén. Tasaá ni̱ka̱ʼa̱n ta̱ faraón: “Ka̱ʼa̱n xíʼin Jehová ná sakútaʼara tu̱ndóʼo yóʼo, tasaá taxii̱ ku̱ʼu̱nndó”. Soo tá sa̱kútaʼa Jehová ña̱yóʼo ta̱ faraón tuku kǒo nítaxira ku̱ʼu̱nna.

Tasaá ni̱ka̱ʼa̱n ta̱ Moisés: “Vitin tí ti̱ka náʼnu kaxírí ndiʼi ña̱ ni̱ndo̱o i̱xaa ñíʼin”. Ku̱a̱ʼání tí ti̱ka xa̱xí ndiʼirí ña̱ ni̱ndo̱o tándi̱ʼi ko̱on sa̱ví. Ta̱ faraón tuku ni̱ka̱ʼa̱n ndáʼvira xíʼin ta̱ Moisés: “Ka̱ʼa̱n xíʼin Jehová ná sakútaʼara tí ti̱ka yóʼo”. Soo tá sa̱kútaʼa Jehová tí ti̱ka, tuku ndi̱kó-ini ta̱ faraón.

Tándi̱ʼi Jehová ni̱ka̱ʼa̱nra xíʼin ta̱ Moisés: “Ndaniʼi ndaʼún chí ndiví”. Ta iin kama na̱kunaa. U̱ni̱ ki̱vi̱ na̱kunaa nu̱ú na̱ ñuu Egipto. Soo nu̱ú xi̱ndoo na̱ ñuu Israel kǒo níkunaa.

Ta̱ faraón ni̱ka̱ʼa̱nra xíʼin ta̱ Moisés: “Yóʼó xíʼin na̱ ñuún va̱ʼa ku̱ʼu̱nndó, soo ná kindo̱o kití sa̱na̱ndó”. Ta̱ Moisés nda̱kuiinra: “Xíniñúʼuva ku̱ʼu̱nrí xíʼinndi̱ chi tí taxindi̱ ndaʼa̱ Ndióxi̱ kúúrí”. Ta̱ faraón ndeéní ni̱sa̱a̱ra ta ni̱ka̱ʼa̱nra: “Kúaʼan, chi tá ná ndikói̱ kunii̱ yóʼó, kaʼníi̱ yóʼó”.