Ta̱ José xi̱kuu iin se̱ʼe ta̱ Jacob, ta̱ loʼoka. Ta̱ Jacob kúni̱níra xínira ta̱ José, soo ¿ndáaña ndo̱ʼo na̱ ñanira tá na̱kunda̱a̱-inina xa̱ʼa ña̱yóʼo? Ni̱sa̱a̱nína xi̱ninara. Ta̱ José ni̱xa̱ní u̱vi̱ xa̱ni ta na̱túʼunra ña̱yóʼo xíʼin na̱ ñanira. Na̱yóʼo nda̱kanixi̱nína ki̱xa̱a̱ iin ki̱vi̱ ña̱ káʼnuka koora nu̱úna. Ña̱kán ni̱sa̱a̱níkana xi̱ninara.

Iin ki̱vi̱ tá ndáa na̱ ñani ta̱ José ndikachi sa̱na̱ yivána yatin chí ñuu Siquem, ta̱ Jacob ni̱ka̱ʼa̱nra xíʼin ta̱ José ña̱ ku̱ʼu̱nra kotora na̱ ñanira. Na̱yóʼo xi̱nina va̱xira, ta ni̱ka̱ʼa̱nna: “Kotondó káa va̱xi ta̱ ni̱xa̱ní xa̱ʼayó, ná kaʼníyóra”. Ti̱innara ta chi̱ka̱a̱nara ini pozo. Soo ta̱ Judá ni̱ka̱ʼa̱nra: “Va̱ása kaʼníndóra, va̱ʼaka ná xi̱kóyóra ña̱ kachíñura nu̱ú inka na̱ yiví”. Tasaá ke̱ʼéna xíʼinra, 20 xu̱ʼún ña̱ plata ki̱ʼinna xa̱ʼara ta ta̱xinara ndaʼa̱ na̱ ñuu Madián na̱ ku̱a̱ʼa̱n chí ñuu Egipto.

Tándi̱ʼi na̱ ñani ta̱ José ka̱vanuna ti̱ko̱to̱ra xíʼin ni̱i̱ ti̱xúʼu ta níʼinaña ku̱a̱ʼa̱nna nu̱ú yivána ta ni̱ka̱ʼa̱nna xíʼinra: “¿Á su̱ví ti̱ko̱to̱ se̱ʼún ta̱ José kúú ña̱yóʼo?”. Ta̱ Jacob nda̱kanixi̱níra iin kití yukú xa̱ʼnírí ta̱ José ta ni̱kusuchíní-inira. Ni iinna va̱ása níkivi sándi̱ko-inira.

Tá ni̱xa̱a̱na ñuu Egipto iin ta̱ chíñu káʼnu ta̱ naní Potifar sa̱tára ta̱ José ña̱ kachíñura nu̱úra. Jehová kǒo nísandákoora ta̱ José. Ta̱ José va̱ʼaní káchíñura xa̱ʼa ña̱yóʼo ta̱ Potifar ta̱xira ndiʼi chiñu ña̱ íyo veʼera ndaʼa̱ra.

Ñá síʼí ta̱ Potifar xi̱niñá va̱ʼaní náʼa̱ ta̱ José. Ta ndiʼi ki̱vi̱ xi̱ka̱ʼa̱nñá xíʼinra ña̱ ku̱su̱nra xíʼinñá. Soo, ¿ndáaña xi̱keʼé ta̱  José? Va̱ása níxiinra ta ni̱ka̱ʼa̱nra xíʼinñá: “Va̱ása, su̱ví ña̱ va̱ʼa kúú ña̱yóʼo. Yiíún ndáaní-inira yi̱ʼi̱ ta ñá síʼíra kún. Tá ná kusui̱n xíʼún ki̱ʼvii̱ ku̱a̱chi nu̱ú Ndióxi̱”.

Iin ki̱vi̱ ñá síʼí ta̱ Potifar i̱xanduxañá xíʼin ta̱ José ña̱ ku̱su̱nra xíʼinñá, ti̱inñá ti̱ko̱to̱ra, soo ta̱yóʼo xi̱nuvara. Tá ki̱xa̱a̱ ta̱ Potifar na̱túʼunñá ña̱ vatá xa̱ʼa ta̱ José ña̱ kúni̱ra ku̱su̱nra xíʼinñá. Xa̱ʼa ña̱yóʼo ni̱sa̱a̱níra ta chi̱ka̱a̱ra ta̱ José ini veʼeka̱a. Soo Jehová kǒo nínandósó-inira xa̱ʼa ta̱ José.