Ñuu Uz ni̱xi̱yo iin ta̱ xi̱ndasakáʼnu Jehová. Ta̱yóʼo xi̱naníra Job ta kuíkání ni̱xi̱yora, ni̱xi̱yo ku̱a̱ʼání se̱ʼera. Va̱ʼaní ni̱xi̱yo inira, chi̱ndeéra na̱ ndáʼvi, ná ñaʼá ná kǒo yií ta chi̱ndeétura na̱ va̱lí na̱ kǒo yivá. Xa̱ʼa ña̱ va̱ʼaní ta̱a ni̱xi̱yora, ¿á kǒo tu̱ndóʼo níndoʼora?

Ta̱ Job va̱ása xíni̱ra ña̱ xítova ta̱ Ndi̱va̱ʼa̱ ndiʼi ña̱ kéʼéra. Jehová ni̱ka̱ʼa̱nra xíʼin ta̱ Ndi̱va̱ʼa: “¿Á xa̱a̱ ki̱ʼún kuenta xa̱ʼa ña̱ kéʼé ta̱ Job? Ni iinna kǒo íyo táki̱ʼva íyo ta̱yóʼo. Kándíxara ña̱ káʼi̱n ta kéʼéra ña̱ va̱ʼa”. Ta̱ Ndi̱va̱ʼa ni̱ka̱ʼa̱nra: “Kándíxavara yóʼó chi ndáúnra ta ku̱a̱ʼání ña̱ va̱ʼa táxiún ndaʼa̱ra, táxiún ñuʼú xíʼin kití ndaʼa̱ra... Kindaa ndiʼiña ndaʼa̱ra tasaá kǒo ndasakáʼnukara yóʼó”. Ta Jehová nda̱kuiinra: “Va̱ʼa keʼún ña̱ kúni̱ún xíʼinra, soo kǒo kaʼníúnra”. ¿Á xíni̱ún nda̱chun ni̱ka̱ʼa̱n Jehová ña̱yóʼo? Saáchi kúnda̱a̱-inira ña̱ ndu̱kú koo ini ta̱ Job xíʼinra.

Ku̱a̱ʼání tu̱ndóʼo ta̱xi ta̱ Ndi̱va̱ʼa ndo̱ʼo ta̱ Job. Ña̱ nu̱ú xi̱niñúʼura na̱ yiví ñuu Sebá ña̱ i̱xakuíʼnana kití sa̱na̱ ta̱ Job. Tándi̱ʼi ni̱xi̱ʼi̱ ndiʼi ndikachi sa̱na̱ra i̱xaa ñuʼu̱, ta na̱ ñuu Caldea i̱xakuíʼnána camello sa̱na̱ra. Ni̱xi̱ʼi̱tu na̱ xi̱ndaa kití sa̱na̱ra. Ta mií ña̱ ndeéka ndo̱ʼora kúú ña̱ ni̱xi̱ʼi̱ ndiʼi se̱ʼera, tá ñúʼuna xíxina nda̱kava veʼe sa̱tána. Ku̱suchíní-ini ta̱ Job, soo va̱ása nísandákoora ña̱ kandíxara Jehová.

Ta̱ ndi̱va̱ʼa kúni̱ra xo̱ʼvi̱ka ta̱ Job, ta iin kue̱ʼe̱ ndeéní ta̱xira ndaʼa̱ra.  Ndo̱ʼoníra xíʼin ña̱yóʼo. Va̱ása xíni̱ra nda̱chun ndo̱ʼora ndiʼi ña̱yóʼo, nisaáví ndinuʼu-inira ka̱ndíxara Jehová. Ndióxi̱ xi̱nira ña̱yóʼo ta ni̱kusi̱íní-inira xíʼin ta̱ Job.

Tándi̱ʼi ta̱ Ndi̱va̱ʼa chi̱ndaʼára u̱ni̱ ta̱a ña̱ kotondosóra ta̱ Job. Na̱yóʼo ni̱ka̱ʼa̱nna xíʼinra: “Iin ku̱a̱chi káʼnuní ke̱ʼún ta̱ kǒo níkaʼún xa̱ʼaña. Xa̱ʼa ña̱yóʼo Ndióxi̱ táxira castigo ndaʼún vitin”. Ta̱ Job ni̱ka̱ʼa̱nra: “Kǒo ña̱ kini níkeʼíi̱”. Soo tándi̱ʼi ki̱xaʼá ndákanixi̱níra ña̱ Jehová kúú ta̱ kúúmií ku̱a̱chi xa̱ʼa ña̱ ndóʼora.

Iin ta̱ loʼo xi̱naní Elihú xi̱niso̱ʼora ndiʼi ña̱ nátúʼunna soo va̱ása ni̱ka̱ʼa̱nra. Ta ki̱xaʼá ni̱ka̱ʼa̱nra: “Ndiʼi ndóʼó va̱ása va̱ʼa ña̱ káʼa̱nndó. Jehová kúú iin Ndióxi̱ ta̱ káʼnuní, ta va̱ása taxira tu̱ndóʼo ndaʼa̱yó. Xítora ndiʼi ña̱ kúu ta chíndeéra na̱ yiví na̱ ñúʼu tu̱ndóʼo”.

Jehová ni̱ka̱ʼa̱ntura xíʼin ta̱ Job: “¿Ndáa mií íyoún tá i̱xava̱ʼi̱ ndiví xíʼin ñuʼú? ¿Nda̱chun ndákanixi̱níún ña̱ va̱ása va̱ʼa ña̱ kéʼíi̱? Káʼún xa̱ʼa ña̱ va̱ása kúnda̱a̱-iniún xa̱ʼa”. Ta̱ Job na̱kunda̱a̱-inira ta ni̱ka̱ʼa̱nra: “Káʼnu koo iniún xa̱ʼa ña̱ ni̱ka̱ʼi̱n. Xi̱niso̱ʼo kuitívai̱ xa̱ʼún, soo vitin na̱kunda̱a̱-inii̱ mií ña̱ nda̱a̱ xa̱ʼún ta va̱ʼa keʼún ndiʼi ña̱ kúni̱ún”.

Tándi̱ʼi tu̱ndóʼo nu̱ú ta̱ Job, Jehová sa̱ndáʼarara ta ku̱a̱ʼáníka ña̱ʼa ta̱xira ndaʼa̱ra. Ku̱a̱ʼání ku̱i̱ya̱ ni̱xi̱yora ta si̱íní ni̱xi̱yora. Jehová ta̱xira ku̱a̱ʼání bendición ndaʼa̱ra xa̱ʼa ña̱ ndinuʼuní ni̱xi̱yo inira ni ki̱xi tu̱ndóʼo nu̱úra. ¿Ta miíún á koún nda̱a̱ táki̱ʼva ni̱xi̱yo ta̱ Job? ¿Á ndasakáʼnún Jehová nda̱a̱ ndáaka tu̱ndóʼo ná kixi nu̱ún?